Kalaallit Nunaanni peqqinnissamik isumaginnittoqarfik pillugu inatsimmi nr. 369, 6. juni 1991-imeersumi § 1 malillugu aalajangersarneqarput:

§ 1. Peqqussummi pineqarput nappaatit pissutsillu tunillannartut atoqatigiinnikkut tunillaassuukkajunnerusut.

Imm. 2. Peqqussummi matumani pineqarpoq kinaluunniit nunatsinniittoq tunngavissalimmillu naatsorsuutigisariaqartoq imm. 1-imi taaneqartut ilaannit nappaammit pissutsimilluunniit atoqatigiinnikkut tunillaassuukkajunnerusumik tunillatsissimasoq.

Imm. 3. Imm. 1-imi nappaatit pissutsillu suut pineqarnersut pillugit naalakkersuisut malittarisassiussapput.

Imm. 4. Nappaatit pissutsillu imm. 1-imi taaneqartut nalunaarutigineqartarneri pillugit erseqqinnerusunik naalakkersuisut malittarisassiussapput.

§ 2. Naalakkersuisut nakkutigissavaat nappaatit pissutsillu tunillannartut § 1, imm. 1-imi pineqartut suunersut qanorlu tunillaassuunnersut taamatullu tunillaassuinerit qanoq ililluni pinaveersaartinneqarsinnaanerat pinngitsoorsinnaanerallu pillugit innuttaasunut paasissutissanik pisariaqartinneqartunik sanasoqarlunilu siammarterisoqassasoq.

§ 3. Kinaluunniit § 1, imm. 1-imi taaneqartut ilaannik nappaammik pissutsimilluunniit tunillatsissimasorisoq nakorsamut misissortissaaq.

Imm. 2. § 4 naapertorlugu nalunaaruteqartoqarsimatillugu imm. 1-imi aalajangersagaq aamma atorneqassaaq.

§ 4. Peqqinnissaqarfimmi sulisut inunnut peqqussummi matumani § 1, imm. 2-mi pineqartunut saaffiginnissinnaapput kaammattuillutillu misissortinnissaannut pisariaqarpallu nakorsamut katsorsartinnissaannut.

Imm. 2. Peqqinnissaqarfimmi sulisut imm. 1 naapertorlugu saaffiginnittarnerat pillugu erseqqinnerusunik naalakkersuisut malittarisassiussapput.

§ 5. Inuit nappaammik pissutsimilluunniit irnmikkut ulorianassusilimmik tunillatsissimasut § 4 naapertorlugu kaammattuummut malinninngitsut nakorsamut misissortinriissaat peqqinnissaqarfimmi sulisunit peqqussutigineqarsinnaavoq.

Imm. 2. Nappaatit pissutsillu immikkut ulorianassusillit suut § 5-imi, imm. 1-imi pineqarnersut pillugit naalakkersuisut malittarisassiussapput.

Imm. 3. Peqqussut malinneqanngippat pineqartoq eqqartuussivimmit nakorsamut misissortinneqarsinnaavoq pisariaqarpallu katsorsartinneqarsinnaalluni, pisariaqassappat politiitut oqartussaassusillit ikiortigalugit.

Imm. 4. Peqqussuteqarnissamut patsisissaatitaasut pillugit erseqqinnerusunik naalakkersuisut malittarisassiussapput.

§ 6. Peqqussut atortuulerpoq 1. januar 1997.

Imm. 2. Tamanna peqatigitillugu nalunaarut nr. 337, 14. juni 1976-imeersoq Kalaallit Nunaanni kinguaassiuutitigut nappaatit akiorniarneqarnerannut tunngasoq atorunnaarpoq.

Namminersornerullutik Oqartussat, ulloq, 31. oktober 1996

Lars Emil Johansen

/

Marianne Jensen