§ 1

Inissianik attartortitsisarneq pillugu Inatsisartut peqqussutaannut nr. 2-mut, 12. maj 2005-imeersumut makku allannguutigitinneqarput:

1. § 5, imm. 1, nr. 2-mi "§ 24, imm. 1", "§ 24, imm. 1 aamma § 24a, imm. 1."-imut allanngortinneqassaaq.

2. § 11, imm. 1, imatut oqaasertalerneqassaaq:
"Sulisunut naalagaaffiup sullissiviini inissiamut innersuunneqarsinnaatitaallutik atorfeqartunut inissianik innersuussisarneq pillugu danskit naalagaaffiannut Naalakkersuisut Rigsombudi aqqutigalugu isumaqatigiissuteqarsinnaapput.".

3. § 15, imm. 2, atorunnaarsinneqarpoq.

Tamatuma kingorna imm. 3 imm. 2-inngortinneqarpoq.

4. § 21 imatut oqaasertalerneqassaaq:
"§ 21. Attartortoq sulisunut inissiami najugaqartoq aammalu inissiamik attartortittakkamik nalinginnaasumik neqeroorfigineqartoq, sulisunut inissiaq najukkani inissianik nalinginnaasumik attartortitsisarnermi piumasaqaatit malillugit tigusinnaavaa, taamaattorli tak. imm. 4.
Imm. 2. Attartortoq ukiuni kingullerni arfineq marlunni sulisunut inissiami najugaqarsimasoq pisinnaatitaavoq sulisunut inissiaq najukkani inissiatut nalinginnaasumik attartortittakkatut tigussallugu, taamaattorli tak. 4.
Imm. 3. Attartortoq soraarninngunnginnermini ukiuni pingasuni kingullerni sulisunut inissiami najugaqarsimasoq pisinnaatitaavoq sulisunut inissiaq najukkani inissiatut nalinginnaasumik attartortittakkatut tigussallugu, taamaattorli tak. 4.
Imm. 4. Imm. 1-3 naapertorlugit pisinnaatitaaffik atuutissanngilaq:
1) Naalagaaffiit sullissiviisa ilaanni atorfeqartunut inissianut innersuunneqartunut, tak. § 11.
2) Inissianut Naalakkersuisoqarfinni ataasiakkaani Naalakkersuisunut ilaasortanut pisortanullu inniminnerneqarsimasunut.
3) Pisortanut inissianut, Namminersornerullutik Oqartussat qitiusumik allaffeqarfiani immikkoortortani pisortanut inniminnerneqarsimasunut, tak. § 15.
4) Inissianut siunertanut aalajangersimasunut imaluunniit atorfinnut aalajangersimasunut inniminnerneqarsimasunut, tak. § 5, imm. 3.".

