Aalisarneq pillugu Inatsisartut inatsisaanni nr. 18, 31. oktober 1996-imeersumi, aamma kingusinnerusukkut Inatsisartut inatsisaatigut nr. 5, 21. maj 2002-meersukkut allanngortinneqartumi, § 5, imm. 1,§ 10, § 10a, § 11, § 13 imm. 2, § 14, imm. 1 aamma imm. 2, § 23, § 26, § 33, imm. 2 aamma § 34 imm. 3 naapertorlugit, aalajangersarneqarpoq:

 

Kapitali 1
Atuuffii nassuiaatillu

§ 1. Imartani Kalaallit Nunaata aalisarnikkut oqartussaaffigisaani saattuarniarnermut (Chionoecetes opilio) nalunaarut atuuppoq.
Imm. 2. Aalisariutinut Kalaallit Nunaanneersunut saattuarnermut nalunaarut atuuppoq.

§ 2. Nalunaarummi matumani "imartat Kalaallit Nunaata aalisarnikkut oqartussaaffigisai" aamma "tunngaviusumik killeqarfik" paasineqassapput tunngaviusumik killeqarfittut imartat Kalaallit Nunaata aalisarnikkut oqartussaaffigisai pillugit Statsministeriaqarfiup nalunaarutaani ilanngussaq 1-imi takuneqarsinnaasumi aalajangersarneqarsimasut.
Imm. 2. "Kitaani"paasineqassaaq Atlantikup Avanaata Kitaani Aalisarneq pillugu Suleqatigiiffimmi sumiiffiup 1-ip ilaa, Kalaallit Nunaata aalisarnikkut oqartussaaffigisaani ilanngussaq 2-mi takuneqarsinnaasumi inissisimasoq.
Imm. 3. "Sumiiffimmi aqutsiviusumi" paasineqassaaq nunap sananeqaataatigut sumiiffik aalajangersimasumik killiligaq, Kalaallit Nunaata aalisarnikkut oqartussaaffigisaani inissisimasoq.

 

Kapitali 2
Aalisarsinnaanermut akuersissutit pisassiissutillu

§ 3. Inuussutissarsiutigalugu saattuarniarneq inerteqqutaavoq, Aalisarnermut Piniarnermullu Pisortaqarfik saattuarniarsinnaanermut akuersissummik tunniussisimatinnagu.
Imm. 2. Akuersissummi piumasaqaatinik aalajangersaasoqarsinnaavoq.
Imm. 3. Akuersissummi piumasaqaatinik unioqqutitsineq inerteqqutaavoq
Imm. 4. Aammattaaq aalisarsinnaanermut akuersissutit pillugit Namminersornerullutik Oqartussat nalunaarutaat innersuussutigineqarpoq.

§ 4. Angallatit 75 BRT/120 BT angissusillit taakkunanngaluunniit anginerusut atorlugit Kitaani inuussutissarsiutigalugu saattuarniarsinnaanermut akuersissummik ataatsimik Aalisarnermut Piniarnermullu Pisortaqarfik tunniussisarpoq. Saattuarniarsinnaanermut akuersissutip piffissaa killiligaavoq pisarineqarsinnaasullu qummut killiligaallutik.
Imm. 2. Saattuarniarsinnaanermut akuersissut tunniunneqartarpoq Kitaata avataani sumiiffimmut sinerissap titarnerullu aalisarnikkut oqartussaaffigisamut tunngaviusumik killigititap avataani 3 sømilinik avasinnerusumut, kisiannili imm. 3 takuuk.
Imm. 3. Saattuarniarneq inerteqqutaavoq sumiiffinni, naleqqanik makkunannga nassuiarneqartuni:
1) Sumiiffik kinguliini naleqqanik nassuiarneqartoq, Tunngaviusumik killigititami sumiiffik 62°25N tunngaviusumik killigititaq atuarlugu sumiiffimmut 61°00N tassanngaaniillu 61°00N, 49°30W-mut aamma 62°25N, 51°15W-mut, ilanngussami 3-mi taaneqartutut.
2) Sumiiffik kinguliini naleqqanik nassuiarneqartoq, Tunngaviusumik killigititami sumiiffik 65°40N tunngaviusumik killigititaq atuarlugu sumiiffimmut 64°30N tassanngaanniillu 64°30N, 53°45W-mut aamma 65°40N, 53°45W-mut, ilanngussami 4-mi taaneqartutut.
3) Sumiiffik kinguliini naleqqanik nassuiarneqartoq, Tunngaviusumik killigititami sumiiffimmi 66°50N tunngaviusumik killigititaq atuarlugu sumiiffimmut 65°40N-mut tassanngaaniillu 65°40N, 55°00W, 66°19N, 55°22W, 66°50N, 55°00W-mut, ilanngussami 5-imi taaneqartutut.
4) Sumiiffik kinguliini naleqqanik nassuiarneqartoq, Tunngaviusumik killigititami sumiiffik 69°00N tunngaviusumik killigititaq atuarlugu 68°00N-mut sumiiffimmut 68°00N, 54°30W, 69°00N, 54°30W-mut, ilanngussami 6-imi taaneqartutut.

