Akileraaruserinermik ingerlatsineq pillugu Inatsisartut inatsisaanni nr. 11, 2. november 2006-imeersumi, kingullermik Inatsisartut inatsisaatigut nr. 10, 5. december 2008-meersukkut allanngortinneqartumi, § 30, imm. 1, nr. 4, §§-it 33-miit 33 d-mut, § 35, § 36, imm. 2, § 37, imm. 2, § 39, imm. 3, § 56, imm. 1, aamma § 83 naapertorlugit aalajangersarneqarput:

Paasissutissanik nalunaaruteqartarneq

§ 1.  Nalunaarummi matumani paasissutissat pineqartut akileraaruseriffimmut nalunaarutigineqassapput.
Imm. 2.  Nalunaaruteqartussaatitaasut ukiumut aningaasarsiorfiusumut paasissutissanik akileraartartunut 20-nut amerlanerusunulluunniit tunngasunik nalunaarutissallit tamakku digitalinngorlugit nalunaarutigissavaat.
Imm. 3.  Nalunaaruteqartussaatitaasut ukiumut aningaasarsiorfiusumut paasissutissanik akileraartartunut 20-nit ikinnerusunut tunngasunik nalunaarutissallit akileraaruseriffimmit peqqu-neqarsinnaapput tamakku digitalinngorlugit pigineqareerpata nalunaaruteqartussaatitaasorlu internettikkoorsinnaappat digitalinngorlugit nalunaaruteqassasut.
Imm. 4.  Akileraaruseriffik pitsaassusitsinik, ilusissanik paasissutissallu inissititernerinut aamma akileraaruseriffiup paasissutissanik digitali atorlugu nalunaarutigineqartunut pingaaruteqartunik piumasaqaatinik aalajangersaasinnaavoq.
Imm. 5.  Nalunaaruteqartussaatitaasut digitali atorlugu nalunaaruteqartussaanngitsut immersugassat akileraaruseriffimmit suliarineqarsimasut atorlugit paasissutissanik nalunaaruteqassapput. Paasissutissanut pineqartunut immersugassaliortoqarsimanngippat paasissutissat pappiliaq nalinginnaasoq atorlugu nalunaarutigineqassapput.

Ilinniagaqarnersiutit

§ 2.  Namminersorlutik Oqartussat ukiut tamaasa ukiup siuliani ilinniagaqarnersiutit ani-ngaasanngorlugit tunniunneqarsimasut pillugit paasissutissat akileraaruseriffimmut piumaffigineqaqqaaratik nassiuttassavaat, tassunga ilanngullugu aningaasanik tigusisut kikkuunerinik, inuup normuanik ilalerlugit paasissutissiisassapput.
Imm. 2.  Paasissutissanik nalunaaruteqarnermi ilaatinneqartussap nalunaaruteqartussaatitaasumut kinaassutsini pillugu ilisimatitsissaaq, tassunga ilanngullugu inuttut normuni.
Imm. 3.  Paasissutissat nalunaarutigineqartut pillugit Namminersorlutik Oqartussat ilinniagaqarnersiutinik pisartagaqartut ilisimatittassavaat.
Imm. 4.  Nalunaaruteqarneq pillugu najoqqutassanik erseqqinnerusunik akileraaruseriffik aalajangersaasinnaavoq, tassunga ilanngullugu paasissutissiisussaatitaanermut piumasaqaatinik annikinnerulersitsisinnaanermut aamma ilinniagaqarnersiutinik pisartagaqartunut ilisimatitsisarneq pillugu.

Nalinik nalunaaruteqarneq

§ 3.  Tamakkiisumik ilaannakortumilluunniit ajunngitsorsiat soorlu akeqanngitsumik nerisaqarneq illusimanerlu, inigisaqarneq, najugaqarallarneq, angalanerit, biilit oqarasuaatillu il.il. pillugit nalunaaruteqarnermi, akileraaruserinermik ingerlatsineq pillugu Inatsisartut inatsisaanni § 30, imm. 1, nr. 4 naapertorlugu nalunaaruteqartussaatitaasup ajunngitsorsiap nalinga pillugu nalunaaruteqassaaq. Ajunngitsorsianut tunngatillugu ukiumut aningaasarsiorfiusumut pineqartumut nalit inatsisitigut aalajangersakkat imaluunniit nalit Naalakkersuisunit aalaja-ngersarneqarsimasut naapertorlugit naliliisoqassaaq.

Meeqqanut akilersuutit

§ 4.  Meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Inatsisartut peqqussutaat malillugu Namminersorlutik Oqartussat kommunillu meeqqanut akilersuutinik akileeqqusissut, ukiut tamaasa piumaffigineqaqqaarnatik makku pillugit paasissutissanik akileraaruseriffimmut tunniussisassapput:
1)  Akilersuisussaatitaasup inuttut normua najugaalu.
2)  Akilersuutinik pissassaqartup inuttut normua najugaalu.
3)  Ukiup siuliani akilersuisussaatitaasumiit akiliutigineqartut annertussusaat.
Imm. 2.  Paasissutissanik tunniussisussaatitaaneq pillugu najoqqutassanik erseqqinnerusunik akileraaruseriffik aalajangersaasinnaavoq, tassunga ilanngullugu paasissutissiisussaatitaanermut piumasaqaatinik annikinnerulersitsisinnaalluni.

