Pinngortitamik allanngutsaaliuineq pillugu Inatsisartut inatsisaanni nr. 29-mi decembarip 18-ani 2003-meersumi § 5, imm. 1, nr. 1, nr. 4, nr. 8 aamma 9, § 9-mi nr. 1 aamma nr. 2, § 16 imm. 1, § 19, § 20, § 46, aamma § 60, imm. 2 aamma imm. 4 naapertorlugit makku aalajangersarneqarput:

Siunertat killiliinerillu

§ 1.  Ivittuut Kangilinnguillu eqqaani nuna sanaartorfiusup avataniittoq allanngutsaaliugassanngortinneqarpoq pinngortitap pilersitaasa nunamilu eriagisassat, kulturikkullu oqaluttuarisaanermi takussutissat pigiinnarneqarnissaat siunertaralugu kiisalu nunap tamatuma nungullarsarneqannginnissaa illersorniarlugu, tamatumunnga ilanngullugit Ikkap kangerluani napasuliaasat Ikait-it. Eqqissisimatitsineq aammattaaq nunap tamatuma piujuaannartitsisumik atorneqarnissaanut aammalu pisuussutinut uumassusilinnut kiisalu Qoornup eqqaani qasigiaqarnerata illersorneqarnissaanut iluaqutaassaaq.
Imm. 2.  Nalunaarut aatsitassanik misissueqqaarnermut, misissueqqissaarnermut piiaanermullu atatillugu suliniutinut atuutinngilaq. Pinngortitap illersornissaanut malittarisassat kiisalu atortulersuutinik inissiineq il.il. malittarisassat inatsisikkut, suliniutissanut taamaattunut piginnaatitaanermik aningaasaliissuteqarnermilluunniit nalunaaruteqarnermut tunngavigineqartukkut, kiisalu taakkua oqartussaasunit tamakkiisumik suliarineqarnerannut ilanngunneqartunit, aalajangersarneqassapput. 

§ 2. Sumiiffik allanngutsaaligaq ilanngussami 1-imi nalunaarneqarpoq.
Imm. 2. Illoqarfiup killinga tikillugu eqqissisimatitsivittut killiliussami illoqarfiup nalunaarutip matuma atuutilerfiata nalaani killinga malinneqassaaq, takuuk ilanngussaq 1.
Imm. 3. Sumiiffiup allanngutsaaliukkap iluani nunap immikkoortuisa ilai tallimaasut toqqarneqarput, takuuk ilanngussaq 2.
1)  Sumiiffiup ilaa A tassaavoq Ikka Ikkap nerukinnerata avannaaniittoq.
2)  Sumiiffiup ilaa B tassaavoq Qoornup Kujalliup Sermiata kujammut killerpiaa aamma Qoornup Avannarliup Sermia, Atarnup Tasia kiisalu taseq tamatuma kujatinnguaniittoq.
3)  Sumiiffiup ilaa C tassaavoq nuuk Qaamasunnguup sioraaniittoq (titarnerup narlusuup 61˚10’49,89”N; 47˚48’14,10”W-ip aamma 61˚ 10’58,64”N; 47˚47’25,09”W-ip akornaniittoq)..
4)  Sumiiffiup ilaa D tassaavoq Eqaluit eqqaat titarnerup narlusuup Eqaluit Qeqertaani nuullu Eqaluit Qeqertaata kujatinnguaniittup akornaniittoq.
5)  Sumiiffiup ilaa E tassaavoq Ilorpup killeqarfiup ilaa timmissat ineqarfiannit 1000 meterisut ungasitsigisoq.
Imm. 4 Nunap aqqisa kalaallisut qallunaatullu taaguutaat ilanngusaq 3-miipput.

Nalinginnaasumik tikinneqarsinnaanera atorneqarneralu

§ 3.  Sumiiffik eqqissisimatitaq kikkunnilluunniit tikinneqarsinnaavoq killiliussatigut nalunaarummut matumunnga malinnaatinneqartutigut. 

