Ilinniarnertuunngorniarneq pillugu Inatsisartut inatsisaanni nr. 13, 22. november 2011-meersumi § 55, imm. 3 naapertorlugu aalajangersarneqarpoq:

Siunertarisaq, atuutilersitsineq tamanullu saqqummiussineq

§ 1.  Ilinniarnertuunngorniarfinni ataasiakkaani ilinniarnermut ileqqorissaarnermullu malittarisassat ilinniarnertuunngorniarfimmi ilinniarnerup siunertarisaa qulakkiissavaat aammalu ilinniartunut, ilassutaasumik ilinniartitsissutinilu ataasiakkaani pikkorissartut kiisalu ilinniarfimmi sulisunut pitsaasumik avatangiiseqarnissaannut tapeeqataassallutik.

§ 2.  Ilinniartut siunnersuisoqatigiivisa aammalu ilinniartitsisut siunnersuisoqatigiivisa tusarniareernerisigut ilinniarnermut ileqqorissaarnermullu malittarisassanik ilinniarfimmi ilinniartunut atuuttunik rektori aalajangersaassaaq.
Imm. 2.  Malittarisassat imarissavaat ilinniarnertuunngorniarfiup torersaarnermut ataatsimooqatigiinnermullu malittarisassai, ilinniartut atuartitsinermi suleqataalluarlutik peqataanissaminnut pisussaaffeqarnerat aammalu ilinniartunut ilinniarfiup ilinniarnermut ileqqorissaarnermullu malittarisassaanik malinninngitsunut rektorip qanoq iliuuseqarsinnaaneranik nassuiaat.
Imm. 3.  Aammattaaq ilinniartut sumiginnaasut ilinniarfimmit qanoq pineqartarnersut pillugu malittarisassani nassuiaatigineqassaaq.

§ 3.  Ilinniarfiup ilinniarnermut ileqqorissaarnermullu malittarisassai ilinniartunit pissarsiarineqarsinnaassapput aammalu ilinniarfiup nittartagaani allassimassallutik. Ilinniarnermut ileqqorissaarnermullu malittarisassat pillugit ilinniarfiup ilinniartut ilisimatissavai aammalu malittarisassat malinneqanngippata tamanna qanoq kinguneqarsinnaanersoq pillugu ilisimatissallugit.
Imm. 2. Ilinniarfiup ilinniarnermut ileqqorissaarnermullu malittarisassai rektorip Naalakkersuisunut ilisimatitsissutitut nassiutissavai.

Atuartitsinermi nalinginnaasumik torersuunissaq atuartitsinermulluapeqataalluarnissaq

§ 4.  Ilinniarfiup ilinniarnermut ileqqorissaarnermullu malittarisassaanik malinninnissaminnut ilinniartut pisussaatitaapput.
Imm. 2.  Atuartitsinermi peqataannginnerit tamarmik peqataannginnermut peqqutaasoq apeqqutaatinnagu peqataannginnertut nalunaarsorneqassapput

§ 5.  Ilinniartut atuartitsinermi pinngitsooratik peqataasussaaneranni makku atuupput:
1) Atuartitsinermi ilinniarfimmi najuunnissamik piumasaqaataaffiusumi peqataaneq.
2) Allaffissornermi periutsit atuartitsinermi suleqataalluarluni peqataanerup nalunaarsorneqartarneranut ilinniarfiup atugaanik pinngitsoorani atuinissaq ilinniartunillu attaveqarnissaq.
3) Pitsaassutsikkut annertussutsikkullu piumasaqaatinik aalajangersarneqartunik malinnilluni allattariarsornikkut naammassiniagassanik piffissaq eqqorlugu tunniussisarnissaq.
4) Piffissani aalajangersimasuni misilitsinnerni, ukiumoortumik misilitsinnerni assigisaannilu peqataaneq.
5) Ilinniarnermi takusassarsiornerit, paasisassarsiorluni angalanerit il.il. peqataasut nerisaqarnerinnarmut akileeqataaffigisaat, annerpaamillu ullut-unnuallu aallartittut tamaasa 50 kr.-mik akeqartinneqartut.
6) Atuartitsinermi allami, tassunga ilanngullugu namminersortumik suliaqarnermi ungasianillu atuartitsinermi atuartitsinerup ilarisaatut pilersaarusiorneqartumi peqataaneq.
7) Iliuuseqarnissamik pilersaarummik § 11 naapertorlugu suliarineqartumik malinninnissamut pisussaaffeqarneq.

