Inissianik attartorneq pillugu Inatsisartut inatsisaat
Kapitali 1
Atuuffissaa
§ 1. Inatsisartut inatsisaat attartukkanik attartortitseqqinneq ilanngullugu, illunik illunilu ineeqqanik inigisassanik attartortitsinermut atuuppoq, attartortoq inuttut namminiussuseqarpat.
Imm. 2. Aningaasaanik imaluunnit allaanerusunik akiliuteqartarnersoq sulineq ilanngullugu, aamma inissiap ilaa inissiatuunngitsoq attartortinneqarnersoq apeqqutaatinnagu Inatsisartut inatsisaat atuuppoq.
Imm. 3. Inatsisartut inatsisaanni matumani Namminersorlutik Oqartussat kommunillu inissiaataattut attartortittakkatut paasineqassapput inissiat attartortittakkat Namminersorlutik Oqartussanit imaluunniit kommunimit toqqaannartumik pigineqartut. Inissiat attartortittakkat allat namminersortunit pigineqartutut isigineqassapput.
§ 2. Inatsisartut inatsisaat immikkut inatsisiliaasunit malittarisassaqartinneqartunut, imaluunniit inissianut attartortitanut ukununnga atuutsinneqanngilaq:
1) Namminersorlutik Oqartussat inissiaataannit attartortittakkanik Naalakkersuisunik ilaatinneqanngitsut.
2) Kommunip inissiaataanit attartortittakkanik kommunalbestyrelsimik ilaatinneqanngitsut.
§ 3. Inatsisartut inatsisaanni matumani malittarisassat malillugit attartortup pisinnaatitaaffii Kalaallit Nunaanni Eqqartuussiviup nalunaarsuinermut allattuiffiani nalunaarsorneqarnani sunulluunniit atuupput. Tamanna aamma attartorneq pillugu siumoortumik akiliisimanissaq, aallaqqaatitut akiliutit, qularnaveeqqusiissutit assigisaaluunniit pillugit isumaqatigiissutinut atuuppoq, aningaasat taakku katillugit ukiup affaa sinnerlugu attartornermit annertunerunngippata.
Imm. 2. Attartornerup naanerani imm. 1 malillugu attartortup piumasaqaatai attartornerup naammassineraniit ukiup ataatsip qaangiutinnginnerani eqqartuussivimmit suliami atuutsinneqarsimassapput imaluunniit Ineqarneq pillugu maalaaruteqartarfimmut maalaarummi atuutsinneqarsimassallutik, piumasaqaatip akilerneqarfissaani illumik piginnittuusumit allaanerusumut piginnittumut allamut tamanna atuutsinneqarsimappat.
Imm. 3. Attartortoq isumaqatigiissuteqarnikkut ingerlateqqitanik pisinnaatitaaffeqalersimappat, assersuutigalugu atorunnaarsinneqarsinnaanngitsumik imaluunniit allamut attartortitsisinnaatitaanermik isumaqatigiissuteqarneq, Kalaallit Nunaanni Eqqartuussivimmi nalunaarsuinermi allattuiffimmi illu pillugu quppernermi isumaqatigiissutip nalunaarsorsimanissaa piumasaqaatigineqarsinnaavoq. Isumaqatigiissutip nalunaarsorneqarsimasup pisortani taarsigassarsiat allallu qularnaveeqqusiilluni pisussaaffiliinerit isumaqatigiissutip nalunaarsorneqartussatut nalunaarutiginerani sapinngisamik annertunerpaamik ataqqivai.
§ 4. Inatsisartut inatsisaat isumaqatigiissuteqarnikkut attartortumut ajoqusiisumik saneqqunneqarsinnaanngilaq, tamanna Inatsisartut inatsisaanni aalajangersakkanit ataasiakkaanit tunngaveqanngippat.
§ 5. Inatsisartut inatsisaat utaqqiisaasumik illusimatitsinernut aamma Naalagaaffimmi, Namminersorlutik Oqartussani kommuninilu atorfeqartunut utaqqiisaasumik allatut illusimatinneqartunut atuutinngilaq.
Imm. 2. Illut illusimatitsiviusut ingerlanneqarneri aqunneqarnerilu pillugit malittarisassanik kiisalu utaqqiisaasumik illusimatitsinermut kiisalu utaqqiisaasutut iluseqartunik illusimatitsinernut allanut innersuussineq aamma atorunnaarnerani akiliuteqarnerlu pillugit malittarisassanik Naalakkersuisut aalajangersaasinnaapput.
§ 6. Inatsisartut inatsisaat naapertorlugu nalunaarutit digitalikkut nassiunneqarsinnaapput, takuuk Pisortani Digitalimik Allakkerineq pillugit Inatsisartut inatsisaat. Attartortoq imaluunniit attartortitsisoq Pisortani Digitalimik Allakkerinermut ilaanngippat, Pisortani Digitalimik Allakkerineq pillugu Inatsisartut inatsisaanni kapitali 4 naapertorlugu nalunaarutit digitalinngorlugit nassiunneqarsinnaanngillat.
Kapitali 2
Attartorneq pillugu isumaqatigiissut innersuussisarnermilu maleruagassat
§ 7. Attartorneq pillugu isumaqatigiissut kalaallisut danskisullu allaqqasumi naqitami Naalakkersuisut akuerisaanni isumaqatigiissutigineqassaaq. Attartornermi isumaqatigiissummi aalajangersakkat Inatsisartut inatsisaannut naleqqiullugu annertunerusumik attartortumut pisussaaffeqartitsiviusut imaluunniit annikinnerusumik attartortumut pisinnaatitaaffeqartitsisut atuutsinneqassappata tamanna immikkut erseqqissaatigineqassaaq.
Imm. 2. Immersugassiaq akuerineqarsimanngitsoq atorneqarpat aalajangersakkat Inatsisartut inatsisaanni allanneqarsimasunit allaanerusunik attartortumik annertunerusunik pisussaaffiliisut imaluunniit attartortumut annikinnerusunik pisussaaffiliisut atortussaanngillat. Aalajangersakkat attartortumut amerlanerusunik pisinnaatitaaffiliisut imaluunniit annikinnerusunik pisussaaffiliisut ingerlaannarlutik suli atorneqarput.
§ 8. Najugaqarfissanik attartortitsinermi imaluunniit taamatut attartornernik paasissutissiinermi paarlaaqatigiinnermiluunniit attartortumiit akiliummik tigusaqarnissaq imaluunniit akileeqqusinissaq imaluunniit attartorneq pillugu isumaqatigiissummut ilaanngitsumik inatsisitigut allatigut attartortup isumaqatigiissuteqarnissaata piumasaqaatigineqarnissaa akuerineqanngilaq.
Imm. 2. Imm. 1-imi aalajangersakkamut niuertarfiup tunineranut akissarsiat imaluunniit taamatut tunisinermut akunniliuttumut akissarsiat ilanngillat.
Imm. 3. Imm. 1-imut akerliusumik akilerneqartut aningaasat utertillugit akileqquneqarsinnaapput. Aningaasat ullormit akilerneqarfissaanniit erniat pillugit inatsimmi akiliinngitsoornermi pillaatitut erniarititamut naapertuuttumik ukiumut ernialersorneqassapput.
Imm. 4. Imm. 1-mik unioqqutitsineq akiliisitsinermik pineqaatissiissutaasinnaavoq. Akiliisitsissutit Inatsisartut inatsisaat manna naapertorlugu Nunap karsianut tutsinneqassapput. Suliffeqarfiit pinerluttulerineq pillugu inatsimmi kapitali 5-imi malittarisassat malillugit akisussaatinneqarsinnaapput.
§ 9. Inissiat attartortitat atorneqanngitsut attartortitsisumit innersuunneqassapput. Inissiani attartortittakkani inissiamik atorneqanngitsumik inissarsiortunut kikkunnut innersuunneqassanersut attartortitsisoq aalajangiissaaq.
