Kulturimut atuartitsinermullu tunngasut siulersorneqarnerat pillugu inatsisartut peqqussutaanni nr. 8-mi 7. maj 1988-imeersumi § 6 aamma meeqqat atuarfii pillugit landstingip peqqussutaani nr. 6-imi 16. oktober 1979-imeersumi § 10 naapertorlugu Kalaallit Nunaanni Kommuneqarfiit Kattuffiannik isumaqatigiissuteqarneq malillugu matumuuna makku aalajangersarneqarput:

§ 1. Meeqqat atuarfii pillugit landstingip peqqussutaa naapertorlugu meeqqat inuusuttullu 20-it inorlugit ukiullit kommunemi najugaqartut ilinniartitaanissaat kommunep isumagissavaa.
Imm. 2. Ilinniartitsinissami unnersuussutissat inoqarfinni minnerusuni (savaateqarfinni, piniariartarfinni, nunaqarfinni minnerusuni assigisaannilu) naammattumik annertussuseqarsinnaanngippata kommunemi eqiterfiusumik ilinniartitsinissaq kommunep unnersuussutigissavaa. Tamatumunnga atatillugu ineqarnissamut periarfissiineqassaaq kollegiami inissat pisariaqartinneqartutut amerlassusillit pissarsiarineqarnerisigut imaluunniit atuartut allatut inissaqartinnerisigut.
Imm. 3. Immikkut ittunik pisoqartillugu kommunep pisussaaffini naammassisinnaavai kollegiami inissat pisariaqartinneqartutut amerlassusillit kommunemi allami atugassanngortinnerisigut.
Imm. 4. Kultureqarnermi Atuartitsinermilu Pisortaqarfiup aalajangersinnaavaa kommunet ataasiakkaat kollegiami inissanik pisariaqartinneqartutut amerlatigisunik kommunenut allanut atugassanngortitsinissaat.
Imm. 5. Kultureqarnermi Atuartitsinermilu Pisortaqarfik kommune sinnerlugu iliuuseqartassaaq inoqarfinnut kommuneqarfiit avataanniittunut tunngasut pillugit.

§ 2. Atuarnermut atatillugu kollegiami najugaqarneq imaluunniit allatut ineqarneq meeqqat atuarfianni atuartunut akeqanngilaq.

§ 3. Kultureqarnermi Atuartitsinermilu Pisortaqarfik atuartut atuarfinni ineqarfiullutillu nerisaqarfiusuni, meeqqat atuarfii pillugit landstingip peqqussutaani § 11 naapertorlugu pilersinneqartuni, tiguneqartarnerat pillugu malittarisassaliussaaq.

§ 4. Meeqqat atuarfiisa kollegiaasa ingerlatitaanerannut Namminersornerullutik Oqartussat tapiissuteqartassapput meeqqat atuarfiinut siunertanut kommunemut tapiissutit tamanut tunngasut (ataatsimoortumik tapiissutit) ilaattut naapertuilluartumik tunngaveqartumik tapiisarneq malillugu.
Imm. 2. Kalaallit Nunaanni Kommuneqarfiit Kattuffiannik isumaqatigiissuteqarneq malillugu tapiissutinik agguaassinissamut tunngavissat aningaasanut inatsimmi aalajangerneqassapput.

§ 5. Kultureqarnermi Atuartitsinermilu Pisortaqarfik atuartut kollegianut tiguneqartarnerat il. il. pillugit erseqqinnerusunik malittarisassaliussaaq.
Imm. 2. Kommunet immikkut ittunik pisortaqartillugu kollegiami inissanik kommunenut allanut atugassiisut
tamanna kommunenit taakkunannga akissarsissutigissavaat.
Imm. 3. Kultureqarnermi Atuartitsinermilu Pisortaqarfik Kalaallit Nunaanni Kommuneqarfiit Kattuffiannik isumaqatigiissuteqarneq malillugu kollegiami inigititanut akigititat, tamakkununnga ilanngullugu ukiumut akiliutissaq aalajangersimasoq, pillugit erseqqinnerusunik malittarisassaliussaaq.

§ 6. Atuartut aamma angajoqqaat kollegiani sunniuteqarnissaat pillugu Kultureqarnermi Atuartitsinermilu Pisortaqarfik erseqqinnerusunik aalajangersagaliorsinnaavoq.

§ 7. Nalunaarut una atulissaaq 1. august 1989. Tamanna peqatigalugu atorunnaassaaq Kulturimik Atuartitsinermillu aqutsisut ineqartussat tiguneqartarnerat inissinneqartarnerallu pillugit kaajallaasitaat 7/80.
Imm. 2. Ukiut atuarfiusut 1989/90 aamma 1990/91 pillugit Kultureqarnermi Atuartitsinermilu Pisortaqarfik kommunenut § 1, imm. 1, 2, aamma 3-mi aalajangersakkanik naammassinnissinnaanngitsunut ikaarsaariarnermi atortussanik aalajangersagaliorsinnaavoq.

Namminersornerullutik Oqartussat, Nuuk, ulloq 9. februar 1989.

Jens Lybert

/

Hugin S.Christiansen