Pisortat tunitsivigineqartut attartortitsinerillu ilaannik  isumaqatigiissuteqartut

§ 5.  Namminersorlutik Oqartussat, Naalakkersuisut allaffeqarfii, Inatsisartut allaffeqarfiat, Kalaallit Nunaata Radioa, suliffeqarfiit namminersortitat il.il. aamma Kalaallit Nunaanni kommunit, aalisarnermiit, piniarnermiit, aallaaniarnermiit, savaateqarnermiit tuttuuteqarnermiillu, eqqumiitsuliornermiit sanalunnermiillu tunisassianik tunitsivigineqarnermut atatillugu aningaasarsiat B-nik akiliuteqartartut ukiut tamaasa piumaffigineqaqqaaratik makku pillugit paasissutissanik akileraaruseriffimmut tunniussisassapput:
1)  Aningaasarsiat B-nik tigusisup inuttut normua imaluunniit GER-normua.
2)  Ukiup siuliani tunisinermut atatillugu aningaasarsiat B-t tigusisumut tunniunneqartut annertussusaat.
Imm. 2.  Namminersorlutik Oqartussat kommunillu, inunnit angallammik, qimussimik alla-tigullu inunnut assartuummik attartortut ukiut tamaasa piumaffigineqaqqaaratik makku pillugit paa-sissutissanik akileraaruseriffimmut tunniussisassapput:
1)  Attartortitsisup inuttut normua imaluunniit IIN-normua.
2)  Ukiup siuliani attartortitsisumut akissarsiatut tunniunneqartut annertussusaat.
Imm. 3.  Imm. 1 aamma 2-mi paasissutissanik taaneqartunik tunniussisussaatitaaneq pillugu najoqqutassanik erseqqinnerusunik akileraaruseriffik aalajangersaasinnaavoq, tassunga ilan-ngullugu paasissutissiisussaatitaanermut piumasaqaatinik annikinnerulersitsisinnaalluni.

Nutserisut akissarsiaat

§ 6.  Translatørinut, oqalutsinut, nutserisunut assigisaannullu akissarsiat akileraarutit A-nut unerartitsinertaqanngitsunik akiliisoq ukiut tamaasa piumaffigineqaqqaarnani makku pillugit paasissutissanik akileraaruseriffimmut tunniussissaaq:
1)  Tigusisup inuttut normua imaluunniit IIN-normua.
2)  Ukiup siuliani tigusisumut akissarsiat tunniunneqartut annertussusaat.
Imm. 2.  Paasissutissanik tunniussisussaatitaaneq pillugu najoqqutassanik erseqqinnerusunik akileraaruseriffik aalajangersaasinnaavoq, tassunga ilanngullugu paasissutissiisussaatitaanermut piumasaqaatinik annikinnerulersitsisinnaalluni.

Ilaasortaanermut akiliutit

§ 7.  Suliatigut peqatigiiffiit soorlu akileraaruserinermik ingerlatsineq pillugu Inatsisartut inatsisaanni § 33 c, imm. 1-imi taaneqartutut ukiup siuliani ilaasortaniit akiliutit tiguneqartut pillugit ukiut tamaasa piumaffigineqaqqaarnatik paasissutissanik akileraaruseriffimmut tunniussisassapput, tassunga ilanngullugu ilaasortap akiliutaanut attuumassuteqartumut kinaassutsimut inuup normuanik ilalerlugit paasissutissat. Akiliutit nalunaarutigineqartut annertussusaat pillugit paasissutissiisussaq ilaasortanut nalunaaruteqassaaq.
Imm. 2. Paasissutissanik nalunaaruteqarnermi ilaatinneqartussap nalunaaruteqartussaatitaa-sumut kinaassutsini pillugu ilisimatitsissaaq, tassunga ilanngullugu inuttut normuni.
Imm. 3. Nalunaaruteqarnissaq pillugu najoqqutassanik erseqqinnerusunik akileraaruseriffik aalajangersaasinnaavoq, tassunga ilanngullugu paasissutissiisussaatitaanermut piumasaqaa-tinik annikinnerulersitsisinnaalluni.

Akiliunneqarluni angalanerit

§ 8.  Inuit imaluunniit inatsisitigut inuttut pisinnaatitaasut, tassunga ilanngullugit sulinngiffeqarnermi aningaasaateqarfiit, atorfinitsitsinermut pissutsit avataasigut inunnut imaluunniit pisortani atorfeqartunut akiliussillutik angalanernut tapiissuteqartut, ukiut tamaasa piumaffigineqaqqaarnatik akileraaruseriffimmut makku pillugit paasissutissanik tunniussissapput:
1)  Tapiissutisisinnaatitaasut allallu tapiissutisisut inuttut normui.
2)  Ukiup siuliani tapiissutisisinnaatitaasup angalaneri tamakkiisut amerlassusaat.
3)  Ukiup siuliani tapiissutisisinnaatitaasumut tapiissutigineqartut annertussusaat.

