Piniarneq aallaaniarnerlu pillugit Inatsisartut inatsisaanni nr. 12-imi, 29. oktober 1999-imeersumi § 2, imm. 2 aamma 4, § 4, § 5, §§ 7 - 8, §§ 11 – 15, § 17, imm. 2 aamma 18, kingusinnerusukkut allanngortinneqartumi Inatsisartut inatsisaanni nr. 1-imi, 16. maj 2008-imeersumi, kiisalu  Uumasunik illersuineq pillugu Inatsisartut inatsisaanni nr. 29-imi, 18. december 2003-imeersumi §§ 34 - 35, § 60, imm. 2, 3 aamma § 61 naapertorlugit.  

 

Attuuffii

§ 1.  Nalunaarummi matumani nunami aalisarnikkullu imartami Kalaallit Nunaata oqartussaaffigisaani puisit makku; aataap (Pagophilus groenlandicus), natsersuup (Cystophora cristata), ussuup (Erignathus barbatus), natsiip (Phoca hispida), qasigissap (Phoca vitulina) aamma puisi sigguttuup (Halichoerus grypus) illersugaanerat piniagaanerallu pineqarput.
Imm. 2.  Kalaallit Nunaata aalisarnikkut oqartussaaffigisaata iluani puisit aallaaneqarsinnaapput puisittoqarsinnaallunilu,taamaattorli takuuk § 3.
Imm. 3.  AvanersuarmiTunumilu Nunamut Allanngutsaaliukkamut kiisalu Qimusseriarsuarmi Uumasunik eqqissiisimatitsivimmut appakaassinnaanermut, tassunga ilanngullugu sumiiffinni pineqartuni piniarsinnaatitaasut piniarnerannut, immikkut aalajangersakkat atuupput. Aalajangersakkat sumiiffiit taakku marluk pillugit immikkut nalunaarutini aalajangersarneqarput.

§ 2.  Inuit piniarsinnaanermut atuuttumik allagartallit imaluunniit inuit akiliuteqarluni puisinniarsinnaanermut atuuttumik akuersissutillit kisimik puisinniarsinnaapput.

Eqqissisimatitsineq

§ 3.  Puisit ataasiakkaat pillugit nunat tamalaat isumaqatigiissutaat, uumassusilinnik misissuisut siunnersuinerat, atuisut ilisimasaat kiisalu Piniarneq pillugu Siunnersuisoqatigiinnik tusarniaasimaneq tunngavigalugu Naalakkersuisut piffissamik eqqissisimatitsiffiusumik aalajangersaasinnaapput.
Imm. 2.  Arnavissat milutsitsisut aamma piaqqat miluttut eqqissisimatitaapput.
Imm. 3.  Piaqqat qiviullit (natsiit, aataat aamma ussuit) eqqissisimatitaapput.
Imm. 4.  Qasigiaq nunatsinni tamarmi eqqissisitaalluinnarpoq. Uumassusilinnik misissuisut siunnersuineranni eqqisisimatitsinerup atorunnaarsinneqarnissaanut takussutissiinissap tungaanut eqqissisimatitsineq ingerlatiinnarneqassaaq.
Imm. 5.  Puisi sigguttooq nunatsinni tamarmi eqqissisitaalluinnarpoq. Uumassusilinnik misissuisut siunnersuineranni eqqissisimatitsinerup atorunnaarsinneqarnissaanut takussutissiinissap tungaanut eqqissisimatitsineq ingerlatiinnarneqassaaq.

Puisinik eqqissisimatitanik pisaqarnermi

§ 4.  Puisinik eqqissisimatitanik pisaqartoqarsimatillugu tamanna Aalisarnermut, Piniarnermut Nunalerinermullu Naalakkersuisoqarfimmut nalunaarutigineqassaaq. Pisaq arsaarinnissutigineqassaaq.
Imm. 2.  Puisinik radiukkut aamma qaammataasakkut nassitsissutitalinnik piniarneq inerteqqutaavoq. Pisaqartoqarsimatilluguli  sumi pisarineqarnera ullorlu pisarineqarfia  Pinngortitaleriffimmut, Boks 570, 3900 Nuuk nalunaarutigineqassapput. Satellitikkut nassitsissutip nassiunneqarneranut aningaasartuutit Pinngortitaleriffiup akilissavai.
Imm. 3.  Puisinik taleqqumikkut nalunaaqutsersorneqarsimasunik pisaqartoqarsimatillugu  sumi pisarineqarnera ullorlu pisarineqarfia  Pinngortitaleriffimmut, Boks 570, 3900 Nuuk nalunaarutigineqassapput. Nalunaaqutsersuutip tunniunneqarnissaa nassiunneqarnissaalu pillugit Pinngortitaleriffiup piniartumut paasissutissiissutigissavaa. Nalunaaqutsersuutip nassiunneqarneranut aningaasartuutit Pinngortitaleriffiup akilissavai.

