Aalisarneq pillugu Inatsisartut inatsisaanni nr. 18-imi 31. oktober 1996-imeersumi, "aalisarneq pillugu inatsimmi", kingullermik aalisarneq pillugu Inatsisartut inatsisaata allanngortinneqarnera pillugu Inatsisartut inatsisaatigut nr. 6-ikkut 20. maj 1998-imeersukkut allanngortinneqartumi, § 7, §§ 10 aamma 11, § 13, imm. 2 aamma imm. 3, §14, imm. 2, § 15, § 21, imm. 2, §§ 22 aamma 23, § 33, imm. 2 aamma § 34, imm. 3 naapertorlugit aalajangersarneqarpoq:

Atuuffii

§ 1. Nalunaarut aalisarneq pillugu inatsimmi § 6 aamma § 9 naapertorlugit angallammik Kalaallit Nunaanni nalunaarsorsimasumik, aamma aalisarneq pillugu inatsimmi § 7 naapertorlugu nunani allamiut angallataannik imartani Kalaallit Nunaata aalisarnikkut oqartussaaffigisaani atuuppoq.
Imm. 2. Nalunaarut manna malillugu akuersissummut tunniunneqartumut, imartami sinerissap titarnerullu aalisarnikkut oqartussaaffimmut tunngaviusumik killeqarfiit avataanni 3 sømilit akornanni angallatinut usitussutsimut uuttuutaat malillugu 75 BRT/120BT-itut angissusilinnut anginerusunulluunniit aalisarnissaq inerteqqutaavoq. Taamaattoq takuuk imm. 4, nr. 2 aamma 3.
Imm. 3. Angallatinut OZTZ, OULB, OVXD, OWES, OYKA, OVOJ, OWMZ aamma OZTJ-imik radiukkut attaveqartilluni ilisarnaatilinnut imartap aalisarnikkut oqartussaaffiusup tunngaviusumik killeqarfia sinerissap qanittuani akuersissutinut tunngatillugu kangimut killeqarfiuvoq. Taamatuttaaq "raajakarsini" aalisarneq pillugu Namminersornerullutik Oqartussat nalunaarutaat atuuppoq.
Imm. 4. Nalunaarut manna malillugu akuersissummut tunniunneqartumut sinerissap titarnerullu aalisarnikkut oqartussaaffiup tunngaviusumik killingata 3 sømilinik avataaniittup akornanni imartami aalisartoqarsinnaavoq ukuninnga
1) angallatinut usitussutsimut uuttuutaat malillugu 75 BRT/120BT-itut angitigisunut mikinerusunulluunniit, aamma
2) angallatit OZJO, OUHK aamma OUUC-mik radiukkut attaveqartilluni ilisarnaatillit kiisalu
3) angallatinut uiluinniarnissamut akuersissuteqarfigineqarsimasunut.

§ 2. Nalunaarummi matumani angallatip usitussutsimigut killigititaasunik qaangiisimaneranut ataassisimaneranulluunniit aalajangiisuussaaq usitussutsikkut annertussuseq angallatip angissusiligaaneranut uppernarsaammi allassimasoq, angallatip angissusiligaaneranut uppernarsaasiinermi uuttuinermut maleruagassat sorliit atorneqarneri apeqqutaatinnagit.

Piffissaa killilerlugu akuersissut

§ 3. Piffissaa killilerlugu akuersissutit ukiunik pingasunik sivisunerpaaffissalerneqartassapput.

§ 4. Piffissaa killilerlugu akuersissutit, pisat amerlanerpaaffissaannik akuerisaasumik aalajangersagartallit, aalisarnernut makkununnga tunniunneqartassapput inuussutissarsiutigalugulu aalisarsinnaanermut piumasaqaataallutik
1) angallatit 75 BRT/120 BT-itut angissusillit anginerusunilluunniit atorlugit qaleralinniarnermut, nataarnarniarnermut, saattuarniarnermut, ammassanniarnermut, suluppaagarniarnermut, tupissuterniarnermut saarullinniarnermullu
2) angallatip angissusia apeqqutaatinnagu uiluinniarnermut, kiisalu
3) imartani nunat allat nunalluunniit tamalaat suleqatigiiffiisa aalisarnermik aqutsinissamut oqartussaaffigisaanni angallatit Kalaallit Nunaanni nalunaarsorneqarsimasut atorlugit aalisarnermut.

