Peqqinnissaqarfiup sullissineri il.il. pillugit Inatsisartut peqqussutaanni nr. 15-imi, 6. november 1997-imeersumi, Inatsisartut peqqussutaatigut nr. 12-ikkut 14. november 2004-imeersukkut allanngortinneqartumi § 10, imm. 3 aamma § 13 naapertorlugit aalajangersarneqarput:

Meeqqat peqqissusaannik misissuineq pinaveersaartitsissutasoq

§ 1. Meeqqat atuartussaatitaaneq ataallugu ukiullit tamarmik najukkami nakorsamit peqqissutsimikkut misissortinnissaminnut neqeroorfigineqassapput.
Imm. 2. Misissuinerit arfineq-marluk sapinngisamik anguniarneqassapput, ikinnerpaamilli imatut:
1) sapaatit akunnerinik tallimanik utoqqaassusillit,
2) ataatsimik ukiullit aamma
3) sisamanik ukiullit tappissusaannik tutsarissusaannillu misissuineq.

§ 2. Meeqqat tamarmik 1. imaluunniit 2. klassini atualereersimasut najukkami nakorsamit peqqissutsimikkut misissorneqarnissaminnut neqeroorfigineqassapput.
Imm. 2. Misissuisarnissat atuarfik suleqatigalugu aaqqissuunneqassapput.

§ 3. Najukkami nakorsamit peqqissutsimik misissuineq pinaveersaartitsissutaasoq makkuninnga imaqassaaq:
1) Meeqqap qanoq innera, ineriartornera nappakulasinnaaneraluunniit pillugit oqaloqatigiinneq.
2) Meeqqamik misissuineq.
3) Angajoqqaanik oqaloqateqarlunilu ilitsersuineq.
4) Malittarisassat atuuttut malillugit akiuussutissaliineq.

Meeqqat atuartussaatitaaneq ataallugu ukiullit meeqqerisumit misissorneqartarnerat

§ 4. Meeqqat tamarmik inuunerminnit ukioq siulleq meeraaqqerisumit misissorneqartarnissaat neqeroorutaassaaq, tamatumanilu meeqqap angerlarsimaffianut takusaaneq annerusumik ileqquuvoq. Arfinileriarluni takusaasarnissaq anguniagaavoq, ikinnerpaamilli imatut:
1) erninerup kinguninngua angerlarsimaffimmut takusaaneq
2) pingasut sisamallu missaannik qaammateqalernermi misissortinneq aamma
3) 7-10-nik qaammateqarnermi misissortinneq.

Atuarfimmi meeqqerisumit misissortinneq

§ 5. Meeqqat atuartussaatitaasut meeqqerisumit misissorneqartarnerisigut aamma akuttunngitsumik meeqqanut attaveqartarnikkut peqqinnissakkut ajornartorsiutaasinnaasut nalinginnaasut meeqqallu ataasiakkaat peqqissutsimikkut ajornartorsiutaat qulaajarneqartassapput.
Imm. 2. Atuarfik suleqatigalugu piginnaasanik misissuisarnissat aaqqissuunneqassapput.

§ 6. Meeqqanut inuusuttuaqqanullu 6. klassinit qummut atuarfik isumasioqatigalugu inuusuttuaranngulernermi ajornartorsiutit, atornerluinermik ajornartorsiutit niviarsiaqqat nukappiaqqallu qanoq pissuseqartarnerat, naartunaveersaatit/kinguaassiuutitigut nappaatinut illersuutit pillugit siunnersuinissamik atuarfimmi meeqqerisut neqerooruteqassapput.

Meeqqat inuusuttuaqqallu immikkut pisariaqartitallit

§ 7. Meeqqat inuusuttuaqqallu immikkut pisariaqartitallit atuartussaatitaanerup naammassineqarnissaa tikillugu immikkut suliniuteqarfiginissaat neqeroorutaassaaq, tassunga ilanngullugit tunaartalimmik siunnersuineq, ikiuineq kiisalu najukkami nakorsamit imaluunniit meeqqerisumit misissortinnerit amerlanerusut.
Imm. 2. Imm. 1 malillugu immikkut suliniuteqarnissamik pisariaqartitsisoqarnersoq najukkami suliassaqarfiit akimorlugit angajoqqaat, ilinniartitsisut, perorsaasut, kigutit nakorsaallu suleqatigalugit najukkami peqqinnissamik sullissisunit nalilerneqassaaq. Isumaginninnermut, perorsaanermut kiisalu peqqinnissamut tunngasuni ilisimasalittut oqartussat pisariaqartillugu naliliinermi peqataatinneqarsinnaapput.

