Pinngortitamik illersuineq pillugu Inatsisartut inatsisaanni nr. 29-mi, 18. december 2003-meersumi § 11, imm. 1, § 46, imm. 2, aamma § 60, imm. 2 naapertorlugit aalajangersarneqarput:

§ 1. Qeqertap Uunartup Nanortallup Kommunianiittup ilaa, qeqertap assissaqanngitsumik kissartunik puilasoqarnera kiisalu pinngortitami kulturikkut oqaluttuarisaanikkullu eriagisassaqarnera illersorniarlugit, eqqissisimatitassanngortinneqarpoq.
Imm. 2. Sumiiffik eqqissisimatitaq assitaliussatut ilanngussaq 1-imi titarnilersukkatut nalunaagaavoq, allorniusami tukimukartumi sanimukartumilu 45^o 20’50’’-imi aamma 60^o 29’41’’-imi sumiiffiligaalluni.

§ 2. Nalunaarummi matumani killiliinernik malittarinnittut kikkulluunniit sumiiffimmut eqqissisimatitamut appakaassinnaapput.

§ 3. Sumiiffimmi eqqissisimatitami puilasut kissartut imaluunniit kuuit puilasunit aallaaveqartut mingutsinneqarnissaat inerteqqutaavoq, taamatuttaaq puilasuni kissartuni uffarnermut atatillugu qaqorsaatinik, nutsanut qaqorsaatinik tunisassianilluunniit taakkununnga assingusunik atuinissaq inerteqqutaalluni.

§ 4. Puilasut uunartut pissusaat kuuillu puilasunit aallaaveqartut allanngortinneqarnissaat, taamatuttaaq sapusersuinissat naatitsiviliinissallu, inerteqqutaapput.
Imm. 2. Puilasut kissartut sinaasa innarlerneqarnissaat inerteqqutaavoq.

§ 5. Puilasut kissartut 200 meterinik pallillugit tupertornissat ikumalaartitsinissallu inerteqqutaapput.

§ 6. Sumiiffimmi eqqissisimatitami illuliornissaq imaluunniit atortunik aalaakkaasunik allanik sanaartornissat inerteqqutaapput.
Imm. 2. Sumiiffimmi eqqissisimatitami assaasoqarnissaa inerteqqutaavoq.

§ 7. Sumiiffimmi eqqissisimatitami angallatinik motorilinnik cykelinilluunniit angallannissat inerteqqutaapput.

§ 8. Sumiiffimmi eqqissisimatitami igitanik sunilluunniit maangaannartitsinissat, ilisarnaasersuinissat imaluunniit ilisimatusarnermi atortunik qimatsinissat inerteqqutaapput.

§ 9. Avatangiisinut Pinngortitamullu Pisortaqarfik Nanortalimmi kommunalbestyrelsi tusarniaavigeqqaarlugu, nalunaarummi matumani aalajangersakkanit immikkut akuersissuteqarsinnaavoq.

§ 10. Nanortalimmi kommunalbestyrelsip nalunaarummi aalajangersakkat malinneqarnerat nakkutigisarissavaa.

§ 11. Paragraffini 3-miit 8-mut aalajangersakkanik unioqqutitsinerit akiliisitsinermik pineqaatissiissutaasinnaapput.

§ 12. Avatangiisinut Pinngortitamullu Pisortaqarfik peqatigalugu Nanortalimmi kommunalbestyrelsi sumiiffimmik eqqissisimatitamik nakkutilliinissamut, tassunga ilanngullugu nakkutilliinissamut iliuutsit qanoq ittut aallartinneqarnissaannut, pilersaarusiussaaq.

§ 13. Nalunaarut atuutilerpoq ulloq 1. juni 2005.

/

Alfred ER Jakobsen

Ilanngussaq