Aalisarneq pillugu Inatsisartut inatsisaanni nr. 18-imi, 31. oktober 1996-imeersumi, Inatsisartut inatsisaatigut nr. 5, 21. maj 2002-imeersukkut allanngortinneqartumi kingullermillu Inatsisartut inatsisaatigut nr. 8-kkut, 22. november 2011-imeersukkut allanngortinneqartumi, § 10 a, § 23 imm. 1, § 33 imm. 2 aamma § 34, imm. 3 naapertorlugit aalajangersarneqarpoq:

Atuuffia

§ 1.  Nalunaarut imartami Kalaallit Nunaata aalisarnikkut oqartussaaffigisaani inuussutissarsiutigalugu aalisarnermut atuuppoq.

Nassuiaatit

§ 2.  Saniatigut pisat tassaapput imaani uumassusilinnik pisat tamarmik, tamakku tassaappata:
1)  angallatip aalisarnissamut akuersissutaanut ilaanngitsut, (licens)
2)  ilanngussami 1-imi minnerpaaffissatut uuttuutinik naammassinnissimanngitsut.

Saniatigut pisanik uuttuineq aamma nalunaarsuineq

§ 3.  Aalisarsinnaanermut akuersissummi angallatip akuerisaasumik saniatigut pisarisinaasaasa amerlanerpaaffissaat aalajangersarneqarsinnaavoq. Tamanna anguneqarsinnaavoq aalisakkat immikkoortut ataasiakkaat annerpaamik amerlanerpaaffissaannik aalajangersaanikkut aamma aalisakkanut allanut angallatip aalisarsinnaanermut akuersissutaani ilaanngitsut ataatsimut katillugit amerlanerpaaffissaannik aalajangersaanikkut.
Imm. 2.  Saniatigut pisat aalisarnermut atortup atorneqartup kingullermik imaareerneratigut angallatip qaavani aalisakkat tamarmik oqimaassusiisa imaluunniit aalisakkat tamarmik angallammiittut imaluunniit tulaanneqartut procentiattut uuttorneqassapput. Saniatigut pisat aalajangiivigineqassapput angallatip qaavani aalisakkanut tamanut naleqqiullugu uuttortaasoqaraangat, pisat nalaatsornikkut immikkoortinneqartut ikinnerpaamik 100 kg misiligutissat tunngavigalugit. Angallammi aalisakkanut tamanut imaluunniit tulaassanut naleqqiullugu uuttuinikkut annertussutsit tamarmiusut naatsorsorneqassapput umiarsuup allattaavii malillugit angallatip pitsaassutsimik pissuteqartumik eqqagai ilassutigalugit.
Imm. 3.  Nakkutilliisutut oqartussaasut qanoq iliorluni uuttortaasoqarnissaa aalajangissavaat.
Imm. 4.  Saniatigut pisat angallammut pisassiissutinit ilanngaatitut naatsorsorneqassapput, taamaattunik peqarsimappat imm. 1 naapertorlugu; imaluunniit angallatip pisassaannit; imaluunniit naalagaaffiup pisassaanit, taamaattunik peqartoqassappat; imaluunniit Kalaallit Nunaata pisassaanit. Tamakkununngali ilaanngillat imaanut avalatitseqqiinerit § 4-mi taaneqartut.
Imm. 5. Aalisarnerni aalisakkanik arlalinnik ataatsikkut pisaqartoqarnissaa pinngitsoorneqarsinnaatinnagu angallat aalisariut, aalisakkat assigiinngitsut ataasiakkaat pisarineqartaraluarlutik piujuaannarsinnaanerat eqqarsaatigalugu akuerineqarsinnaassappat, aalisakkanik assigiinngitsunik tamanik pisassinneqassaaq.

