UAGUT MARGRETHE AAPPAAT, Guutip saammaanneragut Danmarkip Dronningia, nalunaarpugut:

Aningaasalersuinermik suliaqartarneq pillugu inatsisip allanngutaanik inatsimmi nr. 579, 1. juni 2010-meersumi § 221) realkreditimit taarsigassarsisarneq aamma realkreditobligationit il.il. pillugit inatsit, Danmarkip Aningaaservissua pillugu inatsit inatsisillu allat assigiinngitsut (Finanstilsynip nakkutilliinermik suliaasa nukittorsarneqarnerat, aningaasalersuinermik suliaqartarnerup il.il. aqunnissaannik aaqqissuunnissaannillu piumasaqaatit erseqqissarneqarnerat aamma piukkunnassusermik tatiginassusermillu malittarisassat allannguutaat allallu) naapertorlugit, manna aalajangersarneqarpoq:

§ 1. Danmarkip Aningaaserivissua pillugu inatsimmi nr. 116, 7. april 1936-imeersumi makku allannguutitut aalajangiunneqarput:

1) § 14-ip kingorna aamma qulequtaq “Aningaaserivissuup Suliai allat” siornagut ilanngunneqassapput:

“§ 14 a. Aningaaserivissuup pisinnaatitaaffimmini kisitsisitigut paasissutissat katersussavai, suliarissavai tamanullu ammasumik nalunaarutigissallugit aamma suliat suliarineranni pisariaqarfiatigut paasissutissat taakku atorsinnaallugit, tak. § 1.

Imm. 2. Paasissutissat pigineqartut suliallu imm. 1-imi taaneqartut suliarinissaannut pisariallit piffissaliussap iluani nalunaarutigeqqullugit suliffeqarfiit inuillu inatsisitigut akisussaasut Aningaaserivissuup qinnuigisinnaavai makku.

1) Suliffeqarfiit inuillu inatsisitigut akisussaasut Kalaallit Nunaanni najugallit aningaasalersuinermik suliaqartarnermik inatsit allatulluunniit tamatumunnga inatsisit naapertorlugit suliallit.

2) Suliffeqarfiit inuillu inatsisitigut akisussaasut Kalaallit Nunaanni najugallit nunanut allanut aningaasanik aaqqeeqqatigiissuteqartartut.

3) Suliffeqarfiit inuillu inatsisitigut akisussaasut Kalaallit Nunaanni najugallit pappiaqqanik nalilinnik pilersitsisimasut pigisallilluunniit imaluunniit aningaasalersuutinik niuerutillit taakkuninngaluunniit aaqqeeqqatigiissuteqartartut atorunnaarsitsisartulluunniit.

4) Kalaallit Nunaanni immikkoortortat assigisaaluunniit suliffeqarfittut inuttulluunniit inatsisitigut akisussaaffilittut isigineqanngitsut, nr. 1-3-mili ilanngunneqartut.

Imm. 3. Paasissutissanik imm. 2-mi taaneqartunik aningaaserivissuup piumasaanik piffissaq eqqorlugu nalunaaruteqanngitsut imaluunniit piaaralutik annertuumilluunniit mianersuaalliorlutik eqqunngitsunik paasissutissiisut akiliisitaassapput. Pillaasarnermik inatsimmi kapitali 5-imi malittarisassat malillugit ingerlatseqatigiiffiit allallu akisussaatinneqarsinnaapput.

Imm. 4. Suliat suliarinissaannut kisitsisitigut paasissutissat isertuussat Aningaaserivissuup ingerlateqqillugit tunniussinnaavai ukununnga:

1) Det Europæiske System af Centralbanker

2) European Systemic Risk Board

Imm. 5. Paasissutissat imm. 4 malillugu tunniunneqarsinnaasut inunnut tunngasuupput inuit allallu imm. 2-mi taaneqartut toqqaannartumik toqqaannaanngitsumilluunniit kinaassusersinissaannik ajornarunnaarsitsisinnaasut.”

§ 2. Peqqussut manna atuutilerpoq 15. august 2012.

Marselisborg Slotimi tunniunneqarpoq, ulloq 28. juni 2012.

Kunngiussutsitsinnik Atsiorpugut Naqissusiillutalu

MARGRETHE R.

/ Ole Sohn