Piffissaq

§ 9.  §§-it 2-miit 8-mut paasissutissat taaneqartut ukiumi paasissutissanut attuumassuteqartut ukiup tulliani kingusinnerpaamik 31. januarimi akileraaruseriffimmut nalunaarutigineqassapput.

Kontonik ingerlatsisuusut nalunaarutaat

§ 10.  Aningaaseriviit, sparekassit, piginneqatigiiffiit karsii, aningaasanik nioqqutillit, aningaasanik nalilinnik nioqqutillit, eqqartuussissuserisut allallu, aningaasanik erniortitassanik tigusisartut, ukiut tamaasa namminneerlutik ukiup siuliani erniat tunniunneqartut imaluunniit pisassanngortinneqartut allatulluunniit kontoqartunut ataasiakkaanut iluanaarutigititat annertussusaat pillugit, ernialiinerup ulluanik il.il. aammalu aningaasat uninngasuutit ukiup siuliata naanerani amerlassusiinik paasissutissanik akileraaruseriffimmut tunniussisassapput. Akileraaruseriffiup aalajangersinnaavaa allanit, ingerlatsinerminnut atatillugu inuit allat aningaasaataannik erniaqartitsisunit, paasissutissanik taamaattunik tunniussineqassasoq.
Imm. 2.  Imm. 1 malillugu nalunaarutigineqartut kontop taaguutaanik paasissutissanik imaqassaaq, tassunga ilanngullugit kontop qanoq ittuuneranik, kontoqartup aqqanik, najugaanik aammalu inuttut normuanik, suliffeqarfiup ilisarnaataanik normumik (IIN-nr.) suliffeqarfittut ingerlatsiviup normuanik (CVR-nr.) imaluunniit inuussutissarsiuummik ingerlatsiviup normuanik (SE-nr.). Akileraaruseriffiup kontonik pigisaqartunut, inuttut normoqaratillu ingerlatsivittut normoqanngitsut pillugit nalunaaruteqarnermi erseqqinnerusumik najoqqutassat aalajangersinnaavai.
Imm. 3.  Imm. 1 malillugu paasissutissiisussaatitaanermi aamma pineqarput kontot il.il. ukiup ingerlanerani atorunnaarsimasut. Kontonut taamaattunut tunngatillugu atorunnaarsitsinermi uninngasuutit amerlassusii nalunaarutigineqassapput.
Imm. 4.  Pisariillisaataatillugu paasissutissallu pineqartut akileraarutinik nakkutilliinermut pingaaruteqarpianngikkaangata, akileraaruseriffiup imm. 1 aamma 2 naapertorlugit inunnut ataasiakkaanut imaluunniit paasissutissiisussaatitaasut eqimattanut imaluunniit kontonut assigiinngitsunut ataasiakkaanut tunngatillugu atuukkunnaartissinnaavaa annikinnerulersillugilluunniit, taamatullu aamma akileraaruseriffiup aningaasat nalunaarutigineqartussat ikinnerpaaffissaat pillugu aalajangersaasinnaalluni.
Imm. 5.  Paasissutissiisussaatitaasup kontomik pigisaqartumut aningaasat nalunaarutigineqartut amerlassusaannik nalunaaruteqarnermik ilisimatissavaa. Kontomik pigisaqartumut ilisimatitsissuteqarneq pissaaq kingusinnerpaamik ukiup paasissutissiissutinut attuumassuteqartup tulliani februaarip aallaqqaataani.

§ 11.  Kinaluunniit ingerlatsinerminut atatillugu erniaqartitsilluni aningaasanik taarsigassarsisitsisartoq taarsigassanilluunniit isumagisaqartartoq, akileraarusigaanissamut atugassanik ukiut tamaasa namminneerlutik tamanna pillugu akileraaruseriffimmut nalunaaruteqartassaaq.
Imm. 2.  Imm. 1 malillugunalunaaruteqarneq taarsigassarsitinneqartup kinaaneranut paasissutissanik, paasissutissanillu kontomut taarsigassarsinermullu pissutsit attuumassuteqartut pil-lugit paasissutissiissutinik imaqassaaq. Aningaasanut taarsigassarsianut ataasiakkaanut tun-ngatillugu nalunaarutigineqassapput:
1) taarsigassarsinerup qanoq ittuunera,
2) ernialiutat imaluunniit erniat akiligassanngorsimasut,
3) taarsigassarsinermut atatillugu ernianik nalunaaqutsiineq, qaammatisiutit malillugit ukiup nalunaaruteqaataasup siuliani ernialiussanik akiligassanngoreersunik akiliuteqarsimannginnermi, tamatumunnga nalunaaruteqartussaatilluni,
4) taarsigassarsinermut atatillugu ernianik nalunaaqutsiineq, qaammatisiutit malillugit ukiumi nalunaaruteqaataasumi taarsigassarsianik akiligassaajunnaarsitsisoqarsimatillugu tamatumun-nga nalunaaruteqartussaatilluni, imaluunniit ukiuni siuliinut tunngatillugu,
5) sullissinermut akissarsiat ingerlaavartut il.il.,
6) sillimmatissanut aningaasaateqarfimmut allaffissornermullu akiliutit,
7) realkreditinstituttit sillimmatissanut aningaasaateqarfiinit akileraarutaasussanik agguagarsiat amerlassusii, agguagarsiat tigusisumit ukiumi tunniussiffiusumi isertitatut naatsorsuutigineqartussaatillugit,
8) ulloq ernialiiffiusoq,
9) 31. decembarimi akiitsut, aamma
10) akiitsut 31. decembarimi nalingat, taarsigassarsiat aningaasanut nioqquteqarfimmi nalunaarsukkanik obligationinik tunngaveqartumik taarsigassarsiaappata.
Imm. 3.  Pisariillisaataatillugu paasissutissallu pineqartut akileraarutinik nakkutilliinermut pingaaruteqarpianngikkaangata, akileraaruseriffiup nalunaaruteqarnissamut paasissutissiisussaatitaaneq atuukkunnaartissinnaavaa annikinnerulersilluguluunniit.
Imm. 4.  Atukkiussanut tunngatillugu akiliuteqarnerit § 12 naapertorlugu paasissutissiisussaatitaasumit ingerlanneqarpata, imm. 1 naapertorlugu nalunaaruteqarnissamut pisussaaffik atuutinngilaq.