§ 4.  Sumiiffiup eqqissisimatitap iluani tatsit, kuuit, kangerluit nunalluunniit eqqakkanik pinngortitamit pisuunngitsunik, aalisarnermut atortunik atornikunik kiisalu nalunaaqutsersuutinik atorunnaarsimasunik ilisimatusarnermulluunniit atortunik qanorluunniit ittunik mingutsinneqarnissaat inerteqqutaavoq.
Imm. 2.  Orkidét assaavigineqarnissaat, orpiit ajoquserneqarnissaat naasulluunniit arlaatigut ajoquserneqarnissaat nunalluunniit allanngortinneqarnissaa inerteqqutaapput.

§ 5.  Sumiiffiup allanngutsaaliukkap iluani nunalerinikkut suliniutit, uumasuuteqarneq, naggorissaaneq imaluunniit naasunik piiaaneq inerteqqutaapput.

§ 6. Sumiiffiup ilaani A-mi napasuliaasanik ikait-inik nungusaaneq tamarmi, takuuk ilanngussaq 2, tassunga ilanngullugu napasuliaasanit ikait-init atortussianik imaluunniit taakkuninnga immap naqqani sumi tamaaniittunik katersuineq nammineerlunilu piiaaneq inerteqqutaapput.

Tuperneq innermillu maaniinnaq ikumatitsineq

§ 7.  Sumiiffiup allanngutsaaliukkap iluani tuperneq aamma innermik maaniinnaq ikumatitsineq, tassunga ilanngullugu gassimik sprittimilluunniit kissaassutinik il.il. atuineq taamaallaat nunami tamaani ullut unnuallu tallimat tikillugit pisinnaapput. Tamatuma saniatigut tuperneq innermillu maaniinnaq ikumatitsineq, tassunga ilanngullugu gassimik sprittimilluunniit kissaassutinik assigisaannillu atuineq, tamatuma kingorna sumiiffimmi allami, sumiiffigisimasamiit minnerpaamik 100 meterinik ungasissusilimmi taamaallaat pisinnaavoq, taamaattoq takuuk imm. 2.
Imm. 2.  Nunaminertat aalajangersimasumik tupersimaatarfiit innermillu maaniinnaq ikumatitsiviusartut, tassunga ilanngullugu gassimik sprittimilluunniit kissaassutinik il.il. ullunik unnuanillu tallimanik sivisunerusumik atuineq Kommuneqarfik Sermersuumit kommunip ileqqoreqqusaatigut, Nunami Namminermut, Pinngortitamut Avatangiisinullu Naalakkersuisoqarfimmit atuutilersinneqartutigut, toqqarneqarsinnaapput. Nunap ilaani tamaani sumiiffiit, tuperfigineqarsinnaasut innermillu maaniinnaq ikumatitsiviusinnaasut, tassunga ilanngullugit gassimik sprittimilluunniit kissaassutinik il.il. ullunit unnuanillu tallimanit sivisunerusumik atuiffiusarsinnaasut, erseqqissumik nalunaarneqassapput.
Imm. 3.  Sumiiffiup allanngutsaaliukkap iluani naasut toqunerit kiisalu qissiat qisussatut katersorneqarsinnaallutillu ikummatigineqarsinnaapput.

Sanaartorneq, atortulersuutit pisummillu angalaarluni aqqutit

§ 8.  Sumiiffiup allanngutsaaliukkap iluani illuutinik atortulersuutinilluunniit allanik sanaartorneq kiisalu aqqusinniorneq aqqusinneeraliornerluunniit inerteqqutaavoq, taamaattoq takuuk imm. 2.
Imm. 2.  Nunami Namminermut, Pinngortitamut Avatangiisinullu Naalakkersuisoqarfiup Kommuneqarfik Sermersooq tusarniaavigereerlugu illuutinik sananissamut imaluunniit atortulersuutinut aalajangersimasunut kiisalu aqqusinniornissamut aqqusineeraliornissamullu akuersissuteqarsinnaavoq.
Imm. 3.  Nunami Namminermut, Pinngortitamut Avatangiisinullu Naalakkersuisoqarfik illuutit atortulersuutilluunniit aalajangersimasut allat annertussusissaannut, suussusissaannut, inissinneqarnissaannut, ilusissaannut, portussusissaannut kiisalu imm. 2-mi akuersissutini tunniunneqartuni nunap naasullu pissuserisimasaattut isikkoqalerseqqinnissaannut atugassarititanik aalajangersaasinnaavoq.