§ 5. Angallatinut 75 BRT/120 BT-mik mikinerusunut Kitaani inuussutissarsiutigalugu saattuarniarsinnaanermut akuersissutinik assigiinngitsunik arfinilinnik Aalisarnermut Piniarnermullu Pisortaqarfik tunniussisarpoq. Saattuarniarsinnaanermut akuersissutip piffissaa killiligaavoq, pisarineqarsinnaasulli qummut killilerneqaratik.
Imm. 2. Saattuarniarsinnaanermut akuersissut tunniunneqassaaq sumiiffinnut aqutsiviusunut kinguliiniittunut,
1) 71°30N-p avannaani aamma 75°00N-p kujataani, taaneqartoq sumiiffik aqutsivigineqartoq Upernavik.
2) 68°00N-p avannaani aamma 71°30N-p kujataani, taaneqartoq sumiiffik aqutsivigineqartoq Qeqertarsuup Tunua-Uummannaq.
3) 66°00N-p avannaani aamma 68°00N-p kujataani, taaneqartoq sumiiffik aqutsivigineqartoq Sisimiut.
4) 64°15N-p avannaani aamma 66°00N-p kujataani, taaneqartoq sumiiffik aqutsivigineqartoq Maniitsoq-Kangaamiut.
5) 60°45N-p avannaani aamma 64°15N-p kujataani, taaneqartoq sumiiffik aqutsivigineqartoq Nuuk-Paamiut.
6) 60°45N-p kujataani aamma 44°00W-p kitaani tassanngaanniillu 59°00N-mut tassanngaanniillu 42°00W kitaanut, taaneqartoq sumiiffik aqutsivigineqartoq Narsaq-Qaqortoq.
Imm. 3. Saattuarniarsinnaanermut akuersissutiginnittoqarsinnaavoq imm. 2, nr.1-imiit 6-imut sumiiffittut aqutsivigineqartutut taaneqartunut amerlanerpaamik marlunnut.
Imm. 4. Angallat ataaseq qaammatisiutit ukiuanni ataatsimi inuussutissarsiutigalugu saattuarniarnermut imm. 2, nr.1-imiit 6-imut sumiiffittut aqutsivigineqartutut taaneqartuni marlunnit amerlanerusuni saattuarniarsinnaanermut akuersissutaateqarsinnaanngilaq.

§ 6. Angallatinut usiminnik allanut nuussisinnaanermik akuersissutaateqareersunut inuussutissarsiutigalugu saattuarniarsinnaanermut akuersissutinik tunniussisoqartassanngilaq.

§ 7. Saattuarniarsinnaanermut akuersissummik qinnuteqaat, tak. § 4 aamma § 5 Aalisarnermut Piniarnermullu Pisortaqarfimmut nassiunneqassaaq. Qinnuteqarnermi immersugassaq Aalisarnermut Pinianermullu Pisortaqarfimmut piniarneqarsinnaavoq.