§ 10. Naalakkersuisut aalajangersaasinnaapput Namminersorlutik Oqartussat kommunillu inissiaataasa attartortittakkat inissarsiortunut immikkoortinneqarnissai, immikkut atugassanngortinneri, innersuunneqarnerilu pillugit malittarisassanik, inissarsiortut qanoq ittuuneri naapertorlugit agguarneqarneri tassungalu ilanngullugit akiliutit, inissiat atorneqanngitsut inoqutigiinni akissarsiat, inissiamut utaqqisut allattorsimaffii kiisalu annaasaqaratarsinnaanermut qularnaveeqqusiisarnermut il.il. pillugit malittarisassat.
Imm. 2. Naalakkersuisut aalajangersaasinnaapput Namminersorlutik Oqartussat kommunillu inissiaataasa attartortittakkat isumaginninnermi inissaqartitsinissanut innersuussineq pillugu malittarisassanik tassungalu ilanngullugit kommunip annaasaqarneranut qularnaveeqqutit ineqarnermullu akiliutit, qularnaveeqqusiissut il.il. pillugit malittarisassat.
§ 11. Naalakkersuisut aalajangersaasinnaapput Namminersorlutik Oqartussani atorfeqartunut inissianik immikkoortitsineq, innersuussineq atorunnaarsitsinerlu kommunillu inissiamut innersuussissussaatitaanerat pillugit malittarisassanik.
Imm. 2. Naalakkersuisut aalajangersaasinnaapput sulisunut inissiap innersuunneqarsimasup inissiatut nalinginnaasumik attartugassatut tiguneqarnissaa pillugu periarfissaqarneq piumasaqaatillu pillugit malittarisassanik.
§ 12. Naalagaaffiup suliffeqarfiisa arlaanni sulisunut inissiamik innersuunneqarnissamut pisinnaatitaaffeqartunut atorfeqartunut inissianik innersuussineq pillugu danskit naalagaaffiat sinnerlugu Naalagaaffiup Sinniisoqarfianik Naalakkersuisut isumaqatigiissuteqarsinnaapput.
Imm. 2. Imm. 1-imi eqqaaneqartut inissiap pissarsiariniarneraniit kingusinnerpaamik qaammatit pingasut kingorna inissiamik neqeroorfigineqarnissaat anguniarneqarpoq.
Imm. 3. Imm. 1-mi eqqaaneqartuni sullissivinni sulisunut inissianik innersuussinermut inissianik arlalinnik Naalakkersuisut immikkoortitsisinnaapput.
Imm. 4. Tamanna pillugu Naalakkersuisunit aalajangersimasumik isumaqatigiissuteqarnikkut imm. 1-imi eqqaaneqartunut sullissivinni sulisutut aqutsisuusunut pisortanut inissianik Naalakkersuisut innersuussisinnaapput.
§ 13. Inatsisartuni taassumalu ataani sullissivinni sulisunut inissianik innersuunneqarsinnaasunut inissiat kiisalu inissiat allat Inatsisartunut atugassat Naalakkersuisut Inatsisartullu akunnerminni isumaqatigiissutaat naapertorlugu innersuunneqartarput.
Imm. 2. Imm. 1-mi eqqaaneqartuni sullissivinni sulisunut inissianik innersuussinermut inissianik arlalinnik Naalakkersuisut immikkoortitsisinnaapput.
Imm. 3. Tamanna pillugu Naalakkersuisunit aalajangersimasumik isumaqatigiissuteqarnikkut imm. 1-imi eqqaaneqartunut sullissivinni sulisutut aqutsisuusunut pisortanut inissianik Naalakkersuisut innersuussisinnaapput.
Imm. 4. Inatsisartuni taassumalu ataani sullissivinni inissiamik innersuunneqarnissamut pisinnaatitaaffeqartunut sulisunut inissiat § 11 naapertorlugu aalajangersarneqartut malittarisassat malillugit innersuunneqassapput.
Kapitali 3
Namminersorlutik Oqartussat kommunillu inissiaataanni ingerlatsiviit
§ 14. Namminersorlutik Oqartussat kommunillu inissiaataat attartortittakkat ingerlatsivinnut agguarneqarput. Inissiat attartortittakkat ingerlatsivinnut ataasiakkaanut agguarneqarneri pillugit Naalakkersuisut aamma kommunalbestyrelsit aalajangiissapput.
Imm. 2. Ingerlatsivinnut ataasiakkaanut tamanut ingerlatsinermi missingersuutinik ingerlatsinermilu naatsorsuutinik Naalakkersuisut aamma kommunalbestyrelsit suliaqassapput. Ingerlatsinermi missingersuutit ingerlatsinermilu naatsorsuutit ukioq ilivitsoq malippaat. Ingerlatsivimmut ingerlatsinermi naatsorsuutit kukkunersiorneqarneq ajorput.
§ 15. Namminersorlutik Oqartussat aamma kommunit ataasiakkaat inissiaataannut attartortittakkanut ataatsimoortumik ingerlatsinermut missingersuutit aamma ingerlatsinermut naatsorsuutit taakkununngalu atasumik oqimaaqatigiissitsineq suliarineqassapput. Ataatsimoortumik ukiumoortumik nalunaarusiaq taakkununngalu atasumik oqimaaqatigiissitsineq ilanngullugu saqqummiunneqassaaq. Ataatsimoortumik ukiumoortumik nalunaarusiaq taakkununngalu atasumik oqimaaqatigiissitsineq ilanngullugu attartortitsisup imaluunniit allaffissornikkut aqutsisup avataaneersumik kukkunersiuisuanit misissorneqassaaq. Kukkunersiuisup misissuinera kukkunersiuisarnermi ileqqorissaartumik ingerlanneqassaaq.
Imm. 2. Kaaviiaartitat oqimaaqatigiissinnerini aserfallatsaaliinermi immikkoortitat tamarmiusut naatsorsorneqassapput.
Imm. 3. Naalakkersuisut aningaasaliissutinik allaffissornikkut aqutsineq, ingerlatsinermut missingersuusiorneq, ingerlatsinermut naatsorsuutinik aamma ukiumoortumik nalunaarusiamik ilusilersuineq suliarinninnerlu kiisalu avataaneersumik kukkunersiuisup misissuinera pillugit maleruagassanik aalajangersaasinnaapput.
§ 16. Namminersorlutik Oqartussat kiisalu kommunillu inissiaataasa attartortittakkat aserfallatsaaliornerinut qaqugukkulluunniit aningaasat immikkoortitat atorneqarnissai pillugit Naalakkersuisut kommunalbestyrelsillu aalajangiissapput. Aningaasat qaqugukkulluunniit immikkoortinneqarsimasut Naalakkersuisunit kommunalbestyrelsinillu aserfallatsaaliinermut atorneqassapput.
§ 17. Namminersorlutik Oqartussani kommuninilu inissiani attartortittakkani ingerlatsivinnut ataasiakkaanut najugaqartussat sinniisuinik qinersineq aamma najugaqartut sinniisusisa sulinerat pillugu malittarisassanik Naalakkersuisut aalajangersaasinnaapput.
Kapitali 4
Ineqarnermut akiliutip aalajangersarneqarnera
Namminersorlutik Oqartussat kommunillu inissiaataat attartortittakkat
§ 18. Namminersorlutik Oqartussat kommunillu ingerlatsiviini ingerlatsiviup inissianut attartortittakkanut ineqarnermut akiliutit tamarmiusup inissiat attartortittakkat ingerlannerinut aningaasartuutinut matussutaasut aningaasat qaangissanngilaat kiisalu allaffissornermut akiliut, aserfallatsaaliinermut immikkoortitat, takuuk § 19, aningaasaatinit iluanaarutit, takuuk § 20 kiisalu atuisunut akinut naleqqersuut, takuuk § 21.
Imm. 2. Ineqarnermut akiliut tamarmiusoq, imm. 1 naapertorlugu, inissiap angissusia tunngavigalugu naleqquttumik inissianut attartortittakkanut ataasiakkaanut agguarneqassaaq.
