Kapitali 1.
Inatsisikkut siunertarineqartoq atuuffissaalu

§ 1. Inatsisikkut siunertarineqarput
1) toqqortat oqaluttuarisaanermi nalillit imaluunniit innuttaasunut oqartussaasunullu allaffissornikkut eqqartuussiveqarnikkulluunniit pissutsinut uppernarsaatissat atuuttut toqqortarineqarnissaasa qularnaarneqarnissaat,
2) toqqortat pigiinnartariaqanngitsut § 2 naapertorlugu oqartussaasut inatsimmi matumani ilaatinneqartut suleqatigalugit atortussaajunnaarsinneqartarnissaannut periarfissat qularnaassallugit, aamma
3) kikkulluuniit toqqortaatinik pissarsisinnaanissaat qularnaassallugu.

§ 2. Inatsit Namminersornerullutik Oqartussani Kalaallillu Nunaanni kommunini ingerlatsivinnut tamanut atuuppoq.
Imm. 2. Naalakkersuisut aalajangiisinnaapput inatsit sullissiveqarfinnut, ingerlatseqatigiiffinnut, peqatigiiffinnut il.il. erseqqinnerusumik taaneqartunut pisortat ingerlatsiveqarfiisut naatsorsuunneqarsinnaanngitsunut tamakkiisumik ilaannakortumilluuniit atuutissasoq. Aatsaalli taamaattoqartassaaq sulinerminni aningaasartuutaat tamarmik amerlanersaalluuniit pisortanit akilerneqartarpata, imaluunniit inatsisikkut peqqussutikkulluunniit pisortat sinnerlugit aalajangiinissaminnut pisinnaatitaaffilerneqarsimappata.
Imm. 3. Imm. 1-2-lu malillugit oqartussaqarfiit, sullissiveqarfiit, ingerlatseqatigiiffiit, peqatigiiffiit il.il. tulliuttuni pisortat sullissiveqarfiisut taagorneqassapput.
Imm. 4. Pissutsit Inatsisartut aamma oqartussaaffeqarfiit suliffeqarfiillu tassunga atasut allagaateqarfiinut tunngasut pillugit malittarisassat Inatsisartut siulittaasoqarfiannit aalajangersarneqassapput Naalakkersuisut isumaqatiginiareerlugit.

§ 3. Naalakkersuisut inatsit malillugu suliassat suliarineqartarnerat pillugu naalagaaffimmi oqartussanut isumaqatigiissuteqarsinnaapput Kalaallit Nunaanni naalagaaffimmi oqartussaasut sullissiveqarfiinut.

 

Kapitali 2.
Nunatta Katersugaasivia Allagaateqarfialu

§ 4. Nunatta Katersugaasivia Allagaateqarfialu toqqortat § 1, nr. 1-imi taaneqartut pisortat toqqorsiviiniittut aammalu kapitali 6-imi aalajangersakkat naapertorlugit toqqorsivinnit namminersortunit pissarsiat katersorneqarnissaannut, aaqqissuunneqarnissaannut, toqqortarineqarnissaannut nalunaarsorneqarnissaannullu akisussaavoq.
Imm. 2. Nunatta Katersugaasivia Allagaateqarfialu toqqortat pissarsiarineqartut aallaavigalugit ilisimatusarnermik ingerlatsissaaq kiisalu Nunatta piorsarsimassutsikkut inuiaqatigiillu oqaluttuarisaanerannik ineriartornerannik ilisimanninneq siaruartissallugu.
Imm. 3.  Nunatta Katersugaasivia Allagaateqarfialu toqqorsiveqarnermut tunngasutigut piorsarsimassutsikkut sullissiveqarfinnik allanik siunnersuisassaaq suleqateqartassallunilu.

§ 5. Nunatta Katersugaasivia Allagaateqarfialupisortat sullissiveqarfiinut toqqorsiveqarnermut tunngasutigut siunnersuisassaaq.
Imm. 2. Nunatta Katersugaasivia Allagaateqarfialu pisortat sullissiveqarfiutaasa toqqortaataasa suliarineqartarnerannik toqqortarineqartarnerannillu nakkutilliisuussaaq.

 

Kapitali 3.
Pisortat sullissiveqarfiutaasa toqqorsiveqarnerannut tunngasut

Toqqortaqarneq

§ 6. Suulluuniit paasissutissartallit pisortat sullissiveqarfiini sulinikkut pilersinneqartut taakkuluuniit aqqutigalugit pilersinneqartut toqqorneqassapput.

