§ 1.

Aalisarneq pillugu inatsit nr. 18, 31. oktober 1996-imeersumi imaattunik allannguuteqartitsisoqarpoq:

1. § 2, imm. 2 imatut oqaasertaqassaaq:
Imm. 2. Inatsisip matuma atortinnerani aalisagaqartuarnissaa kinguaassiortuarnissaallu pingaartinneqassapput, kiisalu aalisarnerup uumassusillit aaqqissugaanerannut sunniuteqarnera naammaginartuutinneqarnissaa. Aammattaaq aaqqissuulluakkamik ukiullu qanoq ilinera apeqqutaatillugu uumasunik ilisimatuut nalinginnaasumik siunnersuinerat naapertorlugu pitsaanerpaamik iluaquteqarnissaq kiisalu inuiaqatigiit allamut saassinnaanerannut pisariaqartitsineq pingaartinneqassapput.

2. § 14, imm. 5 nutaatut ikkunneqassaaq:
“Naalakkersuisut sinerissap qanittuani aalisarnermi aalisarsinnaanermut akuersissutinik tunniussinermut kiisalu akuersissutinik allanik tunniussinermut atatillugu akiliuteqarnissamik piumasaqarsinnaapput, annertussusissaat aalisarsinnaanermut akuersissutinik tunniussinermut akuersissuteqartarnermullu atatillugu allaffissornermut aningaasartuutit tunngavigalugit aalajangersarneqartunik. Taamaattorli sinerissap qanittuani raajarniarnermut akuersissutinut akiliisoqartassanngilaq.”

3. § 14, imm. 6 nutaatut ikkunneqassaaq:
“Akiliutit § 14, imm. 5-imi taaneqartut aningaasartassai Inatsisartut aningaasanut inatsisaatigut aalajangersarneqassapput.”

4. § 14, imm. 7 nutaatut ikkunneqassaaq:
“Suliffeqarfiit (inuit, ingerlatseqatigiiffiit, umiarsuaatileqatigiit ilaallu ilanngullugit), avataasiorluni imaluunniit sinerissamut qanittumi raajarniarnissamut Naalakkersuisunit akuersissuteqarfigineqarsimasut akuersissutinit ukiumoortumik nunatta karsianut akileraaruteqartassapput. Akileraarut akilersinniarneqartassaaq aalisarnikkut suliniuteqarnernik nakkutilliinermut aningaasartuutinik matussusiinissaq siunertaralugu.”

5. § 14, imm. 8 nutaatut ikkunneqassaaq:
"Aalisagartassiissutinik akuersissuteqarnermut akileraarut, § 14, imm. 7 naapertorlugu, Inatsisartut aningaasanut inatsisaatigut aalajangersarneqassaaq.”

6. § 14, imm. 9 nutaatut ikkunneqassaaq:
“§ 14, imm. 7 malillugu akileraarutinik akiliuteqartitsinermut allaffissorneq pillugu Naalakkersuisut nalunaarutitigut erseqqinnerusumik maleruagassiorsinnaapput, taamatullu atuisunik akiliuteqartitsineq § 14 imm. 5 naapertorlugu.”

7. § 14 imm. 10 nutaatut ikkunneqassaaq:
“Najoqqutassiani una inatsit naapertorlugu atuutilersinneqartuni, najoqqutassiani aalajangersakkanik unioqqutitsinermi akiliisitsinermik pineqaatissiineq pillugu maleruagassiortoqarsinnaavoq. Ingerlatseqatigiiffiit aktiaateqarluni ingerlatseqatigiiffiusut, piginneqataassuteqarluni ingerlatseqatigiiffiusut, piginneqatigiiffiit (Amba), peqatigiiffiit, suliffeqarfiit imminnut ingerlattut aamma aningaasaateqarfiit aalajangersakkanik unioqqutitsinermi akiliisitaasussanngortinneqarsinnaapput.”

8. Kapitali 10-mut kapitalip qulequtaa imaalillugu allanngortinneqarpoq “Naalakkersuisut paasissutissanik pissarsiniarnerat”

9. § 25, imm. 1 imatut oqaasertaqassaaq:
“Inatsisartut inatsisaata aqutsinikkut atorneqarnerani, tassunga ilanngullugit naatsor­sueq­qissaarnermik misissueqqissaarnermillu siunertanut atornerani, aamma nakkutil­liinermik siunertanut atornerani, Naalakkersuisut malittarisassanik aalajangersaasinnaapput, tamatuma kingorna kalaallit aalisariutaannik piginnittuusoq, atugassaqartorluunniit, inatsimmi § 6, imm. 1 naapertorlugu, nunat allamiut aalisariutaat, inatsimmi § 7, imm. 1 naapertorlugu, Kalaallit Nunaanni tunisassiorfiit ilaalu ilanngullugit angallatit pillugit, sakkut atortullu allat, aalisarneq, pisat, angallammut allamut nuus­sinerit, angallammi nammineq tunisassiorneq, usingiaanerni tunisinermilu isertitat ilaalu ilanngullugit pillugit paasissutissiinissaminut pisussaatinneqarpoq. Tassunga ilanngullugit teknikkimut, aningaasaqarnermut ingerlatsinermullu paasissutissanut tunngasut.”

