§ 1

Bibliotekeqarneq pillugu Inatsisartut peqqussutaanni nr. 4, 15. oktober 1979-imeersumi, Inatsisartut peqqussutaatigut nr. 13, 30. oktober 1992-imeersukkut allanngortinneqartumi makku allannguutigitinneqassapput:

1. § 1-imi"meeqqat" kingorna ilanngunneqassaaq: ", taamaattorli tak. kapitali 4,".

2. § 6-imi, § 9, imm. 2-mi, § 10-mi aamma § 13-imi"Kulturimut atuartitaanermullu direktionip"  allanngortinneqassaaq ima: "Naalakkersuisut".

3. § 7-imi imm. 1 atorunnaarsinneqassaaq.
Imm. 2 taamaalilluni imm. 1-inngussaaq, imatullu oqaasertaqassaaq:
"Nunatta Atuagaateqarfiata pisortaa, Nuup Kommunianik isumaqatiginninniaqateqareerluni Nuup Kommuniani atuakkanik atorniartarfiit eqqarsaatigalugit atuakkanik atorniartarfiit taakkulu pitsanngorsarneqarnissaannik pilersaarusiamik suliaqassaaq, Naalakkersuisunut inassutigineqartussamik Naalakkersuisunillu akuersissutigineqartussamik."

4. Kapitali 3-p kingornagut kapitali nutaaq ikkunneqassaaq:

"Kapitali 4
Ataatsimut aalajangersakkat

§ 12b. Nunatta Atuagaateqarfia kommuninilu atuakkanik atorniartarfiit immikkut ittumik sullissinernut atorniartarfiit sullissinerannut attuumassuteqartunut, kisianni sumiiffimmi atuinermit, atortussanik atukkiussinermit nalinginnaasumillu ilitsersuinermit annertunerusunut akiliummik atuisunut akiliisitsisinnaapput. Tamatuma saniatigut aamma atortussanik Qallunaat Nunaanni, Savalimmiuni nunaniluunniit allani atuakkanik atorniartarfinnut piniarneqarsimasunik atukkiussinermi akiliummik akiliisitsisoqarsinnaavoq.
Imm. 2. Sullissinerit imm. 1-imi taaneqartut atuisumit erseqqissumik qinnutaasimassapput.
Imm. 3. Nunatta Atuagaateqarfiani aammalu kommunit atuakkanik atorniartarfiini sullissinernut imm. 1-imi taagorneqartunut akiliutit annertussusissaat qanorlu ittumik akiligassiissutigineqartarnissaat Naalakkersuisut kommunalbestyrelsillu aalajangersassavaat. Akiliut sullissinermi aningaasartuutinit qaffasinnerussanngilaq.

§ 12c. Nunatta Atuagaateqarfia kommunillu atuakkanik atorniartarfii atorniakkat utertinneqarnissaannut piffissaliussamik qaangiinermut akiliummik akiliisitsisinnaapput. Atortussanut atuisup ataatsikkut atugaanut, aammalu piffissap assigiip iluani killilerneqarsimasunut akiliut annerpaamik 15 kr.-iusinnaavoq, atortussanulli meeqqanit inuusuttunillu 15-it inorlugit ukiulinnit atorneqarsimasunut annerpaamik 10 kr.-iussalluni. Qaangiineq ullunit arfineq-marlunnit sivisuneruppat akiliut 50 kr.-inut qaffanneqarsinnaassaaq, atortussanulli meeqqanit inuussuttunillu 15-it inorlugit ukiulinnit atorneqarsimasunut annerpaamik 20 kr.-iussalluni. Qaangiineq ullunit 30-nit sivisuneruppat, atortussanillu atukkiunneqarsimasunik utertitseqqusilluni allakkanik tamanna sioqqullugu nassiussisoqarsimappat, taava akiliut 100 kr.-inut qaffanneqarsinnaassaaq, atortussanulli meeqqanit inuusuttunillu 15-it inorlugit ukiulinnit atorneqarsimasunut annerpaamik 50 kr.-iussalluni.
Imm. 2. Nunatta Atuagaateqarfia kommunillu atuakkanik atorniartarfii atuisup atorniarnermut allagartaata taartissaanik sananermut akiliummik annerpaamik 20 kr.-iusumik akiliisitsisinnaapput.

