Suliassaqartitsiniarnermik inunnillu isumaginninnermik Kalaallit Nunaannut inatsit nr. 580, 29. november 1978-imeersumi § 2 naapertorlugu makku aalajangersarneqarput:

 

Siunertaq

§ 1. Peqqussummi matumani siunertarineqarpoq meeqqap qitiutinnissaa, aamma peqqussut naapertorlugu suliniutini tamani meeqqap pisariaqartitai aallaavigineqassasut.
Imm. 2. Inuit 18-iliinissamik tungaanut meeqqanik taagorneqarput, tamatumani allatut taaneqarsimanngikkunik.

§ 2. Kommunalbestyrelsi pisussaavoq meeqqat ineriartornerannik, ingerlalluarnerannik nammineersinnaanerannillu siuarsaasumik alliartorneranni atugassaqartitsinissamik.
Imm. 2. Arnat naartusut meerartaassap peqqinnissaanik ineriartornissaanillu navianartorsiortitsisinnaasumik atugaqartut siusissukkut tapersersorneqarnissaat pingaartinneqarpoq.
Imm. 3. Meeqqat timimikkut eqqarsartaatsimikkulluunniit piginnaanikillisimasut imaluunniit immikkut tapersersorneqarnissamik pisariaqartitsisut siusissukkut aammalu siunertaqartumik iliuuseqarfigineqassapput.

§ 3. Naalakkersuisut pisussaaffigaat Meeqqat Pisinnaatitaaffii pillugit Naalagaaffiit Peqatigiit isumaqatigiissutaata atuutsinnissaa aammalu Naalagaaffiit Peqatigiit Meeqqanut komite-anut nunap iluani pissutsit pillugit danskit nalunaarusiaannut peqataassallutik.

 

Nakkutilliineq

§ 4. Meeqqat inuunerminni atugarisaannik kommunalbestyrelsi nakkutilliissaaq. Nakkutilliineq eqeersimaartumik akuliunnikkullu ingerlanneqassaaq, taamaalilluni meeqqamik immikkut tapersersorneqarnissamik pisariaqartitsisumik sapinngisamik siusinnerpaamik kommuni ilisimaarinnilerluni.
Imm. 2. Ilaqutariit meerartallit immikkut tapersersorneqarnissamik pisariaqartitsisut kommunimut allamut nuuppata kommunip qimatap tapersersorneqarnissamik pisariaqartitsineq kommunimut nuuffiusumut ilisimatitsissutigissavaa.

 

Nalunaartarneq

§ 5. Kinaluunniit meeqqamik peqqissutsimigut ineriartornermigulluunniit navianartorsiortinneqarluni atugaqartinneqartumik paasisaqaruni kommunalbestyrelsimut nalunaaruteqarnissaminik pisussaaffeqarpoq.
Imm. 2. Inuit isumaginnittoqarfimmi, atuarfeqarfimmi imaluunniit peqqinnissaqarfimmi atorfeqartut meeqqamik ikiorneqarnissamik pisariaqartitsisumik paasisaqarunik kommunalbe-styrelsimut nalunaaruteqarnissaminnik sakkortunerusumik pisussaaffeqarput. Taamatuttaaq inuit qinigaasimanertik tunngavigalugu suliaqartut nalunaaruteqarnissaminnik sakkortunerusumik pisussaaffeqarput.
Imm. 3. Inuit nalunaaruteqarnissaminnik sakkortunerusumik pisussaaffeqartut arnamik naartusumik annertuumik ajornartorsiuteqartumik tapersersorneqarnissamik katsorsarneqarnissamillu pisariaqartitsisorinartumik paasisaqarunik kommunalbestyrelsimut nalunaassapput.

