Atuisartunut pisisartunullu siunnersuisartoqatigiit, tuniniaasarneq, nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliat pillugit inatsisartut inatsisaanni nr. 10-mi, 13. november 1986-imeersumi, inatsisartullu inatsisaatigut nr. 14 31. oktober 1996-imeersukkut allanngortinneqartumi, § 24 malillugu aalajangersarneqarput:

§ 1. Akinik misissuinerit nioqqutissat kiffartuussinerilluuniit aalajangersimasut iluanni ingerlanneqarsinnaapput, sumiiffinnilu toqqarneqarsimasuni ingerlanneqarsinnaallutik. Sumiiffinni misissuineq pissaaq ullormi Atuisartut Siunnersuisoqatigiiffiata aalajangigaani.

§ 2. Atuisartut Siunnersuisoqatigiiffiata Atuisartunut pisisartunullu tunngasumik ataatsimiititaliat imaluuniit allat sumiiffinni ataasiakkaaniittut paasissutissat pissarsiariniarnissaannut pisinnaatissinnaavai. Atuisartut Siunnersuisoqatigiiffiat suliamut tamatumunnga aningaasarsisitsisinnaavoq.

§ 3. Inuit piginnaatinneqartut pisiniarfiit initaannut nalinginnaasunut akornutissaqanngitsumik akornusersorneqaratillu isersinnaassapput.

§ 4. Atuisartut Siunnersuisoqatigiiffiat akinut paasissutissanut atugassamik allattuiffíliussaaq. Suliffeqarfik paasissutissanik suliffeqarfimmi pissarsiaríneqartunik immersukkap nuutsinneqarneratigut ilisimatinneqassaaq. Pisiniarfiup pisortaata akit pillugit paasissutissat allattorneqarsimasut ilumuussusiat akinut allattuiffiit allassimaqqaarfiisa atsiorneratigut uppernarsassavaa.

§ 5. Immersugassap allassimaqqaarfia piginnaatinneqartumit Atuisartut Siunnersuisoqatigiiffianut suliarineqarnissaa pillugu ingerlaannaq nassiunneqassaaq. Atuisartut Siunnersuisoqatigiiffiata inernerit tamakkiisumik ilaannakortumilluuniit tamanut, kisitsisitigut suliarinertaligaasinnaasumik, saqqummiunneqarnissaat isumagissavai.

§ 6. Tamanut saqqummiussineq, piffissaq paasiniaaffmsoq, suliffeqarfiit sumiiffiillu pineqartut aqqi nalunaarlugit, pisussaq, pisinnaavoq radiukkut tv-kulluuniit ilanngutassiinikkut, atuagassiani illoqarfinni ataasiakkaani imaluuniit nuna tamakkerlugu atuuttuni allaaserinninnikkut imaluuniit naqitat immikkut ittut saqqummersinneqarnerisigut.

§ 7. Nalunaarut atortuulersinneqarpoq 1. december 1996.
Imm. 2. Tamatumunnga ilutigitillugu akinik misissuisarneq pillugu Namminersornerullutik Oqartussat nalunaarutaat nr. 36, 16. november 1986-imeersoq atorunnaarsinneqarpoq.

Namminersornerullutik Oqartussat, 28. november 1996.

Peter Grønvold Samuelsen

/

Hans Jakob Helms