Inatsisarsut inatsisaanni nr. 2, 31. maj 1999-meersumi § 49 aamma § 52, imm. 2 naapertorlugit, Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaanni, kingullermik allanngortinneqartoq Inatsisartut peqqussutaat nr. 1, 16. maj 2008-imeersoq naapertorlugu, aalajangersarneqarpoq:

Atuuffia

§ 1. Matumani nalunaarut inuussutissarsiutinut pikkorissartitsisarnernut tapiissutit suliamik ilinniagaqarsimasunut ilinniagaqarsimanngitsunullu, ilanngullugit suliffissaaleqisut, sammitinneqartut inatsisitigut aalajangersarneqarput, taamaattorli tak. § 4, imm. 1 aamma 2.
Imm. 2. Matumani nalunaarut malillugu tapiissutit lærlinginut ilinniagaqartunulluunniit allanut tunniunneqarneq ajorput. Taamaattorli Piareersarfinni ilinniagaqarnermut atatillugu tapiissuteqartoqarsinnaavoq.

§ 2. Inatsisartut aningaasaqarnermut inatsisaanni aningaasaliissutigineqartut malillugit tapiissutit tunniunneqartarput inuussutissarsiutinut pikkorissartitsisarnernut ilinniagaqaqqinnermilu pikkorissartitsisarnernut atatillugu angalanernut najugaqarnernullu aningaasartuutinut, taakku siunertarissammassuk pikkorissartut suliffeqarnermi pisariaqartitsinerit malillugit piginnaasaqarfigilikkaminnik piginnaanerulerlutillu ineriartortitsinissaat.
Imm. 2. Taamatuttaaq suliffissaaleqisunut ilinniagaqartunulluunniit Piareersarfinnut attuumassuteqartunut inuutissartissarsiutillu iluanni ingerlariaqqiffiusumik, annerpaamik, sivikinnerusumik ilinniagaqartunut pikkorissarneqarnerannut atatillugu angalanernut najugaqarnernullu aningaasartuutinut tapiissuteqartoqarsinnaavoq, taakku siunertarippassuk pikkorissartut inuttut ineriartornerannik siuarsaanissaq, taamatullu Inuussutissarsiutinut Ilinniartitaanermut Naalakkersuisoqarfiup nalilerpagu pikkorissartitsinerni taamaattuni peqataanissaq aalajangiisuussasoq suliatigut piginnaanngorsaqqinnermik ingerlatsiviusariaqartoq. Pikkorissartitsinerilli taamaattut pingaarnertut maleruagassarissavaat ingerlanneqartassagamik Piareersarfinni ataasiakkaani inunnut pineqartunut iliuusissatut pinngitsoorani pilersaarusiaasartussat tunngavigalugit, takuuk suliffissanik innersuussisarneq il.il. pillugit Inatsisartut peqqussutaat, imaluunniit piginnaasaqarfigiligassanut malitseqarfiusunik pikkorissartitsisarnerit ilaannut ilaappata.

§ 3. Aningaasanut inatsimmi aningaasaliissutaasut iluanni tapiissutit inuussutissarsiutinut siuarsaaffiujumasunut piginnaasaqarfigiligassanik ineriartortitsinermut pikkorissartitsinernut atatillugu angalanernut najugaqarnernullu aningaasartuutinut tunniunneqarsinnaapput. Taakku saniatigut pikkorissartitsinernut taamaattunut pikkorissarnermut akitsuutinut pikkorissarnersiutinullu tamakkiisumik ilaannakortumilluunniit tapiissuteqartoqarsinnaavoq. Pikkorissartitsinerit ingerlanneqassapput Inuussutissarsiutinut Ilinniartitaanermut Naalakkersuisoqarfik, suliffeqarfiit aamma kommunit suleqatigalugit.

§ 4. Taamatuttaaq Inuussutissarsiutinut Ilinniartitaanermut Naalakkersuisoqarfik qullersanut inuussutissarsiutini ingerlariaqqiffiusumik, annerpaamik, sivikinnerusumik malitseqartinneqartunik tunngaviusumik pikkorissartitsisarnernut tapiissuteqarsinnaavoq.
Imm. 2. Imm. 1 aamma §§ 2-3 malillugit pikkorissartitsisarnernut taaneqartunut pikkorissaasunut ullormusianut, angalanernut najugaqarnernullu aningaasartuutinut tapiissuteqartoqarsinnaavoq. Pineqartunut qinnuteqaatit pikkorissartitsisussamut tunniunneqassapput.