 

Misissuineq

§ 6. Kommunalbestyrelsi meeqqamik immikkut tapersersortarialimmik paasisaqaruni, ilan-ngullugu timikkut eqqarsartaatsikkullu pisinnaasakillisimaneq pissutigalugu, pissutsit misissorneqarnissaat kommunalbestyrelsip isumagissavaa.
Imm. 2. Angajoqqaatut oqartussaassuseqartoq aammalu meeraq 15-ileereersimasoq akuersiseqqaarlugit misissuisoqassaaq.
Imm. 3. Meeqqap peqqissusaata ineriartornerataluunniit annertuumik ajoquserneqarnissaa navianartorsiornersoq paasiniarlugu misissuinissaq pisariaqarpat angajoqqaatut oqartussaassuseqartoq meerarlu 15-leereersimasoq akuersiteqqaanngikkaluarlugit kommunalbestyrelsip misissuinissaq aalajangiussinnaavaa.
Imm. 4. Misissuineq ingerlanneqassaaq najukkami suliamik ilinniagaqarsimasut isumaginnittoqarfimmeersut, peqqinnissaqarfimmeersut atuarfeqarfimmeersullu suleqatigalugit. Pisariaqarpat misissuisoqassaaq paaqqinniffimmiititsinermi imaluunniit napparsimavimmut unitsitsinikkut, ilanngullugu tarnikkut nappaatilinnut immikkoortortaq.

§ 7. Misissuinermi paasisat isummertoqarnissaanut atorneqassapput, suliniutinik aallartitsinissaq tunngavissaqarnersoq taamaappallu suliniutit suut inassutigineqassanersut.
Imm. 2. Inassuteqarnermi ersersinneqassaaq angajoqqaatut oqartussaassuseqartoq aammalu meeraq suliniutissamut qanoq isumaqarnersut. Taamatuttaaq ersersinneqassaaq ilaqutariinni taakkualu avatangiisaanni inuttut nukissat suut pigineqarnersut.

§ 8. Meeraq qulileereersoq pillugu suliami aalajangiisoqannginnerani ajornanngippat sapinngisamik meeraq oqaloqatigineqassaaq. Meeqqap isumai ilanngunneqassapput aammalu ukiuinut inerisimassusianullu naleqqiullugu naleqquttumik pingaartinneqassallutik.
Imm. 2. Meeqqanut quliliisimanngitsunut meeqqap inerisimassusiata suliallu suussusaata taamaattariaqartippagu meeqqap suliniutissamut qanoq isumaqarnera pillugu paasissutissat sapinngisamik pigineqassapput.
Imm. 3. Meeqqap angerlarsimaffiup avataanut inissinneqarnissaanik aalajangiisoqannginnerani suliaq kommunimi oqartussaasoqarfiit assigiinngitsunik suliallit ataatsimiititaanut oqaaseqarfigisassanngorlugu saqqummiunneqassaaq.

 

Suliniutit

§ 9. Angajoqqaatut oqartussaassuseqartoq aamma meeraq 15-ileereersimasoq akuersiseqqaarlugit ikiorsiissutissaq meeqqap immikkut pisariaqartitsineranut naleqqunnerpaaq kommunalbestyrelsip toqqassavaa.
Imm. 2. Kommunalbestyrelsi assersuutigalugu aalajangersinnaavoq
1) meeqqamut pissutsinut tunngatillugu isumaginninnermi sullissinikkut ikiorsiinissamik,
2) meeraq ulluunerani neqeroorutini, inuusuttut klubbianni, ilinniartitaanermut assigisaanniluunniit peqataassasoq,
3) illup iluani, perorsaanermik imaluunniit allatut angerlarsimaffimmi tapersersuinikkut ikiorsiinissamik,
4) ilaqutariinnik katsorsaanissamik assigisaanilluunniit tapersersuinissamik,
5) meeqqamut, angajoqqaatut oqartussaassuseqartumut aamma ilaqutariinni ilaasunut allanut ulloq unnuarlu paaqqinniffimmi, angajoqqaarsiani assigisaanniluunniit ulloq unnuarlu inissiinissamik neqerooruteqarnissamik,
6) ulloq unnuarlu paaqqinniffimmi, angajoqqaarsiani assigisaanniluunniit oqilisaassinertut inissiinissamik neqerooruteqarnissamik,
7) meeqqap angerlarsimaffiup avataanut inissinneqarneranut atatillugu angajoqqaatut oqartussaassuseqartup tapersersorteqarnissaanik neqerooruteqarnissamik,
8) inuttut siunnersuisorisamik neqerooruteqarnissamik, tak. § 16,
9) ineqarfiutigalugu atuarfimmiinnermut efterskole-miinnermulluunniit aningaasatigut ikiorsiinissamik, tamatumunnga angajoqqaatut oqartussaassuseqartoq nammineerluni akissaqanngippat,
10) meeqqap angerlarsimaffiup avataanut inissinneqarnissaanik, assersuutigalugu ulloq unnuarlu paaqqinniffimmut imaluunniit angajoqqaarsianut, meeqqap immikkut pisariaqartitsineranut naammassinnissinnaasutut isigineqartumut imaluunniit,
11) suliniuteqareernermi malinnaanissamik.
Imm. 3. Kommunalbestyrelsi aalajangersinnaavoq suliniutit imm. 2-imi taakkartorneqartut malitsigisaannik aningaasartuutinut ikiorsiinissamik, taakkununnga angajoqqaatut oqartussaassuseqartoq nammineerluni akissaqarsimanngippat.