§ 8. Kalaallit Nunaata Kitaani aalisariutit ilaannut immikkoortunut saattuarniarnermi pisassiissutit ukiut tamaasa Naalakkersuisut aalajangersartarpaat.
Imm. 2. Pisassiissutit tak. imm. 1, pisassiissutit ilaannut arfineq-marlunnut makkununnga agguataarneqartassapput,
1) Pisassiissutit ilaat ataaseq angallatinut 75 BRT/120 BT-tut angissusilinut anginerusunullu Kitaani inuussutissarsiutigalugu saattuarniarsinnaanermut akuersissutaatilinnut, takuuk § 4.
2) Pisassiissutit ilaat ataaseq angallatinut 75 BRT/120 BT-nit mikinerusunut imartami 71°30N-p avannaani aamma 75°00N-p kujataani inuussutissarsiutigalugu saattuarniarsinnaanermut akuersissutaatilinnut, tak. § 5, imm. 2, nr. 1.
3) Pisassiissutit ilaat ataaseq angallatinut 75 BRT/120 BT-nit mikinerusunut imartami 68°00N-p avannaani aamma 71°30N-p kujataani inuussutissarsiutigalugu saattuarniarsinnaanermut akuersissutaatilinnut, tak. § 5, imm. 2, nr. 2.
4) Pisassiissutit ilaat ataaseq angallatinut 75 BRT/120 BT-nit mikinerusunut imartami 66°00N-p avannaani aamma 68°00N-p kujataani inuussutissarsiutigalugu saattuarniarsinnaanermut akuersissutaatilinnut, tak. § 5, imm. 2, nr. 3.
5) Pisassiissutit ilaat ataaseq angallatinut 75 BRT/120 BT-nit mikinerusunut imartami 64°15N-p avannaani aamma 66°00N-p kujataani inuussutissarsiutigalugu saattuarniarsinnaanermut akuersissutaatilinnut, tak. § 5, imm. 2, nr. 4.
6) Pisassiissutit ilaat ataaseq angallatinut 75 BRT/120 BT-nit mikinerusunut imartami 60°45N-p avannaani aamma 64°15N -p kujataani inuussutissarsiutigalugu saattuarniarsinnaanermut akuersissutaatilinnut, takuuk. § 5, imm. 2, nr. 5.
7) Pisassiissutit ilaat ataaseq angallatinut 75 BRT/120 BT-nit mikinerusunut imartami 60°45N-p kujataani aamma 44°00W-p kitaani, kujammut 59°00N tikillugu aamma 42°00W-mut kippasinnerusumut inuussutissarsiutigalugu saattuarniarsinnaanermut akuersissutaatilinnut, tak. § 5, imm. 2, nr. 6.

§ 9. Pisassiissutit ilaat ataaseq aalajangiussaq, tak. § 8, tamakkerluni aalisarneqangajalerpat imaluunniit tamakkerluni aalisarneqarpat aalisarnerup qaqugu taamaatinneqarnissaa Aalisarnermut Piniarnermullu Pisortaqarfiup nalunaarutigissavaa.
Imm. 2. Imm. 1 naapertorlugu nalunaarut Kalaallit Nunaanni Aalisartut Piniartullu Kattuffiannut (KNAPK) aamma Kalaallit Nunaanni Avataasiorlutik Aalisartut aamma Avammut Tuniniaasartut Kattuffiannut (APK) kiisalu tusagassiorfitsigut nuna tamakkerlugu saqqummersartutigut nalunaarutigineqassaaq.
Imm. 3. Imm. 1 malillugu aalisarnerup unitsinneqarneranik nalunaaruteqartoqareernerani inuussutissarsiutigalugu saattuarniarneq tamarmi inerteqqutaalissaaq.

