Kapitali 1
Agguaanneqartarnerat

§ 1. Pinnguaatit, eqqorniaasitsinerit eqquiniunnerillu ilaat pillugit inatsit naapertorlugu pissarsiassat ukiumoortumik Kalaallit Nunaannut pisassanngortinneqartartut Naalakkersuisut tamanut iluaqutaasussamik siunertanut makkununnga agguaatissavaat:
1) 50%-ii timersornernut tamanit peqataaffigineqarsinnaasunut, innarluutillit utoqqaallu timersornerat ilanngullugu,
2) 9,1%-ii piukkunnaatillit pikkorinnerillu timersornerinut,
3) 13,6%-ii meeqqat inuusuttullu peqatigiiffiinut, aamma
4) 27,3%-ii tamanut iluaqutaasussamik siunertanut allanut, taamatuttaaq kulturimut tunngatillugu siunertanut, inunnik qaammarsaanermut siunertanut, nappaatinik akiuiniarnermut pinaveersaartitsinermullu siunertanut, inooqatigiinnermut tunngasunut siunertanut, asimiititsinissanik siunertanut aamma tamanut iluaqutaasussanik ilisimatusarniarluni siunertanut.
Imm. 2. Aningaasat Kalaallit Nunaanni tipsernermit lottornermillu naalagaaffimmut akitsuutip 2004-mi atorunnaarsinneqartup annertoqatai siunertanut imm. 1-imi taaneqartunit allaanerusunut atorneqarsinnaapput.
Imm. 3. Naalakkersuisut aningaasaateqarfinnut suliniaqatigiiffinnullu allanut tipsernermit lottornermillu iluanaarutinik tamanut iluaqutaasussanik siunertanut agguaassisartunut imm. 1-imi taaneqartutut tamanut iluaqutaasussanik siunertanut tapiissuteqartoqarsinnaatillugu ani-ngaasanik tunissuteqarnissaq pillugu isumaqatigiissuteqarsinnaapput. Aningaasanik tunissutissatut isumaqatigiissutigineqartut pissarsiassanit ukiumoortumik Kalaallit Nunaannut pisassanngortinneqartunit imm. 1-imi taaneqartutut agguaassisoqartinnagu ilanngaatigineqassapput.

§ 2. Atugassanngortitat § 1, imm. 1-imi taaneqartut imatut agguaanneqassapput:
1) Atugassanngortitat § 1, imm. 1, nr. 1-imi taaneqartut Kalaallit Nunaanni Timersoqatigiit Kattuffiannut, timersornernut tamanit peqataaffigineqarsinnaasunut, innarluutillit utoqqaallu timersornerat ilanngullugu, agguaasseqqinnermik isumaginnittussamut agguaanneqassapput.
2) Atugassanngortitat § 1, imm. 1, nr. 2-mi taaneqartut Team Grønlandimut, piukkunnaatillit pikkorinnerillu timersornerinut agguaasseqqinnermik isumaginnittussamut agguaanneqassapput.
3) Atugassanngortitat § 1, imm. 1, nr. 3-mi taaneqartut Sorlammut, meeqqat inuusuttullu peqatigiiffiinut agguaasseqqinnermik isumaginnittussamut agguaanneqassapput, aamma
4) Atugassanngortitat § 1, imm. 1, nr. 4-mi taaneqartut qinnuteqaateqartoqarneratigut Naalakkersuisunit agguaanneqassapput.
Imm. 2. Imm. 1, nr. 1-3-mi atugassanngortitat taaneqartut agguaateqqinneranni allaffissornikkut aqutsineq Naalakkersuisut tigusinnaavaat imatut pisoqartillugu:
1) Soqutigisaqaqatigiiffiup Naalakkersuisut taamaaliortoqarnissaanik kissaateqarfigippagit.
2) Pingaarutilimmik aalajangersimasumillu tunngavilersukkamik soqutigisaqaqatigiiffik suliassaminik isumaginnissinnaajunnaarsorineqalerpat.

Kapitali 2
Suliassat suliarineqartarnerat tapiiffigineqarnissamullu piumasaqaatit

§ 3. Pisortat ingerlatsineranni suliassat suliarineqartarnerat pillugu Inatsisartut inatsisaanni pisortat ingerlatsineranni tamanut saqqummiussisussaatitaaneq pillugu inatsisartut inatsisaanni aammalu Inatsisartut Ombudsmandiat pillugu inatsisartut inatsisaanni aalajangersakkat § 2, imm. 1, nr. 1-imiit 3-mut soqutigisaqaqatigiiffinnut taaneqartunut atuupput taakku Inatsisartut inatsisaat manna taannalu malillugu malittarisassat atuuttussanngortinneqartut naapertorlugit Naalakkersuisut sinnerlugit aalajangiinissamut piginnaatitaaffilerneqarsimappata.

§ 4. Inunnut nunami maani najugaqartunut imaluunniit peqatigiiffinnut, soqutigisaqaqati-giiffinnut, suliffeqarfinnut, oqartussaasunut il.il. Kalaallit Nunaanni angerlarsimaffeqartunut taamaallaat tapiissuteqartoqarsinnaavoq.
Imm. 2. Imm. 1-imi aalajangersagaq apeqqutaatinnagu Team Grønland inunnut Kalaallit Nunaata avataani najugalinnut tapiissuteqarsinnaavoq tapiissutisisussat Naalakkersuisunit timersornermut piukkunnaatilittut imaluunniit timersortartutut pikkorinnertut akuersissutigineqarsimappata.
Imm. 3. Imm. 1-imi aalajangersagaq qanorluunniit ikkaluarpat Avalak tapiiffigineqarsinnaassaaq.