§ 6.  Ilinniartoq najuuttoq innarluuteqarnini allatulluunniit piginnaanikinnini pissutigalugu ilinniartitsissummi ataatsimi arlalinniluunniit suleqataalluarluni peqataasinnaanngitsoq qinnuiginninnermigut rektorip aalajangersimasumik naliliinera malillugu atuartitsinerup ilaani peqataanngissinnaavoq. Peqataannginnissamik qinnuiginninnermut uppernarsaatissatut nakorsamit uppernarsaammik tunniusseqqullugu rektorip ilinniartoq qinnuigisinnaavaa. Aamma tamanna atuuppoq ilinniartunut allanik peqquteqarlutik ilinniartitsissummi ataatsimi arlalinniluunniit atuartitsinermi suleqataalluarlutik peqataasinnaanngitsunut kiisalu ilinniartunut timersornermik atuartitsissummi peqataannginnissamik qinnuiginnittunut.
Imm. 2. Ilinniarfiup ilinniarnermut ileqqorissaarnermullu malittarisassani nalunaarneqassaaq ilinniartoq qanoq ilinikkut nakorsamit uppernarsaammik piumasaqarfigineqassanersoq. Nakorsamit uppernarsaammut aningaasartuut ilinniarfimmit akilerneqassaaq.

§ 7.   Ilinniartut ataasiakkaat atuartitsinermi peqataanerisa, tassunga ilanngullugu allattariarsorluni naammassiniagassanik tunniussisarnerisa nalunaarsorneqartarnissaat rektorimit qulakkeerneqassaaq.
Imm. 2.  Ilinniartut ataasiakkaat ilinniarfiup ilinniarnermut ileqqorissaarnermullu malittarisasssaani malittarisassat aalajangersarneqartut malillugit atuartitsinermi namminneq peqataanermik nalunaarsorneqarneranut nakkutilliinissamut oqaaseqaateqarnissamullu periarfissaqartinneqassapput. Nalunaarsuineq ukiumut ilinniarfiusumut ataatsimut atuuttassaaq, taamaattorli tak. imm. 3.
Imm. 3. Pisussaaffinnik annertuumik immikkut sumiginnaasoqartillugu nalunaarsuineq rektorip naliliineratigut ukioq ilinniarfiusoq ataaseq sinnerlugu sivitsorneqarsinnaavoq.
Imm. 4.  Takkutinngitsoortarneq, tassunga ilanngullugu allattariarsorluni naammassiniagassanik tunniussinngitsoortarneq killilersimaarniarlugu ilinniartup sumiginnaaneri sapinngisamik siusissukkut qisuariarfigineqartarnissaat rektorimit qulakkeerneqassaaq.

§ 8.  Ilinniarfiup ilinniarnermut ileqqorissaarnermullu malittarisassaanik annikinnerusumik unioqqutitsisoqarnerani ilinniartoq perorsaanikkut rektorimit avoqqaarneqarsinnaavoq. Perorsaanikkut avoqqaarineq iliuuserisassanut ilaanngilaq, takuuk § 9.

