Aningaasarsianit akileraarutit pillugit landstingip inatsisaani nr. 5, 19. maj 1979-imeersumi landstingip inatsisaani nr. 4 oktoberip 2-anni 1981-imi allanngortinneqartumi makku allannguutigineqassapput:

§ 1

1. § 22-mi imm. 3-tut ikkunneqassaaq:
"Piginneqatigiiffimmut, Kalaallit Nunaanni atortussat aatsitassanit pisut pillugit inatsimmi kapitel IV naapertorlugu akuersissummik tunineqarsimasumut, akuersissummi toqqavillugu ingerlatassatut pineqartunut imm. 1 aamma 2 atortuutinneqassanngillat. "

2. § 94 A ima oqaasertalerneqassaaq:
"§ 94 A. Aningaaseriviit allallu, aningaasanik erniortitassanik ilisiffigineqartartut, qinnuigineqanngikkaluarlutik akileraarusiinermut atugassanik ukiut tamaasa akileraartarnermut oqartussaasut paasissutissittassavaat ukiumi qaangiuttumi kontomik piginnittut ataasiakkaat ernianut akiliutaasa pissarsiaasaluunniit annertussusaannik, ulloq ernialiiffik kiisalu ukiup qaangiuttup naanerani uninngasuutigineqartut annertussusaannik. Paasissutissiinissamut pisussaanermut ilaapput konto-nut il.il. ukiup ingerlanerani matuneqarsimasunut erniat.
Imm. 2. Imm. 1 naapertorlugu paasissutissiinissamut malittarisassanik sukumiinerusunik naalakkersuisut aalajangersaasinnaapput."

3. § 94 B ima oqaasertalerneqassaaq:
"§ 94 B. § 94 A imm. 1-imi taaneqartutut kontomik pilersitsisoq kontomik piginnittup inuup normuanik (cpr. nr.) imaluimniit  piginneqatigiiffiup akileraarutit nalunaarsorneqarfianni normuanik (skr.nr.) paasissutissiissaaq. Akileraartarnermut oqartussaasut § 94 A naapertorlugu kontonik piginnittut inuup normuinik imaluunniit akileraarutit nalunaarsorneqarfianni normuinik paasissutissiinissamut pisussaasunut tunniussaqarsinnaapput.
Imm. 2. Imm. 1 naapertorlugu paasissutissiinissamut malittarisassanik sukumiinerusunik naalakkersuisut aalajangersaasinnaapput."

§ 2

Inatsit tamanut saqqummiunneqarnermini atortuulissaaq.

§ 3

§ 94 A aningaaserivinni il.il. konto-ni ernianut 31. december 1984-ip kingorna akiliutigineqarsimasunut pissarsiarineqarsimasunulluunniit atuutissaaq kiisalu kontoni taakkunani 31. december 1985-imi ukiullu taassuma kinguliini uninngasuutitanut.
Imm. 2. Ernianut 1985-imi akiliutigineqarsimasunut pissarsiarineqarsimasunulluunniit tunngatillugu kiisalu 31. december 1985-imi uninngasuutitanut tunngatillugu paasissutissiinissamut pisussaanermi naalakkersuisut killiliinissamut immikkut ittunik aalajangersagaqarsinnaapput.
Imm. 3. Inatsisip atuutilernerani konto-nut pioreersunut kingusinnerpaamik 31. marts 1985-imi inuup normui imaluunniit akileraarutit nalunaarsorsimaffianni normut il.il. nalunaarsorneqareersimassapput, inatsimmi § 94 A-mi taaneqartutut, § 1, nr. 2-mi allassimasutut.
Imm. 4. Imm. 3-mi killigititap taaneqartup kingorna konto-ni tigusisoqarsinnaanngilaq, inuup normuanik imaluunniit akileraarutit nalunaarsorsimaffianni normuanik nalunaaruteqartoqarsimanngippat.
Imm. 5. Konto-nut inunnit nunani allani nunaqartunit najugaqartunilluunniit pigineqartunut naalakkersuisut sukumiinerusumik malittarisassanik aalajangersaassapput.
Imm. 6. Naalakkersuisut aalajangiisinnaapput aningaaseriviit allallu, aningaasarsianit akileraarutit pillugit landstingip inatsisaani § 94 A naapertorlugu, § 1, nr. 2-mi allassimasutut, paasissutissiinissamut pisussaassuseqarnermik attorneqartut Akileraartarnermut Pisortaqarfímmut konto-nut ilioraaviit allattorsimaffíannik, imm. 3-mi killissarititap aalajangerneqarsimasup qaangiutereernerani inuup normuinik imaluunniit akileraarutit nalunaarsorsimaffíanni normunik il.il. nalunaarsuiffigineqarsimanngitsunut nassiussaqarnissaannut. Naalakkersuisut sukumiinerusumik malittarisassanik aalajangersaasinnaapput, paasissutissat suut allattorsimaffimmi ilanngunneqassanersut.
Imm. 7. Konto-ni uninngasuutitat imm. 6-imi allattorsimaffimmi taaneqartumi allassimasut akileraarusiinermi oqartussanit piginnittussaarunneqarsimasut landskassemut iluaqutissanngorlugit arsaarinnissutigineqarsinnaapput.

Jonathan Motzfeldt

/

Moses Olsen