Kapitali 3
Nakkutilliineq

§ 5. Soqutigisaqaqatigiiffiit § 2, imm. 1, nr. 1-imiit 3-mut taaneqartut kingusinnerpaamik 1. juunimi Naalakkersuisunut ukiumut naatsorsuuteqarfiusumut qaangiuttumut naatsorsuutitik kukkunersiorneqarsimasut naatsorsuutinullu atortussat allat nassiutissavaat. Naatsorsuutit ukiumi qaammatisiuteqarfiusumi qaangiuttumi atugassanngortinneqartunit agguaanneqarsimasut naatsorsuutaannik kukkunersiuisumit naalagaaffimmit akuerisaasumit imaluunniit nalunaarsorneqarsimasumit atsiorneqarsimasunik ilanngussivigineqassapput.
Imm. 2. Naatsorsuutit, naatsorsuutinut atortussat allat naatsorsukkallu imm. 1-imi taaneqartut piffissaq eqqorlugu tiguneqanngippata, imaluunniit Naalakkersuisut paasippassuk tipsernermit lottornermillu iluanaarutit siunertanut naapertuuttumik, § 1, imm. 1 takuuk, atorneqanngitsut, Naalakkersuisut tipsernermit lottornermillu iluanaarutinit soqutigisaqaqatigiiffinnut siunissami akiliutigineqartussat kinguartissinnaavaat naatsorsuutit, naatsorsuutinut atortussat allat naatsorsukkallu nassiunneqareerserlugit imaluunniit tipsernermit lottornermillu iluanaarutit siunertanut naapertuuttumik atorneqarnissaat isumannaarneqareerserlugu. Naalakkersuisut akiliutigineqartussat kinguartinneqarnerannut atatillugu atugassanngortinneqartunik agguaasseqqittarnerup allaffissornikkut aqunneqarnera tigugallarsinnaavaat.

§ 6. Tapiissutisisartut soqutigisaqaqatigiiffiillu § 2, imm. 1, nr. 1-imiit 3-mut taaneqartut piumaffigineqarnermikkut paasissutissat atorfissaqartinneqartut tamaasa Naalakkersuisunut nassiuttassavaat, taamatuttaaq qinnuteqaatit, aalajangiinerit, agguaassinermut najoqqutassat, ilaasortat amerlassusiat, akiliutit il.il. pillugit paasissutissat.

§ 7. Tapiissutigineqartut tamakkiisumik ilaannakuusumilluunniit utertillugit akileqquneqarsinnaapput, qinnuteqaateqartoq eqqunngitsunik paasissutissiisimappat, tapiissuteqarnissamut piumasaqaatit naammassineqarsimanngippata imaluunniit suliarineqartartut sinneqartoorutaasimappata.

Kapitali 4
Piginnaatitsissutit

§ 8. Naalakkersuisut qinnuteqaatinut piumasaqaatit pillugit erseqqinnerusunik malittarisassanik aalajangersaasinnaapput, taamatuttaaq qinnuteqaatit suliarineqassappata piumasaqaataassasoq qinnuteqaateqartut uppernarsaatissanik saqqummiussissasut tassaasunik pilersaarutit allaaserineqarnerinik, missingersuutinik, ilaasortat amerlassusiinik, suliassatut pilersaarutinik assigisaannilluunniit.
Imm. 2. Naalakkersuisut naatsorsuutinik tunniussisarneq pillugu erseqqinnerusunik malittarisassanik aalajangersaasinnaapput, tassunga ilanngullugu allat § 2, imm. 1, nr. 1-imiit 3-mut soqutigisaqaqatigiiffiit taaneqanngitsut naatsorsuutinik saqqummiussissasut, tipsernermit lottornermillu iluanaarutinit pissarsisimagunik.
Imm. 3. Naalakkersuisut tipsernermit lottornermillu iluanaarutinik agguaassisarneq pillugu paasissutissiisarnermut tipsernermit lottornermillu iluanaarutinik atuisarneq pillugu erseqqinnerusunik malittarisassanik aalajangersaasinnaapput.
Imm. 4. § 2-mi imm.1, nr. 1-3 naapertorlugu naalakkersuisut kattuffinnit taakkartorneqartunit tapiissutinik agguaassinermi aalajangersakkat pillugit maalaarutinik suliaqarnissamut atatillugu malittarisassiorsinnaassapput.

Kapitali 5
Atuutilerfia

§ 9. Inatsisartut inatsisaat 1. juli 2006-imi atuutilerpoq.
Imm. 2. Inatsisartut inatsisaata atuutilerneratigut tipsernermit lottornermillu iluanaarutinik agguaassisarneq pillugu Inatsisartut inatsisaat nr. 13, 11. novembari 2000-imeersoq atorunnaarsinneqarpoq.
Imm. 3. Malittarisassat, tipsernermit lottornermillu iluanaarutinik agguaassisarneq pillugu Inatsisartut inatsisaat nr. 13, 11. november 2000-imeersoq najoqqutaralugu aalajangersarneqartut atuutiinnassapput matumani imaluunniit Inatsisartut inatsisaanni allani inatsisinik tun-ngaveqarluni malittarisassatigut aalajangersarneqartutigut taarserneqarnissamik atorunnaarsinneqarnissamilluunniit tungaanut.

Namminersornerullutik Oqartussat, ulloq 1. juni 2006

Hans Enoksen

/

Doris Jakobsen