Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11, 12. november 1980-imeersumi, § 2 aamma § 19 aamma Piniarneq aallaaniarnerlu pillugit Inatsisartut Inatsisaanni nr. 12, 29. oktober 1999-imeersumi, § 2, imm. 3 - 4, §§ 11 - 12, §§ 17 - 18, malillugit aalajangersarneqarput:

 

Atuuffia

§ 1. Nalunaarut manna Kalaallit Nunaanni tuttut (Rangifer tarandus) illersorneqarnissaannut atuuppoq. Nunami tamarmi tuttut eqqissisimatitaapput taamaattorli sumiiffiit nujuitsunik tuttuuteqarfissanngortitat pinnagit aamma § 2-mi taaneqartut pinnagit.
Imm. 2. Nalunaarut manna naapertorlugu pisassiissutinik agguaassineq kiisalu piniarsinnaanermut akuersissummi piumasarineqartut allat tuttut piniagaanerat pillugu Namminersornerullutik Oqartussat nalunaarutaanni aamma akiliuteqarluni aallaaniarneq aalisarnerlu pillugit Namminersornerullutik Oqartussat nalunaarutaanni malittarisassaqartitaapput.

 

Pisassiissutinik, piffissanik sumiiffiinillu piniarfiusinnaasunik aalajangersaasarneq

§ 2. Uumassusilinnut tunngassuteqartunik siunnersuisitseqqaarluni Pinngortitamut Naalakkersuisup tuttut pisassiinikkut piniagaanissaannut pisassiissutit aalajangersarsinnaavai.
Imm. 2. Pisassiissutit uumasunut tunngasunik pissuteqartumik uumasut suiaassusiinut ukioqqortussussiinullu aalajangersimasunut killilerneqarsinnaapput aamma pisassiissutinut ikinnerusunut, nunani piniarfissani piffissanilu piniarfiusussani killilikkani pisarineqartussanut, agguataarneqarsinnaapput.
Imm. 3. Kitaani Avannaanilu pisassiissutinik piniarneq aamma akiliuteqarluni piniarneq piffissami 1. augustimit 20. septemberimut akuerineqarsinnaavoq.
Imm. 4. Piniarneq pillugu Siunnersuisoqatigiit aamma kattuffiit suliamut attuumassuteqartut pisassiissutit pillugit aamma sumiiffinnut piniarfiusussanut piffissanullu piniarfiusussanut killilersuutinut tunngasuni apeqqutinut tusarniarneqassapput, takuuk imm. 1 - 3.
Imm. 5. Ukiumoortumik pisassiissutit kiisalu tamatumani atugassarititaasut isumaqatigiissutigineqartut piffissap tuttunniarfissap aallartinnginneranni nuna tamakkerlugu tusagassiorfitsigut tamanut saqqummiunneqassapput.

 

Piniariaatsit

§ 3. Tuttunniarnermi taamaallaat qoorortooq atorneqarsinnaavoq. Kaliberi minnerpaaq akuerisaasoq .222-iuvoq. Remington. Qoorortuut eqittaannartakkat nusuinnartakkallu tuttunniarnermi atorneqarnissaat inerteqqutaavoq, piniarneq aallaaniarnerlu pillugit Inatsisartut inatsisaanni nr. 12., 29.oktober 1999-imeersumi § 9, imm. 1 naapertorlugu.
Imm. 2. Piniartup kialuunniit piniarneq aallatitsinnagu aallaasip nakersarsimanissaa pitsaasuunissaalu isumagissavai.
Imm. 3. Tuttuniarnermi qimmit nassatereqqusaanngillat.
Imm. 4. Assartuutinit tuttunniartoqaqqusaanngilaq.

 

Tuttunik pissatanik toqutsineq

§ 4. Tuttunniarnerup nalaani tuttumik pissaasup pisussaaffigaa sapinngisamik sukkanerpaamik taassuminnga toqutsinissani. Piniartup pisussaaffigaa tuttup eqqorneqarnermi kinguninnguagut toqusimanera nalorninaatsumik paasissallugu.
Imm. 2. Piniartup tuttumik pissatamik ujarlernini pisariaqartitsineq naapertorlugu pissaanerup kingorna ullup unnuallu ingerlanerata sinnerani ingerlattariaqarpaa aamma tuttu pissataq nanineqartinnagu toqunneqartinnagulu aallanik tuttunniartoqassanngilaq.
Imm. 3. Tuttu pissanneqartoq nanineqarnanilu toqunneqanngippat, piniartoq piniarnerup naammassineqarnerata kinguninnguagut Pinngortitamut Pisortaqarfimmut pissutsinik piviusunik ilisimatitsissaaq.

