§ 1.

Aningaasarsianit akileraarutit pillugit Inatsisartut inatsisaanni nr. 5-imi 19. maj 1979-imeersumi, kingullermik Inatsisartut inatsisaatigut nr. 3-kkut 23. maj 2000-imeersukkut allanngortinneqartumi makku allannguutigitinneqassapput:

1. § 17 b imatut oqaasertaqassaaq:
"§ 17 b.Soraarnerussutisiatigut inuunermullu sillimmasiissutitigut aaqqissuussinernut ingerlaavartumik inuuneq tamaat, toqunikkut unittussanik, pisartagaqarfigineqartartussanut akilersuutit, tamakkununnga ilanngullugit aapparisap imaluunniit inooqatigisap qitornallu soraarnerussutisiassanit pisartagaqartinnissaannut kiisalu innarluutilittut ingerlaavartumik soraarnerussutisiassanut akilersuutit aningaasarsiat akileraaruteqaataasussat naatsorsorneranni ilanngaatigineqarsinnaapput. Taamaattorli piumasarisat makku naammassineqarsimassapput:
1) Aaqqissuussinerit pilersinneqarsimassapput soraarnerussutisiaqalernissamut aningaasaateqarfimmi sillimmasiisarneq pillugu inatsimmi ilaatinneqartumi. Aamma aaqqissuussinerit pilersinneqarsinnaapput selskabimi inuunermut soraarnerussutisiaqalernissamullu sillimmasiisarfimmi ingerlatsinissamut Finanstilsynimit akuerisaasumi,
2) utoqqalineq pissutigalugu soraarnerussutisiani inuuneq naallugu pisartagassanik, naammaataasunillu inuuneq naallugu pisartagassaanngitsunik aningaasartaqartuni, utoqqalineq pissutigalugu soraarnerussutisiat ilaannit inuuneq naallugu pisartagaasunit tunniunneqartut 50 procentiinit amerlanerussanngillat,
3) utoqqalineq pissutigalugu soraarnerussutisiat siusinnerpaamik tunniunneqartalersinnaapput 60-inik ukioqalernermi, taakkuninnga ukiukinnerunissaq Skatterådimit akuerineqarsimanngippat,
4) aapparisamut imaluunniit inooqatigisamut soraarnerussutisiatut pisartakkat aappariinnermi toqukkut qimagaasunut, aappariinnermi avissimasamut imaluunniit inooqatigisimasamut pisassanngortinneqarsinnaapput. Inooqatigisaq tassaavoq inuk aterorlugu taasaq akilersuilernermi toqusup illoqatigisimasaa, imaluunniit inuk toqusup katissimasinnaasaralua imaluunniit pisortatigut nalunaarsukkamik inooqatigisimasaa kingornussassat nalunaarsorneqarfiat toqusup toqunissani qaammatinik pingasunik sioqqullugu pilersissimasaa tunngavigalugu kingornutassaqalersimasoq kingornussisarneq pillugu inatsit naapertorlugu aapparisap katissimasap pinngitsoorani kingornutassarisassaraluata minnerpaamik angeqqataanik, aammalu toqusup toqunissaa sioqqullugu ukiuni marlunni illoqatigisimasaa imaluunniit siusinnerusukkut toqukkut qimaguttumik illoqateqarsimasoq sivikinnerpaamik atasuinnarmik ukiuni marlunni, ineqarfik ineqatigiiffigisaq taamaallaat ineqatigiiffigineqarunnaarsimappat paaqqinniffimmut inissinneqarneq pissutigalugu, tamatumani ilanngullugu utoqqalisut inigisartagaannut nuunneq,
5) aapparisap katissimasap, aapparisap avissimasap imaluunniit inooqatigisap qimataasup soraarnerussutisiat pisartagarisinnaavai sivikinnerpaamik ukiuni qulini,
6) taamaattorli qitornanut toqukkut qimagaasunut, aamma qitornarsianut, soraarnerussutisiarititat pisartagaritinneqassapput sivisunerpaamik qitornaasut 24-nik ukioqalernerat tikillugu, aamma
7) soraarnerussutisiatigut inuunermullu sillimmasiutitigut aaqqissuussinerit danskit soraarnerussutisiaqalernissamut inuunermullu sillimmasiissutitigut danskit selskabiini pilersinneqarsimasut soraarnerussutisiat akileraaruserneqartarnerat pillugu inatsimmi §§-ini 50-imi aamma 53 A-mi taaneqartunut ilaatinneqarsimassanngillat.
Imm. 2. Inuunermut sillimmasiisoqarpat sillimmasiisoq sillimmasersimassaaq sillimmasiutinullu piginnittuussalluni.
Imm. 3. Taamaattorli ingerlaavartumik inuuneq tamaat tunniunneqartartussat ukiumut 6.000 koruunit sinnersimanngippatigit soraarnerussutisiaqartitsinermi aaqqissuussanit, imm. 1-imi taaneqarsimasunit, atorfinitsitaanermullu atasumik pilersinneqarsimasunit, tunniunneqartussat aningaasanngorlugit ataasiaannartumik tunniunneqarsinnaapput.
Imm. 4. Taamaattorli aningaasat soraarnerussutisiaqalernissamut aaqqissuussinernit soraarnerussutisiaqalernissamut aningaasaateqarfinni imaluunniit inuunermut soraarnerussutisiaqalernissamullu selskabini Kalaallit Nunaanni angerlarsimaffeqartuni pilersinneqarsimasut ukiuni tulleriinni marlunni tunniuttagassat nalingi, aammalu atorfeqarnermut tunngatillugu pilersinneqarsimasut, ataasiaannartumik tunniunneqarsinnaapput."

