Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi § 82, imm. 5, aamma § 83, imm. 6, naapertorlugit aalajangersarneqarpoq:

§ 1. Ineqarneq pillugu maalaaruteqartarfik, Namminersornerullutik Oqartussat kommunillu inissiaataanni attartortittakkani attartortitsisup attartortullu akornanni maalaarutinik allaffissornikkut inaarutaasumik aalajangiisartussaq pilersinneqarpoq.
Imm. 2. Naalakkersuisut ineqarneq pillugu maalaaruteqartarfimmut allatsitut ikiuutissapput.

§ 2. Allattoqarfiup suliassaraa:
1) Ineqarneq pillugu Maalaaruteqartarfimmut allakkatigut, oqarasuaatikkut aammalu nammineq ornigullutik saaffiginnittunut akissuteqartarnissaq.
2) Suliassat Ineqarneq pillugu Maalaaruteqartarfimmi suliarineqartussat pillugit paasissutissiisarnermigut piareersaasarnermigullu siulittaasumut ikiuunnissaq.

§ 3. Aalajangiinerit allattoqarfiup Ineqarneq pillugu Maalaaruteqartarfik sinnerlugu piginnaatitaaffigisai allattaavinnut allanneqassapput, aalajangiiffigineqarnerisalu kingorna kingusinnerpaamik sapaatit akunnerata ataatsip qaangiunnerani siulittaasumut allakkatigut nalunaarutigineqassallutik.

§ 4. Maalaarutip piareersarneqarneranut atatillugu takuniaaneq Ineqarneq pillugu Maalaaruteqartarfiup suliamik isumagisaqarneranut piffissaliussat kinguartinneqarnerinik kinguneqarsinnaavoq. 

Ataatsimiittarnerit akulikissusiat suleriaaserlu

§ 5. Ineqarneq pillugu Maalaaruteqartarfik maalaaruteqartarfiup ataatsimiinnerani aalajangiisassaaq.
Imm. 2. Maalaaruteqartarfimmi ataatsimiinnissaq kingusinnerpaamik sapaatit akunnerinik sisamanik sioqqullugu ineqarneq pillugu maalaaruteqartarfimmi ilaasortat tamarmik sulianut ataasiakkaanut siulittaasup inassutaanik allaganngorlugu taamatullu atortut elektroniskiusut aqqutigalugit tigusaqartassapput.

§ 6. Ineqarneq pillugu Maalaaruteqartarfik siulittaasup inassutaa tunngavigalugu aalajangiisassaaq.
Imm. 2. Pisuni immikkut ittuni, maalaaruteqartarfiup ataatsimiinnerani suliap annertunerusumik misissuiffigineqarnissaa pisariaqartinneqartoq paasinarsisimappat, suliap aalajangiiffigineqarnissaata kinguartinneqarnissaa siulittaasup aalajangersinnaavaa.

§ 7. Maalaaruteqartarfiup ataatsimiittarnera ukiumut minnerpaamik pingasoriarluni, imaluunniit siulittaasumit tamanna pisariaqartutut naliliiffigineqartillugu pisassaaq. Maalaaruteqartarfiup ataatsimiittarnerini ukiumut minnerpaamik ataasiarluni Ineqarneq pillugu Maalaaruteqartarfimmi ilaasortat tamarmik ornigullutik peqataasassapput.
Imm. 2. Siulittaasoq maalaaruteqartarfimmi ataatsimiinnissaq minnerpaamik sapaatit akunneri marluk sioqqullugit ataatsimiigiaqqusisassaaq.
Imm. 3. Siulittaasoq aalajangersinnaavoq maalaarutit attartukkamut ataatsimut tunngasut arlallit, ataatsimoortumik kattussiffiusumillu aalajangiinissaq siunertaralugu maalaaruteqartarfiup ataatsimiinnerani ataatsimi suliarineqassasut.

§ 8. Siulittaasoq maalaaruteqartarfiup ataatsimiinnerata aallartinnerani suliat allattoqarfimmit aalajangiiffigineqartut amerlassusaat imaallu pillugit nassuiaateqassaaq.

