Folketingip inatsisaa nr. 587 29. november 1978-imeersoq, kiisalu kirkeministeriap nalunaarutaa nr. 57. 21. februar 1979-imeersoq naapertorlugit makku aalajangersarneqarput:

 

Kapitali 1.
Iliveqarfiliorneq il.il..

§ 1. Iliveqarfinni kommunip innuttaanut naammattunik ilivernut inissaqartitsinissaq kommunalbestyrelsip isumagissavaa.
Imm. 2. Iliveqarfiliornermut, ingerlanneqarnerinut, aserfallatsaalineqarnerinut atorunnaarsinneqartarnerinullu aningaasartuutit kommunip aningaasartuutigissavai.
Imm. 3. Apeqqutini iliveqarfinnut tunngassuteqartuni kommunalbestyrelsip ilagiit sinniisui oqaaseqaateqartittassavaat.

§ 2. Iliveqarfiit ulluinnarni aserfallatsaalineqarneri aqunneqarnerilu ilagiit sinniisuisa isumagissavaat.

§ 3. Iliveqarfik Ilagiit Kalaallit pigisaraat. Ilineqarfissaq toqusup upperisarsioqatigiinnut kikkunnulluunniit ilaasortaanera pissutiginiarneqarsinnaasulluunniit allat apeqqutaatinnagit innersuunneqartassaaq. Iliveqarfiit ilisisarfiilluunniit allat pilersinneqarsinnaapput aatsaat naalakkersuisunit akuerineqarnikkut.

§ 4. Nutaanik iliveqarfiliornissat pioreersullu allilerneqarnissaat naalakkersuisunit akuerineqartassapput.
Imm. 2. Naalakkersuisulli aalajangersinnaavaat iliveqarfinnik alliliinerit annikinnerusut naalakkersuisunit akuerineqanngikkaluarluni suliarineqarsinnaasut.

§ 5. Iliveqarfiit ungaluneqarnissaat, iluarsaanneqarneri, naasulerscrneqarneri,aserfallatsaalineqarneri allilerneqarnissaallu pillugit naalakkersuisut tunaartarisassiussapput.

§ 6. Iliveqarfiit aqqusaarlugit tamanit angallaffiusussanik aqqusinniortoqaraniluunniit aqqusineeraliortoqassanngilaq.

 

Kapitali 2.
Innutaasut piginnaatitaaffii pisussaatitaaffiilu.

§ 7. Kinaluunniit Kalaallit Nunaanni najugaqavissoq najugaqarallartorluunniit iliveqarfimmi najukkaminiittumi ilineqarsinnaatitaavoq.
Imm. 2. Inuit Kalaallit Nunaata avataani najugaqaraluarlutik immikkut tassunga attaveqartut najukkami Ilagiit Kalaallit iliveqarfiisa ilaanni ilineqarsinnaapput.

§ 8. Kinaluunniit Ilagiit Kalaallit iliveqarfiisa avataanni ilineqarsinnaanngilaq, taamaattorli imm. 2 takuuk.
Imm. 2. Inuit piniariarsimallutik ilisimasassarsiorlutilluunniit toqusut toqquvimminni ilineqarsinnaapput. Iliveq sapinngisaq naapertorlugu pitsaanerpaamik isumannaarneqassaaq, sapinngisamillu erseqqissumik sanningasortaliinikkut allatulluunniit nalunaaqutsiinikkut nalunaarneqassalluni.

 

Kapitali 3.
Ilerrit iliveqarfiillu atorunnaarsinneqartarneri.

§ 9. Iliveq sunaluunniit ilisinerup kingorna sivikinnerpaamik ukiuni 50-ini innimigineqarallassaaq.
Imm. 2. Ilagiit sinniisuisa qinnuteqarnerisigut ilagiit kalaallit siulersuisui aalajangiisinnaapput iliveqarfik sivisunerusumik innimigineqassasoq.
Imm. 3. Immikkulli inatsisitigut tunngavissaqartillugu, imaluunniit ilagiit kalaallit siulersuisuisa immikkut pisoqartillugu akuersissuteqarnerisigut iliveq ammarneqarsinnaavoq.
Imm. 4. Ilerrup allamut ilivissatut atorneqaraissaa siunertaralugu piffissap innimiginniffiusussap naaneratigut iliveq ammarneqassappat, saarnit qaqinneqartut ataatsimoortillugit ilineqassapput.

