Aktie- aamma anpartsselskabit pillugit inatsimmi (ingerlatitseqatigiiffiit pillugit inatsit), kunngip peqqussutaatigut nr. 486, 14. maj 2018-imeersukkut Kalaallit Nunaannut atulersinneqartumi § 355 naapertorlugu aalajangersarneqarpoq: 

Naalagaaffiup aktieselskabiinit nalunaarutit tamanut saqqummiunneri 

§ 1. Naalagaaffiup aktieselskabiinit nalunaarutit, tak. ingerlatseqatigiiffiit pillugit inatsimmi, kunngip peqqussutaatigut Kalaallit Nunaannut atulersinneqartumi § 97, imm. 3, oqaaseqatigiit aappaat, § 101, imm. 8, § 130, imm. 3 aamma 354, ingerlatseqatigiiffiup aqqa aamma CVRnormua pillugu paasissutissanik imaqassapput. 

Imm. 2. Naalagaaffiup aktieselskabiinit nalunaarutit ingerlatseqatigiiffiit il. il. pillugit Erhvervsstyrelsip imminut kiffartuussivia www.virk.dk aqqutigalugu Erhvervsstyrelsip qarasaasiaqarfiani sapinngisamik sukkanerpaamik tamanut saqqummiunneqassapput, immikkut pisuni tamanna pillugu Erhvervsstyrelsi immikkut akuersisimanngippat. Nalunaarutit digitalikkut ilisarnaammik atsiorneqassapput, immikkut pisuni tamanna pillugu Erhvervsstyrelsi immikkut akuersisimanngippat. 

Imm. 3. Imm. 2-mi »sapinngisamik sukkanerpaamik« paasineqassaaq ulloq taanna ingerlatseqatigiiffimmi pissutsit pingaaruteqartut pillugit nalunaaruteqarnissaq pisariaqartinneqalerluni, tak. ingerlatseqatigiiffiit pillugit inatsimmi, kunngip peqqussutaatigut Kalaallit Nunaannut atulersinneqartumi § 354. 

§ 2. Pissutsit pingaarutillit taamatut pissutissaqartitsippata nalunaarutit tamanut saqqummiunneqarsimasut Erhvervsstyrelsimit utertinneqarsinnaapput. Utertitsinissaq pillugu noqqaassut tamanut saqqummiussinermiit kingusinnerpaamik ullut arfineq marluk qaangiutsinnagit Erhvervsstyrelsimit tiguneqarsimassaaq. Nalunaarutip utertinnissaanut tunngaviussaaq ingerlatseqatigiiffiup nutaamik nalunaaruteqarnera, tassannga takuneqarsinnaalluni ingerlatseqatigiiffiup nalunaarummik tamanut saqqummiunneqarsimasumik utertitsinera kiisalu tamatumunnga tunngavilersuut. 

Atuutilernera il. il. 

§ 3. Nalunaarut ulloq 1. juli 2018-mi atuutilerpoq. 

Imm. 2. Ingerlatsivinni, naalagaaffiup aktieselskabiutaanut malittarisassanik atuisuni, piginneqataassutit ilaannik pigisaqartarneq pillugu aamma ingerlatsivinniit taamaattuniit nalunaarutinik nassiussisarneq tamanullu saqqummiussisarneq pillugit Kalaallit Nunaannut nalunaarut nr. 783, 10. juli 2008-imeersoq atorunnaarpoq. 

Erhvervsstyrelsi, ulloq 29. maj 2018 

HENNING STEENSIG 

/ Henrik Davidsen