§ 9.  Pisummik angalaarluni aqqutit Nunami Namminermut, Pinngortitamut Avatangiisinullu Naalakkersuisoqarfimmit tusarniaareernikkut Kommuneqarfik Sermersuup innersuussineratigut nalunaaqutsersorneqarsinnaapput.

Nunakkut imaatigullu angalaneq

§ 10.  Sumiiffiup allanngutsaaliukkap iluani cykelinik kiisalu qamutinik motoorilinnik angalaneq inerteqqutaavoq.
Imm. 2.  Imm. 1-imi inerteqquteqarnermi pineqanngillat nunami qerisumi aputilimmilu qamuteralannik angalaneq kiisalu annaassiniarnernut, piniarnermik nakkutilliisut sulinerannut aamma Kalaallit Nunaanni Sakkutooqarfiup annaassiniartartuisa suliaannut atasumik angalanerit.
Imm. 3. Imm. 1-imi inerteqquteqarnermi pineqanngilaq Kangilinnguit aamma Jernhattenimi Grønnedalshyttenillu akornanni qamutit illernisigut cykelinik kiisalu qamutinik motoorilinnik angalaneq.

§ 11.  Nunami, nattorallit, kiinaaleeqqat kissaviarsuillu inaannut 500 meterinit qaninnerusumik, angalaarneq piffissami apriilip 1-aniit aggustip 15-anut inerteqqutaavoq.

§ 12.  Sumiiffimmi allanngutsaaliukkami nunap ilaani C-mi, takuuk ilanngussaq 2, angallatinik motoorilinnik imaani angalaarneq inerteqqutaavoq.
Imm. 2.  Nunap ilaani E-mi, takuuk ilanngussaq 2, angallatinik motoorilinnik angalaarneq piffissami juunip 1-aniit septembarip 1-anut inerteqqutaavoq.
Imm. 3.  Imm. 1-imi 2-milu inerteqquteqarnermi pineqanngillat annaassiniarnernut, piniarnermik nakkutilliisut sulinerannut aamma Kalaallit Nunaanni Sakkutooqarfiup annaassiniartartuisa suliaannut kiisalu ilisimatuut misissuinerannut atasumik angallatinik motoorilinnik imaani angalaarneq.

§ 13.  Sumiiffiup ilaani A-mi, takuuk ilanngussaq 2, 3 knobinik sukkanerusumik angalaarneq inerteqqutaavoq, angallatillu 50 centimeterit sinnerlugit itsineqassanngilaq. Ikait-it ersiinnartut eqqaanni 50 meterit iluanni imaatigut angalaarnermi taamaallaat umiatsiaaqqat, qaannat assigisaalluunniit motooreqanngitsut atorneqarsinnaapput.
Imm. 2. Sumiiffiup ilaata A-p iluani imaatigut angalaarnissaq siumoortumik Kommuneqarfik Sermersuup ataani Ivittuuni Innuttaasunik Sullissivimmut siumoortumik nalunaarutigineqassaaq.

Timmisartornerit

§ 14.  Nunami tamaani uumasut mianereqqullugit nuna allanngutsaaliukkami nunap qulaatigut 500 meterinit appasinnerusumik timmisartorneq kiisalu nuna allanngutsaaliukkami timmisartumik minneq inerteqqutaapput.
Imm. 2.  Imm. 1-imi inerteqquneqarnermi pineqanngillat akuerisaasumik timmisartuussisarnernut, annaassiniarnernut ujaasinernullu, Kalaallit Nunaanni Sakkutooqarfiup suliaanut kiisalu eqqissisimatitsiviusumi ilisimatuutut siunertalinnut atatillugu timmisartornissaq minnissarlu.