10. § 25, imm. 2 imatut oqaasertaqassaaq:
“Naalakkersuisut imm. 1 naapertorlugu naatsorsueqqissaarnermi paasissutissanik pisortatigoortumik saqqummiussisinnaapput aamma Inatsisartut inatsisaat naapertorlugu akuersissutit tunniunneqartut kisitsisinngorlugit paasissutissanik imaluunniit tamanna tunngavigalugu malittarisassat aalajangersarneqarsimasut pillugit.”

11. § 29, imm. 1 imatut oqaasertaqassaaq:
“Kalaallit Nunaanni Aalisarsinnaanermut Akuersissutinik Nakkutilliisoqarfik eqqartuussivimmiit uppernarsaammik peqanngikkaluarlutik uppernarsaatitulli atuussinnaasumik takutitsinikkut § 6, imm. 1 naapertorlugu kalaallit aalisariutaannik piginnittumut, atugassaqartitaasumulluunniit peqqusisinnaapput, inatsimmi § 7, imm. 1 naapertorlugu, Kalaallit Nunaanni Aalisarsinnaanermut Akuersissutinik Nakkutilliisoqarfimmiit aalisarnermi nakkutilliisumik ilaasoqassasoq, aalisariutip aalisarnerani nakkutilliinissaq siunertaralugu.”

12. § 29, imm. 1, nr. 1 nutaatut ikkunneqassaaq:
1)“Kalaallit Nunaata nunataani aalisarnikkullu killeqarfiata oqartussaaffigisaani.”

13. § 29, imm. 1, nr. 2 nutaatut una ikkunneqassaaq:
2)“Kalaallit Nunaata nunataani aalisarnikkullu oqartussaaffigisaata avataani, ingerlatat taakkua angallatinit Naalakkersuisut tunniussaannik akuersissummik pigisalinnit imaluunniit Naalakkersuisut akuerisaannik akuersissummik pigisalinnit ingerlanneqarpata.”

14. § 29, imm. 2 imatut oqaasertaqassaaq:
“Kalaallit Nunaanni Aalisarsinnaanermut Akuersissutinik Nakkutilliisoqarfik eqqartuussivimmiit uppernarsaammik peqanngikkaluarluni uppernarsaatitut atorsinnaasumik takutitsinikkut angallatit akuersitissinnaavai, Kalaallit Nunaanni Aalisarsinnaanermut Akuersissutinik Nakkutilliisoqarfimmeersumik angallatit pineqartut Kalaallit Nunaannut tulaassineranni nakkutilliisoqarnissaannik aamma umiarsuarnut allanut nuussinerni Kalaallit Nunaata aalisarnikkut oqartussaaffigisaani aamma angallatit kalaallit nunaanneersut aalisarnikkut oqartussaaffiusup avataani umiarsuarmut allamut nuussineranni.”

15. § 29, imm. 3 imatut oqaasertaqassaaq:
“Umiarsuaatileqatigiiffiup pineqartup Kalaallit Nunaanni Aalisarsinnaanermut Akuersissutinik Nakkutilliisoqarfimmeersup nakkutilliinermut atatillugu nakkutilliisup angallammiinnera nerisaqarneralu akilertassavai. Nakkutilliinermut atatillugu aningaasartuutinut umiarsuaatileqatigiiffiup annertunerusumik matussuseeqataasinnaaneranut malittarisassiornissamut Naalakkersuisut aalajangersaasinnaapput.”

16. § 29, imm. 4 imatut oqaasertaqassaaq:
“Aalisarnermik nakkutilliisut angallatip inuttai piumaffigisinnaavai, aalisarnermik nakkutilliisut angallatip radioanik, qarasaasiaanik oqarasuaataanillu atuinissamut periarfissaqarnissaminnik nakkutilliinerminnut atatillugu oqartussaasunut attuumassuti­linnut attaveqarniarnerminni.”

17. § 29, imm. 5 nutaatut una ikkunneqassaaq:
“Aalisarnermik nakkutilliisut imaluunniit Kalaallit Nunaanni Aalisarsinnaanermut Akuersissutinik Nakkutilliisoqarfimmiit nakkutilliiartortunut imm. 1 aamma imm. 2 naapertorlugit, pisinnaatitaaffinnik suliassanillu Naalakkersuisut aalajangersaasin-naapput. Inatsisartut inatsisaat malillugu inatsimmilu malittarisassani aalajangersakkat malinneqarnissaannut suliassat nakkutilliinermik ilaqarpata,  naalagaaffimmi oqartussaasut oqaloqatigereernerisigut suliassat aalajangersarneqassapput.”

§ 2.

Inatsisartut inatsisaat 1. januar 2010-mi atuutilersinneqassaaq.

Kalaallit Nunaanni Namminersorlutik Oqartussat, 3. december 2009

Kuupik Kleist

/

Ane  Hansen