Imm. 3. Ingerlatsinermut aningaasartuutit naatsorsornerini aningaasartuutit suut ilanngunneqassanersut pillugit malittarisassanik Naalakkersuisut aalajangersaasinnaapput.
§ 19. Illunut attartortittakkanut tamarmiusunut illut attartortittakkat ataasiakkaat pilerseqqinnissaannut, allanngutsaaliornissaannut piffissakkaartumik aserfallatsaaliuinissamut illullu attartortittakkat pigiinnarnissaannut illullu attartortittakkat pitsaassusaannut pilersaarut nutarterneqarsimasoq pigineqassaaq. Pilersaarutaasumik piffissakkaartumik aserfallatsaaliinissamut pilersaarut piffissamut ukiunut 20-nuussaaq juunillu aallaqqaataani ukiut tamaasa ataasiarluni qaammatinut aqqaneq marlunnut tullinnguuttunut nutarterneqartassalluni, siullermeertumik 2027-mi junip aallaqqaataani.
Imm. 2. Pilersaarutaasumik piffissakkaartumik aserfallatsaaliinissamut pilersaarut tunngavigalugu, takuuk imm. 1, aserfallatsaaliinissamut ingerlaavartumik immikkoortitassat pisariaqartinneqartut naatsorsorneqassapput, annerpaamik ineqarnermut akiliutitut akileqquneqartussat.
Imm. 3. Pilersaarutaasumik piffissakkaartumik aserfallatsaaliinissamut pilersaarummut, takuuk imm. 1, immikkoortitsinerit aamma ineqarnermut akiliutit ilaatut taakkununnga akileeqqusinerit pillugit malittarisassanik Naalakkersuisut malittarisassaliorsinnaapput.
§ 20. Ukiumoortumik Namminersorlutik Oqartussat kommunillu aningaasaliissutinit iluanaarutissaat illuutip sananeranut akiusup 1,5 %-iannik annertussuseqassaaq.
Imm. 2. Illuutip sananeranut akiusup naatsorsorneqarnerani sananermut aningaasartuutit attuumassuteqartut tamarmik ilaatinneqassapput. Illuutip sananeranut akiusoq minnerpaamik kvadratmeterimut 7.000 kr.-inik aamma annerpaamik kvadratmeterimut 15.000 kr.-inik annertussuseqarpoq, sananermut aningaasartuutit piviusut apeqqutaatinnagit.
Imm. 3. Illuni iluarsartuunneqarsimasuni iluarsartuussinerup naammassinerata kingorna illup sananeranut akiusoq teknikikkut aningaasaqarnikkullu naliliineq tunngavigalugu aalajangiiffigineqartarpoq.
Imm. 4. Illuni pisiarineqarsimasuni pisinermi akia kingusinnerusukkut naleqarnerulersitsisinnaasut allannguinerit, iluarsaassinerit imaluunniit pitsannguutit tapiliullugit sananeranut akiusumut ilanngunneqarsinnaapput. Illuni akeqanngitsumik, tunissutitut, kingornussarsiatut, pinngitsaaliissummik taarsiissutitalimmik pigisanik piginnikkunnaarsitsinikkut imaluunniit aappariit nikinnerini pissarsiarineqartuni, sananermut aningaasat illup teknikikkut- aningaasaqarnikkut naliliineq tunngavigalugu aalajangersarneqassaaq.
Imm. 5. Illup sananerani akiusoq kvadratmeterimut ataatsimut 7.000 kr.-inut aalajangersarneqarsimappat, illumilu ikkussugassani ukunani ataaseq amerlanerusulluunniit amigaatigineqarpata, ikkussugassanut amigaatigineqartunut ataasiakkaanut tamanut kvadratmeterimut ataatsimut illup sananeranut akiusoq, 1.000 kr.-inik appartinneqassaaq:
1) Uffarfik aamma anartarfik imermik kuutsittagaq.
2) Centralvarm, uuliartormik kissarsuuteqarneq imaluunniit innaallagissamik kiassaateqarneq.
3) Innaallagiaq.
4) Imeq imaluunniit imermut tanki.
5) Gas imaluunniit innaallagiaq iganermut atorneqartussaq.
6) Kiffiutissat, takuuk imm. 6.
Imm. 6. Natermik, qilaamik iikkanillu kiffiutissat katinneri 250 mm ataallugu mineraluldiuppata sananerani akiusumut ilanngaassisoqassaaq, tak imm. 5, nr. 6. Kiffiutissanut atortut allat atorneqarsimassappata kiffiutissap piginnaasaa mineraluldinut allanngortinneqassaaq.
Imm. 7. Imm. 3 aamma imm. 4 malillugu teknikikkut - aningaasaqarnikkut nalilersuinerup qanoq ingerlanneqarnissaa pillugu malittarisassanik Naalakkersuisut aalajangersaasinnaapput.
§ 21. Ineqarnermut akiliut tamarmiusoq, takuuk § 18, imm. 1, qaammatinut tulliuttunut aqqaneq marlunnut ukiut tamaasa januarip aallaqqaataani aaqqiisoqarsinnaavoq, siullermeertumik 2027-mi januarip aallaqqaataani. Atuisunut akinut naleqqersuut tunngavigalugu aaqqiinermut ilaapput ineqarnermut akiliutip ilaa, allat tunngavigalugit akinut aaqqiissummut ilaatinneqanngitsut. Aaqqiineq atuisunut akinut naleqqersuutip allanngornera tunngavigalugu pissaaq, 2026-mi januarip aallaqqaataani 100-tut naleqqersuutigalugu.
§ 22. Ineqarnermut akiliutip qaffanneqarnera attartortunut ataasiakkaanut allakkatigut qaammatini pingasuni kalerriinikkut naammassineqarsinnaavoq. Kalerriineq qaffaanermut tunngaviusut qaffaatissallu qaammammut oorinngorlugit annertussusissaat pillugu paasissutissanik imaqanngippat kalerriineq atorsinnaanngilaq. Attartornermi akiliummik appaaneq siumut nalunaaruteqaqqaarani pisinnaavoq.
§ 23. Igaffimmik imaluunniit perusuersartarfimmik uffarfimmillu attartortitsisup taarsiinissaanik Namminersorlutik Oqartussani kommuninilu inissiani attartortikkani attartortoq qinnuteqarsinnaavoq. Atortussanik toqqaanissamut, pilersaarusiornissamut suliarinissaanut kiisalu nakkutilliinissamut attartortitsisoq akisussaavoq. Sanaartornermi naatsorsuutinik nalinginnaasunik attartortitsisoq suliaqassaaq. Sanaartornermi naatsorsuutit kukkunersiorneqassanngillat.
Imm. 2. Attartortitsisoq iluarsaassinermut ingerlatsivimmut taarsigassarsisitsissaaq. Taarsigassarsiat ernialersorneqassapput aalajangersimasumillu assigiiaartumillu akilersorneqartussatut taarsigassarsiatut qaammammut aalajangersimasumik akilersorneqassallutik. Qaammammut akiliutit ineqarnermut akiliummut tapitut inissiamik attartortittakkamik qaqugukkulluunniit attartortumut akileqquneqassapput. Ineqarnermut akiliummik akiliineq pillugu Inatsisartut inatsisaanni aalajangersakkat allatigut qaammammut akiliutit akilertarnerinut atorneqassapput.
Imm. 3. Taarsiinissaq sioqqullugu attartortup allakkatigut akuersinera pissarsiarineqassaaq, taarsiinermut aningaasartuutissat missingersorneqarnerat kiisalu tamatumani ineqarnermut akiliummut tapiliussassaq pillugit.