§ 12d. Nunatta Atuagaateqarfiata kommuninilu atuakkanik atorniartarfiit atuisoq atuakkanik atorniartarfinnit atorniarnissamut mattussinnaavaat, atuisup atortussat atukkami innarlerneqaratik utertinneqarnissaannik pisussaaffini annertuumik sumiginnarsimappagu.
Imm. 2. Atuakkanik atorniartarfinnit atorniarnissamut mattussineq aamma pisinnaavoq atuisoq akiliummik § 12c naapertorlugu aalajangersarneqartumik akiligassaqarpat imaluunniit atortussanut innarlerneqarsimasunut tammarsimasunulluunniit taarsiissutitut akiligassanik akiligassaqarpat.
Imm. 3. Atuisup atuakkanik atorniartarfinnut pisussaaffini aaqqippagit, matumani aamma atortussat innarlerneqarsimanngitsut utertinnerisigut imaluunniit atortussat innarlerneqarsimasut taarsernerisigut kiisalu akiliutissat akilerneqarsimanngitsut akilernerisigut, mattussineq atorunnaarsinneqassaaq.
Imm. 4. Nunatta Atuagaateqarfiata aammalu kommunit atuakkanik atorniartarfiutaasa atuisartoq atuakkanik atorniartarfinni atuisinnaaneranut aammattaaq mattussinnaavaat, atuisartoq siusinnerusukkut arlaleriarluni atortut atorsimasat innarlerneqartinnagit tunniunnissaannut pisussaaffini arlaleriarluni unioqqutissimappagu. Mattussineq taamaattoqartillugu piffissamik siumut aalajangeriikkamik, atuisartup atuakkanik atorniartarfimmut pisussaaffimminik naammassinninneranit qaammatinik 3-nik sivisunerunngitsumik, piffisalerlugu.

§ 12e. Nunatta Atuagaateqarfia kommunillu atuakkanik atorniartarfii atortussanik immikkut erlinnaatilinnik pigisaqarunik, taakkulu ikittuinnarnik amerlassuseqarnertik pissutigalugu imaluunniit allanik peqquteqartumik angerlaallugit atukkiussassaqqissuunngippata, atuakkanik atorniartarfiit atortussat angerlaallugit atukkiussinissamut killilersuutinik aalajangersaasinnaapput.
Imm. 2. Atuakkanik atorniartarfik atortussanik imm. 1-imi taaneqartunik angerlaallugit atukkiinermi qularnaveeqqusiissummik akiliisitsisinnaavoq.

§ 12f. Atuakkanik atorniartarfiit ataasiakkaat,atuagaateqarfiup pigisai apeqqutaatillugit, atorniartartut ataasiakkaat atortussat atorsinnaasaasa inniminnersinnaasaasalu katillutik qanoq amerlassuseqarnissaannik killilersuutit atuakkanik atorniartarfiup malittarisassaani aalajangersarsinnaavaat.

§ 12g. Nunatta Atuagaateqarfiata kommunillu atuakkanik atorniartarfiisa atuisut atuagaateqarfiit atorneqarneri pillugit piumasarisanik ilitsersussavaat, matumani aamma ilaatigut paasisitsissutigalugit atorniartartut uppernarsaataat, piffissaq atorfiusinnaasoq, qularnaveeqqusiissummik akiliisitsisinnaaneq, atortussat atukkat innarlerneqaratik utertinneqarnissaannik pisussaaffimmik sumiginnaanerup kingunerisinnaasai, akiliutinik akiliisitsisarneq aammalu akiliisitsiniartarneq.
Imm. 2. Ilitsersuut atuakkanik atorniartarfinni allagarsiinikkut aammalu atuakkanik atorniartarfiit malittarisassaasa atuisunut tunniunnerisigut tamanut saqqummiunneqassaaq.".

Kapitali 4 taamaalilluni kapitali 5-inngussaaq.

§ 2

Inatsisartut peqqussutaat ulloq 1. juni 2005 atortuulissaaq.

Hans Enoksen

/

Henriette Rasmussen