Kalaallit Nunaannut tunngasumut inatsimmut nr. 943 23 december 1986-imeersumut, § 1 imm. 2 aamma § 13 imm. 2-4 -mi innaallagiaqarnermut, imeqarnermut kiassarnermullu, qatserisarfeqarnermut, umiarsualiveqarnermut, aqqusineqarnermut, attaveqaatinut il.il. tunngasumut ilaatillugu aalajangerneqarput:

§ 1. Utoqqarmiut Kangerluarsunnguaniit innaallagissamik pilersuiffiusuni, pisortat namminersortullu kiassaateqarfiutillit Nukissiorfiit peqqusinnaavaat kiassaateqarfiisa innaallagissamik kiassagaalernissaat, taamaasillutik kiassaanermi innaallagissamik atuisinnaalersillugit.

Imm. 2. Nukissiorfinnit innaallagissamik pilersorneqarnissaq pillugu kiassaateqarfinni innaallagissamik kiassarneqartunik pilersorneqarnissamut pisussaatitsineq Nukissiorfinnit aalajangerneqartartillugu ingerlaavassaaq. Nukissiorfiit aaqqiineq atuisumut ukiumik ataatsimik piffissalersillugu taamaatissinnaavaat.

§ 2. Atuisup kiassaateqarfiata innaallagissamik kiassarneqarsinnaasumik pilersornerani uuliatortumik kiassaataa atatiinnarneqassaaq, taamaasilluni uuliatortumik kiassaasinnaaneq periarfissaajuassaaq. Nukissiorfiit kiassaateqarfiup innaallagissamik kiassarneqarsinnaasup annertussusissaa aalajangissavaa atuisup pisariaqartitsinerpaaffianut nallersuuttariaqanngitsumik. Atuisoq pisussaavoq, kiassaateqarfimminut innaallagissamik kiassarneqartunut naammattumik innaallagissamik atuissalluni, pisariaqartitsinerli taassuminnga annertunerussappat nammineerluni kiassaatini, aallartinneqarnissaanut piareeqqajuartussaq, atorlugu kiassaassalluni. Atuisup sukkulluunniit kiassarnermut pisariaqartitsinini, kiassaateqarfik innaallagissamik kiassarneqartoq apeqqutaatinnagu, matussusersinnaassavaa.

§ 3. Kiassaateqarfinnik innaallagissamik kiassaatitalinnik ikkussuineq Nukissiorfiit isumagissavaat, akilerneqarnissai Nukissiorfinnittaaq isumagineqassapput. Atuisup atortut sumut inissinnissaannik kissaateqarnera sapinngisamik malinniarneqartassaaq.

Imm. 2. Kiassaateqarfiup innaallagissamik kiassarneqartup attavilernerani atortut tamarmik Kalaallit Nunaanni Nukissiorfinnit pigineqassapput. Aaqqissuussinermik atuiunnaarnermi Nukissiorfiit kiassaateqarfiit innaallagissamik kiassarneqartut atortuilu tamaasa attaveerlugillu piiassavaat atuisumullu aningaasartuutaanngitsumik iluarsagassanik iluarsaassalluni.

Imm. 3. Kiassaateqarfiit innaallagissamik kiassarneqartut ingerlanneqarneri aserfallatsaalineqarnerilu Nukissiorfinnit isumagineqassapput. Atuisoq pisussaavoq aserortoqarnerani ingerlaneratalu akornuteqalernerani piaartumik Nukissiorfinnut nalunaarutiginnissalluni.

Imm. 4. Atuisup sukkulluunniit Nukissiorfiit kiassaateqarfimmut isertissinnaassavai.

§ 4. Innaallagiaq aaqqiineq malillugu tunineqartoq immikkut ittumik akilersinneqassaaq. Akigititaq aalajangerneqassaaq atuisup nalinginnaasumik uuliatortumik kiassaateqarnermini agguaqatigiisillugu aningaasartuutigisartagaanut sanilliunneqartumik. Akigititamik aalajangiinermi nalinginnaasumik uuliatortumik kiassaateqarnermit uuliamik, kiassaatip ingerlannerani aserfallatsaalineranillu sipaarutaasimasut ilanngunneqassapput. Akigititaq Kalaallit Nunaanni Inatsisartunit aalajangerneqartassaaq.

Imm. 2. Nukissiorfiit, imm. 1-mi ilanngunneqartut pillugit, atuisut piumasaqarnerisigut, paasissutissat kisitsisimanerillu takutittassavai.

Imm. 3. Immikkut akigititaasut eqqaassanngikkaanni Nukissiorfiit innaallagissamut tunisinermi il.il. nalinginnaasumik akigititai atuuttuutiinnarneqassapput.

§ 5. Atuisup Nukissiorfiillu akornanni attavilersinneq attavilikkallu inissinnera pillugu aaqqiagiinngittoqartillugu, Nukissiorfiit allakkatigut pisussaaffiliisassaaq. Atuisup sap. ak. sisamani maalaarfissatut periarfissaasumi aalajangerneq Teknikikkut Pisortaqarfimmut maalaarutigisinnaavaa. Pisussaaffiliinermi maalaarfiusussat maalaarnissamullu piffissarititaasup sivisussusia paasissutissatut ilanngunneqassapput.

§ 6. Pillaassummik akiliisitsisoqarsinnaavoq, inatsisitigut peqqussutaasoq imaluunniit pissusissamisoortumik attavilersinnissamik, innaallagissamilluunniit § 1 aamma § 2 malillugu pisisussaatitaanermik maleruaajumanngitsumut aammalu Nukissiorfinnut § 3 imm. 4 malillugu kiassaateqarfimmut iseqqusinngitsumut.

Imm. 2. Ilanngullugu atuisoq, pisussaaffimminik maleruaannginermini imaluunniit nammineq Nukissiorfiilluunniit piinik pilussinnartitsinermini, Nukissiorfinnut annaasaqaataasussat tamaasa taarsissallugit akisussaatinneqassaaq.

§ 7. Inatsisartut peqqussutaat atuutilissaaq 01.12.1991.

Namminersornerullutik Oqartussat, ulloq 31.oktober 1991.

Lars Emil Johansen

/

Kuupik KLeist