Piniarneq aallaaniarnerlu pillugit Inatsisartut inatsisaanni nr. 12-imi, 29. oktober 1999-imeersumi § 2, imm. 3-4, § 4, §§ 7-8, §§ 12-13, § 16, § 17, imm. 2 aamma § 18 naapertorlugit aalajangersarneqarput:

Atuuffia

§ 1. Una nalunaarut atuuppoq tuttut (Rangifer tarandus) Kalaallit Nunaanni killilersukkanik piniarneqarnerannut sumiiffinnili tuttuuteqarfissanngortitani atuunnani.
Imm. 2. Eqqisisimatitsineq, pisassiissutit aalajangerneqarnerat, nunat piniarfiusussat piffissat piniarfiusussat piniariaatsinullu tunngasut Namminersornerullutik Oqartussat tuttut eqqissisimatitaanerat pillugu nalunaarutaanni aalajangersakkat malillugit pissapput.
Imm. 3. Inuussutissarsiornermut Naalakkersuisup imm. 2-mi nunat piniarfiusussat piffissallu piniarfiusussat aalajangerneqartut agguataaqqissinnaavai. Nunat piniarfiusussat piffissallu piniarfiusussat agguataaqqinneqarnerat pisinnaavoq Piniarneq Pillugu Siunnersuisoqatigiit aamma allat attuumassuteqartut isumasioreerlugit.

Pisassiissutinik agguaassineq

§ 2. Inuussutissarsiornermut naalakkersuisoq Piniarneq Pillugu Siunnersuisoqatigiit inassuteqarneratigut Kalaallit Nunaata Kitaanut tuttutassatut pisassiissutit kommuninut sumiiffinnullu aamma kommunit aggornerisa avataanniittunut agguaatissavai.
Imm. 2. Qaanaami kommunalbestyrelsip inassuteqarneratigut pisassiissutigineqartut Qaanaap kommuniani inuussutissarsiutigalugu aamma sunngiffimmi piniartunut Inuussutissarsiornermut Pisortaqarfiup agguaatissavai.
Imm. 3. Ukiumut pisassiissutit piumasaqaatillu taakkununnga tunngasut tusagassiuutitigut nunamut tamarmut annguttartutigut avammut tusarliunneqassapput tuttunniarnissaq sioqqullugu.

Akuersissutinik tunniussineq

§ 3. § 2, imm. 1 malillugu kommunimut pisassiissutinik kommunalbestyrelsi qinnuteqartunut atuuttumik piniarnermut allagartalinnut kommunimi pineqartumi najugalittut nalunaarneqarsimasunut tuttussinnaanermut akuersissutinik tunniussissaaq.
Imm. 2. Sumiiffinni kommunit aggornerisa avataanniittuni qinnuteqartunut atuuttumik piniarnermut allagartalinnut tassanilu najugalittut nalunaarneqarsimasunut tuttussinnaanermut akuersissutinik najukkami borgerrådi tunniussissaaq, takuuk § 2, imm. 1.

§ 4. Kommunimi inuussutissarsiutigalugu piniarnermut allagartalinnut qinnuteqartunut akuersissutinik tunniussinermi sapinngisamik qinnuteqartut akuersissutinik amerlaqatigiinnik pissarsinissaat anguniarneqartassaaq.Tamanna pisinnaanngippat akuersissutinik sinneruttunik agguaaneq makitsinikkut ingerlanneqassaaq.
Imm. 2. Sunngiffimmi piniarnermut allagartalinnut qinnuteqartunut akuersissutinik agguaassineq makitsinikkut pissaaq.
Imm. 3. Makitsinermut atatillugu akuersissutinik agguaassisussaatitaasup utaqqisut allattorsimaffiat tulleriiaarinertalik pilersissavaa, taannalu atuutilissaaq akuersissutinik agguaasseqqinnermi, takuuk § 5, imm. 2.
Imm. 4. Makitsineq ingerlanneqassaaq najukkami innuttaasunit kikkulluunniit malinnaavigineqarsinnaasumik.

§ 5. Akuersissutinik agguaassisussaatitaasup akuersissutit tunniunneqartut kingusinnerpaamik qaqugu aaneqareersimanissaat killilissavaa. Inuit akuersissummik tunineqarsimasut akuersissummilli atuisinnaanngitsut imaluunniit atuerusunngitsut piaarnerpaamik akuersissut atorneqanngitsoq akuersissutinik agguaassisussaatitaasumut utertissavaat.
Imm. 2. Akuersissutit atorneqanngitsoortut agguaateqqinneqassapput. Agguaasseqqinnerli piaarnerpaamik aatsaat pisinnaavoq sap. ak. marlunnik tuttunniarnerup uninnissaa sioqqullugu akuersissutinik pinissamik utaqqisut tulleriiaakkat allattorsimanerat malillugu.

