Pinngortitamik illersuineq pillugu Inatsisartut inatsisaanni nr. 29, 18. december 2003-meersumi § 5, § 35, § 36, imm. 2 aamma § 60, imm. 2 kiisalu Piniarneq aallaaniarnerlu pillugit Inatsisartut inatsisaanni nr. 12, 29. oktober 1999-imeersumi § 8, § 13, imm. 3 aamma § 17, imm. 2 kingullermik Inatsisartut inatsisaat nr. 1, 16. maj 2008-meersukkut allanngortinneqartoq naapertorlugu aalajangersarneqarput:

 

Atuuffii

§ 1. Nalunaarut nunami aalisarnikkullu Kalaallit Nunaata oqartussaaffigisaani atuuppoq.

§ 2. Inuit piniarnermut allagartamik atuuttumik peqartut kisimik timmiarniarsinnaapput mannissarniarsinnaallutillu.

Eqqissisimatitsilluinnarneq

§ 3. Timmissat tamarmik eqqissisimatitaalluinnarput, taamaattoq takukkit §§ 4 - 6.

Ukiakkut ukiuuneranilu pisasssiissutitalimmik timmiarniarneq

§ 4. Timmissat imarmiut ukiaanerani ukiuuneranilu imm. 2-mi aamma imm. 3 sumiiffinni taaneqartuni piffissat piniarfiusinnaasut taaneqartut iluini makku piniarneqarsinnaapput:
Imm. 2. Nunap Isuaniit Qeqqata kommuniata avannamut killeqarfianut:  

1)	Appa Uria lomvia	15. oktober - 28/29. februar
2)	Appa sigguttooq Uria aalge	15. oktober - 28/29. februar
3)	Miteq siorartooq Somateria molissima	15. oktober - 15. marts
4)	Miteq siorakitsoq Somateria spectabilis	15. oktober - 28/29. februar

Imm. 3.Qeqqata kommuniata avannamut killeqarfianiit Qaanaami aqutsiviup avannamut killeqarfianut Tunumilu:

1)	Appa Uria lomvia	1. september - 28/29. februar
2)	Appa sigguttooq Uria aalge	1. september - 28/29. februar
3)	Miteq siorartooq Somateria molissima	15. oktober - 31. marts
4)	Miteq siorakitsoq Somateria spectabilis	15. oktober - 28/29. februar

Imm. 4. Inuit inuussutissarsiutigalugu piniarnermut allagartallit piffissani imm. 2 – 3-milu taaneqartuni ullormi aallaaniarfiusumi ataatsimi appanik, appanik sigguttuunik, miternik siorartuuník miternillu siorakitsunik amerlanerpaamik ataatsimut katillugit 30-nik pisaqarsinnaapput.
Imm. 5. Inuit sunngiffimmi aallaaniarsinnananermut allagartallit piffissani imm. 2 – 3-milu taaneqartuni ullormi aallaaniarfiusumi ataatsimi appanik, appanik sigguttuunik, miternik siorartuuník miternillu siorakitsunik amerlanerpaamik ataatsimut katillugit tallimanik (5) pisaqarsinnaapput.
Imm. 6. Ulloq aallaaniarfiusoq ataaseq imm. 4 – 5-ilu naapertorlugit paasineqassaaq ullortut unnuartullu inuup taassuma piniarfigisaatut ataatsitut. Ulluni aallaaniarfiusuni aallaaniarfiunngitsunilu pisassiissutit pisarinngitsuukkat pissamaasiunneqarsinnaanngillat. Taamatuttaaq kingusinnerusukkut ullormut pisassaagaluit siumoortumik atorneqarsinnaanngillat.
Imm. 7. Ullormi piniarfiusumi ataatsimi pisassiissutit imm. 4 – 5-ilu naapertorlugit inuup nammineq pigisarai allanullu tunniunneqarsinnaanatik.