§ 10. Ilagiit kalaallit siulersuisui ilagiit sinniisui oqaaseqartereerlugit aalajangiisinnaapput iliveqarfik ilisivigineqaqqissanngitsoq.
Imm. 2. § 9 naapertorlugu ilisinerup kingulliup kingorna piffissap innimiginniffiusussap naaneratigut ilagiit kalaallit siulersuisui iliveqarfiup siunertamut allamut atorneqarnissaa pillugu akuersissuteqarsinnaapput.
Imm. 3. Iliveqarfiup siunertamut allamut atorneqarnissaanik aalajangerneq tamanut nalunaarutigineqartassaaq. Taamatut aalajangerneq qaammatinik pingasunik piffissaqartitaalluni naalakkersuisunut naammagittaalliuutigineqarsinnaavoq.
Imm. 4. Piffissap naammagittaalliuuteqarnissamut periarfissaliussaq naatinnagu, imaluunniit naammagittaalliuutit takkussimasut naalakkersuisunit suliarineqareertinnagit iliveqarfiup siunertamut allamut atorneqarnissaa siunertaralugu suliat suulluunniit aallartinneqarsinnaanngillat.
Imm. 5. Iliveqarfiup siunertamut allamut atorneqalerneratigut iliverni ammarneqartuni saarnit piffissami taamaaliorfiup nalaani iliveqarfiulersimasumi ataatsimut ilerfiorlugit ilineqassapput.

 

Kapitali 4.
Najugarineqanngitsuni iliveqarfiit.

§ 11. Najugarineqanngitsuni iliveqarfiit kommunimi piffimmut tassunga qaninnerpaamiittumi ilagiit sinniisaannit nakkutigineqarput. Taakku iliveqarfiup erseqqissumik nalunaarneqarsimanissaa, aammalu iliveqarfinni torersuutitsinissaq pillugu aalajangersakkat ersarissumut inissillugit.

§ 12. Najugarineqanngitsuni ilisinissat ilagiit sinniisuisa siumoortumik akuersissuteqareernerisigut aatsaat pisinnaapput. Aatsaallu taamaaliornissamik qinnuteqartoqarsinnaavoq toqusup tamanna kissaatigisimappagu, aammalu pissutsit allat tamanna ajornarunnaarsippassuk.

 

Kapitali 5.
Aalajangersakkat assigiinngitsut.

§ 13. Iliveqarfinni tamani qummuattat toqusup arsaanik imallit palasip ajoqilluunniit inissamik innersuussineratigut assaanneqarsinnaapput.
Imm. 2. Suliassani ataasiakkaani vicebiskoppi akuersissuteqarsinnaavoq arsat allatut torersumillu inissinneqarnissaannut, matumani ilanngullugu arsat Kalaallit Nunaanni sumiluunniit siaruarterneqarnissaat akuersissutigisinnaallugu.

§ 14. Kalaallit Nunaata avataani Namminersornerullutik Oqartussanit tamakkiisumik ilaannakortumilluunniit aningaasalersorneqartuni aqunneqartuniluunniit kalaallit immikkut iliveqarfiliuunneqarnissaat, taakku aserfallatsaalineqarnissaat atorunnaarsinneqarnissaalluunniit pillugit naalakkersuisut isumaqatigiissuteqarsinnaapput.
Imm. 2. § 3-mi taaneqarsimasutut akuersissutit pillugit iliveqarfiit ataasi.akkaarlugit naalakkersuisut aalajangersaassapput, inatsisartut peqqussutaanni matumani allannguutissat allaanerussutilluunniit pisariaqartut naleqqunnerusorisalluunniit ilanngullugit.

§ 15. Ilagiit sinniisui iliveqarfilerisartunik peqatigiiffinnilluunniit allanik isumaqatigiissuteqarnermikkut peqqussut manna malillugu ilagiit sinniisuisa suliassaannik tunniussisinnaapput. Isumaqatigiissutit taamaattut ilagiit kalaallit siulersuisuinit akuerineqassapput.

§ 16. Iliveqarfinni suniluunniit torersuutitsinissat taakkulu atorneqarneri pillugit ilagiit kalaallit siulersuisuisa ileqqoreqqusaliai, allattaaviit ilagiit kalaallit siulersuisuinit atortussanngortinneqarsimasut kiisalu iliveqarfiup assiliorneqarnera pigineqassapput.
Imm. 2. Allattaavinni atortussanngortinneqarsimasuni iliveqarfimmi ilisinerit tamarmik piffissami sumi pisimaneri, ilineqartup aqqa, atorfia, inuuia toqquialu kiisalu ilerrup normua allassimassapput.

 

Kapitali 6.
Atortuulersinneqarnera.

§ 17. Peqqussut manna atortuulersinneqarpoq 1. januar 1991 aallarnerfigalugu.
Imm. 2. Tamatumunnga peqatigitillugu Kalaallit Nunaanni iliveqarfiit pillugit maleruagassat 19. april 1933-imeersut atorunnaarsinneqarput.

Namminersornerullutik Oqartussat, ulloq 17.oktober 1990

Jonathan Motzfeldt

/

Kristian Mørch