Kukkunersiuisut naalagaaffimmit akuerisat aamma nalunaarsorneqarsimasut pillugit inatsimmi, Kalaallit Nunaannut kunngip peqqussutaatigut nr. 623-kkut 23. juni 2008-meersukkut atortuulersinneqartumi, § 3, imm. 2 tak. imm. 1, nr. 6, naapertorlugu aalajangersarneqarpoq: 

Qularnaveeqqusiisarneq

§ 1. Kukkunersiuisoq naalagaaffimmit akuerisatut imaluunniit nalunaarsorneqartutut ivertinneqarsinnaassappat piumasaqaataavoq inummit pingatsiuttumit (qularnaveeqqusiisuusoq) nalunaaruteqartoqassasoq (qularnaveeqqusiissut) pineqartup nammineq akiligassalittut akisussaaffigalugit akilissagai aningaasatigut piumasaqaatit, kukkunersiuisut naalagaaffimmit akuerisat aamma nalunaarsorneqarsimasut pillugit inatsimmi, Kalaallit Nunaannut kunngip peqqussutaatigut atortuulersinneqartumi, § 1, imm. 2 naapertorlugu suliassanik suliaqarnerup malitsigisaanik piumasaqaataasinnaasut.

Imm. 2. Qularnaveeqqusiissut tunniunneqassaaq Erhvervs- og Selskabsstyrelsimi aalajangersarneqartutut iluseqartillugu.

Imm. 3. Qularnaveeqqusiissut Erhvervs- og Selskabsstyrelsimi nalunaarsorneqassaaq.

§ 2. Qularnaveeqqusiissutip imarisani naapertorlugu qularnaveeqqusertittoq qularnaveeqqusiisumut toqqaannartumik piumasaqarsinnaatippaa aamma killilersuutit nalunaarut una naapertorlugu akuerisat saniasigut killilersuutitaqartinneqassanngilaq.

§ 3. Qularnaveeqqusiissutip matussusissavai piumasaqaatit, pissutsinut § 1, imm. 1-imi pineqartunut tunngasut, ullormiit qularnaveeqqusiissutip atortuulerfianiit atorunnaarnissaatalu tungaanut (qularnaveeqqusiissutip atuunnera) saqqummiunneqartut.

Imm. 2. Qularnaveeqqusiissut aatsaat atorunnaarsinneqarsinnaavoq atorunnaarsitsinerup Erhvervs- og Selskabsstyrelsimi nalunaarsorneqarneratigut. Nalunaarsuisoqassaaq qularnaveeqqusiisuusup noqqaassuteqarneratigut ulloq aalajangersimasoq, noqqaassutip Erhvervsog Selskabsstyrelsimi tiguneqarneraniit qaammammiit ataatsimiit siusinnerusukkut atuutilersinnaanngitsoq, aallarnerfigalugu sunniuteqartussamik. Qularnaveeqqusiisuusulli piumasarisinnaavaa qularnaveeqqusiissut noqqaassutip Erhvervs- og Selskabsstyrelsimi tiguneqarnerata aqaguani atorunnaarsinneqassasoq, noqqaassut kukkunersiuisup naalagaaffimmit akuerisap aamma nalunaarsorneqarsimasup peqquserluuteqarsimaneranik pissuteqarpat.

Imm. 3. Imm. 2 naapertorlugu nalunaarsuinissamik noqqaassut Erhvervs- og Selskabsstyrelsimit aalajangersarneqartutut ilusilerlugu tunniunneqassaaq.

§ 4. Qularnaveeqqusiissut aningaasat tungaasigut killilerneqarsinnaavoq imaalillugu, piumasaqaatit tamarmiusut qularnaveeqqusiissutip atuunnerani ukiunut ataasiakkaanut tamanut tunngasut aningaasanik aalajangersimasunik, kukkunersiuisumut naalagaaffimmit akuerisamut imaluunniit nalunaarsorneqarsimasumut ataatsimut minnerpaamik 500.000 koruuniusussanik, taamaallaat matussuserneqartussanngorlugit. 

Imm. 2. Imm. 1-imi aningaasanut killissarititaq millisinneqassanngilaq, naak qularnaveeqqusiissuteqartoqaraluartoq ukiumiit ataatsimiit sivikinnerusumik.

§ 5. Qularnaveeqqusiissut piffissap tungaatigut killilerneqarsinnaavoq imaalillugu, taamaallaat matussuserneqartussanngorlugit piumasaqaatit, suliassap imaluunniit pissutsip piumasaqaateqarnermut aallaaviusup naammassineqarneraniit kingusinnerpaamik ukiut tallimat qaangiunneranni qularnaveeqqusiisuusumut piumasaqaatigineqartut.

