Kulturikkut ingerlatsineq sunngiffimmilu sammisassaqartitsineq pillugit Inatsisartut peqqussutaanni nr. 10, 21. maj 2002-meersumi § 31 naapertorlugu aalajangersarneqarpoq:

Kapitali 1
Atuuffia

   § 1  Naalakkersuisut aningaasaliissutinik aningaasanut inatsimmi aalajangersarneqartut iluanni nuna tamakkerlugu tusagassiutinut naqitanut inuiaqatigiinnut paasissutissiisarnermik siuarsaallutik aamma tamat oqartussaaqataatillugit oqallitsitsillutik suliaqartunut ukiumoortumik ingerlatsinermut tapiissuteqartarput.

  § 2  Tapiissutit nutaarsiassanik soqutiginaatilinnillu imamikkut kalaallinut atuartartunut imaluunniit nunani allani pisunik kalaallinut soqutiginarsinnaasunik nalinginnaasumik naqiterititsinermut tapiissutitut tunniunneqartarput.
  Imm. 2.  Tusagassiorfik arlaannaanulluunniit attuumassuteqanngitsutut isigineqassanngilaq:
1)  Pisortani oqartussanit, suliffeqarfinnit imaluunniit ingerlatseqatigiiffinnit pisortanit aningaasalersorneqartunit assigisaannilluunniit tamakkiisumik ilaannakortumilluunniit pigineqarpat imaluunniit
2)  tusagassiorfiup minnerpaamik affaa sulisitsisunit, sulisartunit, suliffeqarfinnit assigiimmik suliaqarfinnit soqutigisaqaqatigiinnilluunniit pigineqarpat, matumani ilanngullugit politikkikkut partiit.
  Imm. 3.  Tusagassiutit naqitat ima paasineqassaaq aviisit, atuagassiat saqqummersartut imaluunniit atuagassiat assigisaat.

Kapitali 2
 Tapiiffigineqarnissamut piumasaqaatit

  § 3.  Tapiiffigineqarnissamut piumasaqaataavoq:
1)  tusagassiorfik namminersortuussasoq, takuuk imm. 2,
2)  tusagassiorfik Kalaallit Nunaanni angerlarsimaffeqassasoq
3)  tusagassiorfik piffissaq tapiissuteqarfiusoq tamakkerlugu akisussaasuusumik aaqqissuisoqassasoq,
4)  tusagassiorfik aaqqissuisunik sulisoqassasoq, taakkulu akisussaasuulluni aaqqissuisoq ilanngullugu minnerpaamik ukioq naallugu sulisinnaasut pingasuussasut,
5)  tusagassiorfik minnerpaamik sapaatit akunneranut ataasiarluni nuna tamakkerlugu naqitanngorluni saqqummertassasoq,
6)  tusagassiortut namminersorlutik suliaannik imaqarlutik saqqummertassasut, pingaartumik naalakkersuinermut inuiaqatigiinnullu tunngassutilinnik sammisaqarlutik, imaasa affai pilerisaarutit ilanngunnagit nunamut namminermut, nunanut allanut, kulturimut, najukkamut tunngassutilinnik soqutiginartuuneri nutaarsiassaaneri isiginiarlugit aaqqissuisunit suliarineqarsimassasut.
7)  saqqummersartut inuussutissarsiutilinnut ilinniarsimasunulluunniit, sulisut peqatigiiffiinut, sulisitsisunut imaluunniit suliffeqarfinnut assigiimmik suliaqarfiusunut, politikkikkut partiinut imaluunniit suliffeqarfiit assigiinngitsut sulisuinut aalajangersimasunut saaffiginniinnaratik atuartartunut assigiinngitsorpassuarnut saaffiginnittuussasut,
8)  minnerpaamik kalaallisut saqqummertassasut,
9)  qinnuteqarnissamut piffissaliussatut aalajangersarneqartoq nallertinnagu ingerlatsinermut tapiiffigineqarnissamut qinnuteqaat Kultureqarnermut Naalakkersuisoqarfimmit tiguneqareersimassasoq, tak. § 4, imm. 1 aamma
10)  Kultureqarnermut Naalakkersuisoqarfik kingusinnerpaamik tapiiffigineqarnissamut qinnuteqaatip tiguneqarneranut peqatigitillugu naatsorsuutit kukkunersiuisumit kukkunersiuisutut nalunaarsukkamik uppernarsaatinillu pisariaqartunik tigusaqarsimassaaq, tak. § 4, imm. 2 aamma 3.
  Imm. 2  Tusagassiorfik namminersortutut isigineqassaaq, tak. imm. 1, nr. 1, namminersortumik aaqqissuisunut pisortaqarpat nammineerluni naqitanik nalunaarsuisinnaasumik, immikkullu saqqummersartunik pisartagaqartoqarsinnaappat.

Kapitali 3
Qinnuteqarnermi periuseq tunniussinerlu

  § 4.  Ingerlatsinermut tapiiffigineqarnissamut qinnuteqaat Kultureqarnermut Naalakkersuisoqarfimmeeriissaaq piffissami 14. novemberimiit 1. december ilanngullugu qaammatisiutit ukiuani qinnuteqarfiusumi.
  Imm. 2.  Allakkatigut qinnuteqartoqassaaq imarisaanilu nalunaarsimassapput qinnuteqartup kontoa, tapiiffigineqarnissamut piumasaqaatit eqqortinneqarsimanerinut uppernarsaatit pisariaqartut, piffissami qinnuteqaatip nassiunnerani saqqummersitsinerit amerlassusii ukiullu sinnerani saqqummersitsinissamut pilersaarutit.
  Imm. 3.  Kultureqarnermut Naalakkersuisoqarfiup qinnuteqaammik suliarinninnerminut ilaatillugu qinnuteqartoq paasissutissanut ilassutinik attuumassuteqartunik piumaffigisinnaavaa, matumani ilanngullugit tapiiffigineqarnissamut piumasaqaatit eqqortitsinerinut uppernarsaatinik amerlanerusunik.

  § 5.  Ingerlatsinermut tapiissutit tusagassiorfiup ukiup tapiissuteqarfiusup iluani saqqummersitaasa amerlassusii tapiiffigineqarnissamut piumasaqaatinik eqqortitsisut tunngavigalugit tunniunneqartarput, ukiup tapiissuteqarfiusup iluani saqqummersitassanut tamarmiusunut tapiiffigineqarnissamut piumasaqaatinik eqqortitsisunut sanilliullugit.
  Imm. 2.  Aningaasaliissutit tamarmiusut tamakkiisumik atugassiissutigineqassapput, ikinnerpaamik qinnuteqartoq ataaseq tapiiffigineqarnissamut piumasaqaatinik eqqortitsisoq qinnuteqaateqarpat.

  § 6.  Kultureqarnermut Naalakkersuisoqarfiup ingerlatsinermut tapiiffigineqarnissamut qinnuteqaatit pillugit aalajangiineri allaffissornikkut oqartussanut allanut suliassanngortinneqarsinnaanngillat.

Kapitali 4
Atuutilersitsinermut ikaarsaarnermullu aalajangersakkat

   § 7.  Nalunaarut 1. juni 2016-imi atuutilissaaq.

Namminersorlutik Oqartussat, ulloq 26 maj 2016

Nivi Olsen

/

Mikael Kristensen