§ 1. Inatsisartut inatsisaanni uani pineqarpoq Naalakkersuisut siulittaasuata Naalakkersuisunullu ilaasortat atorfimminnik ingerlatsinerminnut akisussaanerat.

§ 2. Kalaallit Nunaanni pinerluttulerinermi inatsimmi immikkoortoq siulleq aalajangersakkanut nalinginnaasunut tunngasoq taamaalluni atuutissaaq.

§ 3. Naalakkersuisunut ilaasortaq kinaluunniit sulianut naalakkersuinikkut oqartussaaffigisaminut tunngasunik aalajangiinernut akisussaavoq.

§ 4. Naalakkersuisut ataatsimiinneranni aalajangikkamut Naalakkersuisunut ilaasortaq kinaluunniit ataatsimiinnermi peqataasimasoq aalajangiinermullu akuerseqataasimasoq akisussaavoq. Taamatuttaaq akisussaatinneqassaaq ilaasortaq aalajangikkap pilerneranut allatut iliorluni peqataasimasoq.

§ 5. Inatsisinik unioqqutitsinermi peqataanermut akisussaaneq pillugu pinerluttulerinermi inatsisini aalajangersakkamik atuinermi Naalakkersuisunut ilaasortaq sulisorisami qanoq iliorneranut peqataasutut isigineqassaaq

1) nalusimanngikkuniuk qanoq iliorneq taanna suliaajumaartoq, akornuserniarsimanagulu,

2) qanoq iliorneq taanna aalajangiinissap Naalakkersuisunut ilaasortap akisussaaffigisaata naammassinissaanut pisariaqartuusimappat pinngitsooraniluunniit iliuusissaasimappat, imaluunniit

3) qanoq iliorneq tamanna naammassineqartissinnaasimaguniuk pisariaqarneratut annertutigisumik nakkutilliinnginnermigut malittarisassaliunnginnermigullu.

§ 6. Naalakkersuisunut ilaasortaq § 10 naapertorlugu pineqaatissinneqassaaq piaaraluni imaluunniit mianersuaalliorujussuarnermigut Inatsisartut Naalakkersuisullu pillugit Inatsisartut inatsisaat inatsisilluunniit allat malillugit imaluunniit atorfimmi suunera malillugu imminut pisussaaf f igisassanngortitaasut malillugit iliunngikkuni.

Imm. 2. Imm. 1-imi aalajangersagaq aamma atorneqartassaaq Naalakkersuisunut ilaasortaq eqqunngitsumik paasinerluutaasinnaasumilluunniit inatsisartunut paasissutissiisimappat imaluunniit inatsisartut oqaluuserisassamik oqaluuserinninneranni paasissutissanik oqaluuserisap inatsisartunit aalajangiiffigineqarnissaanut annertuumik pingaaruteqartunik nipangiussisimappat.

§ 7. Naalakkersuisunut ilaasortap qanoq iliorneranik pissuteqartumik taarsiissuteqartitsisinnaaneq eqqarsaatigalugu inuit pisortaqarfimmi kiffartortut ajoqusiinerinut taarsiisitsisarneq pillugu maleruagassiat tamanut atortuusut atussapput.

§ 8. Inatsisartut inatsisaat una malillugu unnerluutiginninneq pissaaq inatsisinik unioqqutitsiunnaarnermiit kingusinnerpaamik ukiut tallimat qaangiutsinnagit.

§ 9. Pinerluttulerinermik inatsimmi § 30 Naalakkersuisunut ilaasortanut atortuunngilaq.

§ 10. Inatsisartut inatsisaanni uani aalajangersakkanik unioqqutitsinerit pineqaatissiissutaassapput Kalaallit Nunaanni pinerluttulerinermi inatsit malillugu.

§ 11. Inatsisartut aalajangissavaat pissutsit Naalakkersuisunut ilaasortap atorfimminik ingerlatsineranut tunngasut Kalaallit Nunaanni Politimesterimut paasiniagassanngortinneqassanersut unnerluussissutissanngortinniarneqassanersullu.

Imm. 2. Kalaallit Nunaanni Politimesterip aalajangissavaa unnerluutiginnittoqassanersoq pineqaatissiinissamik piumasaqaatitalimmik.

Imm. 3. Suliassaq Kalaallit Nunaata Eqqartuussiviata suliarinneqqaartussatut suliarissavaa.

§ 12. Inatsisartut inatsisaat una junip aallaqqaataani 1993-imi atortuulissaaq.

Namminersornerullutik Oqartussat, ulloq 13. maj 1993

Lars Emil Johansen

/

Emil Abelsen