Upernaakkut pisassiissutitalinnik timmiarniarneq

§ 5. Sumiiffiit piffissallu piniarfiusinnaasut imm. 2 – 4-mut aalajangersakkat taaneqartut iluanni upernaakkut piniarnermi nammineq atugassatut timmissat imarmiut makkua piniarneqarsinnaapput.
Imm. 2. Qeqqata kommuniata avannamut killeqarfianiit Qaanaami aqutsiveqarfiup kujammut killeqarfianut, ilanngussaq 1 malillugu:

1)

Miteq siorartooq Somateria molissima

1. april - 30. april

Imm. 3. Ittoqqortoormiit aqutsiveqarfianni, ilanngussaq 2 malillugu:

1)	Appa Uria lomvia	1. marts - 31. ma
2)	Appa sigguttooq Uria aalge	1. marts - 31. maj
3)	Miteq siorartooq Somateria molissima	1. april - 31. maj
4)	Miteq siorakitsoq Somateria spectabilis	1. marts - 31. maj

Imm. 4. Qaanaami aqutsiveqarfimmi, ilanngussaq 3 malillugu:

1)	Appa Uria lomvia	1. marts - 15. juni
2)	Appa sigguttooq Uria aalge	1. marts - 15. juni
3)	Miteq siorartooq Somateria molissima	1. april - 15. juni
4)	Miteq siorakitsoq Somateria spectabilis	1. marts - 15. juni

Imm. 5. Imm. 2 – 4-mut piffissani taaneqartuni ullormi aallaaniarfiusumi ataatsimi timmissat taaneqartut amerlanerpaamik katillugit tallimat (5) pisarineqarsinnaapput.
Imm.6. Ulloq aallaaniarfik imm. 5 malillugu paasineqassaaq ullortut unnuartullu aallaaniarfigineqartutut. Ulluni aallaaniarfiusuni aallaaniarfiunngitsunilu pisassiissutit pisarinngitsuukkat pissamaasiunneqarsinnaanngillat. Taamatuttaaq kingusinnerusukkut ullormut pisassaagaluit siumoortumik atorneqarsinnaanngillat.
Imm. 7. Ullormi piniarfiusumi ataatsimi pisassiissutit imm. 5 naapertorlugit inuup nammineq pigisarai allanullu tunniunneqarsinnaanatik.

 

Pisassiissutitaqanngitsumik timmiarniarneq 

§ 6. Timmissat makku piffissat piniarfiusussat taaneqartut iluanni piniarneqarsinnaapput:

1)	Oqaatsoq Phalacrocorax carbo		1. september - 31. marts
2)	Tuullik Gavia immer		1. september – 15. oktober
3)	Qaqulluk (Malamuk) Fulmarus glacialis		1. september - 31.oktober
	Qeqqata kommuniata avannamut killeqarfianiit Qaanaami aqutsiveqarfiup kujammut killeqarfianut ileqquusumik qaqulluit piaraannik piniarnissaq 15. augustip tungaanut ajornanngilaq.
4)	Nerleq siggukitsoq Anser brachyrhynchus		1. september - 30. april
	Ittoqqortoormiit aqutsivianni timmissat ingerlaartut pisarineqarsinnaapput 31. maj tikillugu.
5)	Nerlernaq Branta leucopsis		1. september - 30. april
	Ittoqqortoormiit aqutsiveqarfianni timmissat ingerlaartut pisarineqarsinnaapput 31. maj tikillugu.
6)	Canadap nerlia Branta Canadensis		15. august - 15. oktober
7)	Qeerlutooq Anas plathyrhynchos		1. september - 28/29. februar
8)	Alleq Clangula hyemalis		1. september - 28/29. februar
9)	Serfaq Cepphus grylle		1. september - 31. marts
10)	Aappaliarsuk Alle alle		1. september - 30. april
	Qaanaap Ittoqqortoormiillu aqutsiveqarfiini appaliarsunniarneq piaraannillu katersineq ukioq kaajallallugu ajornanngilaq.
11)	Naajaannaq Larus glaucoides		1. september - 30. april
12)	Naajarujussuaq Larus hyperboreus		1. september - 30. april
13)	Naajarluk Larus marinus		1. september - 30. april
14)	Taateraaq Rissa tridactyla		15. august – 28/29. februar
15)	Aqisseq Lagopus mutus	1. september – 30. april
	Qeqqata kommuniata avannamut killeqarfianiit Qaanaami aqutsiveqarfiup kujammut killeqarfianut aqisseq 31. maj tikillugu pisarineqarsinnaavoq
16)	Tulugaq Corvus corax		1. september – 28/29. februar