§ 9. Ineqarneq pillugu Maalaaruteqartarfiup ataatsimiinneri allattaavinnut allattorneqartassapput.
Imm. 2. Allattaavinni makku paasissutissiissutigineqassapput:
1) Suliat maalaaruteqartarfiup ataatsimiinnerani suliarineqartut amerlassusaat katillugit.
2) Siulittaasup maalaaruteqartarfimmut inassuteqaatitut saqqummiussaa akuerineqarsimanersoq.
3) Ineqarneq pillugu Maalaaruteqartarfiup aalajangiinera.
4) Ineqarneq pillugu Maalaaruteqartarfimmi aalajangiinermut tunngavilersuutaasoq.
5) Ineqarneq pillugu Maalaaruteqartarfimmi aalajangiinermut inatsisitigut tunngaviusoq.
Imm. 3. Allattaaviit maalaaruteqartarfiup ataatsimeereerneri tamaasa ilaasortanit ataatsimiinnermut peqataasunit atsiorneqartassapput. Aalajangiineq isumaqatigiissutigineqanngippat isumaqatigiinngissutaasoq allattaavinnut allanneqassaaq. Pineqartup allaanerusumik isumaqarnerminut naatsumik tunngavilersuutigisani allattaavinnut allanneqassasoq piumasarisinnaavaat.
Imm. 4. Allattaaviit maalaaruteqartarfiup ataatsimiinnerata kingorna kingusinnerpaamik sapaatit akunnerata ataatsip qaangiunnerani siulittaasumiit allattoqarfimmut tunniunneqassapput.
Imm. 5. Allattaaviit allattoqarfimmi toqqortarineqassapput, taamatullu aamma atortut elektroniskiusut atorlugit toqqortarineqassallutik.

§ 10. Maalaaruteqartarfimmi aalajangiinerup kingorna kingusinnerpaamik sapaatit akunnerisa marluk qaangiunnerini aalajangiineq attartortumut attartortitsisumullu nalunaarutigineqarsimassaaq. Tamatumunnga atatillugu attartortitsisup attartortullu akornanni isumaqatigiinngissutaasup eqqartuussivinnut ingerlateqqinneqarsinnaaneranut periarfissaqartoq Ineqarneq pillugu Maalaaruteqartarfiup erseqqissaatigissavaa.

§ 11. Ineqarneq pillugu Maalaaruteqarfiup aalajangiinerata nassatarisaanik attartortitsisoq iliuuseqarnissamut pisussaaffilerneqarsimappat, iluarsisassat Ineqarneq pillugu Maalaaruteqartarfiup aalajangiinerata § 10 naapertorlugu saqqummiunneqarnerata kingorna kingusinnerpaamik sapaatit akunnerisa marluk qaangiunnerini iluarsineqarsimassapput. 

Ataatsimiigiarnissamut pisussaaffeqarneq

§ 12. Siulittaasoq imaluunniit maalaaruteqartarfimmi ilaasortaq maalaaruteqartarfiup ataatsimiinneranut unioqqutitsinerunngitsumik peqataasinnaanngippat, siulittaasup imaluunniit maalaaruteqartarfimmi ilaasortap sinniisissaa ataatsimiigiassaaq.
Imm. 2. Siulittaasoq, maalaaruteqartarfimmi ilaasortaq taakkuluunniit sinniisissaat atuuttussamik ataatsimiigiaqquneqarsimagaluarlutik maalaaruteqartarfiup ataatsimiinnerannut peqataanngippata, maalaaruteqartarfimmi ataatsimiinnerup kingorna kingusinnerpaamik sapaatit akunnerisa marluk qaangiunnerini Ineqarneq pillugu Maalaaruteqartarfiup siulittaasuanit tamanna pillugu nalunaarfigineqassapput. Ilisimatitsisoqareernerani Naalakkersuisut pineqartumut allakkatigut uparuaassapput.
Imm. 3. Takkutinngitsoortuartoqartillugu Naalakkersuisut pineqartup qinigaanera atorunnaarsinniarlugu aalajangersinnaapput.
Imm. 4. Innersuussuteqarnissamut piginnaatitaasoq qinigaanerup imm. 3 naapertorlugu atorunnaarsinneqarnerata kingorna kingusinerpaamik sapaatit akunnerisa pingasut qaangiunnerini inummik nutaamik Ineqarneq pillugu Maalaaruteqartarfimmut inassuteqassaaq. 

Atortuulersitsineq

§ 13. Nalunaarut 1. februar 2009-imi atuutilerpoq.
Imm. 2. Peqatigisaanik ineqarneq pillugu maalaaruteqartarfiup sulinera pillugu Namminersornerullutik Oqartussat nalunaarutaat nr. 4, 13. februar 2006-imeersoq atorunnaarsinneqarpoq.

Namminersornerullutik Oqartussat, ulloq 26. november 2008

Kim Kielsen

/

Steffen Ulrich-Lynge