Imm. 4. Taarsiinissamut taarsigassarsineq kiisalu taarsigassarsiat ernialersorneri akilersornerilu pillugit malittarisassanik Naalakkersuisut aalajangersaassapput, tassunga ilanngullugit taarsigassarsiat akilersornerinut attartortut akiliisarneri kiisalu piffissaq akilersuiffissap ingerlanerani allaffissornikkut aqutsinermut akiliuteqartarnissaq.
Attartortitsisartut namminersortut
§ 24. Inissiani attartortittakkani namminersortunit pigineqartuni ineqarnermut akiliut aningaasartuutit malillugit annertussusilerneqassaaq, taannalu attartortitsisup aningaasaliissutinut aningaasartuutigisaanit uppernarsarneqartunit, ingerlatsinermut aningaasartuutigisaanit uppernarsarneqartunit aammalu illuutip teknikikkut aningaasaqarnikkullu nalingata diskontop affaatut annertussusilimmik, taamaattorli minnerpaamik 1,5 %-imik, ernialersorneqarneranut akiliutigisaanit qaffasinnerussanngilaq. Ineqarnermut akiliut inissiat angissusiat naapertorlugu agguarneqassaaq.
Imm. 2. Aningaasalersuinermi aningaasartuutinut uppernarsarneqarsimasunut ilaapput illup sananeranut imaluunniit pisiarineranut aningaasalersuinermut piffissami sivisuumi pigisanut aalaakkaasunut atugassanik nalinginnaasumik taarsigassarsinermut akiliutit. Aammattaaq inissiap attartortittakkap sananeranut imaluunniit pisiarineranut akiusup naammaginartup sinnerata ilaanut attartortup aallaqqaatitut akiliutaa ilanngaatigalugu annerpaamik 14 %-imik ernialersuineq ilanngunneqarsinnaavoq.
Imm. 3. Ingerlatsinermut aningaasartuutit uppernarsarneqartut ilaatigut tassaapput innaallagissamut, imermut, eqqiaanermut, allaffissornikkut aqutsinermut, sillimmasiinermut aserfallatsaaliuinermullu aningaasartuutit, kiisalu illuutip attartukkallu qanoq issusia eqqarsaatigalugu naapertuuttutut isigineqartut malillugit teknikikkut atortulersuutinik nutarterinissamut immikkoortitat.
Imm. 4. Attartortitsisoq illumik imaluunniit attartorneqartumik pitsannguisimappat ineqarnermut akiliutip qaffanneqarnissaanut attartortitsisoq pisinnaatitaaffeqarpoq. Piumasaqaat allakkatigut saqqummiunneqassaaq, peqatigisaanillu illuummi attartortunut pineqartunut tamanut qaammatinik pingasunik sioqqutsisumik saqqummiunneqassalluni. Ineqarnermut akiliutip qaffannissaa pillugu piumasaqaat qaffaanerup pissutaa annertussusaalu pillugit paasissutissanik imaqanngippat, siumoortumik ilisimatitsissut atortussaatinneqarsinnaanngilaq.
Imm. 5. Akit qaffanneri, akigititat qaffanneri assigisaasalu malitsigisaannik attartornerup qaffannissaa pillugu piumasaqaammik saqqummiussinissamik attartortitsisoq pisinnaatitaaffeqarpoq. Piumasaqaat allakkatigut saqqummiunneqassaaq, peqatigisaanillu illuummi attartortunut tamanut qaammatinik pingasunik sioqqutsisumik saqqummiunneqassalluni. Ineqarnermut akiliutip qaffannissaa pillugu piumasaqaat, qaffaanerup pissutaa annertussusaalu pillugit paasissutissanik imaqanngippat, siumoortumik ilisimatitsissut atortussaatinneqarsinnaanngilaq.
Imm. 6. Attartornerup qaffannissaanut kiisalu attartortitsisup pisinnaatitaaffia pillugu ilanngullugulu imm. 5-imi takuneqarsinnaasunut tunngaviusunut taarsiullugu naleqqersuutitigut aaqqiineq tunngavigalugu attartornerup qaffannissaanut attartortitsisup pisinnaatitaaffia pillugu malittarisassanik Naalakkersuisut aalajangersaasinnaapput.
Ineeqqanik najugaqarfiusussanik attartortitsineq
§ 25. Ineeqqanik najugaqarfissanik attartortitsinermi, ilanngullugu attartortitsisup nammineq illuani najugaqartussanut attartortitsinermi, ineqarnermut akiliutit annerpaamik inissiami ineqarnermut imaluunniit akilersuutinut akiliutinut, kiassarnermut, innaallagissamut, imermut il.il. aningaasartuutaasunut, ineeqqat amerlassusaannut naatsorsorneqartunut naapertuuttumik annertussusilerneqassapput.
Imm. 2. Ineqarnermut akiliutip qaffanneqarnera attartortitsisup nammineq illuata ilaani ineeqqat eqqarsaatigalugit qaammammik ataatsimik kalerriisoqassaaq. Ineeqqat allat eqqarsaatigalugit kalerriineq qaammatit pingasuussapput. Kalerriineq allakkatigut saqqummiunneqassaaq.
Kapitali 5
Qularnaveeqqusiissummik aamma ineqarnermut akiliuteqarneq
§ 26. Attartornermik isumaqatigiissuteqarnermi attartortoq qularnaveeqqusiissummik aningaasanngorlugu attartortitsisumut akiliissaaq annerpaamik qaammatini tallimani ineqarnermut akiliummut naapertuuttumik. Qularnaveeqqusiissut aamma siumoortumik ineqarnermut akiliut katillugit qaammatini arfinilinni ineqarnermut akiliutip aningaasartaannit annertunerussanngillat.
Imm. 2. Namminersorlutik Oqartussat kommunillu inissiaataannut attartortittakkanut qularnaveeqqusiineq, tassunga ilanngullugit akiliinerit akilersuinerillu, akilersuinermik aaqqissuussinermi akiliutit, akilersuinermik aaqqissuussinermik atornerluinermut aamma attartortitsisup qularnaveeqqusissummik atuinera pillugu malittarisassanik Naalakkersuisut aalajangersaasinnaapput.
§ 27. Ineqarnermut akiliutip, qularnaveeqqutip naafferarnissaanut, erngup kiassarnerullu kiisalu najugaqartup akiligassaanik aamma aningaasartuutinik allanik attartorneq pillugu isumaqatigiissut malillugu akileqquneqartunik, attartorneq pillugu isumaqatigiissummi aalajangersarneqartunut imaluunniit tamatumunnga atasumik akileeqqusinermi aalajangersarneqartuni piffissani akiliinissamut pisussaaffeqarpoq.
Imm. 2. Attartornermik isumaqatigiissummi alla aalajangersarneqarsimanngippat ineqarnermut akiliut, qularnaveeqqutip naafferarnera kiisalu imeq kiassarnerlu akiliinermut tunngasuusoq qaammat sioqqullugu qaammammi aningaaserivimmi ulloq kingulliusumi kingusinnerpaamik akilerneqassapput. Ineqarnermut akiliut, qularnaveeqqut kiisalu imeq kiassarnerlu piffissamut allamut naatsorsorneqarlunilu akileqquneqartoq akiliinermut tunngasuusoq qaammat sioqqullugu qaammammi aningaaserivimmi ulloq kingulliusumi kingusinnerpaamik akilerneqassaaq. Piffissaq eqqorlugu akiliineq tassaavoq akiliutip kingusinnerpaamik ulloq akiliiffissaq nallertinnagu akilerneqarnera.
Imm. 3. Attartortitsisoq akiliiffissamik akileriaatsimillu innersuussissaaq. Aningaaserivimmut imaluunniit allakkerivimmut akiliineq sumiiffimmi akiliiffissatut innersuunneqartumi akiliinertut isigineqassaaq. Akiliiffissamut innersuussisoqarsimanngippat akiliutissaq attartortitsisup niuernermik ingerlatsiviani imaluunniit attartortitsisup avataani aqutsisutut ingerlatsiviani akilerneqassaaq, taamatut ittoq inissiap attartukkap sumiiffigisaani sulisorineqarpat.