2. § 17 c imatut oqaasertaqassaaq:
" § 17 c.Soraarnerussutisiaqalernissaq siunertaralugu naafferartumik akilersuilluni sillimmasiutitut akiliutit aningaasarsiat akileraaruteqaataasussat naatsorsorneranni ilanngaatigineqarsinnaapput aalajangersagaqarpat aningaasat sillimmasiutit sivikinnerpaamik ukiuni qulini amerlaqatigiiaarlugit tunniunneqartassasut aammalu sillimmasersimasoq inuutillugu tunniunneqartut inummut pineqartumut tunniunneqartarpata. Taamaattorli piumasaqaatit makkua naammassineqarsimassapput:
1) Isumaqatigiissut pilersinneqarsimassaaq inuunermut soraarnerussutisiaqalernissamullu sillimmasiisarneq pillugu selskabimi Kalaallit Nunaanni angerlarsimaffeqartumi aammalu inuunermut sillimmasiisarfimmik ingerlatsinissamut Finanstilsynimit akuerineqarsimasumi,
2) Sillimmasersimasup 60-inik ukioqalereernerani isumaqatigiissut taamaallaat pilersinneqarsinnaavoq isumaqatigiissummut taamatut ukioqalerneq sioqqullugu pilersinneqarsimasumut ilassutitut, aammalu isumaqatigiissut siulleq eqqarsaatigalugu piffissanut tunniussivissanut tunngatillugu tunniuttakkat sillimmasiutit amerlassusissaata siusinnerusukkut isumaqaatigiissutaasimasup affaa sinnerlugu amerlassuseqassanatik,
3) sillimmasiutinik pisartoq sillimmasersimassaaq sillimmasiutinillu piginnittuulluni. Sillimmasiutit pilersinneqarsimappata sulisuusup sulisitsisuatalu isumaqatigiissuteqarneratigut akiliutillu sulisitsisup akilertarpagit sulisuusoq sillimmasersimassaaq sillimmasiutinillu piginnittuulluni, aamma
4) Sillimmasersimasup 80-inik ukioqalereernerani piffissamik tunniussivissamik isumaqatigiissutip siulliup ulluanit kingusinnerusumik tunniussisarnissamik isumaqatigiissuteqartoqarsinnaanngilaq. Naafferarlugu tunniussuineq aallartissinnaavoq siusinnerpaamik sillimmasersimasup 60-iliineraniit, ukiukinnerunissaq Skatterådimit akuerineqarsimanngippat. Taammaattorli isumaqatigiissutigineqarsinnaavoq tunniussuineq aallartissinnaasoq sillimmasersimasoq innarluuteqalersimappat 60-illuunniit angunagit toqusimappat.
Imm. 2. Isumaqatigiissummi salliutinneqarsinnaasutuaapput sillimmasersimasup sillimmasiutit isumaqatigiissutigineqartarnerat pillugu inatsisip paasineqariaasia, takuuk inatsimmi tassani § 105, imm. 5, naapertorlugu "qaniginerpaasai" imaluunniit sillimmasersimasup aapparisaa katissimasaa, avissimasaa, inuk aterorlugu taasaq sillimmasersimasup sillimmasernermi nalaani illoqatigisimasaa, sillimmasersimasup inuuneq tamaat kingornussisussai, qitornarsiai imaluunniit qitornarsiat inuuneq tamaat kingornussisussai."