§ 7. Pisortat sullissiveqarfiutaasa toqqortaatimik qaqugukkulluuniit isumannaatsumik suliarineqarnissaat toqqortarineqarnissaallu isumagissavaat.
Imm. 2. Pisortat sullissiveqarfiutaasa toqqortatik pisortat sullissiveqarfiisa allat toqqortaataannit immikkoortissavaat.

§ 8. Pisortat sullissiveqarfiisa suliassaqarfiisa pisortat sullissveqarfiianut allamut nuunneqarneranni toqqortat sulianut inaarneqanngitsunut tunngassuteqartut pisortat sullissiveqarfiutaannut suliassaqarfimmik tigusisumut nuunneqartassapput.
Imm. 2. Toqqortat allat § 15 naapertorlugu Nunatta Katersugaasivianut Allagaateqarfianullu nuunneqarnissamik tungaanut pisortat sullissiveqarfiutaanni nuussisumiiginnartassapput. Pisuni immikkut ittuni Nunatta Katersugaasiviata Allagaateqarfiatalu toqqortat taamaattut pisortat sullissiveqarfiutaannut tigusisumut nuunneqartarnissaat akuerisinnaavai.
Imm. 3. § 7, imm. 2-imi aalajangersagaq aamma atuutissaaq imm. 1 aamma 2 naapertorlugit toqqortaatinik nuussisoqarnerani.

§ 9. Naalakkersuisut pisortat sullissiveqarfiutaasa toqqortaatinik suliarinnittarnerat toqqortarinnittarnerallu pillugit erseqqinnerusunik malittarisassiussapput. Kommunini ingerlatsiviit toqqortaatinik suliarinnittarnerat toqqortaqartarnerallu pillugit malittarisassat Kalaallit Nunaanni Kommunit Kattuffiannut isumaqatiginninniareernikkut aalajangersarneqassapput.

 

Allanut tunniussineq

§ 10. Pisortat sullissiveqarfiutaasa toqqortaataat allanut tunniunneqassanngillat aammalu eqqartuussiviit aqqutigalugit piginnittussaajunnaarsitsinikkut piginnittussaasulluuniit akuersissutigineqarneratigut pissarsiarineqarsinnaanngillat.
Imm. 2. Pisortat sullissiveqarfiutaasa toqqortaataat inunnit ataasiakkaanit pigineqalersimammappata akiliutitaqanngitsumik. Nunatta Katersugaasivianut Allagaateqarfianullu nuunneqartassapput.

 

Toqqorsiveqarnermut allakkanillu nalunaarsuiffeqarnermut pilersaarutit

§ 11. Nunatta Katersugaasivia Allagaateqarfialu allakkanik nalunaarsuiffeqarnermut toqqorsiveqarnermullu pilersaarusiornermut ilitsersuutissanik maleruagassiussaaq.

§ 12. Toqqorsiveqarnermut allakkanillu nalunaarsuiffeqarnermut pilersaarutit Nunatta Katersugaasivianut Allagaateqarfianullu akuerisassanngorlugit saqqummiunneqartassapput.
Imm. 2. Toqqorsiveqarnermut allakkanillu nalunaarsuiffeqarnermut pilersaarutit atuuttut allanngortinneqarneri Nunatta Katersugaasivianut Allagaateqarfianullu akuerisassanngorlugit saqqummiunneqartassapput pilersaarutit ilusaannut tunngassuteqarunik atortussaajunnaartitsinermulluuniit aalajangersagaagunik.

 

Atortussaajunnaarsitsineq

§ 13. Nunatta Katersugaasivia Allagaateqarfialu atortussaajunnaarsitsineq pillugu ilitsersuutissanik maleruagassiussaaq.

§ 14. Toqqortaatinik atortussaajunnaarsitsineq Nunatta Katersugaasiviata Allagaateqarfiatalu allakkatigut akuersineratigut aatsaat pisinnaavoq imaluunniit § 13 naapertorlugu ilitsersuutitut maleruagassiarineqarsimasut naapertorlugit.
Imm. 2. Toqqortat imm. 1 naapertorlugu atortussaajunnaarsitassanngortinneqaraangata toqqortat susassaqanngitsunit pineqarsinnaajunnaarlugit aserorterneqarnissaat pisortat sullissiveqarfiutaata isumagisassaraa.