§ 28. Taamaatitsinermi imaluunniit piffissamut aalajangersimasumut attartornerup naanerani piffissamut attartorfiusumut akiliinissamut attartortoq pisussaaffeqarpoq, attartornermut isumaqatigiissut naapertorlugu attartornerup naammassinissaata tungaanut, takukkit §§ 52-53.
Kapitali 6
Imermut, kiassarnermut il. il. akiliutit
§ 29. Attartortitsisoq kiassarnermik imermillu kissartumik attartortumut pilersuippat attartortup kiassarnermik imermillu kissartumik atuineranut kiisalu ininut ataatsimoorfiusunut kiassarnermut imermullu aningaasartuutinut attartortup akiligassaanut aningaasartuutiminut attartortitsisoq akileeqqusisinnaavoq. Taakkununnga aningaasartuutit ineqarnermut akiliummut ilaatinneqassanngillat, attartortitsisumillu suliarineqartoq immikkut ukiumoortumik kiassarnermut naatsorsuutit aqqutigalugit akilerneqartussaallutik. Kiassarnermut ukiumoortumik naatsorsuutit ukioq ilivitsoq malippaat.
Imm. 2. Aningaasartuutinut attartortut akiligassaannut matussutissatut attartortuni qaammammut akiliigallarnissamut akileeqqusisoqarsinnaavoq. Attartortup akiliutai attartornermi pissutsini aningaasatigut akiliutissaapput ineqarnermullu akiliut peqatigalugu akileqquneqartussaallutik, takuuk § 27.
Imm. 3. Kiassarnermut naatsorsuutit suliarineqarnerinut allaffissornikkut akiliutissamik attartortoq akileeqquneqarsinnaavoq.
Imm. 4. Kiassarnermut naatsorsuusiorneq pillugu, tassunga ilanngullugit allaffissornermut akiliutissaq, attartortut kiassarnermilu sullinneqartut allat akornanni aningaasartuutit agguarneqarneri, akiliinissaq aamma kiassarnermut akiliutissat kingornatigut aaqqiiffigineqarneri pillugit malittarisassanik Naalakkersuisut aalajangersaasinnaapput.
§ 30. Illup kiassarneranut imermillu kissartumik pilersorneranut aningaasartuutinut tunngasut kiassarnermut naatsorsuutinik ukiumi kiassarnermut naatsorsuusiorfiusumi attartortitsisup sumiiffimmi toqqagaani kingusinnerpaamik aprilip 30-iani attartortitsisoq tamanut ammasumik saqqummiussissaaq.
Imm. 2. Imm. 1-imi aalajangersarneqartumi ullormi naatsorsuutit saqqummiunneqanngippata akiliigallartarnerup saniatigut immikkut akiliinissamut piumasaqarnissamut attartortitsisup pisinnaaffini annaassavaa.
Imm. 3. Naatsorsuutit kingusinnerpaamik junip 30-iani saqqummiunneqarsimanngippata inaarutaasumik naatsorsuutit naammassinerini pissarsiassami akiliisoqarnissaata tungaanut ernialersortinnissaannut attartortoq pisinnaatitaavoq, Kalaallit Nunaanni niuerfeqartumi aningaaserivimmi aningaaserivimmiititanut qaqugukkulluunniit qaffasinnerpaamik ernialersorneqartut. Attartortup pissarsiassaanik ernialersuineq junip 15-ianiit pissaaq, aningaasanik utertitsinissaq pillugu allakkatigut nalunaaruteqarnissaq attartortumut ullormi tassani nassiunneqartussaammat.
Imm. 4. Immikkut akiliut imaluunniit utertitsilluni akiliinissaq pillugu allakkatigut nalunaarut attartortumut junip 15-iani kingusinnerpaamik nassiunneqarsimasussaavoq. Nalunaarut imm. 6 malillugu akerliliinissamut attartortut pisinnaatitaaffeqarnerat pillugu paasissutissanik imaqassaaq.
Imm. 5. Imm. 4 malillugu allakkatigut nalunaarut kingusinnerpaamik junip 15-ani nassiunneqarsimanngippat attartortumut immikkut akiliisoqarnissaa piumasaqaatigineqarsinnaanngilaq.
Imm. 6. Naatsorsuutinut attartortup akerliliinera allakkatigut attartortitsisumut nassiunneqassaaq kingusinnerpaamillu aggustip aallaqqaataani nassiunneqarsimassalluni. Naatsorsuutini immikkoortut suut akuerineqarsinnaannginneri pillugit paasissutissanik akerliliineq imaqassaaq. Naatsorsuutini immikkoortut akerlilersorneqartut pillugit uppernarsaatissanik saqqummiusseqqullugu attartortitsisoq qinnuigineqarsinnaavoq.
§ 31. § 30, imm. 4-mi piffissaliussap naanerata kingorna attartortitsisoq kiassarnermut naatsorsuutinut naammassineqarsimasunut tunngasunik pilersuisunit avataaneersuniit naatsorsuutiginngisanik naatsorsuinernik tigusaqarpat attartortitsisoq naatsorsuinerit kiassarnermut naatsorsuutinut tullinnguuttunut qaqutigoortumik nuussinnaavai. Naatsorsuinerup nuunneqartup annertussusaa pillugu attartortunut attartortitsisoq ilisimatitsissaaq.
Imm. 2. Attartortut akornanni aningaasartuutit kukkusumik agguarneqarsimappata attartortunut pineqartunut allakkatigut nalunaaruteqarnikkut kukkuneq piaarnerpaamik iluarsineqassaaq, takukkit imm. 3 aamma 4.
Imm. 3. Attartortoq annikippallaartumik akiliigallarsimappat imm. 2 naapertorlugu tamatuminnga nalunaarfigineqarnerminniit siusinnerpaamik qaammatip tulliani attartornermut akiliinermini siullermi attartortumit tapiliussatut akileeqquneqarsinnaavoq. Tapiliussatut akiliuteqarneq qaammatini pingasuni akiliigallarsimaneq sinnersimappagu, qaammatini pingasuni assigiiaartumik naafferarlugit akilersuinissaminut attartortoq pisinnaatitaavoq.
Imm. 4. Attartortoq annertuallaamik akiliigallarsimappat akiliivallaarsimasut aningaasanngorlugit attartortumut utertinneqassapput imaluunniit imm. 2 naapertorlugu tamatuminnga nalunaaruteqarnermiit attartornermut akiliinermi tullermi ilanngaatigineqassallutik.
§ 32. Illuatungeriit isumaqatigiissutaat tunuliaqutaralugu imermik pilersuisoq attartortunut ataasiakkaanut pilersuisimappat akileeqqusineq naatsorsuinerlu pilersuisup attartortullu akornanni toqqaannartumik pissaaq. Akileeqqusineq naatsorsuinerlu pilersuisup nalinginnaasumik piumasaqaatai malillugit pissaaq.
Imm. 2. Attartortitsisoq imermik attartortumut pilersuippat tamatumunnga aningaasartuutiminut matussusiinissamut attartortumut piumasaqaateqarsinnaavoq. Attartortitsisup imermik aningaasartuutimi matussusernissaannut attartortup akiliigallarnissaanik attartortitsisoq piumasaqarsinnaavoq. Akiliigallarnissaq immikkoortillugu ineqarnermut akiliut peqatigalugu qaammammut ataasiarluni akileqquneqassaaq.
Imm. 3. Illu ataasiakkaanut naatsorsuinernut uuttuutinik pilersorneqarsimanngippat illumi imermik atuineq tamarmiusoq inissiat angissusai malillugit attartukkanut ataasiakkanut agguarneqassaaq. Imeq pillugu naatsorsuutit suliarinerinut attartortunut ataasiakkaanut akiliummik attartortitsisoq akileeqqusisinnaavoq. Imeq pillugu naatsorsuutit illup sumiiffigisaani inissiaqarfik pillugu ukiumut naatsorsuutinik malinnippoq.