Pisassiissutinik, piffissanik piniarfiusussanik piniarfinnillu aalajangersaaneq

§ 5.  Naalakkersuisut puisinik ukiumut pisassiissutinik aalajangersaasinnaapput. Pisassiissutit aalajangersarneqassapput nunat tamalaat isumaqatigiissutaat, uumassusilinnik misissuisut siunnersuinerat, atuisut ilisimasaat kiisalu Piniarneq pillugu Siunnersuisoqatigiinnik tusarniaasimaneq tunngavigalugit.  
Imm. 2.  Pinngortitaassutsimut tunngasut pissutigalugit suiaassutsimut  aamma utoqqaassutsinut aalajangersimasunut pisassiissutit killilerneqarsinnaapput, pisassiissutillu pisassiissutinut ikinnerusunut sumiiffinni killilinni pisarineqarsinnaasunut agguataarneqarsinnaallutik.
Imm. 3.  Pisassiissutit akuerisaasut pillugit aalajangiinerit kiisalu piumasaqaatit aalajangersakkat piffissap piniarfiusussap aallartinnissaa sioqqullugu tusagassiorfinnut nalunaaruteqarnikkut aamma Namminersorlutik Oqartussat nittartagaat aqqutigalugu tamanut nalunaarutigineqassaaq.
Imm. 4.  Piffissaq piniarfiusoq tassaavoq januaarip ulluisa aallaqqaataanit decembarip ulluisa 31-iannut, ullut pineqartut ilanngullugit.

Piniariaatsit

§ 6.  Timmisartut, qulimiguullit qamutillu motoorillit, matumani qamuteralaat (snescootere) ilanngullugit puisinniarnermi atorneqassanngillat.  
Imm. 2.  Qamuteralaat sikukkut immikkullu aqqutigineqarsinnaasutut toqqarneqarsimasukkut pisanik assartuutigineqarsinnaapput, uuttorniarnermit pisat minillugit.
Imm. 3.  Puisinniarnermi aallaat atorneqartoq E₁₀₀-mik sakkortussuseqassaaq 160 Joulemit sakkukinnerussanani, taamaalilluni minnerpaamik 22. mm magnum kiisalu 17 HMR (Hornady Magnum Rimfire) imaluunniit timmiarsiut qooroqanngitsoq minnerpaamik kaliber 20-mik sakkortussusilik atorneqassalluni. Sakkortussutsimut uuttuutigineqartoq E₁₀₀ tassaavoq aallaasip paavaniit tuffianut100 meteri.
Imm. 4.  Puisinniarnermut atatillugu qassutit 280 mm-isut nigartutigisut atorneqarsinnaapput.
Imm. 5.  Qassutit atorneqartut piginnittup aqqanik nalunaaqutserneqarsimassapput, pisaqarnerup kingorna qaqinneqassapput.
Imm. 6.  Puisinniarnermi qassutit allaanerit atoqqusaanngillat.

Pisanik atuineq

§ 7.  Puisip pisap neqaa, orsua, amia allallu atorneqarsinnaasortai tamarmik angerlaanneqassapput qimatulineqassallutilluunniit. Piniarfik qimanneqartinnagu perlukut peerneqassapput.
Imm. 2.  Qimatuliviit najukkami piniarnermut aalisarnermullu nakkutilliisumut nalunaarutigineqassapput.

Pisanik nalunaaruteqarneq nakkutilliinerlu

§ 8.  Puisittat tamarmik Piniarnermut  ukiumoortumik nalunaarutigineqassapput Piniarnermi pisanik nalunaarsuiffimmi immersugassami takuneqarsinnaasutut.
Imm. 2.  Pisat pillugit piumasaqaatinik sukumiinerusunik Naalakkersuisut aalajangersaasinnaapput, tassunga ilanngullugit biologit atugassaannik tunniussinissamut kiisalu piniariaatsit sakkullu pillugit paasissutissiinissamut piumasaqaatit.
Imm. 3.  Piniarnermut allagartaq imaluunniit akuersissut alla politiit, piniarnermik aalisarnermillu nakkutilliisut aamma tamatumunnga pisinnaatitaasut piumasaqarnerisigut takutinneqassaaq.  

Nalunaaqutsersuineq

§ 9.  Puisinik nikeriarsinnaajunnaartitsineq nalunaaqutsersuinerlu taamaallaat Pinngortitaleriffimmit ingerlanneqarsinnaavoq. Allat Aalisarnermut, Piniarnermut Nunalerinermullu Naalakkersuisoqarfimmit akuersissummik qinnuteqassapput.