Aalisarneq piniarnerlu

§ 15.  Aalisarnermut, Piniarnermut Nunalerinermullu Naalakkersuisoqarfik umimmattassatut pisassiissutinik umimmannillu tammajuitsussarsiniarluni piniarnermut aalajangersaasinnaavoq.

§ 16.  Sumiiffiup ilaani B-mi C-milu puisinniarneq tamarmi inerteqqutaavoq, takuuk ilanngussaq 2.

§ 17. Qassusersorneq, tassunga ilanngullugu bundgarnersorneq, sumiiffiup ilaani A-mi, B-mi, C-mi D-milu inerteqqutaavoq, takuuk ilanngussaq 2.
Imm. 2. Sumiiffiup ilaani A-mi sissamiit aalisarneq taamaallaat inerteqqutaanngilaq.

§ 18.  Sumiiffimmi allanngutsaaliukkami imermi tarajuunngitsumi qissattaammik eqalunniarneq taamaallaat akuerisaavoq.
Imm. 2.  Aalisakkat imermi tarajuunngitsumi pisat perlukui nunamut qimanneqassapput.

Aqutsineq, nakkutilliineq immikkullu akuersissuteqarneq

§ 19.  Nunami Namminermut, Pinngortitamut Avatangiisinullu Naalakkersuisoqarfiup Kommuneqarfik Sermersuumik tusarniaarernikkut nuna allanngutsaaliukkamut aqutsinikkut pilersaarut suliarisinnaavaa.

§ 20.  Kommuneqarfik Sermersuumi kommunalbestyrelsip nalunaarut manna maleruarneqarnersoq nakkutigissavaa.

§ 21.  Nunamut Namminermut, Pinngortitamut Avatangiisinullu Naalakkersuisoqarfik Kommuneqarfik Sermersuumi kommunalbestyrelsimik tusarniaareernikkut § 6-imit, § 7-imi imm. 1-imit, § 10-mi, imm. 1-imit, § 11-mit kiisalu § 14-imi imm. 1-imit immikkut akuersissuteqarnermik nalunaaruteqarsinnaavoq.

§ 22.  §§ 4-6-imik, § 7-imi, imm. 1-imik, § 8-mi, imm. 1-imik, § 10-mi, imm. 1-imik, § 11-mik, § 12-imi, imm. 1-imik 2-millu, § 13-imik, § 14-imi, imm. 1-imik, §§ 16-17-imik kiisalu § 18-imi, imm. 1-imik unioqqutitsineq akiliisitaanermik kinguneqarsinnaavoq.
Imm. 2.  Atugassarititanik § 8, imm. 3 naapertorlugu aalajangersakkanik unioqqutitsineq akiliisitaanermik kinguneqarsinnaavoq.
Imm. 3.  Suliffeqarfimmit, tamakkiisumik ilaannakortumilluunniit Naalagaaffimmit, Namminersorlutik Oqartussanit, kommunimit imaluunniit kommuninit ataatsimoortumik ingerlatseqatigiiffimmit, piginneqatigiiffimmit, piginneqataassuteqarluni piginneqatigiiffimmit assigisaannilluunniit pigineqartumit unioqqutitsinermi pineqartoq pinerluttulerinermut inatsit malillugu akisussaatinneqassaaq. Taamattaaq atuutissaaq Namminersorlutik Oqartussat, kommunit imaluunniit kommunit ataatsimoortut unioqqutitsisimappata.
Imm. 4.  Imm. 1-3 malillugit akiliisitsissutit Nunatta Karsianut nakkartinneqassapput.

§ 23.  Nalunaarut juunip 1-ani 2010-mi atuutilerpoq.
Imm. 2.  Tamatumunnga peqatigitillugu Ikkap kangerluata iluani qinnguata eqqissisimatitaanissaa pillugu Namminersornerullutik Oqartussat nalunaarutaat nr. 11, apriilip 25-ani 2000-imeersoq atorunnaarsinneqarpoq.

Namminersorlutik Oqartussat, ulloq apriilip 12-at 2010

Anthon Frederiksen

/

Hans-Erik Bresson