Suliffeqarfiit innuttaasunik tapersersortarialinnik suliffissaqartitsisut nalunaarsugaasut pillugit Inatsisartut inatsisaat nr. 31, 28. november 2019-imeersumi §§ 2-p aamma 18-ip, § 19, imm. 5-ip, aamma § 20, imm. 2-p nassatarisaannik aalajangerneqarput:

Ilusissanut piumasaqaatit

  § 1.  Qinnuteqarnermi, nalunaarsuinermi, nalunaarsugaajunnaarsitsinermi, nalunaaruteqarnermi il.il. allaffissornikkut innersuussutaasutut immersugassat atorneqassapput.

Nalunaarsuinermut akitsuut

  § 2.  Nalunaarsugaanerup akuersissutiginissaa imaluunniit nalunaarsugaanerup akuerisaa-reersup allanngortinnissaa pillugit qinnuteqarnermi qinnuteqaatip kingunerisaa apeqqutaatinnagu utertillugu akilerneqartussaanngitsumik suliffeqarfik nalunaarsuinermut akitsuummik 1.000 kr.-imik akiliissaaq. Nalunaarsuinermut akitsuutip akiliutaanera sioqqullugu suliamik isumaginninneq aallartsinneqassanngilaq.

Nalunaarsugaajunnaarsitsineq aamma nutaamik akuersissuteqarneq

  § 3.  Suliffeqarfittut innuttaasunik tapersersortarialinnik suliffissaqartitsisutut suliffiup nalunaarsugaaneranik akuersissuteqarneq atorunnaassaaq suliffeqarfiit innuttaasunik tapersersortarialinnik suliffissaqartitsisut pillugit Inatsisartut inatsisaanni aalajangersakkatut, imaluunniit nassatarisatut suliffeqarfik killilersuutinik malittarinninngippat, ilanngullugit nalunaarsuinissamut killilersuutinik.
  Imm. 2.  Siusinnerusumi piffissami akuersissuteqarfiusumi nalunaaruteqarnissamut piumasa-qaatinik suliffeqarfik piviusunngortitsisimalerpat suliffeqarfik siusinnerpaamik akuersissummik nalunaarfigeqqinneqarsinnaavoq.

Nalunaaruteqartarneq aamma tamanut saqqummiussisarneq

  § 4.  Suliffeqarfiit innuttaasunik tapersersortarialinnik suliffissaqartitsisut nalunaarsugaasut pillugit Inatsisartut inatsisaat malillugu nalunaarsuineq suliffeqarfinnik innuttaasunik tapersersortarialinnik suliffissaqartitsisunik nalunaarsuisarfimmi tamakkiisumik tamanut saqqummiunneqartassapput, taamaattorli takuuk imm. 2.
  Imm. 2.  Pisortat ingerlatsineranni suliassat suliarineqartarnerat pillugu Inatsisartut inatsisaanni tamanut saqqummiussisarnermut pinngitsuugassanik nalunaarut allagaatinik imaqarpat nalunaarut tamanut saqqummiussinissamut naleqquttumik ilusilikkamik ilaneqartassaaq.

  § 5.  Ukiup naatsorsuiffiup ingerlanerani nalunaarsorneqarnerup allanngortinnerani akuersissuteqarfittut piffissamut tunngasutut paasissutissat sorliuneri nalunaarutaasumi erseqqissumik nalunaarneqassapput.

  § 6.  Suliffeqarfinnut innuttaasunik tapersersortarialinnik suliffissaqartitsisutut nalunaarsugaasunut nalunaarsuisarfik allattoqarfiup nutarsartuarsinnaavaa, ilanngullugit suliffeqarfimmut innuttaasunik tapersersortarialinnik suliffissaqartitsisutut akuerisaajunnaartumut tunngasunik paasissutissat.

Atuutilerfia

  § 7.  Nalunaarut ulloq 1. juni 2022 atuutilerpoq.

Namminersorlutik Oqartussat, ulloq 5. maj 2022

Vivian Motzfeldt
Nunanut Allanut, Inuussutissarsiornermut Niuernermullu Naalakkersuisoq

/Mininguaq Kleist