Uumasuuteqarneq

§ 10.  Puisit uumasuutigeqqusaanngillat.

Annissineq

§ 11.  Naalakkersuisut akuerseqqaartinnagit puisit uumatillugit Kalaallit Nunaanniit anniseqqusaanngillat.
Imm. 2.  Naalakkersuisut akuerseqqaartinnagit puisit eqqissisimatitaalluinnartut taakkuluunniit ilaanik aamma tunisassianik annisseqqusaanngilaq.
Imm. 3.  Aalisarnermut, Piniarnermut Nunalerinermullu Naalakkersuisoqarfik siumoortumik akuersitinneratigut ilisimatuussutsimut, ilinniartitsinermut siunertanulluunniit kulturimut tunngassuteqartunik annissisoqarsinnaavoq.
Imm. 4.  Aalisarnermut, Piniarnermut Nunalerinermullu Naalakkersuisoqarfik akuersiteqqaarnagu puisit amiinik ilivitsunik ilaannaanilluunniit, kalaallisuuni atorneqartunik kalaallisuuliornermulluunniit atugassanik annissisoqarsinnaavoq.

Kommunimi ileqqoreqqusat

§ 12.  Kommunalbestyrelsi kommunip ileqqoreqqusaatigut puisinniarneq pillugu § 3, §§ 5 - 7-imi aalajangersakkanit sakkortunerusunik aalajangersaasinnaapput kiisalu kommunip iluani sumiiffinni aalajangersimasuni piniarnerup qanoq ingerlanneqarnissaanut malittarisassiorlutik. Kommunit ileqqoreqqusaat Aalisarnermut, Piniarnermut Nunalerinermullu Naalakkersuisumit atuutilersinneqassapput.  

Immikkut akuersissuteqarneq

§ 13.  Aalisarnermut, Piniarnermut Nunalerinermullu Naalakkersuisoqarfik, nalunaarummi matumani ilisimatuussutsimut siunertanut imaluunniit Kalaallit Nunaanni piniagassatigut pisuussutinik nalunaarsuinermut ilagitillugu, aalajangersakkanit immikkut akuersissuteqarsinnaavoq.

Pineqaatissiissutit

§ 14.  Nalunaarummi matumani aalajangersakkani makkunani § 2, § 3, imm. 2 –5, § 4, §§ 6 – 7, § 8, imm. 3 kiisalu § 9-imik unioqqutitsineq Piniarneq aallaaniarnerlu pillugit Inatsisartut inatsisaat naapertorlugu akiliisinneqarnermik pineqaatissiissutaasinnaavoq Nunatta karsianut iluaqutaasussamik, aamma /imaluunniit pisat arsaarinnissutaasinnaapput. Nalunaarummi matumani § 10-mik unioqqutitsineq Pinngortitamik illersuineq pillugu Inatsisartut inatsisaat naapertorlugu akiliisinneqarnermik pineqaatissiissutaasinnaavoq Nunatta karsianut iluaqutaasussamik, aamma/imaluunniit pisat arsaarinnissutaasinnaapput.
Imm. 2.  Suliat tamakku piniarneq aallaaniarnerlu pillugit Inatsisartut inatsisaanni aamma pinngortitamik illersuineq pillugu Inatsisartut inatsisaanni malittarisassat malillugit suliarineqassapput.

Atuutilersitsineq

§ 15.  Nalunaarut ulloq 1. december 2010-mi atortuulerpoq.
Imm. 2.  Tamatumunnga peqatigitillugu qasigissamik eqqissisimatitsineq pillugu Landsrådip ileqqoreqqusaa 31. august 1959-imeersoq, ulloq 12. februar 1960-mi aalajangersarneqartoq atorunnaarsinneqarpoq.
Imm. 3.  Qasigissamik eqqissisimatitsineq pillugu Landsrådip ileqqoreqqusaa 31. august 1959-imeersoq naapertorlugu kommunit ileqqoreqqusaanni aalajangersarneqartut imaluunniit allakkiat nassiunneqarsimasut atortuugallassapput puisinniarnermut annerusumik piumasaqaatitaqarunik, atorunnaassallutillu kommunit ileqqoreqqusaliaat nutaat atortussanngortinnerisigut.
Imm. 4.  Kommunemi ileqqoreqqusat allat atortuugallassapput puisinniarnermut annerusumik piumasaqaatitaqarunik, atorunnaassallutillu kommunit ileqqoreqqusaliaat nutaat atortussanngortinnerisigut. Taakkuli nalunaarutigeqqaarnagu atorunnaarsinneqassapput kingusinnerpaamik 31. december 2014.

Namminersorlutik Oqartussat, ulloq  12. november  2010

Ane Hansen

/

Jens K. Lyberth