§ 12.  Aningaaseriviit, sparekassit, piginneqatigiiffiit karsii, selskabit aningaasaliissuteqartartut, aningaasanik nalilinnik nioqqutillit, aningaasanik nioqqutillit, eqqartuussissuserisut allallu, inuussutissarsiummik ingerlatsinerminnut atatillugu pigisanik aalaakkaasunik qularnaveqqusiussaqarluni taarsigassarsinermi allagartanik nakkutigisassaminnik sillimmatinik paarisassanik tigusaqartarunik, akileraarusiinissamut atugassanik paasissutissanik imm. 2-mi taaneqartunik ukiut tamaasa namminneerlutik akileraaruseriffimmut nalunaaruteqassapput.
Imm. 2.  Imm. 1 malillugu nalunaaruteqarneq taarsigassarsitinneqartup sillimmatinillu pigisaqartup kikkuunerinut paasissutissanik aammalu taarsigassarsinermut tunngasunik paasissutissanik imaqassaaq. Taarsigassarsitinneqartunut sillimmatinillu pigisaqartunut ataasiakkaanut tunngatillugu nalunaarutigineqassapput:
1) ernialiutat imaluunniit erniat akiligassanngorsimasut,
2) taarsigassarsinermut atatillugu ernianik nalunaaqutsiineq, qaammatisiutit malillugit ukiumi nalunaaruteqaataasumi taarsigassarsianik akiligassaajunnaarsitsisoqarsimatillugu tamatumun-nga nalunaaruteqartussaatilluni, imaluunniit ukiuni siuliinut tunngatillugu,
3) 31. decembarimi akiitsut sinneri aamma
4) akiitsut 31. decembarimi sinnerannut naligititaq.
Imm. 3.  Pisariillisaataatillugu paasissutissallu pineqartut akileraarutinik nakkutilliinermut pingaaruteqarpianngikkaangata, akileraaruseriffiup nalunaaruteqarnissamut paasissutissiisussaatitaaneq atuukkunnaartissinnaavaa annikinnerulersilluguluunniit.

Kontonik pigisaqartut Kalaallit Nunaanni najugaqartut, najugaqarallartut imaluunniit angerlarsimaffeqartut

§ 13.  Kontomik, akileraaruserinermik ingerlatsineq pillugu Inatsisartut inatsisaanni § 36, imm. 1-imi oqaatigineqartutut pilersitsisoq, paasissutissat tunniunneqartut eqqortuuneri uppernarsaateqarfigissavai, kontomik ingerlatsisuusumut passimik, inuup normuanut uppernarsaammik allamilluunniit pisortanit kinaassutsimut uppernarsaammik takutitsinikkut. Inuup normuanut, IIN-nr.-mut, CVR-nr.-mut imaluunniit SE-nr.-mut tunngasunik, akileraaruserinermik ingerlatsineq pillugu Inatsisartut inatsisaanni § 37, imm. 1-imi oqaatigineqartutut, paasissutissanik paasissutissiinermut atatillugu, kontomik pigisaqartup aqqanik najugaanillu paasissutissiissutinik tunniussineqassaaq.
Imm. 2.  Kontomik pilersitsisoqarsinnaanngilaq kontomik pilersitsiniartup imm. 1-imi taaneqartunik paasissutissanik nalunaaruteqareertinnagu.
Imm. 3.  Paasissutissat imm. 1-imi taaneqartut kontomik pigisaqartup kinaaneranik paasinninnissamut pisariaqartut allanngorpata, kontomik pigisaqartup kontomik ingerlatsisumut paasissutissiisussaatitaasumut qaammat ataaseq qaangiutsinnagu allannguuteqarneq pillugu nalunaarfigissavaa.
Imm. 4.  Selskabinut, peqatigiiffinnut, aningaasaateqarfinnut allanullu kontomik pigisaqartuusunut inuup normuanik, IIN-nr.-mik, CVR-nr.-mik imaluunniit SE-normumik pigisaqan-ngitsunut tunngatillugu, siulittaasup inuttut normua imaluunniit inuup allap kontomik pigisaqartoq sinnerlugu iliuuseqarsinnaasup inuup normuanik nalunaartoqassaaq.