Imm. 4. Illumi attartorneqartut ataasiakkaat naatsorsuinernut uuttuutinik pilersorneqarsimappata aningaasartuutit matussutissaannik aningaasanik akileeqqusinissaq imaluunniit akiliigallarsimanerit annertuallaat utertillugit akilerneqarnissaat siunertaralugu taakku ukiumut ataasiarlutik atuarneqartassapput. Aamma taamaappoq attartortup iserternerani nuunneranilu. Akileeqqusissut attartortumut nassiunneqartoq tassaavoq imermut uuttuut malillugu piffissami imermik atuisimavinneq atuaanermut akiliut 5 %-imik tapeqartillugu kiisalu uuttuummik attartorneq.
Imm. 5. Attartortitsisoq isumaqatigiissuteqarfigalugu imermut uuttuummik attartortoq atuaappat inerneralu attartortitsisumut nalunaarutigalugu attartortoq attartortitsisup atuaanerup inerneranik suliarinninneranut akiliummik akileeqquneqassaaq.
Imm. 6. Annertuallaamik akiliigallartoqarsimanerit attartortumut utertinneqassapput annikippallaamillu akiliigallartoqarsimappat tapiliussatut akiliinissamik attartortoq akileeqquneqassaaq. Tapiliussatut akiliuteqarnerup qaammatini pingasuni imermut akiliigallarluni akiliut sinnersimappagu, qaammatini pingasuni assigiiaartumik naafferarlugit akilersuinissamut attartortoq pisinnaatitaavoq.
Imm. 7. Imermik atuineq pillugu atuaaneq akileeqqusinerlu pillugit malittarisassanik kiisalu imermut naatsorsuusiornissaq ilanngullugulu akiliutit uuttuummillu attartorneq pillugu malittarisassanik Naalakkersuisut aalajangersaasinnaapput.
Kapitali 7
Aserfallatsaaliineq, iluarsartuussineq atuinerlu
§ 33. Namminersorlutik Oqartussat kommunillu inissiaataanni attartortittakkani illuutit attartortitallu pitsaasumik atorsinnaasuutinneqarnissaat attartortitsisup pisussaaffigaa.
Imm. 2. Avammut kuuffinnut, kiassarnermut, innaallagissamut, gasimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iigaasat, matserfiit, kiassaatit, ruujorit, sikaaviit aalakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriarnerit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
Imm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
§ 34. Namminersortut inissianik attartortitsineranni attartortoq attartortitsisorlu allanik isumaqatigiissuteqarsimanngippata § 33-mi allassimasut atorneqassapput.
§ 35. Attartortitsisup piffissamit attartornerup aallartinnissaanut piffissamit isumaqatigiissutigineqartumik pitsaasumik isumannaatsumillu pitsaassuseqartillugu attartortumut atugassanngortissavaa. Iikkat, qilaat natillu sapinngisamik nalinginnaasumik aaqqissuunneqarsimassapput, takuuk § 59, imm. 2, oqaaseqatigiit aappaat aamma pingajuat. Attartorneqarsimasoq eqqiarneqarsimassaaq uumasuaraqassananilu, igalaat, sikaaviit matui aamma matut ilivitsuussapput atorsinnaasunillu paarnaarsaateqassallutik. Tamatumalu saniatigut matut silarliit tamarmik immikkut marlunnik matuersaateqassallutik, teknikikkullu atortulersuutit atorneqarsinnaassallutik.
Imm. 2. Iserternermi attartortitsisoq attartortoq ilagalugu imaluunniit tassunga sinniisoq ini misissussavaat aamma isertilernermi nalunaarusiamik sanallutik, attartortup nalunaarusiap assinga tunniunneqassaaq, taamaattorli takuuk imm. 4. Misissuinermi amigaatit paasineqartut isertilernermi nalunaarummi ilanngunneqassapput.
Imm. 3. Amigaatit allat, attartortup inissiamut iserternermi kingorna tigusinermut atatillugu tikkuarusutai inissiamut iserternermiit sapaatit akunneri marluk qaangiutsinnagit allakkatigut attartortitsisumut nalunaarutigineqassapput. Amigaatilli nalinginnaasumik misissuinermi takuneqarsinnaasimanngippata imaluunniit attartortitsisoq peqquserlussimappat tamanna atuutissanngilaq.
Imm. 4. Inissiamut iserternissamut atatillugu misissuinissamut aningaasartuutissat annertuallaarpata, inissiamut iserternissamut atatillugu takuniaaneq pinngitsoorneqarsinnaavoq.
§ 36. Attartortup attartorneqartoq illersorneqarsinnaasumik paarissavaa, ajoqusikkanullu attartortup nammineq, attartortup inoqutaasa allalluunniit attartortup attartorneqartumut isertissimasaasa illersorneqarsinnaanngitsumik pissusilersornerisigut ajoqusersimasaannut taarsiinissamut attartortoq akisussaavoq. Attartorneqartumi ajoqusernerit attartortitsisup isummerfigisariaqagai imaluunniit iluarsartariaqagai pillugit attartortoq pisariaqanngitsumik kinguarsaanani attartortitsisumut nalunaaruteqassaaq. Misissuinermi paarsinerluttoqarsimasoq paasineqarpat, attartortitsisup tamanna piumasarippagu attartortup ingerlaannartumik ajoqusikkat iluarsaatissavai. Attartortitsisumit allakkatigut akuersisoqaqqaartinnagu attartorneqartumi tupamik imaluunniit pujortagassanik allanik pujortartoqaqqusaanngilaq.
Imm. 2. Attartortup attartortitsisoq akuersiteqqaarnagu inissiaq isumaqatigiissutigineqartumit allaanerusumik atussanngilaa.
Imm. 3. Inissiami ineeqqanik ataasiakkaanik inisimasunut inuit allattorsimaffianni aalajangersimasumik najugaqartussanut attartortitsinerup saniatigut, attartortup inoqutigisami saniatigut allanut attartorneqartoq atugassanngortissanngilaa.
Imm. 4. Ineeqqamik attartortoq attartortitsisoq allakkatigut akuersiteqqaarnagu ineeqqamik atuinermik allanut tunniussinnaanngilaat.
Imm. 5. Attartortoq attartornerup naannginnerani inissiamit ataavartumik nuuppat, attartortoq pisariaqanngitsumik kinguarsaanani tamatuminnga attartortitsisumut nalunaaruteqassaaq aammalu inissiap tunniunneqarnissaa pillugu qanoq ingerlasoqarnissaa attartortitsisoq isumaqatigiissuteqarfigissavaa.
§ 37. Attartortoq pissutissaqavinngikkuni attartortitsisoq inissiamik inatsisinik unioqqutitsilluni atuisoqarnersoq imaluunniit aserfallatsaaliinerup qanoq issusianik paasiniaalluni, iluarsaassisoqassatillugu imaluunniit allanut attartortitsisoqassatillugu inissiamik misissuiniarpat inissiamut isernissaanut itigartitsisinnaanngilaq.
Imm. 2. Attartortitsisoq sapaatit akunnerinik marlunnik siumut ilisimatitsereernermigut attartukkami suliassanik aallartitsisinnaavoq, suliat ingerlanneqarnissaat attartortumut annertuumik akornutaassanngippata. Sulianik allanik aallartitsisoqartinnagu attartortoq qaammat ataaseq-affarlu siumut ilisimatitsereertussaavoq. Taamaattorli attartortitsisoq suliassanik kinguartinneqarsinnaanngitsunik siumut ilisimatitseqqaarnani tamatigut iluarsaassisinnaavoq.
Imm. 3. Suliat suugaluartulluunniit attartortitsisumit aallartinneqartut unitsinneqaratik attartortumullu sapinngisamik annertunerpaamik mianerinnilluni suliarineqartassapput. Attartortitsisoq ingerlaannartumik suliat malitsigisaanik iluarsaassissaaq.
