§ 1

Ikuallannaveersaartitsineq qatserinerlu pillugit Inatsisartut peqqussutaat nr. 6, 30. oktober 1992-imeersoq imatut allannguuteqartinneqassaaq:

1. Kapitali 6-ip qulequtaa imatut oqaasertaliorneqassaaq:
"Qaartoornissamik ikuallattoornissamillu pinaveersaartitsineq, akuersissut, uppernarsaatissanik ujaasineq akitsuutillu"

2. § 25 imatut oqaasertaliorneqassaaq:
"§ 25. Naalakkersuisut akoorutissanik qaartuujasunik eqqussinissamut, annissinissamut, toqqortaqarnissamut, tuniniaanissamut, pisinissamut, tunniussinissamut, assartuinissamut, atuinissamut sananissamullu, kiisalu suliffeqarfinnik akoorutissanik qaartuujasunik toqqortaqarfiusunik, atuiffiusunik sanaffiusartunillu aaqqissuussinissamik maleruagassiorsinnaapput.
Imm. 2. Naalakkersuisut ikuallannaveersaartitsineq aammalu ikuallattoqalersillugu qatserinermi annaassiniarnermilu periarfissanik illersorneqarsinnaasunik qulakkeerinissaq pillugu maleruagassiorsinnaapput.
Imm. 3. Naalakkersuisut innermik qaammaqqutinillu kiisalu ikumatitsivinnik aamma qaammaqqusersuinermut, nukissiornermut kiassarnermullu atortunik allanik atuinissaq pillugu maleruagassiorsinnaapput.
Imm. 4. Naalakkersuisut akoorutissat suikkaasut, imerpalasut silaannartulluunniit pissusillit ikuallajasut pillugit maleruagassiorsinnaapput.

3. § 25-p kingorna kapitel 6-imut ikkunneqassaaq:
"§ 25 a. Naalakkersuisut inummut imaluunniit inatsisitigut pisinnaatitaasumut pisussaatitaasumullu ataatsimut amerlanerusunulluunniit akoorutissanik qaartuujasunik ikuallajasunilluunniit eqqussinissamut, annissinissamut, toqqortaqarnissamut, tuniniaanissamut, tunniussinissamut, assartuinissamut, atuinissamut sananissamulluunniit kisermaassinissamik akuersissuteqarnikkut nalunaaruteqarsinnaapput.
Imm. 2. Naalakkersuisut kisermaassinissamik nalunaaruteqarnermut atatillugu atugassarititaasussanik aalajangersaasinnaapput, tak. imm. 1.

§ 25 b. Naalakkersuisut maleruagassanik Inatsisartut peqqussutaat naapertorlugu aalaja-ngersarneqartunik unioqqutitsisuusorineqartumut pisariaqartumik uppernarsaasiinikkut aammalu siumoortumik eqqartuussisumit aalajangiiffiunngitsumik misissuiartorlutik isersinnaatitaapput, tamanna pisariaqartutut naliliiffigineqarpat. Piginnittup taassumalu sulisuisa Naalakkersuisut misissuineranni pisariaqartitaannik ilitsersuutissavaat ikiussallugillu. Misissuinerli imm. 1-imi taaneqartoq inini nammineerluni angerlarsimaffittut imaluunniit sunngiffimmi angerlarsimaffittut atorneqartuni ingerlanneqarsinnaanngilaq.

§ 25 c. Naalakkersuisut akoorutissanik qaartuujasunik pisinissamut atuinissamullu akuersissusiornerminnut akuersissummillu nutarterinerminnut, qaartiterisartut pisortaattut akuersissusiornerminnut akuersissummillu nutarterinerminnut kiisalu qaartartuusivinnik akuersissusior-nerminnut atatillugu akiliuteqartitsisassapput. Akiliutissaq Inatsisartut aningaasanut inatsisaanni oqaasertaliinikkut aalajangersarneqartassaaq.

§ 25 d. Maleruagassani § 25 naapertorlugu aalajangersarneqartuni Naalakkersuisut akuersissutitut akuerisaattulluunniit nalunaarutigisaasa utertinneqarsinnaanera aalajangerneqarsinnaavoq."

4. § 26, imm. 2 aamma 3 imatut oqaasertaliorneqassapput:
"Imm. 2. Maleruagassanik Inatsisartut peqqussutaat naapertorlugu aalajangersarneqarsimasunik unioqqutitsineq Kalaallit Nunaanni pinerluttulerinermik inatsit naapertorlugu pineqaatissiinermik kinguneqarsinnaavoq.
Imm. 3. Unioqqutitsineq, tak. imm. 1 aamma 2, inatsisitigut pisinnaatitaasumit pisussaatitaasumillu, Namminersornerullutik Oqartussanit, kommunimit imaluunniit kommunit suleqatigiiffiannit piliarineqarpat, akiliisussanngortitsineq inatsisitigut pisinnaatitaasumut pisussaatitaasumullu, Namminersornerullutik Oqartussanut, kommunimut imaluunniit kommunit suleqatigiiffiannut tutsinneqarsinnaavoq.".

5. § 26, Imm. 4, atorunnaarpoq.

Inatsisartut peqqussutaat 1. januar 2007 aallarnerfigalugu atuutilerpoq.

Hans Enoksen

/

Jørgen Wæver Johansen