Iliuuserisassat iliuuseqarnissamullu pilersaarutit

§ 9.  Ilinniartumut ilinniarfiup ilinniarnermut ileqqorissaarnissamullu malittarisassanik malinninngitsumut perorsaanikkut avoqqaarineq ilinniarfiup rektorianit naammanngitsutut isigineqarpat iliuuserisassat makku atorneqarsinnaapput:
1)  Mianersoqqussummik tunisineq
2)  Aaqqissuussani ingerlataniluunniit aalajangersimasuni peqataaqqusinnginneq.
3)  Ukiup ilinniarfiusup ingerlanerani piffissani sivikinnerusuni atuartitsinermi peqataanngikkallartitsineq.
4)  Ilinniartitsissutini ataasiakkaani tamaniluunniit ukiumi ilinniarfiusumi pineqartumi klassimi killiffimmi misilitsinnermik naggaserneqarsinnaasuni misilitsinnissamut innersuussineq.
5) Ilinniartitsissummi ataatsimi arlalinniluunniit ukiumi ilinniarfiusumi pineqartumi misilitsinnermik naggaserneqartussani misilitsinnissamut innersuunneqarsinnaatitaanermik annaasaqarneq. Ilinniartoq pineqartoq misilitsinnermi ataatsimi arlalinniluunniit peqataagaluarluni klassimi killiffiup tullianut ingerlaqqinnissaa ilinniarfiup rektorianit aalajangerneqarpat ilinniartitsissummi ilinniartitsissutiniluunniit pineqartuni ukiumi tulliuttumi misilitsittoqassaaq.
6)  Nammineerluni ilinniartussatut innersuussineq.
7) Ilinniarnermit anisitaaneq (ilinniarunnaarsitaaneq).
Imm. 2. Imm. 1, nr. 4-7 naapertorlugit aalajangiinerit misilitsinnerit ingerlanneqarnissaannut ukiumoortumik pilersaarutip tamanut saqqummiunneqarnissaani kingusinnerpaamik qaammat ataaseq sioqqullugu aalajangerneqartassapput. Imm. 1, nr. 4 naapertorlugu aalajangiinerni ukiumoortumik inaarutaasumik karakteeriliisoqassanngilaq aammalu ilinniartitsissummi pineqartumi ukiumoortumik karakteeriliissutaareersut atorunnaassapput.
Imm. 3. Iliuuserisaq aallartinneqarneq naammaginartuullunilu ilinniarfiup ilinniarnermut ileqqorissaarnermullu malittarisassaanik unioqqutitsinermut sanilliullugu naleqquttuussaaq.

§ 10.  § 9, imm. 1, nr. 2-7 malillugit iliuuserisassat aatsaat aallartinneqarsinnaapput rektorip aalajangersimasumik naliliineratigut aammalu allakkatigut siumoortumik mianersoqqussummik tunniussisoqareernerata kingornagut, taamaattorli takuuk immikkoortoq 3.
Imm. 2.  Allakkatigut mianersoqqussut ilinniartumut tunniunneqassaaq aammalu ilinniartoq angajoqqaatut oqartussaaffigineqarpat angajoqqaatut oqartussaasumut allakkatut tammatsaaliukkatut nassiunneqarluni. Mianersoqqussut ukiup ilinniarfiusup nutaap aallartinnerani atorunnaassaaq, ukiuni ilinniarfiusumi nutaami ilinniartup ukiup ilinniarfiusup siuliani mianersoqquneqaatigisaminik pissusilersornini ingerlatiinnarpagu atuutiinnassalluni.
Imm. 3. Pisuni immikkut ilungersunaatilinni, tassunga ilanngullugu pigisanik inunnilluunniit annertuumik innarliiniarneq unitsinniarlugu pinaveersaartinniarluguluunniit imaluunniit iliuutsinik uteqqiinerni allakkatigut ilimasaareqqaarnani iliuuserisassat aallartinneqarsinnaapput.

§ 11.  Ilinniartoq § 9 malillugu iliuuseqarfigineqarpat iliuuseqarnissamut pilersaarummik suliarinnittoqarnissaanik ilinniartoq piumasaqarsinnaavoq, tassuunakkut ilinniartoq pissusilersornermi iliuuseqarnermik kinguneqaataasup allanngortinnissaanut ilitsersorneqarlunilu tapersersorneqassalluni. Ilinniarfik ilinniartoq, angajoqqaatut oqartussaaffigineqarpat taassuma angajoqqaatut oqartussaasui suleqatigalugit iliuuseqarnissamut pilersaarusiussaaq.

Ilinniartitsissutini ataasiakkaani pikkorissartut il.il.