3. § 17 d imatut oqaasertaqassaaq:
"§ 17 d.Aaqqissuussinernut §§-ini 17 b-mi aamma c-mi taaneqartunut akilersuutit pillugit ilanngaat piffissamut akilersuiffiusumut tunngatinneqassaaq, aammalu ilanngaat ukiup aningaasarsiorfiup ilaani akiliuteqarfiusumi akissarsiat tamarmiusut 15 procentiannit annerusinnaanngilaq. Aappariinnut ataatsimut akileraarusigaasunut imaluunniit inooqatigiittut nalunaarsugaasunut tunngatillugu ilanngaat taaneqartut akissarsiaasa tamarmiusut 15 procentiannit annerussinnaanngilaq. Namminersorlutik inuussutissarsiummik ingerlatsisunut tunngatillugu naatsorsuinermi tunngaviussaaq pissuseqataanik atorfillip akissarsiaasa missingerferneqarnerat.
Imm. 2. Sulisuusup akissarsiaasa akileraaruteqaataasussat naatsorsorneranni ilaassanngillat aningaasat §§-ini 17 b-mi aamma c-mi aaqqissuussinernut taaneqartunut sulisitsisup akilersimasai.
Imm. 3. Ukiup aningaasarsiorfiusup ingerlanerani soraarnerussutisiaqalernissamut aaqqissuussinermut ingerlaavartumik tunniussisartussamut, takuuk § 17 b, imaluunniit naaferartumik akilersuilluni sillimmasiivimmut, takuuk § 17 c, akiliutit imm. 1 naapertorlugu akissarsiat tamarmiusut 15 procentiat sinnerlugu akiliisoqarsimappat Akileraartarnermi Pisortaqarfiup akuerisinnaavaa taanna qaangerlugu akiliutit utertinneqarnissaat tamatumunnga immikkut ittunik patsisissaqarsimappat."

4. § 17 d-p kingornanut una ilanngunneqassaaq:
"§ 17 e.Aningaasarsianut akileraaruteqaataasussanut ilanngunneqassapput:
1) Soraarnerussutisiaqalernissamut aaqqissuussinermit ingerlaavartumik tunniussisartussamit soraarnerussutisiat, takuuk § 17 b, imm. 1, kiisalu § 17 b, imm. 3 aamma 4 malillugit aningaasat tunniunneqartartut piginnittumut namminermut, aapparisaanut katissimasaanut inooqatigisaanulluunniit, tamatumani ilanngullugit aapparisimasamut avissimasamut kiisalu inuuneq naallugu kingornussisussanut, qitornarsianut imaluunniit qitornarsianit inuuneq naallugu kingornussisussanut,
2) soraarnerussutisiaqalernissaq siunertaralugu naafferartumik sillimmasiutinit tigusartakkat, takuuk §17 c, aaqqissuussinermi atugassarititat naapertorlugit naafferartumik tunniunneqartartut sillimmasersimasumut kiisalu sillimmasersimasup toqoreerneratigut naafferartumik tunniuttakkat, tassa kikkut salliutinneqarnissaat pillugu malittarisassat malillugit tunniunneqartarpata pineqartup aapparisaanut katissimasaasut imaluunniit inooqatigisaanut, tamatumani ilanngullugit aapparisimasamut avissimasamut imaluunniit inuuneq naallugu kingornussisussanut, qitornarsianut imaluunniit qitornarsiat inuuneq naallugu kingornussisussaannut, aamma
3) soraarnerussutisiaqalernissamut aaqqissuussinermit ingerlaavartumik tunniussisartussamit soraarnerussutisiat § 17 b, imm. 1 kiisalu § 17 b, imm. 3 aamma 4 malillugit tunniuttakkat aammalu soraarnerussutisiaqalernissaq siunertaralugu naafferartumik sillimmasiutinit tunniuttakkat, § 17 c malillugu piginnittup katissimallugu aapparisaanut avissimasaanut averusersimasaanulluunniit tunniunneqarpata, tassa najugaqatigiinnermi pigisat agguarneqarnerata kinguneranik pisassanngortinneqarsimappata.
Imm. 2. Naafferartumik tigusartakkat sillimmasiinermit § 17 c-mi pineqartumit pisut aningaasarsiatut akileraaruteqaataasussaapput, tigusartakkat inunnut imm. 1, nr. 2-mi taaneqarsimanngitsunut tunniunneqartaraluarpataluunniit.
Imm. 3. Soraarnerussutisiaqalernissamut aaqqissuussinermit ingerlaavartumik tunniussisartussamit soraarnerussutisiassat maanaannakkut unitsitat tunniunneqartut, soraarnerussutisiaqalernissamut aningaasaateqarfimmi imaluunniit inuunermut soraarnerussutisiaqalernissamullu selskabimi Kalaallit Nunaanni angerlarsimaffeqanngitsumi pilersinneqarsimasuneersut, aningaasarsiatut akileraaruteqaataasussaapput, taamaattorli takuuk § 17 f, imm. 5.
Imm. 4. Naafferartumik sillimmasiutinit inuunermut soraarnerussutisiaqalernissamulluunniit selskabimi pilersinneqarsimasumit sillimmasiinerit maanaannarlu unitsitsinikkut tunniunneqartut, Kalaallit Nunaannilu angerlarsimaffeqanngitsuneersut, aningaasarsiatut akileraaruserneqassapput, taamaattorli takuuk § 17 f, imm. 5."

