Naatsorsuutinik kukkunersiuisut naalagaaffimmit akuerisaasut aamma nalunaarsorneqarsimasut pillugit inatsimmi, Kalaallit Nunaannut Kunngip peqqussutaa nr. 623, 23. juni 2008-mi atuutilersinneqartoq, § 9, imm. 1 naapertorlugu aalajangerneqarpoq: 

Kapitali 1

Revisorkommissionip piginnaassuseqassusaa aamma aaqqissuuneqarnera

§ 1. Revisorkommissionip allaffissornikkut aqutsissuppai Erhvervs- og Selskabstyrelsi naatsorsuutinik kukkunersiuisut naalagaaffimmit akuerisaasut aamma nalunaarsorneqarsimasunik pillugit inatsimmik, Kalaallit Nunaannut Kunngip peqqussutaatigut atuutilersinneqartoq. 

Imm. 2. Kommissioni inuttaqarpoq siulittaasoq 1 aamma ilaasortat allat 10. Ilaasortat 3-t kukkunersiuisuussapput naalagaaffimmit akuerisaasut, 2-t kukkunersiuisut nalunaarsorneqarsimasut, 2-t niuernermik ilisimasallit aamma 3-t akileraaruserinermi inatsisinut, pigisanik aalajangersaanermi inatsisinut aamma nunami aningaasaqarnermut tunngasuni immikkut ilisimasallit. Siulittaasoq, niuernermik ilisimasallit imaluunniit suliamut immikkut ilisimasallit ukiuni kingullerni 3-ni kukkunersiuisut naalagaaffimmit akuerisaasimasuussanngillat imaluunniit nalunaarsorneqarsimasuussanngillat imaluunniit kukkunersiuinermik ingerlatsivimmi sulisuusimassanatik imaluunniit kukkunersiuisunik naalagaaffimmit akuerisaasunik aamma nalunaarsorneqarsimasunik peqateqarlutik kukkunersiuinermik ingerlatsiveqarsimassanatik. 

§ 2. Kommissioni kukkunersiuisunik naalagaaffimmit akuerisaasunik aamma nalunaarsorneqarsimasunik soraarummeersitsissaaq tassungalu piareersaalluni Erhvervs- og Selskabstyrelsip tamatumunnga nalunaarusiaani aalajangersakkat naapertorlugit. Angusanut tunniunneqarsimasunut (karakterit) immikkut allattaaveqassaaq. 

Imm. 2. Kommissioni kukkunersiuisunut naalagaaffimmit akuerisaasunut aamma nalunaarsorneqarsimasunut soraarummeersitsinerup aaqqissuunneqarnissaanut kommissionimik pilersitsissaaq. 

Kapitali 2

Kommissionip suliassaanik aaqqissuusineq

§ 3. Siulittaasoq Revisorkommissionip suliaanik aaqqissuisuussaaq aamma kommissionip ataatsimiinnerani isumaqatigiinniarnernik aqutsisuusaaq. Siulittaasup aalajangersinnaavaa, suliat allakkatigut suliarineqartarnissaat. 

Imm. 2. Siulittaasup nakkutigissavaa, suliat, kommissionimut saqqummiunneqartut, naleqquttumik sukkassuseqartumik suliarineqarnissaat. 

§ 4. Kommissionip ataatsimiinnerinut piffissaq piffillu siulittaasumit aalajangerneqassapput, ataatsimiinnernut aggersaanissamik isumaginnittussaasuusoq. Aggersaaneq pissaaq sapinngisamik  sapaatip akunnera sioqqullugu nalunaarnerutigalugu aamma nalunaarlugu, suliat sorliit ataatsimiinnermi suliarineqassanersut.

Imm. 2. Ilaasortat, ataatsimiinnermut takkussinnaanngitsut, tamanna pillugu nalunaaruteqassapput. 

Imm. 3. Aalajangiinerup pisinnaanissaanut, ikinnerpaamik ilaasortat 6-it najuutissapput, taakkunannga ikinnerpaamik siulittaasuusalluni, niuernermik ilisimasaqartuusallutik imaluunniit suliamut immikkut ilisimasaliussallutik.

Imm. 4. Aalajangiineq pissaaq nalinginnaasumik taasinermi amerlanerussuteqarnikkut. Taasinerit amerlaqatigiissagaluarpata siulittaasup taasinera aalajangiisuusaaq.

§ 5. Siulittaasup nakkutigissavaa, ataatsimiinnerit naalisarlugit allaaserineqarnissaat, aamma kommissionip aalajangiinerisa suliarineqartarnissaat. Kommissioni sinnerlugu siulittaasoq atsiussaaq. Ikinnerussuteqarsimasinnaasut piumasarisinnaavaat oqaaseqaatimik kommissionip innersuussutaani imaluunniit oqaaseqaataani allanneqarnissaat.

§ 6. Kommissionip allaffissugassaatai suliarineqassapput allattoqarfimmit najugalik: Erhvervs- og Selskabstyrelsen, Kampmannsgade 1, 1780 København V.

§ 7. Nalunaarut atuutilerpoq ulloq 1. august 2008.

Erhvervs- og Selskabsstyrelsen, ulloq 28. juli 2008

OLE BLÖNDAL

/ Grethe Krogh Jensen