Mannissarneq

§ 7. Mannissarneq inerteqqutaavoq, taamaattoq takukkit imm. 2 - 6.
Imm. 2. Nammineq atugassanik qaqulluit, naajarluit naajarujussuillu mannii ukioq taanna 31. maj ilanngullugu katersorneqarsinnaapput.
Imm. 3. Inuit piniarnermut allagartallit § 13, imm. 4 malillugu ukioq taanna 31. maj ilanngullugu naajarujussuit naajarluillu manniinik tuniniagassaminnik katersisinnaapput.
Imm. 4. Inuit Qeqqata kommuniataavannamut killeqarfianiit Qaanaami aqutsiviup kujammut killeqarfia tikillugu najugallit namminneq atugassaminnik najarluit naajarujussuillu manniinik ukioq taanna 15. juni ilanngullugu katersisinnaapput.
Imm. 5. Inuit piniarnermut allagartallit Qeqqata kommuniataavannamut killeqarfianiit Qaanaami aqutsiveqarfiup kujammut killeqarfia tikillugu najugallit naajarujussuit naajarluillu manniinik ukioq taanna 15. juni ilanngullugu § 13, imm. 4 malillugu tuniniagassaminnik katersisinnaapput.
Imm. 6. Inuit Ittoqqortoormiit Qaanaallu aqutsiveqarfiini najugallit namminneq atugassaminnik appaliarsuit manniinik katersisinnaapput.
Imm. 7. Mannissarniarnermi allunaasat, majuartarfiit, allunaasat innartornermi atortartut innartornermilu atortut allat atornissaat inerteqqutaavoq.

Timmissat piaqqiorfii 

§ 8. Nalunaarummi matumani timmissat piaqqiorfigalugu ineqarfiattut paasineqassaaq timmissat imarmiut aappariikkuutaat ikinnerpaamik qulit piaqqiorfigisaat.
Imm. 2. Piffissami 15. april – 15. septemberimut eqqarneq allatulluunniit pisariaqanngitsumik ajoqusersuineq, taakkununnga ilaalluni angallammik angalaneq, timmissat piaqqiorfiiniit ungasissutsit uku iluini inerteqqutaavoq:
1) 1000 meter, timmissat piaqqiorfiat appanit, appanit sigguttuunit, apparlunnit, appaliarsunnit, taateraanit, qaqullunnit oqaatsunilluunniit najorneqarsimappat. Timmisartunik suluusalinnik helikopterinilluunniit 3000 meterinit qaninnerullugit timmiffiginissat inerteqqutaavoq.
2) 200 meter, timmissat piaqqiorfiat qeqertaasimappat qeqertaasaalluniluunniit miternit, serfanit, qilannganik, imeqqutaallanit naajanillu, taateraajunngitsunit, najorneqartoq.
Imm. 3. Imm. 2-mi aalajangersagaq apeqqutaatinnagu § 7 naapertorlugu mannissartoqarsinnaavoq.
Imm. 4.Imm. 2-mi aalajangersagaq apeqqutaatinnagu angallatit aqqutaat nalunaaqutsersukkat angallammik aqqutigineqarsinnaapput.