§ 38. Attartortup taassumalu inoqutaasa kiisalu inuit attartortumit attartorneqartumut isersinnaatitaasut illumi ileqqoreqqusat maleruagassat maleruassavaat.
Imm. 2. Namminersorlutik Oqartussat aamma kommunit inissiaataanni attartortittakkani uumasuuteqarnissaq akuerisaavoq, taamaattoq takukkit imm. 3-6.
Imm. 3. Taamaattorli imm. 2 apeqqutaatinnagu attartortitsisoq aalajangiisinnaavoq uumasuuteqarneq akuerisaassanngitsoq. Aalajangiinermut uumasuutit aalajangersimasut, inissiat aalajangersimasut imaluunniit illut aalajangersimasut ilaasinnaapput.
Imm. 4. Uumasuuteqarneq pillugu ileqqorissaarnissamut maleruagassani piumasaqaatit qaqugukkulluunniit naammassineqarsimassapput.
Imm. 5. Inissiami uumasumik ataatsimik arlalinnilluunniit uumasuuteqarnermi attartortoq qaammatini pingasuni ineqarnermut akiliutip annertoqataanik immikkut qularnaveeqqusiissaaq. Attartortup uumasuuteqalernermi qularnaveeqqusiussassaq attartortitsisumut aningaasanngorlugu akilissavaa. Attartortup uumasuuteqarunnaarnini pillugu attartortitsisumut nalunaaruteqarnerani, attartortitsisoq illuutip aamma attartorneqartup misissoreernerani aalajangersinnaavoq, attartortup qularnaveeqqusiussaasa uninngatinnissaannut piumasaqaatit atuukkunnaassasut aammalu aningaasat tamakkiisumik ilaannaasumilluunniit utertillugit tunniullugit. Oqaaseqatigiit siulliit malillugit qularnaveeqqusiineq § 26 malillugu qularnaveeqqusiinertut isigineqassanngilaq § 26-milu annerpaaffissatut killiliussatut aalajangersarneqarsimasoq qaangerlugu akileqquneqarsinnaalluni.
Imm. 6. Imm. 5-imi qularnaveeqqusiussatut akiliutigineqartut, ajoqusiinernut uumasuuteqarnermit pilersinneqartunut matussutissatut attartortitsisup atorsinnaavai.
Kapitali 8
Attartortup attartukkamik atuisinnaanera
§ 39. Namminersorlutik Oqartussat kommunillu inissiaataanni attartortittakkani attartortoq attartorneqartumi allanngueqqusaanngilaq imaluunniit attartorneqartup iluani silataanilu aaqqissuussinernik atortunilluunniit allanik inisseeqqusaanani, tamanna attartorneqartup imaluunniit illuutip qanoq issusianik, aaqqissugaaneranik, atortulersuutaanik, sananeqaataanik, silataanik imaluunniit ataatsimoorussamik atugassanik allanngortitsippat.
§ 40. Namminersorlutik Oqartussat kommunillu inissiaataanni attartortittakkani attartortoq attartorneqartup iluani silataaniluunniit suliaqaqqusaananilu pitsanngorsaaqqusaanngilaq. Oqaaseqatigiinnut siullernut attartortup illup iluani aserfallatsaaliinissaa ilaanngilaq, takuuk § 33, imm. 3.
§ 41. Namminersorlutik Oqartussat kommunillu inissiaataanni attartortittakkani attartortoq attartortitsisumit siumut allaganngorlugu akuersissummik pissarsereerluni isumaginninnermi inatsimmi aalajangersakkat malillugit ikiuutinik il.il. ikkussuisinnaatitaavoq. Attartortitsisup akuersissuteqarnermi piumasaqaatitut attartortoq attartukkaminik qimatsinermini inissiap pissusiatut pilersitseqqinnissaa aamma kommunalbestyrelsip inissiap pissusaatut pilersitseqqinnermut aningaasartuutit akilerneqarnissaannut qularnaveeqqusiinissaa piumasaqaatigissavaa. Attartortup attartortitsisoq ikiuutit ikkussuunneqannginneranni kingusinnerpaamik sapaatit akunnerinik sisamanik sioqqutsilluni nalunaarfigissavaa.
§ 42. Namminersortut inissianik attartortitsineranni attartortoq attartortitsisorlu allanik allakkatigut isumaqatigiissuteqarsimanngippata §§ 39-41-mi allassimasut atorneqassapput.
Kapitali 9
Atuisinnaatitaanerup allanut tunniunneqarnera
§ 43. Attartortup atuisinnaatitaanera attartortitsisumit siumut allakkatigut akuersissummik pissarsereersimatinnagu inunnut imaluunniit suliffeqarfimmut allamut tunniunneqarsinnaanngilaq.
Imm. 2. Atuisinnaatitaanerup nuunneqarnera tamatumunngalu piumasaqaatit pillugit malittarisassanik Naalakkersuisut aalajangersaasinnaapput, tassunga ilanngullugit allamut attartortitsigallarnerup nuunneqarnera, toqusoqarnera, aappariinnerup, nalunaarsukkamik aappariinnerup atorunnaarsinnera imaluunniit inooqatigiinnerup atorunnaarsinnera pillugu.
Imm. 3. Imm. 2-mi malittarisassanik aalajangersaanermi meeqqat inersimanngitsut eqqarsaatigineqarneri, inooqatigiinnerup atorunnaarsinneqarnera persuttaanermut tunngaveqarnersoq, ilanngullugu tarnikkut persuttaanermik imaluunniit pinerluttulerinermut inatsimmut ilaasunik saassussinernik allanik tunngaveqarnersoq pingaartinneqassapput.
§ 44. Inissiaq attartortittagaq Namminersorlutik Oqartussani kommunimiluunniit atorfeqarnermut atatillugu sulisumut innersuunneqarsimappat attartukkamik attartortitsigallarsinnaanngilaq.
Imm. 2. Attartortitsisoq attartortup qinnuteqarneratigut aamma atorfinitsitsinermi oqartussanit siumoortumik allakkatigut akuersisoqarneratigut qaammatit aqqaneq marluk tikillugit attartukkamik allamut attartortitsigallarnissamut akuersisinnaavoq, attartortup nammineq imaluunniit attartortup inoqutaanut ilaasup katsorsartariaqarnermik napparsimanerata kingunerisaanik attartukkap avataani aalajangersimasumik utaqqiisaasumik najugaqalernissaq pisariaqalersimappat.
Imm. 3. Attartukkamik attartortitsigallarnissamut isumaqatigiissut attartortitsisumiit akuerineqassaaq. Attartorallarnerup akiliutaa sulisup attartortitsisumut ineqarnermut akiliutaatut annertunerpaamik annertussuseqarsinnaavoq. Attartukkamik attartortitseqqinnermi isumaqatigiissummi pequtit ilaappata ineqarnermut akiliutip annerpaamik 10 %-inut naapertuuttumik taakkununnga akileeqqusisoqarsinnaavoq.
Kapitali 10
Attartornermik taamaatitsineq
§ 45. Attartortup attartornermut isumaqatigiissut § 52, imm. 2-mi siumut ilisimatitsinissamut piumasarisaasut malillugit attartornini taamaatissinnaavaa. Taamaattorli attartortup aapparisani akuersiteqqaarnagu ilaqutariit inigisaannik attartorneq imaluunniit aappariit suliffeqarfianut atatillugu attartorneq taamaatissinnaanngilaa. Attartortup taamaatitsinera allakkatigut nalunaarutigineqassaaq.
§ 46. Sulisunut inissiamik attartorneq atorfeqarnerup unitsinneqarnerani atorunnaassaaq, tamatumunngalu atatillugu inissiaq qimanneqassalluni. Atorfilik pisussaavoq inissiap taamaatinnera allakkatigut nalunaarutigissallugu. Atorfillip akiligassat ingerlaavartut attartukkamut attuumassuteqartut, taamaatitsinissamut siumoortumik nalunaarfissatut piffissarititaasup nalinginnaasup naanissaata tungaanut akiligassarai.