§ 5. Inuussutissarsiutinut Ilinniartitaanermut Naalakkersuisoqarfik tapiissutinik tunniussisarnermut atatillugu Inuussutissarsiornermut Piginnaanngorsaanermullu Siunnersuisoqatigiinnit inassuteqaatinik ukiumoortumik pissarsisassaaq.

§ 6. Tapiissuteqarfiginissamik qinnuteqaat sulisitsisumit, kommunalbestyrelsimit, tak. § 2, imm. 2, imaluunniit pikkorissaasussamit, tak. § 4, imm. 2, Inuussutissarsiutinut Ilinniartitaanermut Naalakkersuisoqarfimmut imaluunniit suliaqarfiusumut qitiusumik ilinniarfimmut inuussutissarsiutinulluunniit ilinniarfimmut tunniunneqareersimassaaq pikkorissartitsinissaq sioqqullugu ullut 14-it tikitsinnagit, tamatumani qinnuteqarnermut immersuiffiliaq atorlugu, imaqassallunilu pikkorissartitsinissap siunertaanik, imarisassaanik, sivisussusissaanik, pikkorissarfiusussap sumiinnissaanik, peqataasussat amerlassusissaannik, angalanernut najugaqarnernullu aningaasartuutit pillugit aammalu allatigut tapiissuteqartoqarsimasinnaaneranik pikkorissartitsinissamut tapiissuteqartussap aningaasaliissuteqarfiusimasinnaasaanik nassuiaateqarfiusumik.
Imm. 2. Pikkorissartitsinernut ilinniagaqaqqinnermullu pikkorissartitsinernut atatillugu aatsaat tapiissuteqartoqarsinnaavoq pikkorissartitsinissaq pineqartoq sioqqullugu qinnuteqareernikkut tapiiffigineqarnissamik akuersissuteqartoqareersimappat. Tapiissutit sulisitsisumut imaluunniit pineqartumut aningaasartuutissanik isumaginnittumut tunniunneqassapput.

§ 7. Pikkorissartitsinernut ilinniagaqaqqinnermullu pikkorissartitsinernut sivikinnerpaamik ullunik sisamanik sivisussuteqartinneqartunut tapiissuteqartoqarsinnaavoq, pineqarsinnaallunili pikkorissartitsineq aaqqissuunneqarpat pikkorissartussat pikkorissarnissaq sioqqullugu pikkorissareernerulluunniit kingorna suliassaqartinneqarpata.
Imm. 2. Imm. 1 naapertorlugu aalajangersagaqaraluartoq Inuussutissarsiutinut Ilinniartitaanermut Naalakkersuisoqarfik pikkorissartitsinissanut ullunit sisamanit sivikinnerusussanut atatillugu tapiissuteqarsinnaavoq pikkorissartitsinerit pineqartut suliaqarfinnut teknologiitigut imaluunniit ilisimatusarnikkut imaluunniit ilinniartitaanikkut malitseqarfiusutigut siunnerfeqartussaappata, ilanngullugit suliamik ilinniagaqarsimasunut ilinniagaqarsimanngitsunullu qullersatut tunngaviusumik pikkorissartitsinerit.