 

Akuersisitseqqaarani angerlarsimaffiup avataanut inissiineq

§ 10. Angajoqqaatut oqartussaassuseqartup aammalu meeqqap 15-ileereersimasup akuersissutaa pigineqarpat pigineqanngikkaluarpalluunniit, meeqqap angerlarsimaffiup avataanut inissinneqarnissaa kommunalbestyrelsip aalajangiussinnaavaa, meeqqap peqqissusaata imaluunniit ineriartornerata ilungersunartumik ajoquserneqarsinnaanera qularnanngitsumik ulorianartorsiorpat pissutigalugu
1) meeqqap naammanngitsumik isumagineqarnera imaluunniit passunneqarnera,
2) persuttaaneq allatigulluunniit ilungersunartumik innarliineq,
3) atuipilunnermik ajornartorsiutit, pinerlunniartutut pissusilersornerit allatigulluunniit meeqqap inooqataanerani ajornakusoorutit annertuut,
4) meeqqap allatigut pissusilersornerani naleqqussarniarneraniluunniit ajornartorsiutit.
Imm. 2. Imm. 1 tunngavigalugu taamaallaat aalajangiisoqarsinnaavoq tunngavissalimmik ilimanaateqarpat ajornartorsiutit meeqqap angerlarsimaffimminiiginnarnerani anigorneqarsinnaanngitsut.

§ 11. Kommunalbestyrelsi akuersisitseqqaarani inissiinissamik aalajangiisinnaanngilaq, imaassimanngippat meeraq aamma angajoqqaatut oqartussaassuseqartoq illersuisoqarsinnaatitaanerannik aamma inisiissamaarneq pillugu oqaaseqaateqartussaatitaanerannik naleqquttumik sivisussusilimmik piffissalerlugit paasitinneqarsimasut.
Imm. 2. Angajoqqaatut oqartussaassuseqartup najugaa imaluunniit sumiiffia ilisimaneqan-ngippat, imm. 1 malillugu nalunaarut, meeqqamik isumaginnittuusumut tunniunneqassaaq.
Imm. 3. Illersuisoqarneq pillugu malittarisassanik, akissarsititsinissaq ilanngullugu, Naalakkersuisut aalajangersaassapput.

§ 12. Akuersisitseqqaarani inissiinissamik aalajangerneq sapinngisamik nalunaaquttap akunneri 24-it qaangiutsinnagit angajoqqatut oqartussaassuseqartumut ilisimatitsissutigineqassaaq.

§ 13. Angerlarsimaffiup avataanut inissiinissamik aalajangerneq ullut arfineq-pingasut qaagiutsinnagit Naalakkersuisunut nalunaarutigineqassaaq.

 

Iliuusissanik pilersaarut

§ 14. Kommunalbestyrelsi § 9 aamma § 10 malillugit meeqqap angerlarsimaffiup avataanut inissinneqarnissaanik aalajangiitinnagu, iliuusissanik pilersaarusiaq suliarineqassaaq. Iliuusissanik pilersaarusiap suliarineqarnissaa inissiinissami utaqqineqarsinnaanngippat inissiinermi siunertaasup naatsukullammik nalunaarutiginissaa naammappoq. Tamatuma kingorna iliuusissanik pilersaarusiaq piaarnerpaamik kommunalbestyrelsip suliarissavaa, kingusinnerpaammik inisseereernermi ullut 14-nit qaangiutinnagit.
Imm. 2. Kommunalbestyrelsi naliliissaaq suliniutit allat ima annertutiginersut iliuusissanik pilersaarusiaq suliarineqartariaqarluni. Angajoqqaat imaluunniit meeraq iliuusissanik pilersaarummik kissaateqarpata, kommunalbestyrelsi pisussaavoq taamaattumik suliaqassalluni.