 

Kapitali 4.
Toqqortaatinik tunniussineq

§ 15. Toqqortat ukiunit 15-init pisoqaanerusut pisortallu sullissiveqarfiutaata sulinerani atortussaajunnaartut Nunatta Katersugaasivianut Allagaateqarfianullu tunniunneqassapput. Pisuni immikkut ittuni aamma Nunatta Katersugaasivianut Allagaateqarfianullu isumaqatigiissuteqarnikkut tunniussineq siusinnerusukkut pisinnaavoq.
Imm. 2. Tunniussinissap tungaanut pisortat sullissiveqarfiutaat toqqortaatiminik toqqortarinninnissaminut pisussaapput.
Imm. 3. Pisortat sullissiveqarfiutaat atortussaajunnaarsinneqarpat taassuma toqqortaataasa pisoqaassusaat apeqqutaatinnagu tunniunneqartassapput pisortat sullissiveqarfiutaannit allamit § 8 naapertorlugu suliassaqarfimmik tigusisussamit atorneqassanngikkunik.

§ 16. Toqqortat tunniunneqarnerminni torersarneqarsimassapput, poortorneqarsimallutik, nalunaaqutserneqarlutik qulequtsersorneqarsimassallutillu aammalu suliat ataasiakkaat pisariaqanngitsortaat peerneqarsimassallutik.
Imm. 2. Nunatta Katersugaasivia Allagaateqarfialu toqqortat tunniunneqartarnerat pillugu erseqqinnerusunik malittarisassiorsinnaavoq.
Imm. 3. Pisortat sullissiveqarfiutaat tunniussisoq tunniussinermi aningaasartuutinik tamanik akiliisaaq.

§ 17. Pisortat sullissiveqarfiutaat toqqortaatinik nammineq tunniussaminik sulinermut atugassaminik attartorsinnaavoq.

 

Kapitali 5.
Pissarsiarineqarsinnaanerat atorneqarnerallu

Tamanit pissarsiarineqarsinnaanerat

§ 18. Toqqortat Nunatta Katersugaasivianut Allagaateqarfianullu tunniunneqartut ukiunik 25-inik pisoqaassuseqaleraangamik tamanit pissarsiarineqarsinnaalersarput, taamaattoq tak. §§ 19-21.

§ 19. Toqqortat inuit ataasiakkaat pillugit paasissutissartallit, tassunga ilanngullugit aningaasaqarnerannut tunngasut, pissarsiarineqarsinnaanerat ukiunut 80-inut killilerneqarpoq.

§ 20. Pisortat inuilluunniit ataasiakkaat soqutigisaat pingaarutilitsigut eqqarsaatigineqartariaqarpata pisortat sullissiveqarfiutaat tunniussisuusoq Nunatta Katersugaasivianik Allagaateqarfianillu oqaloqateqareernermigut §-ini 18-imi 19-imilu pissarsiarineqarsinnaanerannut killiliunneqartumit sivisunerusumik killiliisinnaavoq.
Imm. 2. Imm. 1 naapertorlugu pissarsiarineqarsinnaassusianut killiliussaq tunniussinermi aalajangerneqartassaaq toqqortaatinullu sorlernut imaluunniit toqqortaatinut ataatsimoortunut sorlernut killiliussap tunnganeranik erseqqinnerusunik imaqassalluni.

§ 21. Toqqortaatinut naalagaaffimmi oqartussaneersunut § 3 naapertorlugu immikkut isumaqatigiissuteqarluni Nunatta Katersugaasivianut Allagaateqarfianullu tunniunneqartunut isumaqatigiissummi aalajangiunneqartumik pissarsiarineqarsinnaanerannut killisarititaasut atuupput.

§ 22. §-ini 18-imiit 21-mut pissarsiarineqarsinnaanerannut killissarititat toqqortaatigineqartup ukiumi toqqorneqarfianit naatsorsorneqassapput.

 

Immikkut akuersissuteqartarneq

§ 23. Toqqortat ilisimatusarnermut atorneqassappata Nunatta Katersugaasivia Allagaateqarfialu §-ini 18-miit 20-mut aalajangersakkat atortinneqannginnissaannik immikkut akuersissuteqarsinnaavoq, taamaattoq tak. imm. 2.
Imm. 2. Toqqortat § 20-imi aalajangersakkamit pissarsiarineqarsinnaanerat sivisunerusumik killilerlugu isumaqatigiissutit atorneqarnissaannut immikkut akuersissuteqartoqartinnagu pisortat sullissiveqarfiutaannit tunniussisumit akuersissummik pissarseqqaartoqartassaaq.
Imm. 3. Immikkut akuersissuteqarneq inuit ataasiakkaat ataqqisariaqarnerat unioqqutinneqannginnissaanik piumasaqaatitaqartassaaq.