5. § 24 imatut oqaasertalerneqassaaq:
"§ 24. Namminersornerullutik Oqartussat imaluunniit kommunip inissiaataasa attartortittakkat ilaanni attartortut piginneqatigiilluni inissiaatillit peqatigiiffiannik pilersitsisimappata, aammalu inissianik attartukkaminnik piginneqatigiilluni inissiatut tigusinissaminnik Namminersornerullutik Oqartussanut imaluunniit kommunimut qinnuteqarsimappata, attartortitsisup §§5-imi aamma 65-imi aalajangersakkat sanioqqussinnaavaat. Piffissamit qinnuteqarfiusumit Namminersornerullutik Oqartussat imaluunniit kommunip piginneqatigiilluni inissiaatillit peqatigiiffiat inummik, piginneqatigiilluni inissiaatillit peqatigiiffiata utaqqisunut allattuiffiani allatsisimasumik inissiamut inueruttumut innersuussinissamut piginnaatissinnaavaa.
Imm. 2. Namminersornerullutik Oqartussat imaluunniit kommunip attartortoq, tak. imm. 1, inissiamik najukkaminik piginneqatigiilluni inissiatut tigusinissamik kissaateqanngitsoq illoqarfimmi najukkamini inissiamik najugaata taamaaqataanik neqeroorfigissavaa. Inissiaq a-ngissutsimigut neqeroorutip saqqummiunnerani inoqutigiinni inuit amerlassusaannut naapertuutissaaq, tak. § 6, imm. 2 aamma 3.
Imm. 3. Imm. 2 naapertorlugu inissiamut allamut innersuunneqarnissamut pisinnaatitaaffik taamaallaat atuutissaaq attartortup attartornermut isumaqatigiissut malissimappagu. Pissutsinik pingaaruteqangaanngitsunik imaluunniit attartortumit iluarsineqareersimasunik attartortitsisoq pissutissarsiorsinnaatitaanngilaq.
Imm. 4. Attartortup imm. 2 naapertorlugu neqeroorut allannguiniarluni sulinermut atatillugu akuerissappagu, attartortitsisup attartortoq nuuttussanngortoq nuunnermut atatillugu taarsiiffigissavaa, taakkulu tunngaviusumik aningaasartai 1.200 kr.-inik, kiisalu inimut najugaqarfiusumut ataatsimut 1.000 kr.-inik amerlassuseqartinneqassapput. Taarsiissutit aningaasartaat inaarutaasumik allannguinermut atatillugu aningaasartuutinut tamakkiisunut ilanngunneqassapput. Nuunneq kapitali 12-imi maleruagassat naapertorlugit ingerlanneqassaaq.
Imm. 5. Attartortup imm. 2 naapertorlugu neqeroorut akuerinngippagu attartorneq ingerlaannassaaq. Ukiumoortumik attartornermut akiliutip aalajangersarneqarnerani allaffissornermut akiliut 4.200 kr.-inik, illuutip tunniunneqarnerani aningaasaaliissutinit iluanaarutissat 1,5%-inik, kiisalu kvadratmeterimut ataatsimut ingerlatsinermut, aserfallatsaaliuinermut illuartitsinernullu akiliutit 405 kr.-inik annertussusilerneqassapput. Attartornermut akiliutip annertussusissaa ukiumi pineqartumi Inatsisartut aningaasanut inatsisaanni oqaasertaliussinikkut allanngortinneqarsinnaavoq.
Imm. 6. Attartorneq imm. 5 naapertorlugu ingerlatiinnarneqassappat, attartortup Namminersornerullutik Oqartussanut imaluunniit kommunimut pisinnaatitaaffii atuutsinneqarsinnaasut taamaallaat tassaassapput, Namminersornerullutik Oqartussat imaluunniit kommunip piginneqataasutut piginneqatigiilluni inissiaatillit peqatigiiffiannut pisinnaatitaaffigisai.
Imm. 7. Attartortup inissiaq attartukkani piffissap qanorluunniit ilinerani piginneqatigiilluni inissiatut tigusinnaavaa.".

6. § 24-p kingorna kapitali 2-mi ikkunneqassaaq:
"§ 24a. Namminersornerullutik Oqartussat imaluunniit kommunii illuutaanni attartortittakkani annerpaamik 16-inik inissiartaqartuni attartortut affaat sinnerlugit inissiamik piginnittut peqatigiiffiannik pilersitsisimappata, aammalu inissianik attartortitakkanik inissiatut nammineq pigisatut tigusinissamik allakkatigut Namminersornerullutik Oqartussanut imaluunniit kommunimut qinnuteqaateqarsimappata, attartortitsisup §§ 5-imi aamma 65-imi aalajangersakkat sanioqqussinnaavai.
Imm. 2. § 24, imm. 2-7 taamatuttaaq inissianik attartortittakkanik inissiatut nammineq pigisatut allanngortinneqarnerinut atatillugu atuutissaaq, tak. im. 1
Imm. 3. Attartortup pissutsit imm. 1-imi taaneqartut saniatigut allanik peqquteqarluni inissiap attartukkami inissiatut nammineq pigisatut tigunissaanik kissaateqarpat, illuummi attartortut allat piumasaqaatit atuutereersut tunngavigalugit attartortutut inissisimaannassapput.".

7.  § 26, imm. 3 aamma 4, atorunnaarsinneqarput.

8. § 32-mi imm. 8-tut ikkunneqassaaq:
"Imm. 8. Attartortitsisup inissiaataasa inissisimaffiannut pitsanngorsaanissamut imaluunniit aningaasaleeqqinnissamut aningaasartuutinut matussutissanik attartortitsisoq Namminersornerullutik Oqartussat kommunillu ilaqutariinnut arlalinnut illuutaanni attartortunut akiliisitsisinnaavoq. Akiliutissap annertussusissaa ukiumi pineqartumi Inatsisartut aningaasanut inatsisaanni oqaasertaliussinikkut annertussusilerneqassaaq.".

9. § 63, imm. 1-imi "taamaattorli tak. imm. 2-4" imatut allanngortinneqassaaq: "taamaattorli tak. imm. 2-5.".