§ 15. Iliuusissanik pilersaarummi siunertaavoq siunertaqarluartumik meeqqamut suliniuteqarnissap qularnaarnissaa. Taamaattumik iliuusissanik pilersaarut meeqqamut ataatsimut tunngassaaq aamma suliniuteqarnermi siunertaq nalunaallisissallugu aammalu siunertap anguneqarnissaanut qanorpiaq suliniuteqartoqartariaqarnersoq nalunaassallugu. Iliuusissanik pilersaarummiissapput suliniuteqarnerup qanoq sivisutiginissaa naatsorsuutigineqarnersoq, meeraq pillugu pissutsit immikkut ittut, ilanngullugit ilinniartitaaneq il. il.
Imm. 2. Angerlarsimaffiup avataanut inissiinermi aammattaaq iliuusissanik pilersaarummiissaaq meeqqap angerlarsimaffiup avataani inissisimaneranut aammalu angerlaqqereerneranut atatillugu immikkut ilaqutariinnut tapersersuineq qanoq ilusilik pilersinneqassanersoq.
Imm. 3. Angerlarsimaffiup avataanut piffissami sivisunerusumi inissiinermi inissiinermut anguniakkatut iliuusissanik pilersaarutip nassuiaataa tunngavigalugu kommunalbestyrelsip minnerpaamik ukiumut ataasiarluni inissiinissamik aalajangiineq naliliiffigeqqittassavaa. Inissiineq ingerlaannassasoq aalajangertoqarpat iliuusissanik pilersaarut nutaamik aalajangiinermut naleqquttunngorlugu iluarsineqassaaq.

 

Inuttut siunnersorti

§ 16. Inuttut siunnersortip nammineerluni attaveqarnermigut meeraq taassumalu ilaqutai siunnersuinikkut ilitsersuinikkullu tapersersussavai. Meeqqamut inuttut siunnersortissatut toqqarneqassapput inuit taamatut suliaqarnissamik immikkut piukkunnaateqartut.
Imm. 2. Inuttut siunnersorti kommunalbestyrelsimit toqqarneqassaaq peqatigisaanillu iliuusissanik pilersaarusiaq suliniuteqarnissamik nassuiaasoq allaganngorlugu tunniunneqassaaq.
Imm. 3. Inuttut siunnersortinik toqqaasarnermut akissarsisitsisarnermullu malittarisassanik kiisalu inuttut siunnersortitut sulinerup qanoq ingerlanneqarnissaanut malittarisassanik Naalakkersuisut aalajangersaassapput.

 

Paarsinissamik akuersissut

§ 17. Kinaluunniit meeqqamik ilaqutariinni paarisassamik tigusisinnaanngilaq kommuni ilaqutariit paarsisussat najugarivitaat tamatumunnga allaganngorlugu akuersissuteqaqqaartinnagu.
Imm. 2. Paarsinissamik akuersissummik qinnuteqartoqarnerani qinnuteqartoq taassumalu aappaa inooqataaluunniit pinerluuteqarsimanermut nalunaarsuiffimmit takussutissiamik takutitsissaaq. Ilaqutariit paarsisussat angerlarsimaffianni pissutsit perorsaanissamut aamma peqqinnissamut tunngatillugu isumannaatsuunersut kommunalbestyrelsi naliliissaaq.
Imm. 3. Meeqqanut ataasiakkaanut ilaqutariinni paarineqartussanut tamanut paarsinissamik akuersissut allaganngorlugu tunniunneqassaaq. Meeqqat paarineqartussat qassit ilaqutariinni paarsisussani isumagineqarsinnaanersut kommunalbestyrelsi ataasiakkaani tamani aalajangiissaaq.
Imm. 4. Akuersinermi tunngaviusut tunngavissaajunnaarpata paarsinissamik akuersissut atorunnaarsinneqassaaq.
Imm. 5. Ilaqutariinnik paarsisussanik akuerinnittarneq pillugu aalajangersakkanik erseqqinnerusunik Naalakkersuisut aalajangersaassapput.