Imm. 2. Piffissarititaq imm. 1-imiittoq qularnaveeqquserneqartup kukkunersiuisumik eqqartuussisutigoortitsineratigut atorunnaarsinneqassaaq, matumunnga ilanngullugu maalaarummik disciplinærnævnimut (Kukkunersiuisoqatigiit aalajangiisartut), kukkunersiuisut naalagaaffimmit akuerisat aamma nalunaarsukkat pillugit maalaarutinik kukkunersiuisut naalagaafimmit akuerisat aamma nalunaarsukkat pillugit inatsit Kalaallit Nunaannut kunngip peqqussutaatigut atortuulersinneqartoq naapertorlugu suliaqartartunut, tunniussaqarnermi.

§ 6. Qularnaveeqqusiissut akisussaatinneqarnissamut sillimmasiissummut § 8-mi taaneqartumut naleqqiullugu killilerneqarsinnaavoq, taamaalilluni piumasaqaatit qularnaveeqqusiissummit matussuserneqassanatik, akisussaatinneqarnissamut sillimmasiissutitigut matussusiinnginneq taassumap aningaasatigut killiliineranik taamaallaat pissuteqarpat.

§ 7. Qularnaveeqqusiisuusoq sillimmasiisarfiussaaq, aningaaseriviussaaq imaluunniit aningaaseriveqarfiussaaq alla, qularnaveeqqusiissutai taamatulli qularnaveeqqusiisinnaassusillit.

Imm. 2. Qularnaveeqqusiussat annertussusissaat inatsisit Kalaallit Nunaanni atuuttut malillugit naleqqussaavigineqassapput. Qularnaveeqqusiissutit pillugit eqqartuussivikkut suliassiissutit Kalaallit Nunaata Eqqartuussisuuneqarfiani suliassiissutigineqassapput.

Imm. 3. Taamaattoq kukkunersiuisunut ataasiakkaanut qularnaveeqqusiissutit aaqqiissutitut ataatsimoorussatut kukkunersiuisut arlallit peqataaffigisaattut pilersinneqarsimappata qularnaveeqqusiisuusoq aningaasaateqarfiusinnaavoq namminersortoq imaluunniit peqatigiiffiusinnaavoq. Piumasaqaataavorli aningaasaateqarfiup imaluunniit peqatigiiffiup neriorsuutaa imatut saqqumitigissasoq imm. 1-itulli ittumik qaqugukkulluunniit qularnaveeqqusiissuteqartoqarsimasoqarluni. Tamatumannga Erhvervs- og Selskabsstyrelsi naliliisuussaaq.

Akisussaatinneqarnissamut sillimmasiineq

§ 8. Kukkunersiuisoq naalagaaffimmit akuerisatut imaluunniit nalunaarsorneqarsimasutut ivertinneqassappat piumasaqaataavoq sillimmasiisarfimmiit nalunaarutigineqarsimassasoq kukkunersiuisartoq pineqartoq akisussaatinneqarnissamut sillimmateqartoq aamma taarsiisussatut akisussaaneq, kukkunersiuisup naalagaaffimmit akuerisap imaluunniit kukkunersiuisup nalunaarsukkap nammineerluni imaluunniit allap, kukkunersiuisut naalagaaffimmit akuerisat aamma nalunaarsorneqarsimasut pillugit inatsimmi, Kalaallit Nunaannut kunngip peqqussutaatigut atortuulersinneqartumi, § 1, imm. 2 malillugu suliassanik suliaqarneranut atatillugu kukkunersiuisup akisussaaffigisaata, mianersuaalliorluni iliuuseqarneranut sillimmasiisarfik ajoquserneqartumut akisussaasuusoq.

Imm. 2. Sullivinni, tak. kukkunersiuisut naalagaaffimmit akuerisat aamma nalunaarsorneqarsimasut pillugit inatsimmi Kalaallit Nunaannut kunngip peqqussutaatigut atortuulersinneqartumi § 12, imm. 1 aamma 8, qulinik amerlanernilluunniit kukkunersiuisunik naalagaaffimmit akuerisanik imaluunniit nalunaarsorneqarsimasunik sulisulinni akisussaatinneqarnissamut sillimmasiissutit imm. 1 naapertolugu ukiut qularnaveeqqusiiffiusut  tamaasa minnerpaamik 20 mio. koruuninik ataatsimut matussusiissutaasussanik aningaasartaqassapput.

Imm. 3. Sullivinni kukkunersiuisunik naalagaaffimmit akuerisanik imaluunniit nalunaarsorneqarsimasunik qulit ataallugit sulisulinni akisussaatinneqarnissamut sillimmasiissutit matussusiissutaasussamik aningaasartaqassapput ukiut qularnaveeqqusiiffiusut tamaasa minnerpaamik 2 mio. koruunit kukkunersiuisut naalagaaffimmit akuerisat nalunaarsukkallu sullivimmi tassani sulisut katillugit amerlassusaannik ganngerlugit, taamaattoq tak. imm. 4. 

