Katersugaasiveqarnermut allagaateqarfeqarnermullu ataatsimiititaliami katersugaasiviit akuerineqarsimasut sinniisaasa qinerneqartarnerat pillugu Namminersornerullutik Oqartussat nalunaarutaat
Inatsisartut katersugaasiveqarneq toqqorsiveqarnerlu pillugit peqqussutaanni nr. 4-mi 18. maj 1990-imeersumi § 21, imm. 3 malillugu katersugaasiveqarnermut allagaateqarfeqarnermullu ataatsimiititaliaq oqaaseqaateqartereerlugu makku aalajangersarneqarput:
§ 1. Nalunaarummi matumani katersugaasiviit akuerineqarsimasut tassaatinneqarput katersugaasiviit Inatsisartut katersugaasiveqarneq toqqorsiveqarnerlu pillugit peqqussutaat nr. 4, 18. maj 1990-imeersoq tunngavigalugu katersugaasivittut sulinissaminnut akuerineqarsimasut.
§ 2. Inatsisartunut nutaamik qiriersisoqarnerata kingorna katersugaasiviit akuerineqarsimasut katersugaasiveqarnermut allagaateqarfeqarnermullu ataatsimiititaliami ilaasortassanik katillugit marlunnik qinersissapput.
Imm. 2. Ilaasortaq siulleq katersugaasivinni pisortat akornanni taakkunannga qinerneqartassaaq. Ilaasortap aappaa katersugaasviit siulersuisuini ilaasortat akornanni taakkunannga qinerneqartassaaq.
Qinigaasinnaassuseqarneq qinersisinnaatitaanerlu
§ 3. Kinaluunniit qinigassanngortitseqqusinermit qinersinerup tungaanut katersugaasivimmi akuerisaasumi pisortaasoq imaluunniit katersugaasivimmi akuerisaasumi siulersuisurii ilaasortaasoq qinigaasinnaassuseqarpoq.
§ 4. Kinaluunniit qinersinerup nalaani katersugaasivimmi akuerisaasumi pisortaasoq siulersuisuniluunniit ilaasortaasoq qinersisinnaatitaavoq.
Qinerseriaaseq piffissarititaasullu
§ 5. Inatsisartunut nutaamik qinersinerup kingorna ulloq qinersivik naatsorsuutigalugu ullut 14-it qaangiutsinnagit katersugaasiveqarnermut allagaateqarfeqarnermullu ataatsimiititaliamut allattoqarfiup katersugaasivinni akuerisaasuni tamani pisortanit siulersuisunillu qinigassanngortittut aqqinik nassiusseqqusissaaq.
Imm. 2. Qinigassanngortittut aqqi nassiusseqqusissutip tiguneqarnerata kingorna kingusinnerpaamik qaammat ataaseq qaangiutsinnagu allattoqarfimmut nalunaarutigineqassapput.
§ 6. Katersugaasiveqarnermut allagaateqarfeqarnermullu ataatsimiititaliamut allattoqarfiup § 5, imm. 2-mi piffissarititaasup naaneranit ullut 14-it qaangiutsinnagit katersugaasivinni akuerisaasuni pisortat qinigassanngortittut tamarmik aqqi katersugaavinni pisortanut aamma katersugaasivinni akuerisaasuni siulersuisuni ilaasortat qinigassanngortittut tamarmik aqqi katersugaasivinni siulersuisunut nassiussuutissavai.
§ 7. Katersugaasivinni pisortat tamarmik tulleriinnilersuillutik taasissapput, taamaalillutik katersugaavisinni pisortat qinigassanngortittut aqqisa allattorsimaffianniittut pingasut pingasunit, marlunnit ataatsimillu taaneqartillugit.
Imm. 2. Katersugaasivinni siulersuisut tamarmik tulleriinnilersuillutik taasissapput, taamaalillutik katersugaasiviit siulersuisuini ilaasortat qinigassanngortittut aqqisa allattorsimaffianniittut pingasut pingasunit, marlunnit ataatsimillu taanneqartillugit. Katersugaasivimmi siulersuisut isumaqatigiinngittoqartillugu tulleriinnilersuillutik taasinissamut qanoq iliorlutik anngutissanerlutik nammineq aalajangertassavaat.
Imm.3. Taasinerit inerneri qinigassanngortittut aqqisa allattorsimaffiata tiguneqarneranit kingusinnerpaamik qaammat ataaseq qaangiutsinnagu allattoqarfimmeeriissapput.
§ 8. Qinigassanngortittoq qinigassanngortittut aqqisa allattorsimaffiini amerlanerpaanit taaneqartoq qinigaasutut isigineqassaaq. Qinigassanngortittoq amerlanerpaat tulliattut taaneqarsimasoq sinniisussatut qinigaasutut isigineqassaaq.
Imm. 2. Taasinerit amerlaqatigiippata qinigassanngortittut amerlaqatigiinnit taaneqarsimasut akornanni taasisoqaqqissaaq. Taaseqqinnerup kingorna taasinerit suli amerlaqatigiippata qinersineq makitsinikkut aalajangiivigineqassaaq.
Tunuarneq ilassutissatullu qinersineq
§ 9. Ataatsimiititaliami ilaasortatut qinigaasimasoq katersugaasivimini akuerisaasumi pisortatut atorfimminit imaluunniit siulersuisuni ilaasortaanermit tunuaruni ataatsimiititaliami ilaasortaanerminit aamma tunuassaaq, sinniisussaalu ilaasortanngorluni.
Imm. 2. Ataatsimiititaliami ilaasortaq sinniisissaalu tunuarsimappata ilaasortaaffimmut tassunga ilassutissatut qinersisoqassaaq.
Imm. 3. Ilassutissatut qinersinermi nalinginnaasumik qinerseriaaseq malinneqassaaq.
Atortuulersinneqarnera
§ 10. Nalunaarut manna 1. februar 1996 aallarnerfigalugu atortuulersinneqarpoq.
Imm. 2. Atortuulersitsinerup nalaani katersugaasivinni akuerisaasuni ilaasortatut qinigaasoqarsimappat taakku ataatsimiititaliami ilaasortaaginnarallassapput Inatsisartunut nutaamik qinersinermut tullermut atatillugu nutaamik qinersisoqarnissaata tungaanut, imaluunniit § 9, imm. 1-imi taaneqarsimasutut tunuartariaqalernermik tungaanut.
Namminersornerullutik Oqartussat, 26. januar 1996
Konrad Steenholdt
/
Karl Kristian Olsen