§ 1.

Aalisarneq pillugu Inatsisartut inatsisaanni nr. 18, 31. oktober 1996-imeersumi kingullermillu Inatsisartut inatsisaatigut nr. 15-ikkut 12. november 2001-imeersukkut allanngortinneqartumi makku allanngortinneqarput:

1. § 5-imi imm. 3–tutilanngunneqassaaq:
"Imm. 3. Kalaallit Nunaata Kitaani raajanut TAC –ip agguaanneqarnerani sinerissamut qanittumi aalisariutinut 43 %-i avataasiortunullu 57 % tunniunneqartassaaq."

2. § 10-mi nr. 5 atorunnaarsinneqarpoq.
Tamatuma kingorna nr. 6 nr. 5-inngorpoq nr. 7-ilu nr. 6-inngorluni.

3. § 10-p kingornagut paragraffitut nutaatut ilanngunneqassaaq:
" § 10a. Aalisakkat erseqqinnerusumik nalunaarsorneqarsimasut aalisarneqarsinnaanerannut aamma aalisarnerup ingerlanneqarnissaanut atugassarititat pillugit Naalakkersuisut malittarisassiorsinnaapput.
Imm. 2. Aalisarnerup ingerlanneqarnissaanut atugassarititani allanngortitsinernik piffissanut killilikkanik taamatullu aamma aalisarnerup qaqugu aallartinneqarsinnaaneranik unitsinneqarnissaanillu Naalakkersuisut nalunaaruteqarsinnaapput.
Imm. 3. Imm. 2 malillugu nalunaarutit imm. 1 tunngavigalugu malittarisassiat naapertorlugit nalunaarutigineqarlutillu atortussanngortinneqartassapput. Nalunaarutit Nalunaarutit-Grønlands Lovsamlingimi saqqummiunneqartassanngillat."

4. § 22-p kingorna paragraffittut nutaatut ilanngunneqassaaq:
" § 22a. Tunitsiviit nioqqutissiorfiillu nutaat Naalakkersuisut akuersissuteqarsimatinnagit pilersinneqassanngillat. Tamanna aamma atuuppoq nioqqutissiorfiup pioreersup tunitsivittut allanngortiterneqarnissaa imaluunniit aalisakkanik allanik nioqqutissiorfinngortinneqarnissaa kissaatigineqarpat.
Imm. 2. Imm. 1-mi aalajangersagaq namminersortut pisortalluunniit suliffeqarfiutaasa tunisassiorfinnik pioreersunik matuneqartunik tigusinissaannut akornusersuutitut atorneqaqqusaanngilaq. Tamanna aamma atuuppoq tigusinermut atatillugu tunisassiorneq allanngortinniarneqaraangat.
Imm. 3. Naalakkersuisut akuersissuteqarnerannut atatillugu susassaqartut tamarmik tusarniaavigineqartassapput.
Imm. 4. Naalakkersuisut tunitsivinnik aamma nioqqutissiorfinnik nutaanik pilersitsineq kiisalu nioqqutissiorfiit pioreersut allanngortinneqarneri pillugit erseqqinnerusunik malittarisassiorsinnaapput."

5. § 32 ima oqaasertaqassaaq:
" § 32. Naalakkersuisut Aalisarneq pillugu Siunnersuisoqatigiinnik pilersitsissapput aalisarnermi soqutigisaqaqatigiiffinnit ilaasortaaffigineqartumik.
Imm. 2. Naalakkersuisut Aalisarneq pillugu Siunnersuisoqatigiit kikkunnik inutta-qartinneqassanersoq aammalu qassinik ilaasortaqassanersoq peqqussusiuutissavaat.
Imm. 3. Naalakkersuisut suliassani nalinginnaasuni §§ 5, 7, 9, 10, 11, 13, 18, 20, 22 aamma 23-mut tunngasuni Aalisarneq pillugu Siunnersuisoqatigiit tusarniaavigisassavaat.
Imm. 4. Apeqqutini imm. 3-mut ilaatinneqartuni kinguartinneqarsinnaanngitsuni Aalisarneq pillugu Siunnersuisoqatigiinni ilaasortanik tamanik allakkatigut Naalakkersuisut tusarniaatitsisinnaapput. Allakkatigut tusarniaaneq atorneqartassaaq siunnersuisoqatigiit isummerniarlutik ataatsimiissinnaanngikkaangata."

§ 2.

Inatsisartut inatsisaat ulloq 1. juni 2002 atuutilerpoq.

 


Namminersornerullutik Oqartussat, ulloq 21. maj 2002.

Jonathan Motzfeldt

/

Hans Enoksen