 

Kommunalbestyrelsimit ilaqutariinnut inissiineq

§ 18. Ilaqutariit inuussutissarsiutigalugu paarsisartut tassaapput ilaqutariit paarsisartut, meeqqanut annertuumik eqqarsartaatsimikkut ajoquserneqarsimasunut imaluunniit meeqqanut annertuumik timimikkut eqqarsartaatsimikkulluunniit innarluutilinnut isumaginninnissamut immikkut tunngavissiisumik isumaginninnikkut sullissinissamut ilinniakkamik tunuliaqutallit assigisaanilluunniit inuussutissarsiornermi misilittagallit.
Imm. 2. Angajoqqaarsiat minnerpaamik aappaata meeqqamik ataatsimik arlalinnilluunniit angerlarsimaffimmi paarsineq ulloq tamaat suliffigissavaa.
Imm. 3. Ilaqutariinni inuussutissarsiutigalugu paarsisartuni angajoqqaarsiat tamarmik angerlarsimaffiup avataani inuussutissarsiutigalugu suliffeqarnissaat immikkut illuinnartunik pisoqartillugu kommunalbestyrelsi akuerisinnaavaa.

§ 19. Ilaqutariit nalinginnaasumik paarsisartut tassaapput ilaqutariit angerlarsimaffimminni meeqqanik paarsisartut.
Imm. 2. Ilaqutariit paarsisartut paarsinissamik suliassaq nalinginnaasumik ulloq tamaat suliffiginngilaat angerlarsimaffiullu avataani inuussutissarsiutigalugu suliffeqarsinnaallutik.

 

Nammineq aaqqissuutamik ilaqutariinnut inissiineq

§ 20. Meeqqamut angajoqqaatut oqartussaasuseqartup nammineerluni ilaqutariinnut isumaqatiginnissinnaavoq meeraq imminniitillugulu isumagisarissagaat.
Imm. 2. Meeqqamik inissiisoq inissiinermulluunniit peqataasoq pisussaavoq angajoqqaarsiat atuuttumik paarsinissamik akuersissummik peqarnersut qularnaassallugu. Paarsinissamik akuersissummik tunineqartup piaartumik kommunalbestyrelsi nalunaarfigissavaa, meeraq tiguneqarpat, paarsineq taamaatippat allanngorpalluunniit aammalu ineqarnermut tunngasunik allanngortoqarpat.
Imm. 3. Meeraq nammineq aaqqissuutamik ilaqutariinnut inissinneqarpat angajoqqaatut oqartussaassuseqartup meeqqap pilersorneqarnera tamakkiisumik nammineerluni isumagissavaa.

 

Kommunalbestyrelsip ilaqutariinnut inissiiviusunut pisussaaffii

§ 21. Ilaqutariit paarsisussat paarsinermi suliassamik sukumiisumik ilitsersorneqartussaapput. Ilaqutariit inuussutissarsiutigalugu aamma nalinginnaasumik paarsisussat angerlarsimaffiup avataanut inissiinermi iliuusissanik pilersaarummik tunngaviusumik peqassapput. Taamatullu sulinermi atugassarititaasut akiliuteqarnissarlu pillugit ilaqutariit paarsisussat kommunalbestyrelsip isumaqatigiissusiorfigissallugit. Ilaqutariit paarsisussat pikkorissarnissamik ingerlaavartumillu nukittorsarneqarnissamik neqeroorfigineqarsinnaapput.
Imm. 2. Ilaqutariit paarsisussat sulineranni pissutsit, aningaasarsiaqarnerat paaqqinninnersiuteqarnerallu pillugit Naalakkersuisut aalajangersaassapput.

 

Ulloq unnuarlu paaqqinniffiit

§ 22. Meeqqanut angerlarsimaffiup avataanut inissinneqartussanut pisariaqartunik amerlassusilinnik paaqqinniffinni inissaqartitsinissaq Naalakkersuisut nakkutigissavaat.
Imm. 2. Paaqqinniffiit imm. 1-imi pineqartut pilersinneqarnerini ingerlanneqarnerinilu Naalakkersuisut ataqatigiissaarissapput, aammalu perorsaanermut tunngatillugu ilitsersuissallutik.
Imm. 3. Nuna tamakkerlugu paaqqinniffinni aqutsineq Naalakkersuisut isumagissavaat.
Imm. 4. Paaqqinniffiit pilersinneqarsinnaallutillu ingerlanneqarsinnaapput Naalakkersuisunit, kommunimit ataatsimit arlalinnilluunniit imaluunniit Naalakkersuisut isumaqatigiissuteqarfigisaannit paaqqinniffittut imminut pigisutut.