§ 8. Pikkorissatitsinernut qitiusumik ilinniarfinnit imaluunniit inuussutissarsiutinut ilinniarfinnit neqeroorutigineqartunut ikinnerpaamillu arfinilinnik peqataaffigineqartussanut atatillugu taamaallaat tapiissuteqartoqarsinnaavoq, tamaattorli tak. imm. 2 aamma 3.
Imm. 2. Imm. 1 naapertorlugu aalajangersagaqaraluartoq pikkorissartitsinernut qitiusumik ilinniarfiit imaluunniit inuussutissartinut ilinniarfiit imaluunniit allat pikkorissartitsisinnaasut suleqatigalugit aaqqissuunneqartunut tapiissuteqartoqarsinnaavoq, assersuutigalugu ilinniartitaanernut malitseqartinneqartutut aaqqissuussanut Inuussutissarsiutinullu Ilinniartitaanermut Naalakkersuisoqarfiup suliaqarfiusoq pillugu ataatsimiititaliamit inassuteqaatisiaa tunngavigalugu akuersereerneratigut.
Imm. 3. Imm. 1 naapertorlugu aalajangersagaqaraluartoq Inuussutissarsiutinut Ilinniartitaanermut Naalakkersuisoqarfik pikkorissartitsinernut najukkani Piareersarfinnit allanilluunniit neqeroorutigineqartunut atatillugu tapiissuteqarsinnaavoq pikkorissartitsinerit pineqartut assigisinnaasaat Nunatsinni qitiusumik ilinniarfinnit imaluunniit inuussutissarsiutinut ilinniarfinnit neqeroorutigineqarsinnaanngippata. Inuussutissarsiutinut Ilinniartitaanermut Naalakkersuisoqarfik pineqartunut akuersinissaminut atatillugu isumannaassavaa pikkorissartitsinerit suliatigut pissarsiviusinnaanissaat aammalu pisariaqanngitsumik aningaasartuuteqarfigineqarnissaa.

§ 9. Angalanernut aningaasartuutinut matussusiinissamut tapiissuteqarsinnaanissamut piumasaqaataavoq pikkorissarfiusussamut utimullu angalanerit pikkorissarnissamut atatinneqarnissaat. Pikkorissaqataasoq piffissami allami angalappat pineqatumut angalanissaanut aningaasartuutinut matussusiinissamut tapiissuteqartoqarsinnaanngilaq.
Imm. 2. Angalanernut najugaqarnernullu aningaasartuutinik matussusiinissamut tapiissuteqarsinnaanermut piumasaqaataavoq angalanerit pikkorissarnerillu aaqqissuunneqarsimanissaat aningaasartuutigisassat sapinngisamik annikinnerpaatinniarlugit.

§ 10. Pikkorissartut 18-inik ukioqalereersimasuussapput, annerpaamillu, inuussutissarsiutinut ingerlariaqqiffiusumik sivikinnerusumik ilinniagaqarsimassallutik, Nunatsinni najugaqartuussallutik pikkorissartitsinissamullu pineqartumut peqataanissamut suliatigut tunngavissaritinneqartunik atasumik naammassinnissinnaassallutik.

§ 11. Pikkorissartitsinernut ilinniagaqaqqinnissamullu pikkorissartitsinernut pineqartunut angalanissanut najugaqarnissanullu aningaasartuutinik matussusiinissamik siunertaqartumik aningaasatigut allatigut tapiissuteqartoqarsinnaasimappat una malillugu tapiissutissarsisoqarsinnaanngilaq.

§ 12. Inuussutissarsiutinut Ilinniartitaanermut Naalakkersuisoqarfik tapiissutinik aqutsinermut atugassanik immersuiffiliassanik nalunaarusiorfinnik suliaqassaaq.
Imm. 2. Tapiissutinik pissarsisup immersuiffiliaq nalunaarusiorfik immersoreerlugu Inuussutissarsiutinut Ilinniartitaanermut Naalakkersuisoqarfimmut pikkorissartitsisimanerit pineqartut naammasseriiginnartut piaarnerpaamik nassiutissavaa.

§ 13. Taamaallaat tapiissuteqartoqartarpoq Inuussutissarsiutinut Ilinniartitaanermut Naalakkersuisoqarfiup akit aalajangersarsimasai naapertorlugit pikkorissarfiusussamut pikkorissarfiusumullu angalanernut najugaqarnermullu aningaasartuutissanut, taamaattorli tak. § 3 aamma § 4, imm. imm. 2.
Imm. 2. Pikkorissartitsiviusussami pikkorissartitsiviusumiit ullormit siullermiit ulloq kingulleq ilanngullugu pikkorissartitsiviusumut najugaqarnissamut nerisaqartinneqarnissamullu aningaasartuutinik matussusiinissamut, soorluttaaq pikkorissarfiusussamut tassanngaanniillu angalanermi akunninnermi najugaqarnermut nerisaqartinneqarnermullu aningaasartuutit matussuserneqassapput. Najugaqartinneqarnermut aningaasartuutinut pineqarput inissiaqartinneqarallarnermut sumiiffigisami naapertuuttunut aningaasartuutit atuuttut. Nerisaqartinneqarnermut aningaasartuutinut atasumik pineqarput Nunatsinni Nunatsinniillu suliamut atatillugu angalanermi ullormusiat unnuarsiornermullu tapisiat pillugit maleruagassat. Pikkorissartitsinermi nerisaqartinneqarneq najugaqarfissaqartinneqarnerlu ilaatinneqanngippata nerisassarsiutissat unnuarsiornermilu tapisiat naalagaaffimmi, Namminersornerullutik Oqartussani kommuninilu atorfillit pillugit maleruagassat atuuttut naapertorlugit matussuserneqassapput, ilanngaatigalugit ullaakkorsiutissanut atugassat, taakku akunnittarfimmiinnermi ilaatinneqareerpata, taamatullu akeqanngitsumik nerisaqartinneqarnissamut ajunngitsorsiassanit ilanngaatigineqartussatut.