Sumiiffiit timmissat illersugaaffii 

§ 9. Piffissami 1. majimiit - 31. augustimut summiiffinni ukunani taakkunanngalu 500 meterisut ungasitsigisumi, nunamut niunissaq allatulluunniit angalaarnissaq inerteqqutaavoq:

1)	Qeqertat kujataanni Lion Øer (Avanersuup aqutsiveqarfiani).
2)	Kuup Apparsui / Kap Schackleton (Upernaviup aqutsiveqarfiani).
3)	Toqqusaaq (Upernaviup aqutsiveqarfiani).
4)	Kingittuarsuk, Angisup avannaani kitaani (Upernaviup aqutsiveqarfiani).
5)	Upernaviup Apparsui / Sandersons Hope (Upernaviup aqutsiveqarfiani).
6)	Kippakup Apparsuit (Upernaviup aqutsiveqarfiani).
7)	Salleq (Uummannap aqutsiveqarfiani).
8)	Imerissut eqqaanni Assissut, ikkarluit (Qeqertarsuup aqutsiveqarfiani).
9)	Kitsissuarsuit eqqaanni Nunatsiaq (Aasiaat aqutsiveqarfianni).
10)	Kitsissunnguit eqqaanni Saattuarssuit (Aasiaat aqutsiveqarfianni).
11)	Akuliarutsip Sermersuata eqqaani Naternap tunuani kangerluup affarlia Tasiusarsuaq (Kangaatsiap Qasigiannguillu aqutsiveqarfianni).
12)	Appat Innaat (Ilulissat aqutsiveqarfianni).
13)	Kitsissut Avalliit (Qaqortup aqutsiveqarfiani).

Imm. 2. Imm. 1-imi aalajangersakkat apeqqutaatinnagit aqqutit nalunaarsukkat angallammik ingerlavigineqarsinnaapput.

Ullunik, manninnik piaqqanillu illersuineq

§ 10. §§ ini 8 – 9 timmissat piaqqiorfii pillugit aamma sumiiffinni timmissat illersugaaffiinik eqqissisimatitsinissamik aalajangersakkat immikkut ittut avataasigut, Kalaallit Nunaanni tamarmi timmissat ulluisa nutaat inigineqartulluunniit kiisalu timmissat manniisa piaraasalu ajoqusernissaat akornusersorneqarnissaalluunniit inerteqqutaavoq.
Imm. 2. Imm. 1-imi pineqanngillat § 6, imm. 1. nr. 3 aamma 10 naapertorlugu appaliarsuit qaqulluillu piaraannik manninnillu katersineq § 7 naapertorlugu.

Timmiarniarneq 

§ 11. Angallat ingerlatillugu angallammit timmissanik timmisunik malersuineq piniarnerlu inerteqqutaavoq.
Imm. 2. Qeerlutuunik nerlernillu isasunik ungoorilluni piniarneq inerteqqutaavoq.
Imm. 3. Timmisartuniit, qamutinit motorimik ingerlatilinniit qamuteralannillu (snescooter) timmiarniarneq inerteqqutaavoq.

§ 12. Timmissanik piniarnermi pisaqarnermilu taamaallaat aallaasit makku piniutaasinnaapput:
1) Timmiarsiutit annerpaamik 12-erit (kaliber 12) qoorortuuararlu minnerpaamik kaliber 0.22.
2) Timmiarsiutit singissaartullit ("Pump gun") annerpaamik 12-erit (kaliber 12) marluinnarnik patroneqarsinnaasut.
3)Nuffit.
4) Qaanaap Ittoqqortoormiillu aqutsiveqarfiini appaliarsunniarnermi qalut aamma naperniutit ipullit. Qaqulluit piaraannik ileqquusumik piniarneq § 6 imm. 1, nr. 3 naapertorlugu allaat atornagu pissaaq, piaqqat immamiippata aamma minnerpaamik 1000 meterit timmissat piaqqiorffiinit ungasinneruppata.