 

Atorneqartarnerat

§ 24. Toqqortat malittarisassani §-it 18-imiit 21-mut allassimasut naapertorlugit pissarsiarineqarsinnaasut Nunatta Katersugaasiviani Allagaateqarfianilu atorneqarsinnaapput, taanna atuinermut ikiorsiullugu.
Imm. 2. Ilisimatusarnermut atugassaatillugit Nunatta Katersugaasiviata Allagaateqarfiatalu toqqortat atuagaateqarfinnut katersugaasivinnullu akuerisanut kiisalu sullissiveqarfinnut tamakku assinginut atukkiunneqarsinnaanerat akuersissutigisinnaavaa.

§ 25. Toqqortaatinik, tamanit takuneqarsinnaanngitsunik, atuinissaminut akuerineqartoq taamaaliornermigullu paasissutissanik isertuussanik ilisimasaqalersoq akuerineqartinnani paasissutissanik isertuussanik tamanut saqqummiussissanngilaq, ingerlatitseqqissanani atuissananiluunniit.

§ 26. Nunatta Katersugaasiviata Allagaateqarfiatalu toqqortat atorneqarnissaat itigartitsissutigisinnaavaa toqqortaatip toqqortarineqarnermini pissusia eqqarsaatigineqartariaqartillugu. Toqqortaatip toqqortarineqarnermini pissusaa ajoqusernagu pissappat atuisussamut atugassanngorlugu assiliissummik assilillugu nuussisoqassaaq.

§ 27. Nunatta Katersugaasivia Allagaateqarfiatalu allagaatiminik ilisimatusarnermut aamma tamanut saqqummiussassatut atugassiinerminut akiliuteqartoqarnissaanik piumassaqarsinnaavoq.

 

Kapitali 6.
Inuit ataasiakkaat toqqortaataat

§ 28. Nunatta Katersugaasivia Allagaateqarfialu inuinnarnit, sullissiveqarfinnit, ingerlatsivinnit, peqatigiiffinnit il.il. § 2 imm. 1-2- mut ilaatinneqanngitsunit allagaatinik katersisinnaatitaavoq, tigusisinnaatitaavoq, isumannaarisinnaallunilu.
Imm. 2. Imm. 1 naapertorlugu toqqortaatinik tunniussisoq toqqortaatip pissarsiarineqarsinnaaneranut killiliisimatinnagu toqqortaatit maleruaqqusat §§ 18-20 aammalu §§ 22-23 malillugit pissarsiarineqarsinnaapput.
Imm. 3. Imm. 1 naapertorlugu atorneqarsinnaanerannik aalajangersaasoqarsimatinnagu toqqortat malittarisassat §§ 24- 26-imut aalajangersakkanut naapertorlugit atorneqarsinnaapput.

§ 29. Toqqortaatinik ilisimatusarnermut nalinginnaasumilluuniit piorsarsimassusermut pingaarutilinnik namminerisaminik pigisaqartoq toqqortat nunamit anninneqartinnagit toqqortaatip Nunatta Katersugaasivianit Allagaateqarfianillu assilineqarnissaannut periarfissiissaaq.

 

Kapitali 7.
Pineqaatissiinissamut aalajangersakkat

§ 30. § 10, imm. 2-ip, § 25-p aamma § 29-p unioqqutinneqarnerat akiliisitsissutaasinnaapput.

 

Kapitali 8.
Atuutilerfia ikaarsaariarnermilu aalajangersakkat

§ 31. Inatsisartut inatsisaat januaarip aallaqqaataani 1999-imi atuutilerpoq.
Imm. 2. Tamatuma peqatigisaanik Inatsisartut katersugaasiveqarneq toqqorsiveqarnerlu pillugit peqqussutaanni nr. 4, 18. maj 1990-imeersumi aalajangersakkat toqqorsiveqarnermut tunngasut, kiisalu Toqqorsiveqarneq pillugu Inatsisartut inatsisaat nr. 10, 18. maj 1990-imeersoq atorunnaarput.

§ 32. Allaffissornikkut malittareqqusat Kultureqarnermut, Ilinniartitaanermut Ilageeqarnermullu Naalakkersuisoqarfimmit aalajangersakkat aammalu Nunatta Katersugaasiviata Allagaateqarfiatalu ilitsersuutitut maleruagassiai erseqqivissumik atortussaajunnaarsinneqarnissartik tikillugu atuutiinnassapput.

Namminersornerullutik Oqartussat, ulloq 30. oktober 1998.

Jonathan Motzfeldt

/

Konrad Steenholdt