Utertitsilluni akiliineq il.il.

§ 14. Inuussutissarsiutinut Ilinniartitaanermut Naalakkersuisoqarfik utertitsilluni akiiliisoqarnissaanik piumasaqaateqarsinnaavoq, tamatumani:
1) Pikkorissartup pikkorissarnini taamaatiinnarpagu, akerlianik uppernarsarneqarsinnaangippat taamaatitsiinnarneq pikkorissartup taassumaluunniit qaniginerpaasaani napparsimasoqarneranik pissuteqartoq.
2) Pikkorissartoq pikkorissartitsinermi aaqqissuussanut amigartumik peqataaniarsimappat uteqqiasumillu kingusinaarluni orniguttarsimappat; pikkorissartoq pikkorissaanermini iluamik malinnaasimanngippat, taamatullu taamaattoqarneranut naammaginartumik tunngavissaqartoqanngippat.
Imm. 2. Pikkorissartup pikkorissarnini unitsiinnarpagu najugaqarnermi aningaasartuutinut matussusiinissamut tapiissuteqartoqarunnaassaaq piffiup pikkorissarfiusup sinnerani. Taamaakkaluartoq, Inuussutissarsiutinut Ilinniartitaanermut Naalakkersuisoqarfiup tamanna avaqqussinnaavaa taamaatitsiinnarneq pippat pikkorissartitsinermi qullersaasoq isumaqatigiissuteqarfigereerlugu, ilanngullugit pikkorissartumit imaluunniit taassuma qaniginerpaasanit napparsimaneq pillugu uppernarsaasikkat.

§ 15. Paasineqarpat tapiissutit siunertamut aningaasaliiffigisanit allanut atorneqartut, Inuussutissarsiutinut Ilinniartitaanermut Naalakkersuisoqarfiup tapiissutit pineqartut eqqunngitsumik tunngaveqartumik tapiissutisiarineqarsimanerat tunngavigalugu pineqartunik tamakkiisumik ilaannakortumilluunniit utertitsilluni akiilisoqarnissaanik piumasaqaateqarsinnaavoq. Taamatuttaaq Inuussutissarsiutinut Ilinniartitaanermut Naalakkersuisoqarfik tapiissuteqarnissamik qinnuteqaatip suliarineqarneranut atatillugu kingusinnerusukkut suliaqarnermini pingaartinnerusinnaavaa tapiissutinik pissarsisup utertitsilluni akiliinissaanik Naalakkersuisoqarfiup akilerneqarnissaannik piumasaqaateqarnissaq.

Naammagittaalliorneq

§ 16. Inuussutissarsiutinut Ilinniartitaanermut Naalakkersuisoqarfiup tapiissuteqaatit pillugit aalajangersagai, ilanngullugit tapiissutinik tunniussinissamik utertitsillunilu akiliinissat, pisortat aqutsisoqarnikkut oqartussaaffiannut allamut ingerlateqqinneqarsinnaanngillat.

§ 17. Matumani nalunaarut atuutilerpoq ulloq 1. juli 2008 aallarnerfigalugu. Ilutigalugu, Inuutissarsiutitigut ilinniartitaanermi pikkorissartitsisarnerni tapiissutit pillugit Namminersornerullutik Oqartussat nalunaarutaat nr. 43, 24. oktober 1990-imeersoq atorunnaarpoq.

Namminersornerullutik Oqartussat, ulloq 1. juli 2008

Siverth K. Heilmann

/

Christel Lund Jæger-Hansen