Nioqqutissanik eqqussuineq annissuinerlu pillugit Inatsisartut inatsisaanni nr. 18, 30. oktober 1992-imeersumi § 17 aamma § 46 naapertorlugit aalajangersarneqarput:

Tikinneq

§ 1.  Tikinneq tassaavoq nunanit allanit, tassunga ilanngullugit Danmarkimit Savalimmiunillu, akitsuuteqarfiusumut tikinneq.
Imm. 2.  Tikinnermi angalasut nioqqutissat tulliini taagorneqartutulli annertussuseqartut akitsuuteqanngitsumik nassatarisinnaavaat pisiarisinnaallugilluunniit:
1)  Sikaritsit 200-t imaluunniit sikaat 50-t imaluunniit cigarillossit 100-t imaluunniit tupat 250 g,
2)  Sikaritsinut imusivissat imaluunniit pappiarartassat immertariaannaat 200-t,
3)  Imigassaq kimittooq (22 pct. sinnerlugu aalakoornartortalik) 1 literi imaluunniit hedviinni (15-miit 22 pct. tikillugu aalakoornartortalik) 2 literi,
4)  Viinni nerriseq (15 pct. inorlugu aalakoornartortalik) 2,25 literi,
5)  Immiaaqqat 2 literi,
6)  Imeruersaatit kulsyretallit 2 literi,
7)  Tipigissaat 50 g aamma 0,25 literi tipigissoq. Tamakkua saniatigut pinnersaatit tipigissullu allat katillugit annerpaamik 1.000 koruunit nalingannut,
8)  Sukkulaatinit mamakujuttunillu nioqqutissiat katillugit 4 kg,
9)  Kaffit aamma tiit katillugit 4 kg, aamma
10)  Neqi, neqinit nioqqutissiat imaluunniit timmissat katillugit 5 kg.
Imm. 3.  Inuit 18-inik ukioqalereersimasut kisimik tupanit nioqqutissianik, imigassanik kimittuunik, viinninik, immiaaqqanillu akitsuuteqanngitsunik eqqussisinnaapput.

§ 2.  Nioqqutissanik akitsuuteqanngitsunik § 1, imm. 2-mi taaneqartunik tikittunut nioqquteqarneq taamaallaat mittarfiit niuertarfiini, taamakkuninnga nioqquteqarnissamut Akileraaruseriffiup akuerisaani pisinnaavoq.

Angallassinermi sulisuusut

§ 3.  Angallassinermi sulisuusut, tassa imaappoq umiarsuarni timmisartunilu nunat tamalaat akornanni angalasuni angallassissutip ingerlanneqarnerani imaluunniit taassuma iluani suliaqartut, ullut unnuallu 15-it inorlugit sivisussusilimmik Kalaallit Nunaata avataaniikkallarne­rup kingorna uternerminni makkuninnga nassarsinnaapput:
1)  Sikaritsit 60-t imaluunniit sikaat 40-t imaluunniit cigarillossit 50-t imaluunniit tupat 250 g,
2)  hedviinni 2 literi aamma viinni nerriseq 2,25 literi, kisianni imigassanik kimittuunik pinna-tik,
3)  Tipigissaat 50 g aamma 0,25 literi tipigissoq.
Imm. 2.  Angallassinermi sulisuusut ulluni unnuanilu 15-ini taakkuluunniit sinnerlugit Kalaallit Nunaata avataaniikkallarnerup kingorna tikinnerminni § 1-imi maleruagassat naapertorlugit nioqqutissanik nassarsinnaapput.

Sinerissap avataani sanaartukkani sulisuusut

§ 4.  Sinerissap avataani sanaartukkani, matumani aamma qilleriviusuni kiisalu qilleriviliani ineqarfiuutigisuni sulisuusut, aatsitassanik imaluunniit ikummatissanik misissueqqaarnermut, misissueqqissaarnermut qalluinermullu atatillugu sulisut akitsuuteqarfiusup iluani niunerminni akitsuuteqanngitsumik nassarsinnaavaat:
1)  Sikaritsit 60-t imaluunniit sikaat 40-t imaluunniit cigarillossit 50-t imaluunniit tupat 250 g.
Imm. 2.  Akitsuuteqannginnissami piumasaqaataavoq ulluni unnuanilu minnerpaamik 15-ini akitsuuteqarfiusup avataaniikkallarsimanissaq.
Imm. 3.  Imm. 1 naapertorlugu akitsuuteqannginnissaq taamaallaat nioqqutissanut akitsuuteqarfiusup avataani pisiarineqarsimasunut atuuppoq.

Angallatit aalisariutit nunanit allaneersut

§ 5.  Angallatinut aalisariutinut nunanit allaneersunut Kalaallit Nunaata imartaani aalisartunut, aammalu umiarsuarnut Kalaallit Nunaata imartaaniinnerminni akitsuutinik akiliisussaatinneqanngitsunut tunngatillugu, nioqqutissat umiarsuarmi nassarneqartut inuttamut ataatsi­mut ullup unnuallu ataatsip ingerlanerani akitsuuteqanngitsumik atorneqarsinnaapput: viinni nerriseq 1 literi, imaluunniit hedviinni 0,5 literi, imaluunniit imigassaq kimittooq 0,25 literi imaluunniit immiaaqqat 2 literi kiisalu tupanit nioqqutissiat 40 g, sivisunerpaamik ulluni 28-ni.
Imm. 2.  Umiarsuarni inuttaasut, imm. 1 naapertorlugu nioqqutissanik akitsuusigaanngitsunik pissarsisimasut, akitsuuteqarfiusumiit aallarnissartik pissutigalugu umiarsuarmiit niusimasut nioqqutissanik akitsuusigaanngitsunik § 3-mi annertussusissatut aalajangersakkat anner-toqqataannik nassarsinnaapput.
Imm. 3.  Imm. 1 naapertorlugu akitsuuteqannginnissaq taamaallaat nioqqutissanut, umiarsuup akitsuuteqarfiusup avataani pisiarisimasaanut atuuppoq.