5. § 17 e-p kingornanut una ilanngunneqassaaq:
"§ 17 f. Aningaasarsiat akileraaruteqaataasussat naatsorsorneqarneranni ilanngunneqartassanngillat tjenestemanditut soraarnerutissanut aamma Arbejdsmarkedets Tillægspensionimut nammineq akilersuutit aamma/imaluunniit sulisitsisup akilersuutai.
Imm. 2. Aningaasat aaqqissuussinernit imm. 1-imi taaneqartunit ingerlaavartumik tunniunneqartartut aningaasarsiat akileraaruteqaataasussat naatsorsorneqarneranni ilanngunneqartassapput.
Imm. 3. Aningaasarsiat akileraaruteqaataasussat naatsorsorneqarneranni danskit aningaaseriviini assigisaannilu soraarnerussutisiassanik katersiniarluni aaqqissuussinernit, soraarnerussutisiaqalernissamut ileqqaakkat akileraaruserneqarnissaannut inatsimmi kapitali 1-imi pineqartunut ilaatinneqartunit, kiisalu Lønmodtagernes Dyrtidsfondimi uninngasuutinit erniasiat ilanngunneqartassanngillat.
Imm. 4. Aningaasarsiat akileraaruteqaataasussat naatsorsorneqarneranni ilanngunneqartassanngillat pisortani atorfillit soraarnerussutisiaqalernissamut ileqqaagaannut sulisitsisup akiliutai, soraarnerussutisiaqalernissamut ileqqaakkat makkunatut iluseqartinneqarpata: naafferartumik akilersuilluni sillimmasiinerit, soraarnerussutisiaqalernissaq siunertaralugu naafferartumik akilersuilluni ileqqaakkat naafferartumik tunniunneqartussat, sillimmasiinerit akit nikerarneri najoqqutaralugit iluarsineqartartut, akit nikerarneri najoqqutaralugit ileqqaakkat, ataatsikkut akiliilluni sillimmasiinerit aammalu soraarnerussutisiaqalernissamut ileqqaakkat ataatsikkut tunniunneqartussat, aaqqissuussineq sulisumut pinngitsoorani ileqqaartitsissutaappat akileraartussaanerullu siornatigut pilersinneqarsimappat. Taamaattorli aaqqissuussineq soraarnerussutisiaqalernissamut ileqqaakkat akileraaruserneqarnissaannut inatsimmi § 50 imaluunniit § 53 a naapertorlugu akileraarusigassanngortinneqarsimappata sulisitsisup akiliutai aningaasarsiat akileraaruteqaataasussat naatsorsorneqarneranni ilanngunneqartassapput.
Imm. 5. Aningaasarsiat akileraaruteqaataasussat naatsorsorneqarneranni so-raarnerussutisiaqalernissamut aaqqissuussinerit maanaannaq atorunnaarsinneqartut nalingat ilanngunneqartassanngilaq, aaqqissuussinerit tamakku soraarnerussutisiaqalernissamut ileqqaakkat akileraaruserneqarnissaannut inatsimmi kapitali 1-imi pineqartunut ilaasimappata."