Timmissanik manninnillu tuniniaaneq

§ 13. Taamaallaat piniarnermut allagartallit timmiartaminnik tuniniaasinnaapput suliarineqanngitsunik, erisakkanik atoriaannanngorlugilluunniit saleriikkanik, taamaallaalli angerlarsimaffimmik aqutsiveqarfiata iluani, takuuk ilanngussaq 4.
Imm. 2. Timmissat aalisarnermi pisarisuukkat tuniniaqqusaanngillat
Imm. 3. Imm. 1 naapertorlugu taamaallaat appanik, appanik sigguttuunik, miternik aamma miternik siorakitsunik tunisisoqarsinnaavoq § 4, imm. 2 – 3-milu piffissani piniarfiusussatut aalajangersakkani najukkamilu aqutsisoqarfiup iluanni. Timmissanik allanik tunisineq pisinnaavoq timmissanut pineqartunut piffissat piniarfiusussat iluini tamani, kisianni aqutsisoqarfiup najukkamik iluanni, takuuk § 6.
Imm. 4. Taamaallaat piniarnermut allagartallit naajat manniinik suliarineqanngitsunik atuisunut tuniniaasinnaapput kisianni aqutsisoqarfiup najukkamik iluanni, takuuk § 7, imm. 3 aamma 5.
Imm. 5. Timmissat pisat inuussutissarsiutigalugu nioqqutissiarineqassanngillat, suliarineqaratik qeritinneqaratilluunniit Aalisarnermut, Piniarnermut Nunalerinermullu Naalakkersuisumit akuersissummik pereersimatinnani.
Imm. 6. Imm. 5 naapertorlugu akuersissummi najukkami timmissat illersorniarlugit piffissamut aamma sumiiffimmut tunisinermilu amerlassutsinut piumasaqaatinik aalajangersaasoqarsinnaavoq. Akuersissummi aammattaaq tuniniaanermi piumasaqaatinik aalajangersaasoqarsinnaavoq, tamanna najukkami timmissat illersorneqarnissaannut sunniuteqaqataasinnaappat.

Nalunaaqutsersuutit, nalunaaquttat nassitsissutillu timmissaniittut nassaarineqartut 

§ 14. Nalunaaqutsersuutit, nalunaaquttat, radiukkut aamma qaammataasakkoortumik nassitsissutit sumi qangalu timmissap pisarineqarsimaneranik paasissutissartalerlugit Pinngortitaleriffimmut nassiunneqartassapput.

Piniarneq pisallu pillugit nalunaaruteqartarneq 

§ 15. Timmissat pisat tamarmik, matumani aamma timmissat aalisarnermi saniatigut pisat tamarmik, ukiumoortumik Piniarneq-mut nalunaarutigineqartassapput, taakku Piniarneq-mi pisanik nalunaarsuiffimmi immersugassami ilaappata.
Imm. 2. Manniit inuussutissarsiuteqarnermut atatillugu aamma nammineq atugassatut katersukkat ukiumoortumik Piniarneq-mut nalunaarutigineqassapput, taakku Piniarneq-mi pisanik nalunaarsuiffimmi immersugassami ilaappata.

Timmissanik taakkunanngalu nioqqutissianik il.il. nioqquteqarneq annissinerlu 

§ 16. Timmissanik eqqissisimatitaalluinnartunik uumasunik toqungasunilluunniit taakkualu ilaannik taakkunanngalu nioqqutissianik tamanut saqqummiussilluni tuniniaanissaq, tunisinissaq pisinissarlu inerteqqutaavoq, taamaattoq takuuk § 13, imm.1, imm.3 aamma imm.4.