 

Pinngortitami uumassusilinnik misissuinernut nalunaaruteqartarneq

§ 5. Tuttunniarnermut akuersissummut tunngatillugu pisanik nalunaarsukkanik nassitsisarnissamik piumasaqarsinnaaneq piumasarineqartunut ilanngunneqarsinnaavoq.
Imm. 2. Pisanik nalunaaruteqarneq imaluunniit pisanik nalunaarsuutinik kommunimut tunniussineq piniarnerup naammassineqarnerata kingornagut kingusinnerpaamik sapaatip akunnerisa pingasut qaangiunneranni pissaaq. Tamatuma kingorna paasissutissat ataatsimoortillugit piniarnerup naammassineqarnerata kingornatigut kingusinnerpaamik sapaatip akunnerisa arfinillit qaangiunneranni kommunimit Pinngortitaleriffimmut nassiunneqassapput.

 

Uumatillugit tigusinerit nuussinerillu

§ 6. Naalakkersuisut akuersiteqqaarsimatinnagit tuttut nuunneqarnissaat, ilisimajunnaartinneqarnissaat tiguneqarnissaallu aammalu ungalusat iluiniitinneqarnissaat inerteqqutaavoq.

 

Kommunimi ileqqoreqqusaq

§ 7. Kommunimi ileqqoreqqusakkut kommunalbestyrelsi § 2, imm. 2 - 6 naapertorlugit amerlanerusunik piumasaqaateqarsinnaavoq nalunaarummi aalajangersakkanit sakkortunerusunik. Kommunimi ileqqoreqqusaq Pinngortitamut Naalakkersuisumit atuutilersinneqassaaq.

 

Immikkut akuersissuteqartarneq

§ 8. Ilisimatusarnikkut siunertanut tassunga ilanngullugu ilisimatusarnermut atatillugu piniarsinnaanermut Pinngortitamut Pisortaqarfik immikkut akuersissuteqarsinnaavoq.
Imm. 2. Tuttut navianartorsiortitsisut imaluunniit angallannermut atatillugu annertuumik akornusersuisut allatut aaqqiissutissanik iluatitsisoqarsimatinnagu toqunneqarsinnaapput.
Imm. 3. Tuttumik allamit pissanneqarsimasumik sulilu uumasumik takunnittup ajornanngippat tuttu toqussavaa nikisinnagulu qimallugu. Taamatuttaaq tuttu toqungasoq siumorneqartoq nikisinneqarani qimanneqassaaq.
Imm. 4. Imm. 2 - 3, naapertorlugit tuttut toqutat Namminersornerullutik Oqartussanut pigisassanngortinneqassapput. Tuttumik pisaqarnermi akisussaasup pisussaaffigaa piniarnerup ingerlasimanera Avatangiisinut Pinngortitamullu Pisortaqarfimmut nalunaarutigissallugu.

 

Pineqaatissiinerit

§ 9. § 2, imm. 3 aamma §§-ini 3-mit 7-mut aalajangersakkanik unioqqutitsinerit akiliisitsinermik pineqaatissiissutaasinnaapput.
Imm. 2. § 2, imm. 3, § 3 kiisalu § 7 unioqqutillugit tuttutat Naalagaaffiup karsianut tunniussassanngorlugit arsaarinnissutigineqarsinnaapput.

 

Atuutilerfia il.il.

§ 10. Nalunaarut una atuutilerpoq 15. februar 2001.
Imm. 2. Peqatigitillugu tuttut eqqissisimatitaanerat piniagaanerallu pillugit Namminersornerullutik Oqartussat nalunaarutaat nr. 10, 26. juni 1999-imeersoq atorunnaarsinneqarpoq.

Namminersornerullutik Oqartussat, ulloq 8. februar 2001.

Alfred Jakobsen

/

Hans J. Høyer