Aalisarneq pillugu Inatsisartut inatsisaanni nr. 29, 23. maj 2024-meersuni § 55, imm. 3, nr. 1 aamma § 68, imm. 2, naapertorlugit aalajangersarneqarpoq: 

Atuuffia

  § 1.  Nalunaarut Kalaallit Nunaata aalisarfiani inuussutissarsiutigalugu aalisarnermut angallatinut aalisariutinut 9,4 meterinik takissusilinnut takinerusunulluunniit atuuppoq. 

  Imm. 2.  Nalunaarut aamma kalaallit aalisariutaattut nalunaarsorneqarsimasunut Kalaallit Nunaata aalisarfiata avataani inuussutissarsiutigalugu aalisartunut atuuppoq.   

  Imm. 3.  Nalunaarut aammattaaq nunami aalisakkerinermik suliffissuaqarnermut atasuni tunisassiorfinnut aamma tunitsivinnut atuuppoq. 

Nalunaaruteqartussaatitaaneq

  § 2.  § 1 malillugu suliffeqarfimmik ingerlatsisoq 1. november tikitsinnagu ukiut tamaasa nioqqutissiornermut aningaasaqarnermullu tunngasut ukiumi ullorsiuteqarfiusumi kingullermi aalisariutiminut, nioqqutissiorfimminut tunitsivimminulluunniit tunngasut pillugit paasissutissanik nalunaarsuisassaaq. 

  Imm. 2.  Nalunaaruteqarnermi paasissutissat ilanngussami 1-3-mi allassimasut ilanngunneqassapput.  

  Imm. 3.  Paasissutissat nalunaarut una malillugu nalunaarutigineqartut Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni nr. 9, 13. juni 1994-imeersumi paasitinneqarsinnaatitaaneq pillugu malittarisassat, inatsimmilu ingerlatsinikkut niuernikkulluunniit pissutsit pillugit paasissutissat ilaatinneqanngitsut, tak. § 12, imm. 1-imi oqaaseqatigiit aappaat, pillugit aalajangersakkat malillugit suliarineqassapput.

  § 3.  Paasissutissat § 2 naapertorlugu nalunaarutigineqartut elektroniskimik Aalisarnermut Naalakkersuisoqarfimmut, Sullissivik.gl aqqutigalugu nassiunneqassapput. 

  § 4.  Tunisassiorfinnik tunitsivinnillu ingerlatsisoq pisat tunineqarsimasut pillugit nalunaarsukkanik, suliffeqarfimmut § 1, imm. 1 malillugu pisanik tunniussisumut ukiut tamaasa nassiussisassaaq.

  Imm. 2.  Ukiumut nalunaarsuinerit ilanngussaq 1 aamma 2 malillugit paasissutissanik eqqortunik tamakkiisunillu atorsinnaasumik tunngavissiissapput. Nalunaarummi ilaatinneqassapput kaaviiaartitat, bonusit aningaasarsiallu allat artinut ataasiakkaanut aggulullugit. 

Pineqaatissiissutit

  § 5.  Kalaallit Nunaanni Pinerluttulerinermut inatsimmi malittarisassat malillugit akiligassiisoqarsinnaavoq: 

1. §§ 2 aamma 3 malillugit paasissutissanik nalunaartussaatitaanermik malinninngitsoq. 
2. pissutsinik nalunaarummut uunga ilaatinneqartunik pisortat oqartussaannut kukkusunik eqqunngitsunilluunniit paasissutissiisoq.  

  § 6.  § 5, nr. 1 malillugu nalunaartussaatitaanermik piaaraluni utikattumilluunniit unioqqutitsisoqartillugu, Aalisarnermut Naalakkersuisoqarfik aalisarneq pillugu Inatsisartut inatsisaanni § 26, nr. 2 malillugu akuersissummik tunniussamik atuisinnaanermik killiliisinnaavoq arsaarinnissinnaalluniluunniit. 

Atortuulerfia

  § 7.  Inatsisartut inatsisaat 1. august 2026-mi atuutilissaaq. 

  Imm. 2.  Inuussutissarsiutigalugu aalisarneq aamma nunami tunisassiorfeqarneq pillugit tunisassiornikkut tunngasunik aningaasarsiornikkullu paasissutissanik nalunaaruteqartarneq pillugu Namminersorlutik Oqartussat nalunaarutaat nr. 67, 22. november 2021-meersoq ilutigalugu atorunnaarsinneqarpoq.

Namminersorlutik Oqartussat, ulloq 3. juuli 2026

Peter Borg

Aalisarnermut, Piniarnermut, Nunalerinermut Imminullu Pilersornermut Naalakkersuisoq 

                                                                                                                                                                /Emanuel Rosing