10. § 63-imi imm. 5-itut ikkunneqassaaq:
"Imm. 5. §§ 58-imi aamma 59-imi aalajangersakkat inissianut siunertanut aalajangersimasunut inniminnerneqarsimasunut, imaluunniit inissianut immikkut ittumik ilusilersugaasunut aammalu inissianut innarluutilinnut atugassanngortitaasunut atuutissanngillat.".

11. § 65, imm. 1, imatut oqaasertalerneqassaaq:
"Sulisunut inissiamik attartorneq atorfeqarnerup unitsinneqarnerani atorunnaassaaq, tamatumunngalu atatillugu inissiaq qimanneqassalluni. Atorfilik pisussaavoq inissiaq allakkatigut taamaatissallugu. Atorfillip akiligassat ingerlaavartut attartornermut attuumassutillit, taamaatitsinissamut piffissarititaasup nalinginnaasup naanissaata tungaanut akiligassarai, taamaattorli tak. § 70, imm. 3.".

12. § 73 imatut oqaasertalerneqassaaq:
"§ 73. Inissiani attartortittakkani pisortanit pigineqartuni attartortitsisup ineqarnermut, imermut, kiassarnermut imaluunniit qularnaveeqqutissamut akiliutissanut akiliinngitsoornerup kingunerisaanik attartornermut isumaqatigiissut atorunnaarsissava, tak. §§ 37, imm. 1, 38, imm. 1, aamma 74, imm. 1. Inissiani attartortittakkani namminersortunit pigineqartuni attartortitsisup peqqutitut taaneqartut tunngavigalugit attartornermut isumaqatigiissut atorunnaarsissinnaavaa.
Imm. 2. Attartortitsisup attartornermut isumaqatigiissut atorunnaarsissinnaavaa:
1) Inissiaq unioqqutitsisumik atorneqarpat, tak. § 48, imm. 2 aamma 3.
2) Inissiaq ikerinnaannakkut qimanneqarpat, tak. § 48, imm. 5.
3) Inatsisini piumasarineqartut unioqqutillugit attartortitsisoq inissiamut isernissaanut itigartinneqarpat, tak. § 49, imm. 1.
4) Ileqqorissaarnissamut maleruagassat unioqqutinneqarpata, tak. § 50.
Imm. 3. Attartortitsisup aatsaat imm. 1 aamma 2 naapertorlugit attartorneq atorunnaarsissinnaavaapissutsit attartortumut assuarliutaasut annertuumik pingaaruteqarpata.
Imm. 4. Pissutsit imm. 1-imi aamma imm. 2-mi taaneqartut attartortitsisup tunngaviginiarsinnaanngilai, pissutsit attartortitsisup attartornermut isumaqatigiissummik atorunnaarsitsinnginnerani aaqqinneqarsimappata.
Imm. 5. Attartortitsisup pissutsit imm. 2-mi taaneqartut tunngavigalugit attartornermik atorunnaarsitsinnginnerani attartortitsisup attartortoq pissutsit aaqqeqqullugit peqqussavaa.
Imm. 6. Attartortoq attartukkaminit anisinneqarpat, attartortitsisup kommunimi inunnik isumaginnittoqarfik tamanna pillugu ilisimatissavaa. Ilisimatitsinermi attartortitsisup anisitsinermut nalunaarutip assilinera nassiutissavaa.

13. § 81-imi imm. 4-p kingorna immikkoortoq nutaatut ikkunneqassaaq:
"Imm. 5. Namminersornerullutik Oqartussat imaluunniip kommunip imm. 1 naapertorlugu nakkutilliinera ilaatigut aningaasatigut ingerlatsinermik nakkutilliinermut ilaatigullu avataaniit aqutsisup allaffissornermi suliassaanik allanik nakkutilliinermut tunngasuuvoq.".

Tamatuma kingunerisaanik imm. 5 imm. 6-inngussaaq.

14. § 84-imi imm. 5-itut ikkunneqassaaq:
"Imm. 5. Pissutsit imm. 1-imi taaneqartut pillugit maalaarutit Ineqarneq pillugu Maalaaruteqartarfiup saniatigut allaffissornikkut oqartussaasunut allanut saqqummiunneqarsinnaanngillat.".

§ 2

Inatsisartut peqqussutaat 1. januar 2007-imi atuutilerpoq. § 1, nr. 4 aamma 5 piginneqatigiilluni inissiaatillit peqatigiiffiinut aamma nammineq pigisanik inissiaatillit peqatigiiffiinut ulloq atuutilerfissaq sioqqullugu pilersinneqarsimasunut atuutissanngillat.

Hans Enoksen

/

Jørgen Wæver Johansen