6. § 17 f-ip kingornanut una ilanngunneqassaaq:
"§ 17 g. Aningaasarsiat akileraaruteqaataasussat naatsorsorneranni inuunermut sillimmasiissutinit soraarnerussutisiatigullu aaqqissuussinernit § 17 b-mi imaluunniit § 17 c-mi taaneqanngitsunit iluanaarutit ilanngunneqartassapput. Aningaasarsianit akileraartartussaatitaavoq piginnittoq imaluunniit piginnittup toqunerata kingornagut sillimmasiissutinit pisartagaqartussaatitaasoq. Iluanaarutit naatsorsorneqassapput illuatungaani sillimmasiussat ukiup aningaasarsiorfiup naanerani aningaasanngorlugit nalingata ukiup ingerlanerani sillimimmasiisumut tunniunneqarsimasunik tapikkat illuatungaanilu sillimmasiussat ukiup aningaasarsiorfiup aallartinnerani aningaasanngorlugit nalingata ukiup ingerlanerani sillimmasiisumit akiliutigineqarsimasunik tapikkat assigiinngissutaattut. Sillimmasiissutinit amigartoorutit § 21, imm. 1-imi maleruagassat malillugit taamaallaat ukiuni aningaasarsiorfiusuni tallimani tulliuttuni sillimasiissutinit taakkuusunit iluanaarutaasunit ilanngaatissanngorlugit nuunneqarsinnaapput.
Imm. 2. Inuunermut sillimmasiissutinit il.il., imm 1-imi pineqartunit, pisassat ingerlaavartumik tunniuttagaanngippata aningaasarsiat akileraaruteqaataasussat naatsorsorneranni ilanngunneqassanngillat.
Imm. 3. Taamaattorli imm. 1-imi 2-milu maleruagassat inuunermut sillimmasiissutinut il.il. sillimmasiisoq piffissap sillimmasiiffiusup isumaqatigiissutaasumik naanissaa nallertinnagu toquppat imaluunniit timimigut innarluuteqalerpat aatsaat tunniunneqarsinnaasunut atussanngillat, isumaqatigiissutaasumik naaffissaq taanna sillimmasiisup 80-inik ukioqalernerata kingornagut sillimmaserneqarnermut allagartami ullormit siullermit kingusinnerunngippat.
Imm. 4. Aningaasarsiat akileraaruteqaataasussat naatsorsorneranni ilanngunneqassanngillat aningaasat sillimmasiisup toqoreerneratigut pisartagaqartitsiniarluni sillimmasiissutinit, matumani ilaallutik timikkut innarluuteqalernermut taartisiat ataatsikkoortumik inuunermut sillimmasiissutinit imm. 3-mi pineqartunit kiisalu ajunaarnissamut sillimmasiissutinit tunniunneqartut.
Imm. 5. Imm. 1-imi 2-milu maleruagassat taamattaaq atussanngillat naafferartumik akilersuilluni sillimmasiinernut soraarnerussutisiaqalernissarlu siunertaralugu naafferartumik akilersuilluni ileqqaakkanut naafferartumik tunniunneqartussanut, sillimmasiinernut akit nikerarneri najoqqutaralugit iluarsineqartartunut, akit nikerarneri najoqqutaralugit ileqqaakkanut, ataatsikkut akiliilluni sillimmasiinernut soraarnerussutisiaqalernissamullu ileqqaakkanut ataatsikkut tunniunneqartussanut, soraarnerussutisiaqalernissamut ileqqaakkat akileraaruserneqarnissaannut inatsimmi kapitali 1-imi pineqartunut.
Imm. 6. Inuunermut sillimmasiissutit Skatterådip imm. 1 aamma 2 malillugit akileraarusigassanngortinngissinnaavai inuunermut sillimmasiineq pilersinneqarsimappat sillimmasiisoq Kalaallit Nunaannut akileraartartussanngorsimatinnagu."

7. § 17 g-p kingornanut una ilanngunneqassaaq:
"§ 17 h.Soraarnerussutisiaqalernissamik isumaqatigiissutip imaluunniit soraarnerussutisiaqalernissamut aningaasaateqarfiit aamma inuunermut soraarnerussutisiaqalernissamullu selskabit Kalaallit Nunaanni angerlarsimaffeqartut akornanni tunniussinertut akiliutitulluunniit suliarineqassanngillat nuussinermi pineqarpata:
1) soraarnerussutisiaqarnermut aaqqissuussinerit ingerlaavartumik tunniussisartut akornanni, takuuk § 17 b,
2) Naafferartumik sillimmasiutiniit, takuuk § 17 c, soraarnerussutisiaqalernissamut aaqqissuussinermut ingerlaavartumik tunniussisartussamut, takuuk § 17 b, imaluunniit
3) naafferartumik sillimmasiummiit taamaaqataanut nuussinerit, takuuk § 17 c.
Imm. 2. Skatterådip akuerisinnaavaa aningaasat nunani allani sillimmasiisarnermut aaqqissuussinerniit nuunneqartut soraarnerussutisiaqalernissaq pillugu aaqqissuussinernut § 17 b-mi imaluunniit § 17 c-mi pineqartunut akiliutitut suliarineqassanngitsut.
Imm. 3. Imm. 1-imit 2-mut maleruagassat atortinneqarnissaannut piumasaqaataavoq nuussineq sioqqullugu aningaasat nuutat pillugit aningaasarsianit akileraartussanngortitsisoqarsimassanngitsoq imaluunniit nuunneqartunit akileraartussanngortitsisoqarsimassanngitsoq."