 

Kapitali 3
Inuussutissarsiutigalugu saattuarniarsinnaanermut inerteqqut

§ 10. Sumiiffimmi aqutsivigineqartumi, tak. § 5, imm. 2, piffissap ilaani tunisinikkut naammassisaqarsinnaassuseq saattuanut tulaanneqartartunut imaluunniit tulaanneqartussatut ilimagineqartunut sanilliullugu naammaginarunnaarpat, Naalakkersuisut aalajangersinnaavaat sumiiffik aqutsivigineqartoq saattuarniarsinnaanermut akuersissutaatilinnut sumiiffiup aqutsivigineqartup pineqartup iluani illoqarfimmi nunaqarfimmiluunniit najugaqartuunngitsunut saattuarniarneq unitsinneqarallassasoq.
Imm. 2. Imm. 1 malillugu aalajangiineq, sumiiffimmi tunitsivimmit aamma sumiiffimmi KNAPK-p immikkoortortaqarfianit (KNAPP) inassuteqaat tunngavigalugu pissaaq.
Imm. 3. Sumiiffimmik aqutsivigineqartumik, tak. imm. 1 aamma imm. 2, matusigallarnermik ammaaqqinnermillu nalunaarut KNAPK-mut, APK-mut aamma sumiiffimmi tunitsivimmut kiisalu tusagassiorfitsigut nuna tamakkerlugu saqqummersartutigut nalunaarutigineqassaaq.
Imm. 4. Imm. 3 malillugu sumiiffimmi aqutsivigineqartumi qaqugu matusigallartoqassanersoq aamma ammaaqqittoqassanersoq nalunaarutigineqassaaq.
Imm. 5. Imm. 1 malillugu Naalakkersuisut aalajangeereeraangata saattuarniarsinnaanermut akuersissutilinnut illoqarfinni imaluunniit nunaqarfinni aqutsiviusup pineqartup killeqarfiata iluani najugaqanngitsunut saattuarniarneq inerteqqutaavoq.

§ 11. Piffissami 1. januarimiit 31. marts ilanngullugu Kitaani 64°15N-p avannaani inuussutissarsiutigalugu saattuarniarneq inerteqqutaavoq.

§ 12. Angallatit 20 BRT/37 BT-tut angissusillit anginerusullu piffissami 1. aprilimiit 30. september ilanngullugu tunngaviusumik killigititap iluani inuussutissarsiutigalugu saattuarniarsinnaatitaanngillat.
Imm. 2. Inerteqquteqarneq, taamaattoq imartami 68⁰30N-p avannaani aamma 70⁰30N-p kujataani atuutinngilaq.

§ 13. Inuussutissarsiutigalugu saattuarniarneq unitsinneqartassaaq pullatinik amoornermi pisat 20%-ii sinnerlugit tunineqarnissaminnut tunisassiarineqarnissaminnulluunniit naleqqutinnginnerat pissutigalugu avalatseqqinneqaannartariaqartut paasinarsippat. Tamatuma kingorna saattuarniarneq sumiiffinnut siusinnerusukkut ningitsiviusimasunit ungasinnerulaartunut nuunneqassaaq.
Imm. 2. Saattuat aqitsunik qaleruaqarunik tunineqarnissaminnut naleqqutinngillat.

 

Kapitali 4
Minnerpaaffissat, avalatsitseqqittarneq aalisarnermi atortut, aalisarnermilu atortut nalunaaqutserneqartarneri

§ 14. Saattuanut angusallunnut minnerpaaffiuvoq qaleruaata qaavatigut uuttorlugu 10 cm.
Imm. 2. Saattuat angusalluit minnerpaaffiliussamit mikinerusut angallammiitinneqassanngillat avalatseqqinneqartassallutilli.
Imm. 3. Saattuat arnarluit angallammiitinneqartassanngillat avalatseqqinneqartassallutilli.

§ 15. Saattuat BCD-mit (Bitter Crab Disease) tunillanneqarsimasut avalatseqqinneqartassanngillat nunamukaanneqartassallutilli.

§ 16. Inuussutissarsiutigalugu saattuarniarnermi pullatit kisimik atorneqartassapput.
Imm. 2. Pullatit qassutitaasa nigartaasa minnerpaaffigissavaat qassutitaasa nigartaata affaa 70 mm.
Imm. 3. Pullatit qassutitaasa nigartaannit imm. 2-mi taaneqartumit nigartakinnerusut angallammi pigineqassanngillat.