Avalatitseqqiineq

§ 4.  Nataarnat saniatigut pisarineqartut, qalorsuaanngitsunik atortoqarluni pisarineqartut, angallammi uninngatinneqassanngillat, kisiannili imaanut avalatseqqinneqassallutik, sapinngisamik ajornanngippat uumatillugit.
Imm. 2.  Saattuat angutivissat, minnerpaaffissatut uuttuummit mikinerusut, kiisalu saattuat arnavissat angallammi uninngatinneqassanngillat, kisiannili imaanut avalatseqqinneqassallutik, ajornanngippat uumatillugit.
Imm. 3. Saattuat BCD-imik tunillanneqarsimasut (Bitter Crab Disease) avalatseqqinneqassanngillat, nunamulli tulaanneqassallutik.
Imm. 4.  Bundgarnersorluni aalisarnermi aalisakkat mikivallaat, ilanngussaq 1 naapertorlugu, angallammi uninngatinneqassanngillat, kisiannili imaanut avatseqqinneqassallutik, ajornanngippat sapinngisamik uumatillugit.

 
Igitsinissamut inerteqquteqarneq

§ 5.  Pisat angallammi tunisassiornermi ajoquserneqartut taamaammallu tunineqarsinnaanngitsut iginneqarsinnaasut pitsaasuunnginnerat pissutigalugu iginneqarsinnaapput. Pitsaasuunnginnerat pissutigalugu igitat, koorinut katersorneqassapput allatulluunniit oqimaalutarneqassallutillu aamma umiarsuup allattaaviinut allanneqassallutik, eqqaasoqalersinnagu.
Imm. 2. § 4-mi aamma § 5 imm. 1-imi taaneqartut pinnagit, pisat suulluunniit angallammi uninngatinneqassapput nunamullu tulaanneqassallutik.    

Saniatigut pisaqarnermut pissuteqartumik nuunneq

§ 6.  Bundgarniunngitsunik aamma saattuanut pullataanngitsunik atortoqarluni aalisarnermi aalisarneq unitsinneqassaaq aalisarfillu qimanneqassalluni ataasiarluni amuarnermi saniatigut pisat kalinnermi tamakkerlugit pisat oqimaassusiisa 10 %-ii sinnerpagit.
Imm. 2. Aalisarneq aallarteqqinneqassanngilaq umiarsuup allattaaviini allassimasutut kalinnerup aallartiffianiit kalikkunnaarfiullu akornanni titarnermiit 5 sømilinit qaninnerusumi, umiarsuup allattaaviinit allassimasutut kalikkunnaarnermiit minnerpaamik nal. ak. 60-it qaangiutsinnagit.

§ 7. Kilisaatip § 6, imm. 1-imi taaneqartutut pissutsinik nalaassisup, aalisarfimmi tassani aalisarnini nangeqqissinnaavaa qalorsuarni ristinik panelinilluunniit saniatigut pisat annertussusiinik annikillisitsisussatut naatsorsuutigineqartunik ikkussisoqareerneratigut – imaluunniit qalorsuit qalorsuarnik allanik taamaattunik panelertalinnik ristertalinnilluunniit taarserneqareernerisigut.
Imm. 2.  Tamatuma kingornatigut saniatigut pisat ataasiarluni kalinnermi oqimaassutsimikkut kalinnermi pisat tamarmiusut 10 % -ii sinnerpagit, § 6-mi pineqartut malinneqassapput.

§ 8.  Raajarniarnermi aalisarneq unitsinneqassaaq, § 6, imm. 1-imi aamma § 7, imm. 2-mi taaneqartutut saniatigut pisat 5 %-ii qaangersimappatigik.

§ 9.  § 6, imm. 1-imi aalajangersagaq apeqqutaatinnagu ataasiarluni aalisarnermi (umiarsuup allattaaviinut allattuilluni angalanermi) nataarnanik pisat akunnaallisillugit saniatigut pisatut 5 tonsit sinnersimassanngilaat.

§ 10.  § 6-imi aamma § 7-imi aalajangersakkat apeqqutaatinnagit angallatini angallammi nammineq tunisassiornissamut akuersissuteqarfigineqarsimasuni saniatigut pisanik uninngatitat ullut unnuallu aalisarfiusut qulit kingornatigut angallatip pisaasa tamarmiusut oqimaassusiisa 10 %-ii sinnersimassanngilaat.
Imm. 2.  Angallatinut nammineq tunisassiornissamut akuersissuteqarfigineqarsimanngitsunut imm. 1 atuuppoq, ullut aalisarfiusut sisamat kingornatigut.