Kontonik pigisaqartut Kalaallit Nunaata avataani najugaqartut, najugaqarallartut imaluunniit angerlarsimaffeqartut

§ 14.  Kontonut akileraaruserinermik ingerlatsineq pillugu Inatsisartut inatsisaanni § 36, imm. 1-imi taaneqartunut inunniit, selskabinit peqatigiiffinnillu il.il., Kalaallit Nunaata avataani najugaqartunit najuisuusunilluunniit imaluunniit qaammatit pingasut sinnerlugit Kalaallit Nunaanniissimanngitsunit pigineqartunut tunngatillugu, inuup normua, IIN-nr., CVR-nr.  imaluunniit SE-nr. oqaatigineqassaaq aatsaat kontomik pigisaqartoq normumik taamaattumik tunineqarsimatillugu. Tamatumalu saniatigut kontomik pigisaqartup aqqa, najugaa nunalu angerlarsimaffigisaa oqaatigineqassapput.

Pensiuunisianut tunngasunik nalunaaruteqarnerit

§ 15.  Pensiuunisiaqalernissamut aningaasaateqarfiit, pensiuunisiatigut inuunermullu sillimmasiissutitigut aaqqissuussinernut selskabit allallu pensiuunisianik ingerlaavartumik inuuneq naallugu sillimmasiissutinik tunniussisartut, ukiut tamaasa namminneerlutik akileraaruseriffimmit piumaffigineqaqqaaratik, Akileraaruserinermik ingerlatsineq pillugu Inatsisartut inatsisaanni § 39, imm. 1 aamma 2-mi taaneqartutuut, akileraaruseriffimmut paasissutissiisassapput aamma pensiuunisianut aaqqissuussinernut pigisaqartup kinaaneranik paasinninnissamut pisariaqartut pillugit paasissutissiinerit ilanngullugit.
Imm. 2.  Kinaluunniit pensiuunisiassanik aaqqissuussinermik, aningaasarsianit akileraarutit pillugit Inatsisartut inatsisaanni §§-it 39 aamma 40 naapertorlugit taasanik pilersitsisoq, paasissutissiisussaatitaasunut aaqqissuussinermut pigisaqartup (kontomik piginnittup) kinaaneranik paasinninnissamut pisariaqartut pillugit paasissutissiissaaq, tamatumani inuup normua nalunaaruteqartussaanermut atuutsitsinissamut pisariaqartinneqartut, aammalu paasissutissat tunniunneqartut eqqortuuneri uppernarsaateqarfigineri ilanngullugit.
Imm. 3.  Pensiuunisiassanut aaqqissuussinermik pilersitsisoqarsinnaanngilaq pilersitsiniartup imm. 2-mi taaneqartunik paasissutissanik nalunaaruteqareertinnagu. Imm. 2-mi taaneqartutut pissutsit allannguuteqarpata, paasissutissiisussaatitaasumut qaammat ataaseq qaangiutsinnagu allannguuteqarneq pillugu nalunaaruteqartoqassaaq.

Aningaasanik nakkutigisanik taarsigassarsianillu nalunaaruteqartarneq

§ 16.  Suliffeqarfimminut atatillugu aktianik nakkutigisassanik nalilinnut sillimmasiinermi tigummiaqartoq, ukiut tamaasa akileraaruseriffimmut sillimmasiissutinit aningaasanik nioqquteqarfimmi nalunaarsukkanit aktianit assigisaannillu, iluanaarutisianik qaammaatisiutit malillugit ukiup atuuttup siuliini pissarsiarititaasut pillugit nalunaaruteqartassaaq.
Imm. 2.  Imm. 1 naapertorlugu nalunaarutit iluanaarutinik tigusaqartunut ataasiakkaanut tamanut paasissutissanik makkunannga imaqassapput:
1) Nalunaaruteqartup kinaaneranik paasissutissat.
2) Iluanaarutisianik tigusaqartup kinaaneranik paasissutissat, tamakkua pigineqarnerat naapertorlugu.
3) Iluanaarutisiat ukiup ingerlanerani agguagarsiaritinneqartut (tamakkiisut) annertussusiat.
4) Iluanaarutisiat ukiup ingerlanerani agguagarsiaritinneqartut akileraarutitai akilerneqarsimasut, takuuk nr. 3.
5) Aktiat il.il. iluanaarutisiaqaataasut nunami sumi pilersinneqarsimanersut, aktiat il.il. ani-ngaasanik niuerfimmi nalunaarsugaappata.
Imm. 3.  Nalilinnut tqqorsivimmiititsisoq imm. 1-imi taaneqartutut, nalunaaruteqarnissamut paasissutissiisuteqartussaasumut kinaanini ilisimatitsissutigissavaa, tamatumani inuup normua, GER-nr., CVR-nr. imaluunniit SE-normu, ilanngullugit.
Imm. 4.  Imm. 2-mi taaneqartutut aktianit iluanaarutisianik pissarsisoq, nalunaaruteqarnissamut paasissutissiisuteqartussaasumut kinaanini ilisimatitsissutigissavaa, tamatumani inuttut normuni, CVR-nr. imaluunniit SE-nr. ilanngullugit. Tamannali atuutinngilaq iluanaarutisianik pissarsisoq selskabinut tunngasumik inatsisini malittarisassat malillugit selskabimi peqatigiiffimmiluunniit il.il. agguagarsisitsisumi nalunaarsugaanissaq pisussaanngippat.
Imm. 5.  Pisariillisaataatillugu paasissutissallu pineqartut akileraarutinik nakkutilliinermut pingaaruteqarpianngikkaangata, akileraaruseriffiup inunnut ataasiakkaanut imaluunniit qassiikkaarlugit paasissutissiisussaatitaasunut nalunaaruteqarnissamut paasissutissiisussaatitaaneq imm. 1-imiit 4-mut maleruagassat taaneqartut atuukkunnaartissinnaavai annikinnerulersillugilluunniit.