§ 17. Angallatinit 75 BRT/120 BT-tut angitigisunik anginerusunilluunniit inuussutissarsiutigalugu saattuarniarnermi kalunnermi ataatsimi pullatit amerlanerpaamik 100 pitunneqarsimassapput.
Imm. 2. Angallatinit 75 BRT/120 BT-nit mikinerusunit inuussutissarsiutigalugu saattuarniarnermi kalunnermi ataatsimi pullatit amerlanerpaamik 50 pitunneqarsimassapput.

§ 18. Pullatit kalunneqartinneqassapput.
Imm. 2. Kalunnerit avannamut isuat nalunaaquttamik qernertumik erfalasortalimmik sungaartumillu qaamanermut akisussinnaasortalerlugu nalunaaqutserneqarsimassaaq.
Imm. 3. Kalunnerit kujammut isuat nalunaaquttamik marlunnik sungaartunik erfalasortalimmik sungaartunillu qaamanermut akisuttartunik marlunnik nalunaaqutserneqassaaq.
Imm. 4. Aalisarnermi atortunut nalunaaqutit radarinut akisuttaatilerneqassapput.
Imm. 5. Pullatit ataatsit tamarmik piginnittup aqqanik najugaanillu angallatilluunniit aqqanik umiarsualiviatalu ilisarnaataanik naqinnernik imermik suujunnaarsinneqarsinnaanngitsumik nalunaaqutserneqarsimassapput.

§ 19. Aalisarnermi nalunaaqutaq immap qaavaniit mikinerpaamik 2 meteritut portussuseqassaaq.
Imm. 2. Aalisarnermi nalunaaqutaq piginnittup aqqanik najugaanillu angallatilluunniit aqqanik umiarsualiviatalu ilisarnaataanik naqinnernik imermik suujunnaarsinneqarsinnaanngitsumik nalunaaqutserneqarsimassaaq.

§ 20. Aalisarnermi nalunaaquttami erfalasut assigiissapput kippaarissuussallutillu.
Imm. 2. Erfalasup naannerpaaffia minnerpaamik 40 cm-iussaaq.
Imm. 3. Aalisarnermi nalunaaquttami ataatsimi erfalasut marluk akunnerat minnerpaamik 20 cm-iussaaq.

§ 21. Aalisarnermi nalunaaquttani qaamanermut akisuttaatit sakkortuumik akisuttartunik sanaajussapput minnerpaamillu sanimut 6 cm-itut silissuseqassallutik, killingusaaq kaajallallugu akisussinnaasuusallutik aalisarnermi nalunaaquttami sapinngisamik qutsinnerpaamut inissinneqarsimassallutik. Qaamanermut akisuttaatit marluk akunnerat minnerpaamik 12 cm-iussaaq.

§ 22. Radarit qinngornerinut akisuttaatit aalisarnermi nalunaaqquttami sapinngisamik portunerpaamut inissinneqarsimassapput, sumiiffinniillu tamanit ungasinnerpaamik 2 sømilinit ungasitsigisumit radarikkut takuneqarsinnaassallutik.

§ 23. Allunaasat aalisarnermi nalunaaquttanut imaluunniit puttaqutinut kisaatinullu atorneqartut kivisinnaasumik sanaajussapput kivisinnaanngortinneqarsimassallutilluunniit.

 

Kapitali 5
Pisanik nalunaaruteqartarneq aammalu tunisanik nalunaaruteqartarneq

§ 24. Angallatinut 75 BRT/120 BT-ut angissusilinnut imaluunniit anginerusunut pisanik nalunaaruteqatarneq eqqarsaatigalugu avataasiorluni aalisarnermik nakkutilliineq pillugu Namminersornerullutik Oqartussat nalunaarutaat innersuussutigineqarpoq.
Imm. 2. Angallatinut 75 BRT/120 BT-mit mikinerusunut pisanik nalunaaruteqartarneq aammalu tunisanik nalunaaruteqartarneq eqqarsaatigalugit sinerissap qanittuani saattuarniarnermi pisanik tunisanillu nalunaaruteqartarneq pillugu Namminersornerullutik Oqartussat nalunaarutaat innersuussutigineqarpoq.