§ 5. Piffissaa killilerlugu akuersissutit, pisat amerlanerpaaffissaannik akuerisaasumik aalajangersagartaqanngitsut, aalisarnernut makkununnga tunniunneqartassapput piumasaqaataallutillu inuussutissarsiutigalugu
1) immikkut pisuni, uumassusilinnik ilisimatuut siunnersuinerat angallatinut ataasiakkaanut pisat annertunerpaaffissaannik akuerisaasumik aalajangersaanissamut pissutissaqartitsinngikkaangat, kalaallit angallataat atorlugit aalisarnermi,
2) qaleralinniarnermut saattuarniarnermullu, kalaallit angallataat atorlugit aalisarnermi pisassat aalisarneqarsinnaasut angallatinut Kalaallit Nunaanni nalunaarsorneqarsimasunut ataatsimoorussaappata,
3)imartani Kalaallit Nunaata aalisarnikkut oqartussaaffigisaani nunani allamiut a-ngallataannik aalisarnermut, pisassat aalisarneqarsinnaatitaasut nunap angerlarsimaffigisap pineqartup angallataanut ataatsimoorussassaatillugit, aamma
4) imartani Kalaallit Nunaata aalisarnikkut oqartussaaffigisaani misileraalluni aalisarnermut, angallatip nunamit suminngaanneernera apeqqutaatinnagu.

Piffissaa killilernagu akuersissut

§ 6. Piffissaa killilernagu akuersissutit, pisat amerlanerpaaffissaannik akuerisaasumik aalajangersagartallit, inuussutissarsiutigalugu raajarniarnermut tunniunneqartassapput piumasaqaataallutillu.
Imm. 2. Akuersissutip taamaattup pisassiissutinit pigisat akuersissummut tunngavigisaasut nalunaarpai, pisassiissutinit pigisat tassaallutik imartami pisassaqarfiusumi aalisariutit ilaannut immikkoortunut naalakkersuisut pisassatut aalajangigaasa procentiisa ilaat.
Imm. 3. Nalunaarummi matumani "aalisariutit ilaat immikkoortut", angallatitut erseqqissumik killilerneqarlutik immikkoortutut, tak. § 1, Kalaallit Nunaanni angerlarsimaffeqartutut paasineqassapput.
Imm. 4. Akuersissummut taamaattumut atatillugu ukiut tamaasa ukiup pisassaqarfiusup aallartinnginnerani ukiumut pisassat nalunaarutigineqartassapput. Ukiumut pisassanik nalunaarutikkut ukiumi tassani pisassiissutit pigisat tonsinngorlugit annertussusii nalunaarneqartarput.
Imm. 5. Kalaallit Nunaata Kitaani pisassanit sinerissap qanittuani aalisariutit ilaannut immikkoortunut pisassiissutigineqartunit kilisaatit raajarniutit, angallatip uuttuutaanut uppernarsaat malillugu 75 BRT/120 BT-init mikinerusut, angallatillu radiukkut attaveqartilluni ukuninnga ilisarnaatillit akuersissuteqarfigineqartussaapput
1) OZJO, OUHK aamma OUUC kiisalu
2) OZTZ, OULB, OVXD, OWES, OYKA, OVOJ, OWMZ aamma OZTJ.
Imm. 6. Raajanik kilisaatit 75 BRT/BT 120-nik angissusillit anginerusullu - imm. 5, nr. 1-imi taaneqartut pinnagit - Kalaallit Nunaata Kitaani raajartassanit aalisariutit ilaannut immikkoortunut avataasiutinut immikkoortinneqartunik Tunumilu raajarniarnissamut akuersissuteqarfigineqassapput.

Ukiumik pisassiiffigineqartumik eqaannerusumik aaqqissuineq

§ 7. Umiarsuaatileqatigiiffik ukiumut pisassaminik nunguutsisimasoq tamatumunnga qinnuteqarsimaguni, 15. novemberip kingornatigut aalisarnerminik ingerlatseqqinissaminnut akuerineqarsinnaavoq pisarineqartut ukiumi pisassiivimmi tullermi umiarsuaatileqatigiiffimmut pisassiissutigineqartunit ilanngaatigineqartussanngorlugit.
Imm. 2. Umiarsuaatileqatigiiffik ukiumut pisassami ilaannik nunguutsinngitsoorsimasoq, tamatumunnga qinnuteqarsimaguni ukiumut pisassaminik ukiumi tulliuttumi ukiumut pisassaminik amerlisitsisinnaavoq, ukiup siulianit pisarinngitsuukkami amerlaqataanik. Taamaattorli pisassat nuunneqartut kingusinnerpaamik apriilip 30-ianni aalisarneqareersimassapput.
Imm. 3. Imm. 1 aamma 2 malillugit qinnuteqaatit Aalisarnermut, Piniarnermut Nunaqarfinnullu Pisortaqarfimmut nassiunneqassapput, pisortaqarfimmilu tiguneqarsimassallutik kingusinnerpaamik imm. 1 naapertorlugu aalisarnerup ingerlaqqinnissaa sapaatit akunnerinik marlunnik sioqqullugu, imaluunniit imm. 2 naapertorlugu pisassanik nuussinissaq kissaatigineqarsimappat.
Imm. 4. Qinnuteqaammi aalisarneqartussatut kissaatigineqartut amerlassusii imaluunniit ukiumi tulliuttumi nuunneqartussat amerlassusii taaneqassapput.