§ 23. Ulloq unnuarlu paaqqinniffiit pilersinneqarnissaannut, pisatsersornissaannut, siulersorneqarnissaannut ingerlanneqarnissaannullu aammalu paaqqinniffinni perorsaanermik suliaqarnermut malittarisassanik pisariaqarfiisigut Naalakkersuisut aalajangersaassapput.
Imm. 2. Ingerlatsinerup tungaatigut, aningaasaqarnermut perorsaanermullu tunngatillugu ulloq unnuarlu paaqqinniffinnik Naalakkersuisut nakkutilliissapput.

§ 24. Ulloq unnuarlu paaqqinniffiit inatsisartut peqqussutaanni matumani pineqartut, meeq-qanik paaqqinniffimmut kommunalbestyrelsemit inissikkumaneqartunik tigusinissaminnik pisussaapput, tamatumuuna inissaqartitsigunik aammalu inissiinissaq paaqqinniffiup siunertaanut naapertuuppat. Inissiinissaq pillugu kommuni paaqqinniffillu isumaqatigiinngissuteqarpata, apeqqut Naalakkersuisunut aalajangiiffigisassanngorlugu saqqummiunneqassaaq.
Imm. 2. Ulloq unnuarlu paaqqinniffiup kommunalbestyrelsimik suleqateqarluni isumaginninnermi perorsaanermut tunngasunik allanik suliaqarsinnaanera pillugu Naalakkersuisut aalajangersaasinnaapput, tamatumani ilanngullugu akiliuteqarnissamik aalajangersakkat.

§ 25. Meeqqanut ulloq unnuarlu paaqqinniffinnut inissinneqarsimasunut kommunip akiliutissaa ulloq unnuarlu inissisimaffimmut ataatsimut aningaasanngorlugu naatsorsorneqassaaq.

§ 26. Ulloq unnuarlu paaqqinniffiit ukiumoortumik Naalakkersuisunut nalunaaruteqartassapput. Kingusinnerpaamik Inatsisartut upernaakkut ataatsimiinneranni Naalakkersuisut ataatsimoortitamik ukiumoortumik Inatsisartunut nalunaaruteqartassapput.
Imm. 2. Ulloq unnuarlu paaqqinniffiit ukiumoortumik nalunaarusiaasa tunniuneqarnissaat, ilusissaa imarisassai il.il. pillugit malittarisassanik erseqqinnerusunik Naalakkersuisut aalajangersaassapput.

 

Suliniutinik atorunnaarsitsineq

§ 27. § 9 aamma § 10 naapertorlugit suliniutit unissapput suliniuteqarnermi siunertaq anguneqarpat, ilanngullugit iliuuseqarnissamik pilersaarummi anguniakkat anguneqarpata, imaluunniit suliniuteqarneq siunertaminik naammassinnikkunnaarpat.
Imm. 2. Inatsisartut peqqussutaat manna naapertorlugu suliniutit aamma unissapput meeqqap 18-iliinerani. Suliniutit ingerlareersut 18-ileereernermi ingerlaannarsinnaapput, inuusuttoq tamatumunnga akuersippat aammalu iliuuseqarnissamik pilersaarummi anguniakkat aalajangiunneqarsimasut anguneqarnissaat naleqquttumik ilimanaateqarpat.
Imm. 3. Imm. 2 malillugu suliniuteqarneq unippat, kommunalbestyrelsip inuusuttoq suleqatigalugu aammalu kingusinnerpaamik angerlarsimaffiup avataanut inissiinerup taamaatinnissaa qaammatinik arfinilinnik sioqqullugu, nassuiassavaa tamatuma kingorna inuusuttoq qanoq tapersersorneqassanersoq.

§ 28. Ilaqutariinni inissiinerup taamaatinnissaa aalajangiunneqartinnagu, ilaqutariit paarsisut oqaaseqartinneqassapput. Meeraq kommunerivitami avataani ilaqutariinnut inissinneqarsimappat, meeqqap kommuni uninngavigisaa oqaaseqartineqassaaq.
Imm. 2. Ulloq unnuarlu paaqqinniffimmiigunnaarnissamik aalajangiisoqartinnagu ulloq unnuarlu paaqqinniffik oqaaseqartinneqassaaq.
Imm. 3. Ulloq unnuarlu paaqqinniffimmit imaluunniit ilaqutariinnit inuussutissarsiutigalugu paarsisartunit oqaaseqaateqarnermi kommunalbestyrelsip aalajangiunniagaa assortorneqarpat, suliaq § 34 malillugu Meeqqat pillugit paasisimasalittut qitiusumik ataatsimiititamut oqaaseqarfigisassanngortinneqassaaq.