8. § 17 h-p kingornanut una ilanngunneqassaaq:
"§ 17 i.Soraarnerussutisiaqalernissamut aaqqissuussinermit ingerlaavartumik tunniussisartussamit aammalu soraarnerussutisiaqalernissamut aningaasaateqarfimmi imaluunniit inuunermut soraarnerussutisiaqalernissamulluunniit selskabimi Kalaallit Nunaanni angerlasimaffeqartumi pilersitaasumi maanaannakkut unitsitat tunniutassat akileraaruserneqassapput 45 procentimik.
Imm. 2. Naafferartumik sillimmasiutit maanaannakkut unitsitat tunniunneqalerneranni aammalu inuunermut soraarnerussutisiaqalernissamullu sillimmasiinermut selskabimi Kalaallit Nunaanni angerlarsimaffeqartumi pilersinneqarsimasut, akileraaruserneqassapput 45 procentimik.
Imm. 3. Imm. 1 aamma 2 naapertorlugit tunniussinernut naligiissitaapput allamut tunniussineq imaluunniit allamut pigisassanngortitsineq qularnaveeqqutissatulluunniit tunniussineq kiisalu iliuutsit il.il. aaqqissuussinerup ilanngaatigineqarsinnaaneranut piumasaqaatitaanik naammassinnissinnaajunnaarnermik kinguneqartut, taavalu 45 procentimik akileraaruserneqassapput aningaasat allamut tunniussinerup iliuuseqarnerulluunniit nalaani aaqqissuussinerup atorunnaaarnerani tunniunneqarsinnaagaluartut akeqanngitsumik isumaqatigiissutip assigisaataluunniit naligisinnaagaattut.
Imm. 4. Imm. 1-imiit 3-mut maleruagassat atussanngillat pigeqatigiitanik aapparisamut agguaassinermi. Agguaassinerup kingornatigut aapparisaq nammineerluni akileraartartunngussaaq imaluunniit pissarseqataassutiminit akileraarutinut akiliisussanngussaaq, aammalu § 17 c, imm.2-mi maleruagassat malillugit salliutitatut inississinnaalluni.
Imm. 5. Akileraarutinik akiliisussaatitaasup pisussaaffigaa soraarnerussutisiaqalernissamut aningaasaateqarfik imaluunniit inuunermut soraarnerussutisiaqalernissamut sillimmasiinermut selskabi iliuutsit imm. 3-mi taaneqartut pillugit piaartumik ilisimatissallugu."

9. § 17 i-p kingornanut una ilanngunneqassaaq:
"§ 17 j.Soraarnerussutisiaqalernissamut aningaasaateqarfiup imaluunniit inuunermut soraarnerussutisiaqalernissamullu selskabip tunniussisussap § 17 i malillugu akileraarut unerartissavaa Akileraartarnermilu Pisortaqarfimmut akilerlugu soraarnerussutisiaqalernissamut aningaasaateqarfiup imaluunniit inuunermut soraarnerussutisiaqalernissamullu sillimmasiinermut selskabip akileraarummik akiliisussaatitaanermik paasisaqarnerata kingornatigut kingusinnerpaamik qaammatip ataatsip qaangiunnerani.
Imm. 2. Soraarnerussutisiaqalernissamut aningaasaateqarfik imaluunniit inuunermut soraarnerussutisiaqalernissamulluunniit sillimmasiinermut selskabi akileraarummik unerartitsisussaanerminik naammassinninngitsoq, imaluunniit aningaasanik ikippallaanik unerartitsisoq aningaasat amigaataasut akilernissaannut toqqaannartumik landskarsimut akisussaasunngussaaq, soraarnerussutisiaqalernissamut aningaasaateqarfiup imaluunniit inuunermut soraarnerussutisiaqalernissamullu sillimmasiinermut selskabip uppernarsarsinnaanngippagu inatsimmi matumani aalajangersakkat qarsupissimanagit. Soraarnerussutisiaqalernissamut aningaasaateqarfik imaluunniit inuunermut soraarnerussutisiaqalernissamullu sillimmasiinermut selskabip aningaasat unerartitassat landskarsimut akilertussanngussavai. Akiligassat akilersinniarneqarsinnaapput inatsimmi matumani maleruagassat malillugit.
Imm. 3. Akileraarutip Akileraartarnermi Pisortaqarfimmut akilerneqarnissaanut maleruagassat sukumiinerusut Naalakkersuisut aalajangissavaat."

