Imigassanik aalakoornartortalinnik nioqquteqartarneq sassaallertarnerlu pillugit Inatsisartut inatsisaanni nr. 11-mi, 11. november 2000-meersumi, Inatsisartut inatsisaata allanngortinneratigut Inatsisartut inatsisaatigut nr. 3-kkut, 31. maj 2001-imeersukkut allanngortinneqartumi, § 26, imm. 1, nr. 2, aamma § 27, imm. 3, malillugit aalajangersarneqarput:

Atuuffii

§ 1. Nalunaarut Tasiilamut aamma Ittoqqortoormiinut aamma nunaqarfinnut Kulusumut, Tiniteqilaamut, Sermiligaamut, Kuummiunut aamma Isortumut atuuppoq.  

Imarisai pingaarnerit

§ 2.  Imigassanik 15 procentitut kimittutigisumik taannaluunniit sinnerlugu aalakoornartortalinnik nioqquteqartarneq sassaallertarnelu inerteqqutaapput.  

§ 3.  Tasiilami aamma nunaqarfinni Kulusumi, Tiniteqilaami, Sermiligaami, Kuummiuni aamma Isortumi imigassanik 2,25 procent sinnerlugu kimittutigisumik aalakoornartortalinnik nioqquteqartarneq sassaallertarnerlu ukiut tamaasa junip aallaqqaataanni inerteqqutaapput.

§ 4.  Nunaqarfinni Tiniteqilaami, Sermiligaami aamma Isortumi, siuningaaniit inniminneereersimatinnani, imigassanik kimittuunik nioqquteqartarneq inerteqqutaavoq, taamaattorli § 5 takuuk.

§ 5.  Nunaqarfinni Tiniteqilaami, Sermiligaami aamma Isortumi immiaaqqanik 4,10 procent taannaluunnit sinnerlugu kimittutigisumik aalakoornartortalinnik nioqquteqartarneq ajornartitaanngilaq.

Pineqaatissiissutit

§ 6.  §§-inik 2-4-mut unioqqutitsisoqartilugu pineqaatissiissummik akiliisitsisoqarsinnaavoq.

Atortuulersinneqarnera

§ 7.  Nalunaarut ulloq 4. marts 2011 atortuulersinneqarpoq.
Imm. 2.  Peqatigitillugu Ammassalik kommuneani imigassamik aalakoornartulimmik nioqquteqannginnissaq aamma imigassanik 15% sinnerlugu aalakoornartortalinnik sassaallertoqartannginnissaa pillugu Namminersornerullutik Oqartussat nalunaarutaat nr. 20, 30. juni 2008-meersoq, Ammassallip Kommuniani aalakoornartortalinnik nioqquteqartarneq sassaallertarnerlu pillugit Namminersornerullutik Oqartussat nalunaarutaat nr. 8, 31. maj 2007-imeersoq aamma  Illoqqortoormiut Kommuniani aalakoornartortalinnik nioqquteqartarnerup sassaallertarnerullu unitsikkallarneqarnerat pillugu Namminersornerullutik Oqartussat nalunaarutaat nr. 10, 23. februar 2001-imeersoq, atorunnaarsinneqarput.  

Namminersorlutik Oqartussat, ulloq 4. marts 2011

Agathe Fontain

/

Ann Birkekær Kjeldsen