§ 11.  Aalisakkanik aalajangersimasunik naalagaaffiup pisassai imartami pisassaqarfiusumi aalajangersimasumi tamakkerlugit aalisarneqarpata, aalisakkanit pineqartunit saniatigut pisat 5 %-ii imartami pisassaqarfiusumi tassani allatut aalisarnikkut aalisarneqassanngillat.

Imm. 2.  Taamaaliortoqassanngilarli nunat tamalaat isumaqatigiissutaat pisussaaffiilu malillugit umiarsuaatillit akuersissuteqarfigineqarsimaneranni, imm. 1-imi tamanna allassimatillugu.

Imartamik matusineq  

§ 12.  Aalisarnermut, Piniarnermut Nunalerinermullu Naalakkersuisoqarfiup imartaq aalajangersimasunik aalisarnermut atortoqarluni aalisarfiusoq matusinnaavaa, tassani annertuallaanik saniatigut pisaqartoqartartoq paasineqarpat.
Imm. 2.  Tamakku pillugit tamanut saqqummiussinikkut, imartami pineqartumi umiarsuarnut nalunaaruteqarnikkut aamma kalaallit angallataannut tunngatillugu angallatit pineqartut piginnittaannut qarasaasiakkut (e-post) imaluunniit telefaxikkut nalunaaruteqartoqassaaq. Angallatinut nunani EU-mut ilaasortaasuni nalunaarsorneqarsimasunut tunngatillugu nalunaarut EU-kommissionimut nassiunneqassaaq aammalu kalaallit angallatiginngisaannut allanut tunngatillugu, naalagaaffiup aalisarnermut oqartussaasuinut.
Imm. 3.  Imartaq matoqqatitaq ammaqqinneqassaaq tassani nakkutigineqartumik aalisarnikkut paasinarsippat imartami pineqartumi saniatigut pisat pillugit maleruagassat unioqqutinnagit aalisartoqarsinnaasoq.

Immikkut saneqqutsinissamut akuersissutit

§ 13.  Naalakkersuisut misileraalluni aalisarnissamut akuersissuteqarnikkut imaluunniit pissutsit immikkut illuinnartut tamanna pisariaqartippassuk nalunaarummi uani mikinerpaaffissanut uuttuutinik maleruagassat aamma saniatigut pisat killilersorneqarnerisa immikkut saneqqunneqarnissaannik akuersissuteqarsinnaapput.
Imm. 2.  Naalakkersuisut kilisaatinut kinguppanniutinut aalisakkanik § 5 malillugu igitseqqusaannginnermik piumasaqaammit atuutsitsinngikkallarnissamik immikkut akuersissuteqarsinnaapput, umiarsuarmi kinguppanniummi aalisakkanik nioqqutissiornissamut piumasaqaatit naammassitserlugit. Taamatut immikkut akuersissuteqarsimaneq ukiumut ataatsimut atuutissaaq, umiarsuaatileqatigiillu ukiumut pisassiissutaannut nalunaarummi allanneqartassalluni.

Pineqaatissiinerit

§ 14.  Nalunaarummi matumani aalajangersakkanik unioqqutitsinerit akiliisitsinermik imaluunniit Kalaallit Nunaanni pinerluttulerinermik inatsimmi malittarisassat malillugit arsaarinninnermik kinguneqarsinnaapput. Angallammit unioqqutitsilluni aalisartoqartillugu aalisarnermut atortut atorneqartut, angallatip pisai tamaasa taakkuluunniit nalingi arsaarinnissutigineqarsinnaapput, pisat unioqqutitsinani aalisarnermit pissarsiarineqartutut uppernarsarneqartut pinnagit. Taamatuttaaq tamakku pillugit suliat Aalisarneq pillugu Inatsisartut Inatsisaanni malittarissat malillugit suliarineqartassapput.

Atuutilerfia

§ 15.  Nalunaarut atuutilerpoq ulloq 1. januar 2012.
Imm. 2.  Tamatumunnga peqatigitillugu aalisarnermi saniatigut pisat pillugit Namminersornerullutik Oqartussat nalunaarutaat nr. 28, 11. december 2008-meersoq atorunnaarsinneqarpoq.

Namminersorlutik Oqartussat, ulloq 6. december 2011

Ane Hansen

/

Jens K. Lyberth