10. § 25 l-p kingornanut una ilanngunneqassaaq:
"§ 25 m.Skatterådip akuerisinnaavaa imm. 2-miit 4-mut maleruagassat atorneqassasut suli inuutilluni suliffeqarfiup ilaataluunniit qitornanut, ernuttanut, qatanngutinut, qatanngutit meeraannut imaluunniit qatanngutit ernutaannut tunniunneqarnissaat, tunniussisoq piginnittunngortorlu § 1, imm. 1, nr. 1 naapertorlugu Kalaallit Nunaanni tamakkiisumik akileraartussaatitaappata. Qitornavissiartaarisimasat qitornarsiallu ilaqutavittut isigineqarput.
Imm. 2. Suliffeqarfiup pigisai nalillit tunniunneqarpata akileraarutitigut nalingannik annerusumilluunniit nalilerlugit, kisiannili nalinginnaasumik nioqqutigissagaanni nalissaraluannit appasinnerusumik, piginnittunngortoq aningaasarsiat akileraaruteqaataasussat naatsorsorneranni akileraarutitigut nalikilliliissutinut kiisalu iluanaarutit akileraaruserneqarnerannut aamma tunisinermi ajunaarutit ilanngaatigineqarsinnaanerannut tunngatillugu piginnittoq inissisimassaaq soorlulusooq pigisat nalillit piginnittunngortumit pissarsiarineqarsimasut piginnittuusimasup nalimini akiligaatut akeqartillugit. Tunniussisup akileraarutitigut nalikilliliissutigisimasinnaasai piginnittunngortup nalikilliliissutigisimasaatut isigineqassapput. Tunniussisup pigisat nalillit inuuniutiminut iluanaarniarnerminullunniit atatillugu pissarsiarisimappagit iluanaarutit annaasalluunniit pigisat nalillit tuneranni pilersut piginnittuulersumit suliaasut taassuma aningaasarsiaasa akileraaruteqaataasussat naatsorsorneqarnerannut ilanngunneqassapput imaassimappat iluanaarutit annaasalluunniit tunniussisup aningaasarsiaasa akileraaruteqaataasussat naatsorsorneqarneranni ilanngunneqartussaasimagaluartut taassuma pineqartut tunisarisimappagit.
Imm. 3. Akileraarutitigut kingornussinermut, takuuk imm. 2, taarsiullugu tunniussisup piginnittunngortullu toqqarsinnaavaat suliffeqarfiup allamut tunniunneqarnerani iluanaarutit ajunaarutillu naatsorsussallugit suliffeqarfiit allamut pigisassanngortitaaneranni malittarisassat nalinginnaasut malillugit, suliffeqarfiup pigisai nalillit nalit imm. 2-mi taaneqartut sinnernagit tunniunneqarsimagaluarpataluunniit.
Imm. 4. Ukiumi pigilernerata siulianiittumi amigartoorutit piginnittuulersup suliffeqarfiup tigunerani iluanaarutinit ilanngaatigisinnaanngilai."

11. § 34 a imatut oqaasertaqassaaq:
"§ 34 a.Inuk § 1 naapertorlugu akileraartussaatitaasoq umiarsuarmi Dansk Internationalt Skibsregisterimi nalunaarsorsimasumi Kalaallit Nunaatalu imartaani angalasuunngitsumi sulisimanermigut akissarsiaqarsimappat, akileraarutissat tamarmiusut akissarsiat taakkua akileraarutitaannut naapertuuttumik annertussusilinnik appartinneqassapput.
Imm. 2. Maleruagassamut imm. 1-itimiittumut ilaavortaaq inuk § 1 naapertorlugu akileraartussaatitaasoq umiarsuarmi usinik angallassissummi Dansk Internationalt Skibsregisterimi nalunaarsugaasumi sulinermigut akissarsisimasoq, aammalu Kalaallit Nunaata nunallu allat, matumani ilanngullugit Danmarki Savalimmiullu, akornanni aalajangersimasumik usinik angallassinermi inuttaasoq.
Imm. 3 . Imm. 1-imi maleruagassamut ilaavortaaq inuk § 1 naapertorlugu akileraartussaatitaasoq umiarsuarmi usinik angallassissummi 1.100 bruttotonnage taannaluunniit qaangerlugu usitussusilimmi Dansk Internationalt Skibsregisterimi nalunaarsugaasumi aammalu umiarsuarni usinik angallassissutini imm. 2-mi taaneqartuni Kalaallit Nunaanni umiarsualivimmiit umiarsualivimmut usinik aalajangersimasumik angallassinermi inuttaanermigut akissarsiaqartoq kiisalu uuliamik assartuutini 450 bruttotonnage taannaluunniit qaangerlugu usitussusilinni."

12. § 59-ip kingornanut una ilanngunneqassaaq:
"§ 59 a.Suliassat § 17 i naapertorlugu akileraartussaatitaanermut tunngasut Akileraartarnermi Pisortaqarfiup aalajangiiffigisassavai. Akileraartarnermi Pisortaqarfiup aalajangigai pisortaqarfimmut qulliunerusumut ingerlateqqinneqarsinnaanngillat. Akileraartarnermi Pisortaqarfiup aalajangiineri Kalaallit Nunaata Landsrettianut siullermeertumik suliassatut tunniunneqarsinnaapput pineqartup aalajangiinermik ilisimatinneqarneraniit qaammatit arfinillit qaangiutsinnagit. Immikkut patsisissaqarsimappat Landsdommerip suliassiineq akuerisinnaavaa piffissarititaq qaangerneqarsimagaluarpalluunniit. Unnerluutigineqartussaapput Naalakkersuisut."

13. § 82-imi immikkoortutut nutaatut ilanngunneqassaaq:
"Imm. 8. Akileraarutit § 17 i naapertorlugu akilerneqartut landskarsimut, kommunimut akileraarfimmut kommuninullu tamanut nakkartassapput, § 27 naapertorlugu ukiumi aningaasarsiorfiusumi akileraarusiissutip procentiat aalajangerneqarsimasoq, ukiumi aningaasarsiorfiusumi 1. januarimi inuttussuseq tunngavigalugu § 28 naapertorlugu akileraarusiissutip procentiata nalilerneqarnera aammalu § 28 a naapertorlugu ukiumut aningaasarsiorfimmut akileraarusiissutip procentiat aalajangerneqarsimasoq assigiinngissutaat tunngavigalugu."

