Peqqinnissaqarfiup sullissineri il.il. pillugit Inatsisartut peqqussutaanni nr. 15-imi, 6 november 1997-imeersumi § 2, imm. 2, aamma § 20, naapertorlugit aalajangersarneqarput:

§ 1. Inuit, Savalimmiuni Danmarkimiluunniit najugaqartut, Kalaallit Nunaanniikkallarnerminni tassanngaannartumik napparsimalissagaluarunik imaluunniit ataavartumik nappaatiminnik tassanngaannartumik ajornerulersitsissagaluarunik, ajunaarnermik assigisaanilluunniit nalaataqassagaluarunik napparsimanermi akeqanngitsumik sullinneqarnissamut pisinnaatitaapput.
Imm. 2. Napparsimanermi akeqanngitsumik sullinneqarnissamut pisinnaatitaanermi piumasaqataavoq inuit Savalimmiuni najugaqartut savalimmiormiut sygekassiannit sullinneqarnissamut pisinnaatitaaffeqarnissaat. Savalimmiuni najugaqartut meeqqat 16-it inorlugit ukiullit angajoqqaamik ilaasortaanerannut ilaatinneqassapput.
Imm. 3. Napparsimanermi akeqanngitsumik sullinneqassagaanni nunami najugarisami napparsimanermi ikiorneqarnissamut pisinnaatitaaffeqarnermut uppernarsaat takutinneqassaaq.

§ 2. Inuit, § 1 naapertorlugu nunaqarfimmit imaluunniit najukkamit allamit ukioq naallugu najugarineqartumit illoqarfimmi napparsimmavimmut aamma illoqarfimmi napparsimmavimmit Dronning Ingridip Napparsimmavissuanut, nakorsap peqqusineratigut akeqanngitsumik angallanneqarnissaq pisinnaatitaaffigaat. Ukioq naallugu najugarineqartup avataaniit kiisalu napparsimmavimmut imaluunniit katsorsaavimmut Kalaallit Nunaata avataaniittumut angallanneqarneq inummit namminermit akilerneqassaaq.

§ 3. Pineqartup Savalimmiunut Danmarkimulluunniit uterluni angalasinnaalernissaanut piffissaq qaangerlugu katsorsaaneq il.il. ingerlanneqassanngilaq. Katsorsaanerli itigartitsissutigineqartariaqanngilaq pissutsit eqqarsaatigalugit pineqartup Savalimmiuni Danmarkimiluunniit katsorsartinnissaanut innersuussinissaq naleqqutinngitsutut naliliivigineqarpat.

§ 4. Nalunaarut atuutilerpoq ulloq 1. november 2006.

Namminersornerullutik Oqartussat, ulloq 13. september 2006

Asii Chemnitz Narup

/

Søren Rendal