§ 1

Avatangiisit innarlitsaaliorneqarnissaannik Inatsisartut peqqussutaanni nr. 12 ulloq 22. december 1988-imeersumi inatsisartut peqqussutaatigut nr. 7 ulloq 13. maj 1993-imeersukkut aamma inatsisartut peqqussutaatigut nr. 14 ulloq 31. oktober 1996-imeersukkut allanngortinneqartumi allannguutigitinneqassapput makku:

1. § 7, imm. 1 imatut oqaasertalerneqassaaq:
"Naalakkersuisut anguniakkat § 1-imi taaneqartut isumagineqarnissaat siunertaralugu maleruaqqusanik aalajangersaasinnaapput, tamatumani ilanngullugit ataani allattorneqartut pillugit aningaasartuuteqarnissanut aamma aningaasartuutissanut qularnaveeqqusiinissanut:
1) suliffeqarfinnit, ingerlatsivinnit, maskiinanit, sakkuutinit, kiassaateqarfinnit assartuutinillu kiisalu tamakku aaqqissuunnerinit, ingerlannerinit aserfallatsaalinerinillu mingutsitsinerit killilersimanissaat,
2) imiinnarmit taratsumillu imissaqartitsiniarneq il.il. kiisalu imeqarfiit isumannaallisaavigineqarnissaat,
3) imikoornermit, ikuallaavinnit, eqqaavissuarnit il.il. mingutsitsinerit killilersimanissaat, kiisalu ingerlatsiviit tamakku aaqqissuunneri, ingerlanneri aserfallatsaalinerilu,
4) igitassanik eqqaaneq, tamatumani ilanngullugit uuliamik akoorutissanillu eqqagassat,
5) illuliaareersunit illuliorfissanillu eqqakkat aqqutaannut attavilersuineq,
6) ikummatissat kiassarnermut imaluunniit assartuutinut maskiinanullu atugassat sukuloqanngitsuunissaat akoornissaallu,
7) ingerlatsiviit, maskiinat, sakkuutit assartuutillu suussusiisa pisortanit akuerisaasimanissaat,
8) suliat ulorianartortaqarsinnaasut kiisalu sunik navianartulinnik soorlu § 2-mi, imm. 2-mitaaneqartunik, uninngasuuteqarlunilu assartuineq,
9) imeqarfinnik, taratsumik imiliorfinnik, silaannnarmik nunamillu mianerinninneq kiisalu pisorpaloqartitsinaveersaarneq,
10) sunik, tunisassianik imaluunniit uumasuaqqanik aalajangersimasunik eqqussuinissamik, annissuinissamik, tunisassiornissamik, tunisinissamik imaluunniit atuinissamik inerteqquteqarneq killilersuinerluunniit, tamakku avatangiisinut ajoqusiisinnaasutut ilimagineqarpata,
11) ingerlatsivinnik, aaqqissuussinernik imaluunniit apparatinik, tamatumani aamma uuttortaanermut apparatinik mingutsitsinermut akiuunnissaq siunertaralugu atortussanik pisortanik akuersisitsineq,
12) nunap isikkuisa, naasut il. il. innarlerneqarnerini iluarsaannissaat imaluunniit pissusaattut ilitinnissaat,
13) uumasunut tunngasut,
14) uumasut ajoqutaannaasut,
15) immiaaqqanut imeruersaatinullu kulsyretalinnut puussat, aamma poortuutissat aalajangersimasut atorneqarnissaannut inerteqquteqarneq pisussaaffiliinerluunniit kiisalu puunik utertitsinissamut aaqqissuussinermik pilersitsinissamut pisussaaffiliineq ilanngullugit,
16) atortuutit anginerusut avatangiisinut sunniuteqartarnerisa naliliiffigineqartarneri (VVM)
17) avatangiisinut paasissutissanik katersineq tunniussisarnerlu.".

2. § 9, imm. 2-mi "peqqussummut tapiliussami ilanngunneqartut" imatut allanngortinneqarpoq "§ 16, imm. 2-mi allattorneqarlutik ilaatinneqartut".

3. § 16, imm. 1 imatut oqaasertalerneqassaaq:
"§ 16. Suliffeqarfiit, ingerlatsiviit imaluunniit aaqqissuussinerit immikkut mingutsitsisut, imm. 2-mi allattorneqarlutik ilaatinneqartut sananeqaratilluunniit aallartinneqassanngillat tamatumunnga akuersissut tunniunneqartinnagu.
Imm. 2. Suliffeqarfiit, ingerlatsiviit imaluunniit aaqqissuussinerit immikkut mingutsitsisut imm. 1-imi akuersissuteqarnissamut ilaasut pillugit Naalakkersuisut allattuiffiliussapput.
Imm. 3. Akuersissuteqartarneq pillugu maleruagassanik erseqqinnerusunik Naalakkersuisut aalajangersaassapput.".

4. §§ 17 aamma 18-imi "tapiliussami ilanngunneqartutut ittut" imatut allanngortinneqarput "§ 16, imm. 2-mi allattorneqarlutik ilaatinneqartut".

5. § 20-mi "tamakku tapiliussamiippata/tapiliussamiinngikkaluarpataluunniit" imatut allanngortinneqarpoq "tamakku § 16, imm. 2-mi allattorneqarlutik ilaatinneqarpata ilaatinneqanngikkaluarpataluunniit".

6. § 36-ip kingornatigut kapitel 8-tut ilanngunneqarpoq:
"§ 36 a. Mingutsitsinerup tamarmiusup killilersimaarnissaa siunertaralugu immikkoortunut toqqarneqartunut Naalakkersuisut iliuusissanut pilersaarusiorsinnaapput.
Imm. 2. Nammineq ingerlatanut kommunit immikkoortullu toqqarneqartut iliuusissanut pilersaarusioqullugit Naalakkersuisunit peqquneqarsinnaapput.
Imm. 3. Tunisassiat, stoffit atortussialluunniit erseqqinnerusumik aalajangersimasut atorneqarnerisa, kuutsinneqarnerisa annikkillisinneqarnissaannut suujunnaarsinneqarnissaannulluunniit kiisalu avatangiisinut sunniutaasut nalunaarsorneqarnissaannut immikkoortunut ataasiakkaanut pisussaaffeqarnerannut piumasaqaatit kiisalu tamakku pillugit paasissutissiisarnissaat pillugu iliuusissanut pilersaarusiaq anguniagassanik aalajangersaasinnaavoq.
Imm. 4. Iliuusissanut pilersaarusiassani imm. 2-mi taaneqartuni anguniakkat kiisalu imarisaat annertussusaallu kommunit immikkoortullu attuumassuteqartut isumaqatiginiareerlugit aalajangersarneqassapput.".

Inatsisartut peqqussutaat manna ulloq 1. august 2004-mi atuutilerpoq.

/

Jens Napãtôk’