14. § 94 a, imm. 1 imatut oqaasertaqassaaq:
"     Kinaluunniit sullivimmik ingerlatsinerminut tunngatillugu aningaasanik erniortitassanik tigusaqartartoq imaluunniit erniaqartussanik taarsigassarsisitsisup taarsigassarsianilluunniit ingerlatitseqqittup akileraarutissat amerlassusilerneqarnissaannut atugassatut ukiut tamaasa qinnuvigineqanngikkaluarluni akileraartarnermut oqartussat ilisimatissavai erniat tunniunneqartut iluanaarutaasulluunniit annertussusiannik kiisalu ukiumi qaangiuttumi kontumik piginnittunut ataasiakkaanut erniatigut tunniunneqarsimasut akiligassanngorsimasulluunniit amerlassusiat, ernialiinerup ullua kiisalu ukiup qaangiuttup naanerani aningaasat uninngasuutigineqartut akiitsorineqartulluunniit annertussusiat. Paasissutissiinissamut pisussaanermut ilaapput kontut il.il. ukiup ingerlanerani atorunnaarsimasut."

15. § 97, imm. 1 imatut oqaasertaqassaaq:
"     Maleruagassat Naalakkersuisut aalajangersagaat malillugit soraarnerussutisiaqalernis-samut aningaasaateqarfiit, inuunermut soraarnerussutisiaqalernissamullu sillimmasiisarnermut selskabit allallu soraarnerussutisianik imaluunniit inuunermut tunngatillugu sillimmasiutinik ingerlaavartumik tunniussisartut akileraartarnermut oqartussaasut ukuninnga ilisimatittassavaat:
1) Akileeqataassutit akiliutillu annertussusiat,
2) Soraarnerussutisiaqalernissamut aaqqissuussinerit § 17 b-mi c-milu taaneqartut tunngavigalugit tunniuttakkat,
3) Ilaasortaajunnaarnermi tunniussat, utertillugu pisiarinninnerup nalingi aaqqissuussinerillu tamakkua malillugit bonusit, aamma
4) § 17 e, imm. 5-imi iliuutsit taaneqartut, taakkua soraarnerussutisiaqalernissamut aningaasaateqarfiup, inuunermut soraarnerussutisiaqalernissamullu sillimmasiinermut selskabip il.il. ilisimalersimappagit."

16. § 107, imm. 1 imatut oqaasertaqassaaq:
"     Taamatut § 101-imi taaneqartutut pillarneqassaaq kinaluunniit piaaraluni mianersuaalliorujussuarluniluunniit:
1) Akileraarutinik A-nik imaluunniit iluanaarutisianit akileraarutinik unerartitsinissaminik naammassinninngitsoq,
2) piffissaagallartillugu akileraarutinik unerartitanik akiliinngitsoortoq,
3) piffissaagallartillugu § 42, imm. 3-mi aamma § 71-imi taaneqartutut ittunik paasissutissiinngitsoortoq,
4) pissutsit § 42, imm. 3-mi imaluunniit § 71-imi taaneqartut pillugit eqqunngitsumik imaluunniit paasinerluisitsisinnaasunik paasissutissiisoq,
5) § 17 i, imm. 2 naapertorlugu akileraarutinik unerartitsinissaminik naammassinninngitsoq, imaluunniit
6) § 17 i, imm. 1 naapertorlugu akileraarutinik unerartitanik piffissaagallartillugu akiliinngitsoortoq."

17. § 107, imm. 3 imatut oqaasertaqassaaq:
"Imm. 3. Taamatullu § 101-imi taaneqartutut pillarneqassaaq kinaluunniit:
1) Aningaasarsianik A-nik imminut tunniussisitsisoq nalunngikkaluarlugu peqqussutigineqartutut akileraarutinik unerartitassanik unerartitsivigineqarsimanngitsunik,
2) piaaraluni mianersuaalliorujussuarluniluunniit § 37, imm. 4 aamma 5, § 40, imm. 6, § 45, § 47, imm. 6 imaluunniit § 48 malillugit aalajangiinermi atugassanik eqqunngitsunik paasinerluisitsisinnaasunilluunniit paasissutissiisoq imaluunniit paasissutissanik qinnuteqaatit aalajangersakkani taakkunani taaneqartut ilaannut atasumik apeqqutip aalajangiiffiginiarnerani pingaaruteqarsinnaasunik nipangiussiinnartoq, imaluunniit
3) § 17 i, imm. 5-imi taaneqartutut nalunaaruteqanngitsoortoq."

§ 2.

Inatsit 1. januar 2001-imiit atortuulissaaq.

Namminersornerullutik Oqartussat, ulloq 11. november 2000.

Jonathan Motzfeldt

/

Josef Motzfeldt