Atuagaateqarfeqarneq pillugu Inatsisartut peqqussutaanni nr. 4-mi, 15. oktober 1979-imeersumi Inatsisartut peqqussutaatigut nr. 13-ikkut 30. oktober 1992-imeersukkut allanngortinneqartumi § 12 a naapertorlugu makku aalajangersarneqarput:

Kapitali 1.
Akissarsisinneqartartut

§ 1. Namminersornerullutik Oqartussat atuakkiortunut, nutserisartunut, assiliartalersuisartunut assiliisunullu, atuakkanik kalaallisuunik atuakkanillu immiunneqartunik suliaqarsimasunut suliaallu Nunatta Atuagaateqarfianiitinneqartunut qinnuteqartoqarnera naapertorlugu atuagaateqarfimmiittuuteqarnermut ukiut tamaasa akissarsisitsisassapput.
Imm. 2. Akissarsisinneqarsinnaatitaasoq toqukkut qimaguppat uillarnera nuleerneraluunniit atuagaateqarfimmiittuuteqarnermut akissarsianik pisartagaqartitaajuaannassaaq. Sivikinnerpaamik ukioq ataaseq inooqatigiinneq katissimanermut sanilliunneqarsinnaasoq, akissarsisinneqarsinnaasup toqukkut qimagunnerani atuuttoq, aappariinnermut sanilliunneqassaaq.

Kapitali 2.
Suliat akissarsiaqaataasartussat

§ 2. Suliamik ataatsimik nalunaarummi uani pineqarpoq atuakkiaq naqitertinneqarsimasoq ataaseq.
Imm. 2. Atuakkanut immiunneqartunut tunngatillugu suliap ataatsip assigaa taamatut naqitertitaq ataaseq.
Imm. 3. Suliaq akissarsiaqaataasinnaasoq Nunatta Atuagaateqarfiani nalunaarsorneqassaaq.
Imm. 4. Akissarsisinneqartassagaanni suliaq ukiumi akissarsisinneqarumalluni qinnuteqarfiusumi januaarip aallaqqaataani Nunatta Atuagaateqarfianiitinneqalersimasutut nalunaarsugaasimasariaqarpoq.
Imm. 5. Katersugaatit inuiaassutsimut tunngasut Groenlandicat nalunaarummi uani pineqanngillat.

§ 3. Akissarsiaqartitsisoqartassaaq sulianut 32-nik imaluunniit taakku sinnerlugit quppernilinnut.
Imm. 2. Akissarsiaqartitsisoqassanngilaq sulianut pingasut sinnerlugit suleqataaffigineqartunut.
Imm. 3. Akissarsiaqartitsisoqartassaaq atuakkianut ilisimasassanut tunngasunik oqaluttualianillu imalinnut.
Imm. 4. Suliani nutsikkani aallaqqaataaniilli assiliartaliussanut assitanullu akissarsiaqartitsisoqassanngilaq.

Kapitali 3.
Akissarsiassat agguaanneqarnerat

§ 4. Aningaasat akissarsiassaasut tamarmiusut § 6, imm. 1 naapertorlugu qinnuteqartoqarnera najoqqutaralugu sulianut akissarsiaqaataasussanut tamanut assigiimmik agguaanneqartassapput.
Imm. 2. Qinnuteqarnissamut killiliussaq ukiumut ataasiarluni tamanut nalunaarutigineqartassaaq. Qinnuteqarnissamut juunip aallaqqaataat killiliunneqarpoq. Akissarsisinneqarnissamut qinnuteqaatit immersugassanut Nunatta Atuagaateqarfiata suliarisimasaanut allanneqartassapput.

§ 5. Suliamut kisermaassamut ataatsimut akissarsiassaq ataaseq akissarsiaritinneqartassaaq.
Imm. 2. Suliamut nutsikkamut ataatsimut suliamillu allanngorlugu allaqqitamut ataatsimut akissarsiassap affaa akissarsiaritinneqassaaq.
Imm. 3. Akissarsiassaritinneqartut suleqataasut angeqqatigiimmik agguartassavaat.
Imm. 4. Assiliartaliussat assitallu akissarsissutaassagunik suliap 40%-ia sinnerlugu annertussuseqassapput, akissarsiassarlu angeqqatigiinnik ilanngussisunut taakkununnga agguarneqassaaq.

§ 6. Ukiumut aningaasaliissutigineqartunit atuagaateqarneq pillugu Inatsisartut peqqussutaanni § 12 a naapertorlugu, 90%-ii § 4-mi 5-imilu aalajangersakkat malillugit agguaanneqassapput, aaqqissuussinerlu taanna Nunatta Atuagaateqarfianit aqunneqassaaq.
Imm. 2. Sinneri 10%-it Kultureqarnermut Pisortaqarfiup aamma Kalaallit Atuakkiortut isumaqatigiissutaat malillugu agguaanneqassapput kalaallisut atuakkiat amerlanerulernissaat kalaallillu (atuakkanik) pilersitsisuusut § 1, imm. 1-imi taaneqartut tapersersornissaat siunertaralugu.

§ 7. Akissarsiaqarnissamik qinnuteqaammut itigartitsineq qinnuteqaammut itigartitsissutip qinnuteqartumit tiguneqarneranit sap. akunneri sisamat qaangiutsinnagit Kultureqarnermut Pisortaqarfimmut allaganngorlugu naammagittaalliuutigineqarsinnaavoq.
Imm. 2. Suliap aalajangiiffigineqannginnerani suliaq Kalaallit Atuakkiortunut oqaaseqarfigisassatut saqqummiunneqassaaq.

Kapitali 4.
Atulerfissaa

§ 8. Nalunaarut atortuulerpoq 1. november 1999.
Imm. 2. Tamatumunnga peqatigitillugu Atuagaateqarfimmiittuuteqarnermut akissarsiaqartarneq pillugu Namminersornerullutik Oqartussat nalunaarutaat nr. 10, 22. april 1993-imeersoq atorunnaarsinneqarpoq.

Namminersornerullutik Oqartussat, ulloq 5. oktober 1999.

Lise Lennert

/

Karl Kristian Olsen