§ 17. Timmissat eqqissisimatitat uumasut toqungasulluunniit kiisalu tamakku ilamerngi taakkunanngaluunniit nioqqutissiat Kalaallit Nunaanniit anniseqqusaanngillat.
Imm. 2. Timmissanik eqqissisimatitaasunik kiisalu taakkua ilamernginik nioqqutissianillu nuunnermut atatillugu annissinermi Aalisarnermut, Piniarnermut Nunalerinermullu Naalakkersuisoqarfiup akuersissuteqarsimanissaa piumasaqaataavoq.
Imm. 3. Timmissanik nujuartanik kiisalu taakkua ilamernginik taakkuninngalu nioqqutissianik ilisimatusarnermi imaluunniit ilinniartitsinermi siunertanut atorneqartussanik annissisoqassappat Aalisarnermut, Piniarnermut Nunalerinermullu Naalakkersuisoqarfiup akuersissuteqaqqaarsimanissaa piumasaqaataavoq.
Imm. 4. Timmissat eqqissisimatitaalluinnartut toqungasut nassaat taakkualu ilamerngi pinngortitami qimaannarneqanngippata ingerlaannartumik Pinngortitaleriffimmut imaluunniit politiinut, Pinngortitaleriffimmut tunniunneqanissaannik isumaginnittussanut, tunniunneqassapput.

Timmiaateqarneq, taakkunannga anisitsineq nalunaaqutsersuinerlu

§ 18. Kalaallit Nunaanni nujuartanik timmiaateqarneq inerteqqutaavoq.
Imm. 2. Timmissanik nujuartanik ajoqusersimasunik paaqqutarinninnermi Aalisarnermut, Piniarnermut Nunalerinermullu Naalakkersuisoqarfik imm. 1-ip saneqqunneqarnissaanut immikkut akuersissuteqarsinnaavoq.

§ 19. Timmissanik Kalaallit Nunaannut eqqunneqartunik tamakkulu piaraannik pinngortitamut anisitsineq inerteqqutaavoq.

§ 20. Timmissanik nujuartanik nalunaaqutsersuisoqassappat, ilisimatusaatigalugu timmissanik nujuartanik misissugassanik katersisoqassappat Aalisarnermut, Piniarnermut Nunalerinermullu Naalakkersuisoqarfiup akuersissuteqaqqaarsimanissaa piumasaqaataavoq.

Immikkut akuersissuteqarneq

§ 21. Nalunaarummi matumani aalajangersakkanit Aalisarnermut, Piniarnermut Nunalerinermullu Naalakkersuisoqarfik peqqissuunissamik, ilisimatusarnermik atuartitsinermillu siunertanut kiisalu attaveqaqatigiinnik pissutsit aamma timmisartukkut angallannerup isumannaatsuunissaata qulakkeernissaanut immikkut akuersissuteqarsinnaavoq.

Kommunit ileqqoreqqusaat 

§ 22. Kommunalbestyrelsi kommunip ileqqoreqqusaatigut timmissanik illersuinermut maleruaqqusaliorsinnaavoq §§ 4 – 8-mi aalajangersarneqarsimasunit sakkortunerusunik. Kommunip ileqqoreqqusaa Naalakkersuisunut ilaasortamit akuersissutigalugu atulersinneqassaaq.

Pineqaatissiinerit

§ 23. Nalunaarummi matumani § 2, §§ 3-7, § 8, imm. 2, § 9, imm. 1, § 10, imm. 1, §§ 11-14, §§ 16-17, § 18, imm. 1 aamma §§ 19-20-mi aalajangersakkanik unioqqutitsinerit akiliisitsinermik pineqaatissiissutaasinnaapput.

Atulersitsineq

§ 24. Nalunaarut manna atuutilerpoq ulloq 2. marts 2009.
Imm. 2. Peqatigitillugu timmissat illersorneqarnerat pillugu Namminersornerullutik Oqartussat nalunaarutaat nr. 5, 29. februar 2008-meersoq atorunnaarpoq.

Namminersornerullutik Oqartussat, ulloq 2. marts 2009

Finn Karlsen

/

Amalie Jessen

---

Ilanngussaq 1

Ilanngussaq 2

Ilanngussaq 3

Ilanngussaq 4