§ 17.  Suliffeqarfimminut atatillugu aktianik nakkutigisassanik nalilinnut sillimmasiivimmi tigummiaqartoq, ukiut tamaasa akileraaruseriffimmut qaammatisiutit malillugit ukiup siuliani paarititaasunit aningaasanik nioqquteqarfimmi nalunaarsukkanit aktianit assigisaannillu nalunaaruteqartassaaq, sillimmasiivimmiititsineq inummut kiffartuussineruppat.
Imm. 2.  Imm. 1 malillugu nalunaarutit aktianut ataasiakkaanut aktiat suunerinik ukiullu naa-nerani nalingannik tunngasunik paasissutissanik imaqassapput.
Imm. 3.  Suliffeqarfimminut atatillugu aktianik nioqquteqartoq, ukiut tamaasa akileraaruseriffimmut aningaasanik nioqquteqarfimmi nalunaarsugaasunik aktianik il.il. qaammatisiutit malillugit ukiup atuuttuusup siuliani tunisaqarnernik nalunaaruteqartassaaq tunisaqarnerit inummut kiffartuussineruppata. Nalunaaruteqarneq aktiap suuneranik, qanga tunineqarfianik aammalu aktiap tunineqarnerani naligitinneqartoq pillugu paasissutissanik imaqassaaq.
Imm. 4.  Nalilinnik sillimmasiivimmiititsisoq tuniniaassunneqartorluunniit, nalunaaruteqarnissamut paasissutissiisussaatitaasumut kinaanerminik, tamatumani aamma inuttut normuminik ilisimatitsissuteqassaaq.
Imm. 5.  Pisariillisaataatillugu paasissutissallu pineqartut akileraarutinik nakkutilliinermut pingaaruteqarpianngikkaangata, akileraaruseriffiup inunnut ataasiakkaanut imaluunniit qassiikkaarlugit paasissutissiisussaatitaasunut nalunaaruteqarnissamut paasissutissiisussaatitaaneq imm. 1-imiit 4-mut maleruagassat taaneqartut atuukkunnaartissinnaavai annikinnerulersillugilluunniit.