Imm. 4. Sullivinni kukkunersiuisunik naalagaaffimmit akuerisanik imaluunniit nalunaarsorneqarsimasunik arfinillit ataallugit sulisulinni imm. 1 naapertorlugu akisussaatinneqarnissamut sillimmasiisoqarsinnaavoq aningaasartai matussusiissutaasussat ganngernagit, kukkunersiuisartumullu naalagaaffimmit akuerisamut imaluunniit nalunaarsukkamut ataatsimut ukiut qularnaveeqqusiiffiusut tamaasa minnerpaamik 2. mio. koruuninik matussusiissutaasussamik aningaasartalinnik. Aningaasat matussusiissutaasussat taakku sillimmasiisarfiup ajoqusernermut ataatsimut qaffasinnerpaatut akiligassarai, kukkunersiuisartoq naalagaaffimmit akuerisaq imaluunniit nalunaarsugaq ataaseq arlallilluunniit ajoqusernermut pineqartumut taarsiisussatut akisussaagaluarpataluunniit. 

Imm. 5. Nalunaaruteqartoqassaaq Erhvervs- og Selskabsstyrelsimit aalajangersarneqartutut iluseqartillugu.

Imm. 6. Nalunaarut Erhvervs- og Selskabsstyrelsimi nalunaarsorneqassaaq.

§ 9. Kukkunersiuisunut ataasiakkaanut § 8, imm. 1 naapertorlugu akisussaatinneqarnissamut sillimmasiissutit ataatsimoorussamik aaqqiissutaappata, kukkunersiuisarfiit arlallit kukkunersiuisartullu qulingiluanit amerlanerusut peqataaffigisaat, akisussaatinneqarnissamut sillimmasiissutit ukiumut sillimasiiffiusumut minnerpaamik 20. mio. koruuninik matussusiissutaasussamik aningaasartaqassapput. Ataatsimoorussamik akisussaatinneqarnissamut sillimmasiissuteqartoqarluni aaqqiissuteqartoqassappat piumasaqaataavoq, sillimmasiissutit aningaasartai ukiumi sillimasiiffiusumi ajoqusernerup ataatsip arlallilluunniit kingunerisaanik nungussappata atuutilersitseqqinnissaannut matussusiineq sillimmasiissutinut ilaassasoq (policedækket reinstatement).

§ 10. Ajoqusersimasumut tunngatillugu akisussaatinneqarnissamut sillimmasiissutit aatsaat unitsinneqarsinnaapput Erhvervs- og Selskabsstyrelsimut tamatuminnga nalunaarsuisitsinikkut. Nalunaarsortinneq sillimmasiisarfiup noqqaassuteqarneratigut pissaaq atuuttussanngorlugu ullormiit aalajangersimasumiit, noqqaassutip Erhvervs- og Selskasstyrelsimi tiguneqarneraniit qaammammiit ataatsimiit siusinnerusinnaanngitsumiit.

Imm. 2. Imm. 1 malillugu nalunaarsuinissamik noqqaassuteqartoqassaaq Erhvervs- og Selskabsstyrelsimit aalajangersarneqartutut iluseqartillugu.

§ 11. Sillimmasiisarfik Kalaallit Nunaanni Danmarkimiluunniit najugaqarfeqassaaq imaluunniit Kalaallit Nunaanni Danmarkimiluunniit sillimmasiisarfimmik ingerlataqassaaq immikkoortortaqarfik, Kalaallit Nunaanni Danmarkimiluunniit pilersinneqarsimasoq, aqqutigalugu.

Imm. 2. Sillimmasiissutit annertussusissaat inatsisit Kalaallit Nunaanni atuuttut malillugit naleqqussarneqassapput.

Atortuulersitsineq il.il.

§ 12. Nalunaarut atortuulissaaq ulloq 1. august 2008.

Imm. 2. Kukkunersiuisut naalagaaffimmit akuerisat aamma nalunaarsorneqarsimasut qularnaveeqqusiisarnerat pillugu nalunaarut nr. 767, 22. august 1994-imeersoq naapertorlugu aningaasatigut piumasaqaatinut sillimmasiineq (akisussaaneq aamma qularnaveeqqut) atuutiinnassaaq ulloq atorunnaarfiusussaq sillimmasiinissamik isumaqatigiissummi isumaqatigiissutigineqarsimasoq tikillugu, sivisunerpaamilli ulloq 1. august 2009-p tungaanut.

Erhvervs- og Selskabsstyrelsi, ulloq 28. juli 2008

OLE BLÖNDAL

/ Grethe Krogh Jensen