Takornariat nunat allamiut umiarsuaannut ilaasartaatinut ilaasut

§ 6.  Takornariat nunat allamiut umiarsuaannut ilaasartaatinut ilaasut umiarsuup Kalaallit Nunaata imartaaniinnerani akitsuusigaanngitsunik atugaqarsinnaatitaapput.
Imm. 2.  Takornariat imm. 1 naapertorlugu akitsuusigaanngitsunik atugaqartut tupanit, sukkulaatinit aamma mamakujuttunit nioqqutissiat nammineq atugassamik saniatigut nioqqutissanik akitsuusigassanik nunaliaasseqqusaanngillat. Angerlamut angalaneq Kalaallit Nunaat aqqusaarlugu aallartippat takornariat nioqqutissanik akitsuuteqanngitsunik § 1 naapertorlugu nassarsinnaapput.
Imm. 3.  Imm. 1 naapertorlugu akitsuuteqannginnissaq taamaallaat nioqqutissanut, umiarsuup akitsuuteqarfiusup avataani pisiarisimasaanut atuuppoq.

Inuit akitsuuteqarfiusumi aalajangersimasumik najugaqanngitsut najugaqarallartuunngitsulluunniit

§ 7.  Inuit akitsuuteqarfiusumi aalajangersimasumik najugaqanngitsut najugaqarallartuunngitsulluunniit angalanerni nammineq atugassatut akitsuuteqanngitsumik eqqussinnaavaat tipigissaatit, pinnersaatit tipigissullu, nioqqutissanik eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi § 1, nr. 18 naapertorlugu akitsuusigassaasut, Akileraaruseriffiup taakkua annertussusii suunerilu piffissap angalaffissap sivisussusianut naleqquttuusorippagit.

Akitsuuteqannginnissamut piumasaqaat

§ 8.  § 1 aamma §§-it 3-miit 7-imut malillugit akitsuuteqannginnissamut piumasaqaataavoq nioqqutissat imaluunniit angalanermi atortut inummit nassarneqarnissaat imaluunniit inuup nammineq nassataaniitinneqarnissaat, taamaalillugit nioqqutissat imaluunniit angalanermi atortut Akileraaruseriffimmut takutinneqarsinnaanngorlugit.

Nakkutilliineq

§ 9.  Suliffeqarfiit nioqqutissanik akitsuusigaanngitsunik tikittunut nioqquteqarnissamut akuersissummik peqartut, tak. § 2, imigassanik aalakoornartortalinnik kiisalu tupanit nioqqutissianik tunisaqarnerminni piumasarisassavaat angalasup ikilernermut allagartaq, pineqartup nunamit allamiit tikinnerminik uppernarsaatitut takutissagaa.
Imm. 2.  Ikilernermut allagartap imm. 1-imi taaneqartutut takutinneqarnerani, ikilernermi allagartaq nalunaaqutserneqassaaq imaluunniit allagartap imigassanik aalakoornartortalinnik imaluunniit tupanit nioqqutissianik pisinermi atorneqarsimanera arlaatigut takussutissinneqassalluni.
Imm. 3.  Ikilernermi allagartat imm. 2-mi taaneqartut imigassanik aalakoornartunik tupanillu nioqqutissianik pisinermut atoqqinneqarsinnaanngillat.

Pineqaatissiinerit

§ 10.  § 1, imm. 2-mi 3-milu, § 2-mi, § 3, imm. 1-imi, § 4, imm. 1-imi 3-milu, § 5, imm. 1-imiit 2-mut, § 6, imm. 2-mi, § 7-imi aamma § 8-mi aalajangersakkanik piaaraluneerluni mia­nersuaalliorujussuarluniluunniit unioqqutitsisoq unioqqutitseriaraluartorluunniit Kalaallit Nunaanni pinerluttulerinermik inatsimmi maleruagassat naapertorlugit akiliisitsinermik pineqaatissinneqarsinnaavoq.
Imm. 2.  Imm. 1-imi taaneqartutut unioqqutitsisoqarpat unioqqutitseriaraluartoqarpalluunniit nioqqutissaq, taannaluunniit peqanngippat aningaasat taassuma aningaasanngorlugu nalingata amerlaqatai, akiliisitsinermik pineqaatissiisoqarpat pineqaatissiisoqanngikkaluarpalluunniit, Kalaallit Nunaanni pinerluttulerinermik inatsimmi maleruagassat naapertorlugit arsaarinnissu­tigineqarsinnaapput.
Imm. 3.  Imm. 1 naapertorlugu akiliisitsissutit Landskarsip pisassarai.
Imm. 4.  Imm. 2 naapertorlugu arsaarinnissutit Landskarsip pisassarai.

Atortuulerfia

§ 11.  Nalunaarut manna 1. november 2012-imi atuutilissaaq.
Imm. 2.  Tamatumunnga peqatigitillugu tikinnermi nioqqutissanik akitsuuteqanngitsunik eqqussisinnaaneq pillugu nalunaarut nr. 24, 20. december 2010-meersoq atorunnaarsinneqarpoq.

Kalaallit Nunaanni Namminersorlutik Oqartussat, ulloq 25. oktober 2012

Maliina Abelsen

/

Jan H. Lynge-Pedersen