Aalajangersakkat tamanut atuuttut

§ 8. Akuersissut aamma - § 6, imm. 1 naapertorlugu piffissaa killilernagu akuersissut pineqarpat - ukiumut pisassanik nalunaarut taassumaluunniit assilineqarnera aalisartilluni angallammiitinneqartassapput.

§ 9. Akuersissut piginnittumut aalajangersimasumut ataatsimut tunniunneqassaaq, tassanilu allassimassallutik angallatit aalisarnermut atorneqarsinnaasut. Taamaattorli, § 6, imm. 1 naapertorlugu, akuersissummut piffissaa killiligaanngitsumut atatillugu, ukiumut pisassanik nalunaarummi tassunga atasumi angallatit taaneqassapput.
Imm. 2. Akuersissutip tunniunneqarnerani tunngaviusut allannguuteqarneri, taamatuttaaq piginnittut allannguuteqartillugit, aalisarneq pillugu inatsimmi § 6 takuuk, naalakkersuisunut akuersissutigisassanngorlugit saqqummiunneqassapput.

§ 10. Taamaallaat angallatit naalakkersuisunit akuerisat atorneqarsinnaapput.
Imm. 2. Naalakkersuisut taamaallaat akuerisinnaavaat angallatit
1) inuussutissarsiutigalugu aalisarneq pillugu inatsimmi aalajangersakkanut naapertuuttumik pigineqartut, aamma
2) naalakkersuisut naliliinerat malillugu aalisarnissamut periarfissanut atuuttunut naleqquttumik aalisarsinnaassusillit.
Imm. 3. Akuerineqarnissamik qinnuteqaat naalakkersuisunut allaganngorlugu tunniunneqassaaq.

§ 11. Imartani Kalaallit Nunaata aalisarnikkut oqartussaaffigisaasa avataanni kinaluunniit § 4, imm. 1, nr. 3 naapertorlugu inuussutissarsiutigalugu aalisarnissamut akuersissuteqarfigineqarsimasoq, nunat tamalaat isumaqatigiissutaannik aalisarfiusumi Kalaallit Nunaannut atuuttunik, malinnittussaatitaavoq.
Imm. 2. Kinaluunniit, imm. 1 naapertorlugu, imartami isumaqatigiissuteqarfiusimasumi inuussutissarsiutigalugu aalisartoq nakkutilliinermut allatulluunniit iliuutsinut nunat tamalaat isumaqatigiissutaat naapertorlugit ingerlanneqartunut akerlilersuisinnaanngilaq.

Pineqaatissiinerit

§ 12. § 1, imm. 2 - 4, §§ 4 aamma 5, § 6, imm. 1- 3, §§ 7 aamma 8, § 9, imm. 1, § 10, imm. 1 aamma 2-p unioqqutinneqarnerat kiisalu akuersissummi atugassarititaasut sumiginnarneqarnerat akiliisitsinermik kinguneqassaaq.
Imm. 2. § 10-imut akerliusumik inuussutissarsiutigalugu aalisarneq akiliisitsinermik kinguneqassaaq, nunat tamalaat isumaqatigiissutaat pineqaatissiisarnermut aalajangersakkamik imaqanngikkaluarpataluunniit.
Imm. 3. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiilluni ingerlateqatigiiffik imaluunniit piginneqataassuteqarluni umiarsuaatileqatigiiffik unioqqutitsisuusimappat ingerlatseqatigiiffik immini akiliisitaanissamut akisussaatinneqarsinnaavoq.
Imm. 4. Pinerluttulerineq pillugu inatsimmi pinngitsaaliinikkut arsaarinnittarnermik maleruagassat atuupputtaaq.
Imm. 5. Kalaallit Nunaata eqqaani aalisarnermi malittarisassanik akuersissummiluunniit piumasaqaatinik unioqqutitsineq taassuma atorneqarsinnaatitaaneranut killiliissutinik kiisalu pissutsit ilungersunarnerutillugit imaluunniit unioqqutitsisoqaqqitsillugu piginnaatitaaffimmik arsaarinninnermik kinguneqarsinnaapput. Tamakku pillugit naalakkersuisut aalajangiissapput, nalunaarutigineqarneranillu ullut 15-it qaangiutsinnagit Nunatta Eqqartuussivianut, suliassanngortinneqarsinnaalluni aalisarneq pillugu inatsimmi § 21, imm. 4 malillugu.
Imm. 6. Pineqaatissiissutit pillugit suliat allatigut aalisarneq pillugu inatsimmi aalajangersakkat malillugit suliarineqassapput.

Atuutilerfia

§ 13. Nalunaarut 1. februar 2002 atuutilerpoq.
Imm. 2. Peqatigitillugu aalisarsinnaanermut akuersissuteqartarneq pillugu Namminersornerullutik Oqartussat nalunaarutaat nr. 18, 22. august 1996-imeersoq atuukkunnaarsinneqarpoq.

Namminersornerullutik Oqartussat, ulloq 31. januar 2002

Hans Enoksen

/

Gedion Jeremiassen