§ 18.  Pisortat karsii, realkreditinstituttit, pappiaqqanut nalilinnut qitiusumik nalunaarsuiffiit, aktieselskabit, aningaaseriviit, sparekassit, piginneqatigiiffiit karsii, aningaasaliissuteqarnernut peqatigiiffiit, aningaasanik nalilinnik nioqquteqartut allallu, ernianut allagartanik aningaasanngortitsisartut, obligationinulluunniit tunngasunik ernialiisartut, akileraarusiinermut atugassanik minnerpaamik ukiumut ataasiarlutik namminnerlutik akileraaruseriffimmut ukiup siuliani obligationinik pigisaqartut ataasiakkaat ernianut allagartanik aningaasanngortitaasa ernialiussalluunniit ani-ngaasartaasa amerlassusiinik obligationillu pineqartut taaguutaannik ukiullu pineqartup naanerani nalimikkut nalinginik aammalu paasissutissanik imm. 3-mi 4-milu taaneqartunik tunniussisassapput.
Imm. 2.  Imm. 1-imi taaneqartutut taamatuttaaq aningaasaliinernut peqatigiiffinni aningaasaliinernut uppernarsaatinut tunngatillugu iluanaarutinut allagartanik aningaasanngortitsinerit imaluunniit aningaasaliinernut peqatigiiffinni kontonik ingerlatsiviusuni aningaasaliissutinik pigisassanngortitsinernik aammalu aningaasaliissutinut uppernarsaatinut kontomik ingerlatsiviusumi aningaasaliinernut peqatigiiffiup taaguutaa, tamatumani suuneri sumullu atortuuneri, ukiullu naanerani nalimikkut nalingi pillugit paasisitsissutigineqassapput. Akileraaruseriffiup aamma aalajangersinnaavaa, nalunaaruteqarnissamut paasissutissiisussaatitaasut paasissutissanik akileraaruseriffimmut nalunaaruteqarnissamut pisussaaffimminnik naammassinninnissamut atugassanik imminnut ilisimatitseqatigiittassasut. Taamatuttaaq obligationinik, allatamik erniaqartinnagit imaluunniit aningaasarsianit akileraarutit pillugit Inatsisartut inatsisaanni § 18 imm. 3 naapertorlugu, erniasiarititassanut minnerpaaffissarititaasoq ataallugu erniaqartillugit pilersitaasunik tamakkiisumik akiligaqarnerit pillugit paasissutissat tunniunneqassapput.
Imm. 3.  Aningaasaliinernut peqatigiiffimmi kontonik ingerlatsisuusumi ilaasortaasoq peqatigiiffiup imm. 1 aamma 2 naapertorlugu ilaasortaasup aningaasaliissutaanut ikisanik nalunaaruteqarnissami atugassanik imaluunniit peqatigiiffiup § 19 naapertorlugu tigusat pillugit peqatigiiffiup nalunaaruteqarnissaani atugassanik, qinnuteqartoqartillugu peqatigiiffiup akileraartarnermut tunngatillugu attuumassuteqartunik tunngavigisat ilaasortaasup isertitanik naatsorsuinermi atugarisai pillugit, tamatumani aamma pineqartup inuuniutigalugu pissarsianit akileraarusigaanersoq nalunaaruteqassaaq.
Imm. 4.  Ernianut iluanaarutisianulluunniit kuponinik aningaasanngortitsinissamik imaluunniit pappiaqqanik aningaasanik nalilinnik qitiusumik nalunaarsuiffimmi kontomik pilersitsinissamik qinnuteqartoq, akileraaruseriffiup ilusissamik aalajangigaa malillugu iluseqartumik aningaasanngortitsiviusoq imaluunniit kontomik ingerlatsiviusumik institutti piginnittuusup kinaaneranik ilisimatitsissuteqassaaq paasissutissallu tunniunneqartut eqqortuuneri uppernarsarlugit. Kuponi aningaasanngortinneqassanngilaq erniallu akilerneqassanatik aningaasanngortitsiffiusoq imaluunniit kontomik ingerlatsiviusumik institutti paasissutissanik taaneqartunik pereertinnagu.

§ 19.  Kinaluunniit nuussinermik ingerlatitseqqiilluni akunnermiliuttuusoq imaluunniit pissarsisoq imaluunniit nuussisoq pillugit akunnermiliuttutut taasaq imm. 3 naapertorlugu akileraaruseriffimmut obligationinik erniasianullu allagartanik, tamatumani aamma obligationinik allassimasumik erniaqartitaanngitsunik imaluunniit erniarititat minnerpaaffissaat ataallugu allaassimasumik erniaqartillugit pilersitaasunik, aningaasarsianit akileraarutit pillugit Inatsisartut inatsisaanni § 18, imm. 3 naapertorlugu, tunniussinernik ilisimatinneqassaaq. Tamanna aamma atuuppoq aningaasaliissutinut uppernarsaatinik taamaattunullu tunngatillugu iluanaarutinut kuponinik tunniussinernut aammalu aningaasanngortitsinernut, tamatumani aamma aningaasanngortitsinernut ataasiakkaanut tunngatillugu piffissaq aningaasanngortitsiffiusoq pillugu, aningaasaliisarnernut peqatigiiffimmi kontomik ingerlatsisuusumi uninngasuutinut, aammalu tigusinerni ataasiakkaani aningaasaliisarnernut peqatigiiffiup aningaasanik nalilinnik pappiaraataasigut iluanaarutinut annaasaqaatinulluunniit piviusunngortitsinerup nalaani suli piviusunngortitaanngitsortaanut. Akileraaruseriffiup attuumassuteqartut peqataasut § 10, imm. 2-mi taaneqartutut inuup normuanik il.il. paasissutissiisussaatitaanermut pisussaafilerneqarsinnaapput.
Imm. 2.  Taamatuttaaq imm. 1-imi aalajangersagaq piffissaq akiliiffissamut, pisinermut tunisinermullu tunngasunik isumaqatigiissutinut nuussinernulluunniit atuuppoq, isumaqatigiissuteqartuni illuatungiusut arlaat inuinnaappat.
Imm. 3.  Suliffeqarfimminut atatillugu imm. 1 aamma 2-mi taasani pappiaqqanik nalilinnik imaluunniit isumaqatigiissutinik niueruteqarlunilu nuussinermik ingerlatitseqqiilluni akunnermiliuttuusoq, imm. 1 naapertorlugu naalunaaruteqarluni paasissutissiisussaatitaavoq. Taamatuttaaq aamma atuuppoq kimulluunniit inuussutissarsiutigalugu isumaqatigiissutinik taamaattunik suliaqarluni isumaqatigiissusiortartumut imaluunniit nuussinermik ingerlatitseqqiilluni akunnermiliuttuusumut. Kontomik ingerlatsiviusumi aningaasaliinernut peqatigiiffinni kontomit tigusinerit pillugit tamatumani peqatigiiffik nalunaaruteqartussaatitaavoq. Pappiaqqat nalillit imaluunniit illuatungeriit isumaqatigiissutaat imm. 1 aamma 2-mi taasat nuunneqartillugit, taakkualu oqaaseqatigiinni siullerni taasatut nalunaaruteqarnikkut paasissutissiisussaatitaanngippata, imaluunniit nalunaaruteqarnikkut paasissutissiisussaatitaasuunngitsumit tamanna pillugu isumaqatigiittoqartillugu aamma nuussinermik ingerlatitseqqiilluni akunnermiliunnikkut isumaqatigiissutinik suliaqartoqartillugu, pappiaqqanik nalilinnik imaluunniit isumaqatigiissummik illuatungiusumit pissarsisuusumit nalunaaruteqarnikkut paasissutissiisussaatitaaneq tassannga pissaaq.
Imm. 4.  Pappiaqqanik nalilinnik imaluunniit isumaqatigiissutinik imm. 1 naapertorlugu nuussisoqartillugu imaluunniit isumaqatigiissummik imm. 2 naapertorlugu inuinnarmit imaluunniit inatsisit naapertorlugit inuttut tunngatinneqarsinnaasup akornanni isumaqatigiissusiortoqarsimatillugu Kalaallillu Nunaanni angerlarsimaffeqartuutillugit imaluunniit Kalaallit Nunaanni aalajangersimasumik ingerlatsiveqartumik inuussutissarsiuteqartut (akileraartartut) aamma inuinnarmit imaluunniit inatsisit naapertorlugit inuttut tunngatinneqarsinnaasup nunanit allanit pisup, imm. 3-mi oqaaseqatigiit siulliit naapertorlugit nalunaaruteqarnikkut paasissutissiisussaatitaanngitsuuppat aamma nuussineq akunnermiliuttumit imaluunniit isumaqatigiissut taamatut paasissutissiisussaatitaanngitsumit suliarineqarpat, akileraartup nalunaaruteqarnikkut paasissutissiisussaatitaaneq akisussaaffigivaa.
Imm. 5.  Pissarsisoq, nuussisoq ingerlatitseqqiilluniluunniit akunnermiliuttuusoq, nalunaaruteqarnikkut paasissutissiisussaatitaanermik pisussaaffeqarnerminik naammassinninngitsoq, obligationinut il.il. imaluunniit kuponimut attuumassuteqartunik ernianik iluanaarutinillu akileraartussatut isigineqarsinnaavoq.
Imm. 6.  Pissutsit atuuttut tamanna taperserpassuk, paasissutissarlu akileraartarnermi nakkutilliinermut annikinnerusumik pingaaruteqarpat, akileraaruseriffiup obligationinik il.il. piginnittunut ataasiakkaanut qassiikkuutaanulluunniit nalunaaruteqarnikkut paasissutissiisussaatitaanermik pisussaaffeqarneq atorunnaarsissinnaavaa annikinnerulersilluguluunniit.