§ 29. Angerlarsimaffiup avataanut inissiineq unissanngitsoq kommunalbestyrelsi aalajangiisinnaavoq tamanna meeqqap pisariaqartitaanut akerliuppat. Tamatuminnga naliliinermi pi-ngaartinneqassaaq inissiinerup nalaani meeqqap ikiorserneqarnissamik periarfissai tamakkiisumik atorluarneqarnersut. Tamanna aamma atuuppoq angajoqqaatut oqartussaassuseqartoq akuersiseqqaarlugu meeraq angerlarsimaffiup avataanut inissinneqarsimappat.

§ 30. Angerlarsimaffiup avataanut inissiinerup taamaatinnissaanik aalajangerneq Naalakkersuisunut nalunaarutigineqassaaq ullut arfineq-pingasut qaangiutsinnagit.

 

Inissiinermi

§ 31. Kommunalbestyrelsip inissinneqarfissaq aalajangigassaraa aammalu meeqqap paarineqarnera, perorsarneqarnera ilinniartitaaneralu isumagissallugu kiisalu allatigut meeqqamut namminermut tunngasut pisariaqarfiisigut aalajangiiffigissalugit.
Imm. 2. Kalaallit Nunaanni inissiinissamik periarfissaarussimappat Naalakkersuisut akuersinerisigut Kalaallit Nunaata avataanut inissiisoqarsinnaavoq.

§ 32. Inissiinerup atuunnerani kommunalbestyrelsip inissiivimmik attaveqarnermigut meeqqamut tunngassuteqartut malinnaavigissavai aammalu inissiiviup, katsorsaanerup assigisaasaluunniit allanngornissaa pisariaqarpat aalajangiissalluni.
Imm. 2. Inummik, paaqqinniffimmik imaluunniit peqatigiiffimmik akuerisaasimasumik § 36 malillugu meeqqamik ulluinnarni isumaginninnissamik kommunalbestyrelsi piginnaatitsisinnaavoq. Meeraq ulloq unnuarlu paaqqinniffimmut inissinneqarsimappat pisortaasoq ulluinnarni isumaginnittuussaaq.

§ 33. Meeqqap angajoqqaallu akornanni attaveqaqatigiittuarnissaq meeqqamut ulluinnarni isumaginnittoq suleqatigalugu kommunalbestyrelsip isumagissavaa. Angerlarsimaffimmut utertitsinissap aqqutissiuunnissaa sulissutigineqassaaq, tamanna meeqqap ineriartornerata ingerlaannarnissaanut peqqinnissaanullu akerliunngippat.

 

Meeqqat pillugit paasisimasalittut qitiusumik ataatsimiititaq

§ 34. Meeqqat pillugit paasisimasalittut qitiusumik ataatsimiititami ilaasortaapput inatsisileritooq, tarnip pissusiinik ilisimasalik, isumaginninnermi siunnersorti, isumaginninnermi perorsaasoq, ilinniartitsisoq aamma meeqqerisoq, tamarmik meeqqat inuusuttullu pisariaqartitaannik immikkut ittumik ilisimasaqartussat.
Imm. 2. Ataatsimiititaq ukiunut sisamakkaartunut Naalakkersuisut pilersissavaat, siullermik peqqussutip matuma atuutilerneranit aallartittumik. Ilaasortaq ataatsimiititap piffissaq atuuffissaata ingerlanerani soraarpat, ilaasortassamik nutaamik ataatsimiititap piffissaq atuuffissaata sinneranut atuuttussamik Naalakkersuisut toqqaassapput.
Imm. 3 Ataatsimiititaq iluminni siulittaasumik siulittaasumullu tullersortimik toqqaalluni nammineq inissitsitissaaq.
Imm. 4. Ataatsimiititap suliassaraa meeqqap ulloq unnuarlu paaqqinniffimmit aamma ilaqutariinnik inuussutissarsiutigalugu paarsisartunit angerlartinneqarneranut atatillugu § 28, imm. 3 naapertorlugu suliani oqaaseqaateqarnissaq.
Imm. 5 Naalakkersuisut ataatsimiititap suleriaasissaa suliarissavaat, allattoqarfeqarneq isumagissallugu aammalu aningaasartuutit ataatsimiititap ataatsimiinneranut tunngasuteqartut aningaasartuutigissallugit.