Piniarnissamut piumasaqaatit

§ 6. § 3 malillugu akuersissutinik inuit pisimasut kisimik tuttussinnaatitaapput.
Imm. 2. Akuersissut inummut atiatigut taasamut taamaallaat atuuppoq allanullu tunniunneqaraniluunniit tunineqarsinnaanani.
Imm. 3. Akuersissut ataaseq ataatsimik tuttunnissamut periarfissiivoq.

§ 7. Inuussutissarsiutigalugu tuttunniarnermut akuersissummi allanneqarsinnaavoq tuttumik ilivitsumik, ilaanik, amianik, nassuinik il.il. tunisisoqarsinnaasoq uumasut nakorsaqarfianiit akuerineqarsimasumut neqileriffimmut imaluunniit tunitsivimmut.

§ 8. Aasaanerani ukiaanerani piniarnissamut akuersissutinik agguaanneqarnerannut peqataasinnaassagunik qinnuteqaateqartut allagartaq ukiumi pineqartumi kingusinnerpaamik majip aallaqqaataani akilereersimassavaat.
Imm. 2. Piumasaqaataavortaaq sunngiffimmi piniarnermut allagartalik akuersissummik qinnuteqartoq qinnuteqarnermini 16-inik ukioqalereersimassasoq.

Kommunit ileqqoreqqusat

§ 9. Kommunalbestyrelsi nalunaarummi §§ 7-8-mut piumasaqaatinit sakkortunerusunik kommunip ileqqoreqqusaatigut piumasaqaateqarsinnaavoq. Kommunip ileqqoreqqusiaa Naalakkersuisunut ilaasortamit atortussanngortinneqassaaq.

Nakkutilliineq

§ 10. Inuit § 3 malillugu tuttunniarnissamut akuerineqarsimasut, akuersissummut ilanngullugit tuttumut ataatsimut ikkutassanik ataasiarlugit atugassanik marlunnik, assigiinnik normulikkanik, tunineqassapput kingusinnerusukkut tuttutamut uppernarsaatitut atugassanik.
Imm. 2. Tuttup pisarineqarnerata kinguninnguagut, kingusinnerpaamillu tuttu angallammut assartuussutissamut ikineqarpat, ataasiaannarlugit atugassat taakku quttoraanut qajannaatsumik erseqqissunngorlugillu ikkunneqassapput.
Imm. 3. Ataasiaannarlugit atugassat taakku tuttumi ikkusimaannassapput tunineqarnissaata atorneqarnissaataluunnit tungaanut.
Imm. 4. Ataasiaannarlugit atugassat taakku tunniunneqartut atorneqanngitsoortulli piaarnerpaamik, kingusinnerpaamillu sap. ak. 3-t tuttunniarnerup uninnerata kingorna kommunimut utertinneqassapput. Taava kommunip piaarnerpaamik kingusinnerpaamilli sap. ak. 5-t tuttunniarnerup uninnerata kingorna ataasiaannarlugit atugassat atorneqanngitsoortut Inuussutissarsiornermut Pisortaqarfimmut nassiutissavai.
Imm. 5. Tuttutat tamarmik Piniarneq-mi pisanik nalunaarsuiffik atorlugu nalunaarutigineqassapput.

§ 11. Kinaluunniit politiinit, piniarnermik aalisarnermillu nakkutilliisunit allanilluunniit Inuussutissarsiornermut Pisortaqarfimmit taamaaliornissamut immikkut pisussaaffilerneqarsimasunit piumaffigineqaruni tuttunniarsinnaatitaanini uppernarsaqqullugu, taava piniarnermut allagartaq atuuttoq, tuttunniarnissamut akuersissut tuttutamullu ataasiaannarlugit ikkutassat takutissinnaassavai.

Pineqaatissiissutit

§ 12. §§ 6-7, § 10, imm. 2-5 aamma § 11-mik unioqqutitsinerit akiliisitsinermik pineqaatissiissutaasinnaapput.
Imm. 2. Neqi, ameq allallu tuttumeersut § 6, imm. 1 unioqqutillugu tuttutameersut arsaarinnissutigineqarsinnaapput Naalagaaffiup karsianut iluaqutissanngorlugit.
Imm. 3. § 7 malillugu kommunip ileqqoreqqusani kommunalbestyrelsi aalajangiisinnaavoq maleruagassiamik unioqqutitsineq akiliisitsinermik kinguneqarsinnaasoq.

Atulersitsineq il.il.

§ 13. Nalunaarut una atuutilerpoq 15. februar 2001.
Imm. 2. Peqatigitillugu Namminersornerullutik Oqartussat tuttut eqqissisimatitaanerat piniagaanerallu pillugu nalunaarutaat nr. 10, 26. Juni 1999-imeersoq atorunnaarpoq.

Namminersornerullutik Oqartussat, ulloq 8. februar 2001.

Simon Olsen

/

Jørn Birk Olsen