§ 12.  Nalunaarut pikkorissartunut ilinniartitsissutini ataasiakkaani ilinniartinneqartunut assinganik atuutissaaq, ilinniartitsissutinili ataasiakkaanut pissutsinik immikkut ittunik tunngavilersorneqartunut atuutissanani.

§ 13. Nalunaarut ilinniarnertuunngorniarfimmi ilassutitut pikkorissarnerni pikkorissartunut assinganik atuutissaaq, pikkorissartunut taakkununnga pissutsinut immikkut atugassaritinneqartunut atuutissanani.

Illuatungerisanut tusarniaaneq naammagittaalliornerlu

§ 14. Nalunaarut manna naapertorlugu rektorip aalajangigai pisortat ingerlatsineranni inatsisit malillugit aalajangiinerupput.  
Imm. 2. § 9, imm. 1 naapertorlugu iliuuseqarnissamik aatsaat aalajangiisoqarsinnaavoq ilinniartoq ilinniartorlu angajoqqaatut oqartussaaffigineqarpat taassuma angajoqqaatut oqartussaasui piffissaqartitsilluarluni tusarniaaffigineqarsimappata. Tusarniaanerup tigusisussamut nalunaarutigineqarneranit tusarniaanermut akissuteqarnissamut piffissarititaq ullunit marlunnit sivikinnerussanngilaq, taamaattorli tak. § 10, imm. 3.

§ 15.  Nalunaarut manna malillugu rektorip aalajangigai ilinniartumit imaluunniit ilinniartoq angajoqqaatut oqartussaaffigineqarpat taassuma angajoqqaatut oqartussaasuinit nalunaarutip nalunaarutigineqarneranit sapaatip akunneri marluk qaangiutsinnagit Ilinniartitaanermut Naalakkersuisoqarfimmut naammagittaalliuutigineqarsinnaapput.
Imm. 2. Naammagittaalliuut allaganngorlugu ilinniarfimmi rektorimut tunniunneqassaaq, rektorip suliami nammineq oqaaseqaatini ilanngullugit naammagittaalliuut Ilinniartitaanermut Naalakkersuisoqarfimmut ingerlateqqissallugu. Suliap ingerlateqqinneqannginnerani rektorip naammagittaalliuuteqartoq sapaatip akunnerata ataatsip ingerlanerani oqaaseqaammut oqaaseqaateqarnissamut periarfississavaa. Naammagittaalliuuteqartup oqaaseqaatigisinnaasai Naalakkersuisoqarfimmut ilanngullugit nassiunneqassapput.
Imm. 3.  Ilinniarfimmi rektori pisunilu immikkut ittuni Naalakkersuisoqarfik tamanna pillugu aalajangiitinnagit § 9, imm. 1 naapertorlugu iliuuserisassanngortinneqartut pillugit naammagittaalliuutit  atuukkunnaarallartinneqarsinnaanngillat.

Atuutilerfissaq ikaarsaariarnermilu aalajangersakkat

§ 16.  Nalunaarut ulloq 1. august 2012 atuutilerpoq.
Imm. 2.  Ilinniarnermut ileqqorissaarnermullu malittarisassat piffissami nalunaarutip atuutilernerani ilinniarfinni ataasiakkaani atuutsinneqartut atuutiinnassapput nalunaarut manna tunngavigalugu ilinniarnermut ileqqorissaarnermullu malittarisassanit nutaanit taarserneqarnissamik tungaanut.
Imm. 3.  Ilinniarnermut ileqqorissaarnermullu maleruaqqusanik atuuttunik nutarterineq kiisalu § 2, imm. 1 aamma § 3, imm. 1-2 naapertorlugit tusarniaaneq tamanullu saqqummiussineq ullup nalunaarutip matuma atuutilerfiata kingorna kingusinnerpaamik qaammatit marluk kingorna ingerlanneqassapput.

Kalaallit Nunaanni Namminersorlutik Oqartussaq, ulloq 23. juli 2012

Palle Christiansen                                      

/

Mikael Kristensen