 

Suliniutit allat - misileraanerit

§ 35. Kommunalbestyrelsip qinnuteqarneratigut suliniutinik allaanerusunik pilersitsinissaq Naalakkersuisut akuerisinnaavaat, ilanngullugit misileraanerit aammalu meeqqanut inuusuttunullu isumaginninnikkut perorsaanermi neqeroorutit immikkut ittut.
Imm. 2. Suliniutit imm. 1-imi taaneqartut Naalakkersuisut nakkutigissavaat.

 

Peqatigiiffinnik akuerinninneq

§ 36. Meeqqanut inuusuttunullu sullissinerup iluani atugassarititaasussatut erseqqinnerusumik aalajangersakkat malillugit peqatigiiffiit suliffimmik ingerlatsinissaat Naalakkersuisut akuerisinnaavaat.

 

Aningaasalersuineq

§ 37. Inatsisartut peqqussutaat manna malillugu meeqqanut inuusuttunullu ikiorsiinissamut aningaasartuutit kommuninit aningaasartuutigineqassapput.
Imm. 2. § 11 malillugu illersuisoqarnermut aningaasartuutit Nunatta Karsianit aningaasartuutigineqassapput.
Imm. 3. Paaqqinnittarfiit sananerinut ingerlatinnerinullu aningaasartuutinut Naalakkersuisut tapiissuteqarsinnaapput.

 

Angajoqqaat akiliuteqarnerat

§ 38. Kommunalbestyrelsip meeraq angerlarsimaffiup avataanut inissikkuniuk inissiinermi kommunip aningaasartuutai angajoqqaanut tamakkiisumik ilaannakortumilluunniit akiligassanngortissavai.
Imm. 2. Pissutsit taamaattariaqartippassuk, kommunalbestyrelsip angajoqqaat akiliisinngitsoorsinnaavai imaluunniit akiligassaat isumakkeerinnissutigisinnaallugit.
Imm. 3. Angajoqqaat aningaasaqarnikkut atugarisaat annertuumik allanngorsimappata kommunalbestyrelsip akiliinissamik aalajangiineq allanngortissinnaavaa.
Imm. 4. Angajoqqaat akiliutissaasa amerlassusissaat pillugit Naalakkersuisut aalajangersaassapput.

 

Naammagittaalliuuteqarneq

§ 39. § 6, imm. 3, §§ 9-10, § 17, § 29 aamma § 38 malillugit aalajangiinerit isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni aalajangersakkat tunngavigalugit Isumaginninnermut Naammagittaalliuuteqartarfimmut naammagittaalliuutigineqarsinnaapput.

 

Pineqaatissiinissamik aalajangersakkat

§ 40. Kinaluunniit inatsisartut peqqussutaata matuma atortinneqarnerani peqataasoq pisortanik sullissitilluni suliffeqartilluniluunniit pinerluttulerinermi inatsimmi pinerluutit pillugit malittarisassat malillugit akisussaaffeqarpoq suliffik qinigaanikkut pigaluarpalluunniit.

 

Atortuulersitsineq ikaarsaariarnermilu aalajangersakkat

§ 41. Inatsisartut peqqussutaat manna atortuulerpoq ulloq 1. juli 2003.
Imm. 2. Peqatigisaanik Inatsisartut peqqussutaat nr. 9, 30. oktober 1992-imeersoq atorunnaarpoq.
Imm. 3. Maleruagassat Inatsisartut peqqussutaat nr. 9, 30. oktober 1992-imeersoq tunngavigalugu aalajangersarneqarsimasut atuutiinnassapput, Inatsisartut peqqussutaat manna imaluunniit Inatsisartut peqqussutaat allat tunngavigalugit maleruagassanik aalajangersaanikkut taarserneqarnissaasa imaluunniit atorunnaarsinneqarnissaasa tungaanut.

Namminersornerullutik Oqartussat, ulloq 15. april 2003

Hans Enoksen

/

Ruth Heilmann