 

Kapitali 6
Inuussutissarsiutinagu aalisarneq

§ 25. Inuit danskisut innuttaassusillit tamarmik Kalaallit Nunaanni aalajangersimasumik angerlarsimaffillit namminneq atugassaminnik saattuarniarsinnaatitaapput. Nunani allani Danmarkiunngitsumi innuttaassusillit Kalaallit Nunaanni najugaqavissut ukiullu marluk ataavartumik Kalaallit Nunaanniissimasut danskisut innuttaassuseqartutut isigineqassapput.
Imm. 2. Aalisarnermi pullatit amerlanerpaamik pingasut atorneqartassapput.
Imm. 3. Aammattaaq aalisarneq §§ 11-16 aamma §§ 18-23 naapertorlugit ingerlanneqassaaq.

 

Kapitali 7
Nakkutilliineq pineqaatissiissutillu

§ 26. Angallat nalunaarummi matumani pineqartoq Kalaallit Nunaanni Aalisarsinnaanermik Akuersissutinik Nakkutilliiviup (KANUAANA), Sakkutuut aalisarnermik nakkutilliisuisa (Grønlands Kommando), aalisarnermik piniarnermillu nakkutilliisut aamma politiit suliassaminnik isumaginninnerini suleqateqartassaaq.
Imm. 2. Angallatip qularnaassavaa KANUAANA-mi, Sakkutuut aalisarnermik nakkutilliisuisa politiinilu sulisut kiisalu aalisarnermik piniarnermillu nakkutilliisut akornusersorneqaratik angallammik misissuiartorsinnaanissaat.

§ 27. § 3 imm. 1-imik aamma imm. 3-mik, § 4 imm. 3-mik, § 9 imm. 3-mik, § 10 imm. 5-imik, § 11-mik, § 12 imm. 1-imik, § 13 imm. 1-imik, § 14-imik, § 15-imik, § 16-imik, § 17-imik, § 18-imik, § 19-imik, § 20-mik, § 21-mik, § 22-mik, § 23-mik, § 25-mik aamma § 26-mik unioqqutitsinerit akiliisitaanermik kinguneqarsinnaapput.
Imm. 2. Aktiaateqarluni piginneqatigiiffik, piginneqataassuteqarluni ingerlatseqatigiiffik, piginneqatigiiffik piginneqatigiilluni aalisariutaatileqatigiiffilluunniit unioqqutitsisuuppat, ingerlatseqatigiiffik taamaattutut akiliisussanngortinneqarsinnaavoq.
Imm. 3. Saattuarniarsinnaanermut akuersissutini piumasaqaatinik unioqqutitsinerit kingunerisinnaavaat taassuma atorsinnaanerata killiliiffigineqarnera kiisalu annertuumik arlaleriarluniluunniit unioqqutitsisoqarnerani akuersissutip arsaarinnissutigineqarsinnaanera. Tamanna Naalakkersuisunit aalajangiiffigineqassaaq nalunaarutigineqarneraniillu ullut 15-it qaangiutsinnagit Kalaallit Nunaata Eqqartuussisuuneqarfianut suliassanngortinneqarsinnaalluni, tak. Aalisarneq pillugu Inatsit.
Imm. 4. Aamma pineqaatissiinermik suliat Aalisarneq pillugu Inatsimmi kap. 13-imi aalajangersakkat malillugit suliarineqartassapput

 

 

Kapitali 8
Atuutilerfia

§ 28. Nalunaarut 1. juli 2004 atuutilerpoq. Taamaattoq §§ 18-22 aatsaat ulloq 1. januar 2005 atuutilissapput.

Namminersornerullutik Oqartussat, ulloq 7. juni 2004.

Simon Olsen

/

Amalie Jessen

---

Ilanngussaq 1

Ilanngussaq 2

Ilanngussaq 3, Paamiut

Ilanngussaq 4, Maniitsoq/Kangaamiut

Ilanngussaq 5, Sisimiut

Ilanngussaq 6, Aasiaat