§ 8. Meeqqat tamatuminnga immikkut pisariaqartitsisut ataatsimik ukiullit saniatigut § 4 naapertorlugu angerlarsimaffianni meeraaqqerisumit misisorneqarnissaat neqeroorutaassaaq.

§ 9. Qinnuigineqarneq malillugu atuarfinnut, ulluunerani meeqqanik inuusuttuaqqanillu paaqqinnittarfinnut il.il. najukkami nakorsat qullersaat meeraaqqerisunilu sulisut meeqqanut inuusuttuaqqanullu sullissisunit immikkut ajornartorsiutilittut isumaqarfigineqartunut aalajangersimasumik siunnersuinikkut ikiuuttassapput.
Imm. 2. Imm. 1-imi oqaatigineqartutut pisoqartillugu peqqinnissamik sullissisunut paaqqinnittarfik saaffiginninnginnermini meeqqap angajoqqaavi ajornartorsiummik paaqqinnittarfiup ilisimatereersimassavai kiisalu taamaaliornissaq ajornanngippat ajornartorsiutip aaqqiivigineqarnissaanut peqataatillugit.

Najukkami peqqinnissamik sullissineq

§ 10. Peqqinnissamik isumaginninneq sulisunit ilinniarsimasunitpiukkunnartunit soorlu meeraaqqerisunit, peqqissaasunit, peqqissaanermi ikiortinit aamma peqqinnissamik siammarsaasunit isumagineqassaaq.
Imm. 2. Peqqinnissamik isumaginninnermik sulineq najukkami nakorsat qullersaannit aqunneqarpoq.

§ 11. Najukkami nakorsat qullersaat peqqinnisamillu isumaginninnermi sulisut atuarfiit, ulluunerani paaqqinnittarfiit il.il. nalinginnaasunik peqqinnissamik siuarsaanermi aamma nappaatinik pinaveersaartitsinermi suliniuteqarneranni § 10 naapertorlugu ilitsersuinermikkut ikiuutissapput, tassunga ilanngullugit meeqqat inuusuttuaqqallu peqqillutik peroriartornissaat pillugu nalinginnaasumik siunnersuillutik aamma nerisassat eqqiluisaarnerlu pillugit paasisitsiniaallutik.

Aalajangersakkat allat aamma atuutilersitsineq il.il.

§ 12. Eqqiluisaarneq, nappaatinik tuniluuttunik akiuiniarneq, peqqinnissamullu tunngassuteqartut allat pillugit najukkani peqqinnissamik sullissinermi Peqqinnissakkut Nakkutilliisoqarfik siunnersuillunilu ilitsersuisassaaq.

§ 13. Peqqissaaveqarfinni Aqutsivik Peqqinnissakkut Nakkutilliisoqarfik suleqatigalugu meeqqat peqqissusaannik misissuisarnerit meeqqerisumillu misissorneqartarnerat pillugit nalunaarutip matuma itisilerneqarnissaanut najoqqutassaqartitsisinnaapput.

§ 14. Peqqissaaveqarfinnik Aqutsivik peqqinnissamik isumaginninnermi suliat pillugit ukiumoortumik nalunaarusiortassaaq.

§ 15. Nalunaarut manna 1. marts 2005-imi atuutilerpoq
Imm. 2. Tamanna peqatigalugu atorunnaarsinneqarput
1) Nakorsaanerup kaajallaasitaa nr. 109, 24. maj 1976-imeersoq"Kalaallit Nunaanni peqqinnissaqarfiup ataani pinaveersaartitsinermik suliat pilersaarusiornissaannut najoqqutassat".
2) Nakorsaanerup kaajallaasitaa nr. 108, 8. marts 1976-imeersoq "Kalaallit Nunaanni Nakorsaanermit najukkani nakorsanut, DIH-mi nakorsaanernut, nunaqarfinni peqqissaasunut aamma meeraaqqerisunut"
3) Pitsaaliuinermi Siunnersuisoqatigiit pillugit Peqqinnissamut Avatangiisinullu Pisortaqarfiup kaajallaasitaa nr. 1, 11. november 1993-imeersoq.
4) Peqqinnissamut Ataatsimiititaliat Peqqinnissamullu Pilersaarusiat pillugit Peqqinnissamut Avatangiisinullu Pisortaqarfiup kaajallaasitaa nr. 7, 15. november 1993-imeersoq.
5) Peqqinnissamut Avatangiisinullu Pisortaqarfiup sulisoqarnikkut aqutsinera pillugu najoqqutassat nr. 2, 23. januar 1995-imeersut "Nunatsinni ernisussiortuunerit sulinerminni atugaat pillugit najoqqutassat"

Namminersornerullutik Oqartussat, ulloq 14. februar 2005.

Asii Chemnitz Narup

/

Søren Rendal