§ 20.  Paasissutissanik §§-ini 10-miit 12-imut aamma 15-imiit 19-imut taaneqartunik paasissutissiisussaatitaapput inuit aammalu inatsisit naapertorlugit inuttut akisussaasut tamakiisumik killilimmillu akileraartussaatitaasut.

Pineqaatissiinerit

§ 21.  Piaaraluni imaluunniit mianersuaalliorluni § 1, imm. 2-miit 4-mut, § 3, § 4, imm. 1, § 5, imm. 1 aamma 2, § 6, imm. 1, § 7, imm. 1 aamma 2, § 8, § 9, § 10 imm. 1 aamma  5, § 11, imm. 1, § 12, imm. 1, § 13, imm. 1, 3 aamma 4, § 15, imm. 1 aamma 2, § 16, imm. 1, 3 aamma 4, § 17, imm. 1, 3 aamma 4, § 18 aamma § 19, imm. 1-imiit 4-mut aalajangersakkanik unioqqutitsisoq akilisitaanermik pineqaatissinneqarsinnaavoq.
Imm. 2.  Imm. 1-imi taaneqartut arlaat aktieselskabip, anpartsselskabip, andelsselskabip, peqatigiiffiup, suliffeqarfiup imminut ingerlatittup, aningaasaateqarfiup taakkuluunniit assigisaasa unioqqutippagit, inatsisitigut pisinnatitaasutut akiliisitaanermik pineqaatissinneqarsinnaavoq. Namminersorlutik Oqartussat, kommune kommunilluunniit suleqatigiiffiat unioqqutitsisuuppat Namminersorlutik Oqartussat, kommunalbestyrelse imaluunniit kommunit suleqatigiiffiat akiliisitaanermik pineqaatissinneqarsinnaavoq.
Imm. 3.  Akiliutissanngortitat Landskarsip pisassarai.

Atuutilerfia

§ 22.  Nalunaarut 1. juli 2010-mi atuutilerpoq.
Imm. 2.  Ilutigitillugu Aningaasarsianit akileraarutit pillugit paasissutissanik akileraaruseriffimmut nalunaaruteqartarneq pillugu Namminersornerullutik Oqartussat nalunaarutaat nr. 26, 1. december 2006-imeersoq atorunnaarpoq.

Namminersorlutik Oqartussat, ulloq 18. juni 2010

Palle Christiansen

/

Jan H. Lynge-Pedersen