Imm. 2. Sulisunut inissiaq pillugu attartugaq taamaatitsinissamut siumoortumik nalunaarfissap naanissaa kingusinnerpaamik ulluinnaat 15-it sioqqullugit qimareerneqarsimassaaq, takuuk § 59, imm. 1, oqaaseqatigiit siulliit.
§ 47. Attartortitsisup attartornerit imaattut taamaatissinnaavai:
1) Ineeqqat, attartortitsisup inigisaani inissiap ilaaniittut, imaluunniit ilaqutariinnut ataatsinut illuni illuniluunniit affarleriinni attartortitsisup najugarisaata ilaaniittut.
2) Illumi najugaqarfittut inissiat, piffissami taamaatitsiviusumi najugaqarfittut inissiat marluinnaatillugit, aappaanilu piginnittoq najugaqartillugu.
Imm. 2. Attartortitsisup taamaatitsinera allakkatigut pissaaq.
§ 48. Attartortitsisup attartortumut attartorneq allakkatigut taamaatissinnaavaa:
1) Attartorneqartoq Namminersorlutik Oqartussanit imaluunniit kommunimit attartugaappat kingornalu attartortumut attartortitseqqinneqarsimappat imaluunniit,
2) attartorneqartoq Namminersorlutik Oqartussanit imaluunniit kommuninit aalajangiisumik sunniuteqarfigineqartumi inissiaatileqatigiiffimmi attartorneqarsimappat kingornalu attartortumut attartortitseqqinneqarsimappat.
Imm. 2. Imm. 1 malillugu taamaatitsinermut piumasaqaataavoq attartortitsisup tamatuma peqatigisaanik illoqarfimmi nunaqarfimmiluunniit tassani tulluartumik allamik attartugassamik innersuussinera. Attartugassamut allamut innersuussineq malittarisassat qaqugukkulluunniit atuuttut malillugit pissaaq.
§ 49. Attartortitsisoq taamaallaat taamaatitsisinnaavoq §§ 47-48-imi saniatigut attartornerni allani taaneqartut:
1) Attartortitsisup attartortitamini nammineerluni najugaqalivinniarluni nalunaarutigippagu, imaluunniit attartortitsisoq pingaarutilinnik tunngaveqarluni attartornermik taamaatitsinissamut immikkut pissutissaqartitsippat, aammalu taamaatitsiniarluni nalunaaruteqarneq illuatungeriinnut tunngasut nalilerneqarnerat aallaavigalugu naammaginartutut isigineqarsinnaappat.
2) Attartortitsisup illumik iluarsaassinissaq isaterinissarluunniit peqqutaalluni attartorneqartoq qimanneqartariaqartoq uppernarsarpagu.
3) Attartortoq illup ingerlanneqarnerani suliaqartussatut atorfeqartitaasimappat, inissiarlu attartortitseqqinnermi atorfimmit taartaasumut atorneqassappat.
4) Attartortoq attartortitsisumit allakkatigut mianersoqqussutinik tunineqartaraluarluni tupamik pujortarnissamik inerteqqussummik unioqqutitsippat, attartortitsisumit ileqqoreqqusat aalajangersarneqartut malinngippagit, imaluunniit pissusilersornera illumut ineqartunulluunniit allanut akornutaappat, pissutsilli imaanngippata attartortitsisup attartornermik isumaqatigiissut atorunnaartissinnaallugu. Attartortoq allakkatigut mianersoqqussutinik inassutinilluunniit pingasunik qaammatit tulleriit aqqaneq marluk iluanni tigusisimasussaavoq.
§ 50. Namminersorlutik Oqartussat imaluunniit kommunip inissiamik attartukkamik iluarsaassinissaq isaterinissarluunniit pissutigalugu attartorneq taamaatissappagu, takuuk § 49, nr. 2, attartortoq inissiamik taartissamik innersuussivigineqassaaq. Inissiamik taartissamik innersuussisussaatitaaneq taamaallaat atuutissaaq, attartortup Namminersorlutik Oqartussat imaluunniit kommunip attartornermik taamaatitsinerata nalaani attartornermut isumaqatigiissut taamaatinneqartoq eqqortissimappagu.
Imm. 2. Attartortut iluarsaassinerup kingunerisaanik inissiamik taartissamik innersuussivigineqartut iluarsaassinerup naammassereerneratigut illuni iluarsaanneqarsimasuni inissiamik innersuussivigineqarnissamut salliutinneqartussaatitaapput, attartortullu isaterinerup kingunerisaanik inissiamik taartissamik innersuussivigineqartut illunut isatikkanut taartissatut inissiaqarfimmi sananeqartunut inissiamik innersuussivigineqarnissamut salliutinneqartussaatitaallutik.
Imm. 3. Salliutinneqartussaatitaaneq taamaallaat atuutissaaq attartortup inissiami taartissatut innersuussivigineqartumi attartornermut isumaqatigiissut eqqortissimappagu, aammalu attartortup inissiamik innersuussivigineqarnissamut piumasaqaatit allat naammassisimappagit. Namminersorlutik Oqartussat imaluunniit kommuni pissutsit annertuumik pingaaruteqanngitsut, imaluunniit attartortumit uteqqinnissamik neqerooruteqarnermi aaqqinneqarsimasut pissutiginiarsinnaanngilaat.
Imm. 4. Attartortup attartukkani qimassappagu, takuuk imm. 1, attartortitsisup attartortoq taarsiissuteqarfigissavaa, inissiamut ataatsimut tunngaviusumik 2.000 kr.-inik amerlassuseqartunik, ininut najugaqarfiusunut tamanut immikkut 1.500 kr.-inik ilassuteqartumik. Attartortitsisup attartortoq iluarsaassinerup naammassinerani attartortup inigisaminut uterneranut atatillugu imaluunniit isaterinerup kingorna nutaamik sanaqqinnermi illumut nutaamut attartulerneranut atatillugu taamatorpiaq taarsiissuteqarfigissavaa, takukkit imm. 2-3.
Imm. 5. Imm. 4-mut atatillugu aningaasartuutit illumi iluarsaassinissamut isaterinissamulluunniit aningaasaliissutit aqqutigalugit akilerneqassapput.
§ 51. Attartortitsisup taamaatitsinera § 49 naapertorlugu allakkatigut nalunaarutigineqassaaq, aammalu attartortup imm. 2 naapertorlugu akerliliissuteqarsinnaaneranut paasissutissanik imaqassalluni. Taamaatitsinermut nalunaarut taamaatitsinermut pissutaasumik aamma paasissutissanik imaqassaaq.
Imm. 2. Attartortup taamaatitsineq akuersaarumanngikkuniuk, attartortoq taamaatitsinerup tiguneraniit sapaatit akunneri arfinillit qaangiutsinnagit allakkatigut akerliliissuteqassaaq. Attartortitsisup taamaatitsineq atuutsiinnarniarlugu kissaatigiguniuk, attartortitsisoq sapaatit akunneri suli arfinillit qaangiutsinnagit eqqartuussivinnut suliassanngortitsissaaq. § 49, nr. 2 aamma 3 naapertorlugit attartornermik taamaatitsinermut akerliliissut kinguartitsisumik sunniuteqassanngilaq.
§ 52. Attartortitsisumit taamaatitsineq sivikinnerpaamik qaammatinik pingasunik siumut ilisimatitsereernikkut, qaammatip naanerani atuuttussanngorlugu, taamaattorli matumani ineeqqamik attartorneq pineqartillugu qaammammik ataasiinnarmik siumut ilisimatitsinikkut taamaatitsisoqarsinnaavoq, takuuk § 47, nr. 1.
Imm. 2. Attartortup tungaaniit taamaatitsineq allakkatigut sivikinnerpaamik qaammatinik marlunnik siumut ilisimatitsereernikkut, qaammatip naanerani atuuttussamik pissaaq. Attartorneqartup misissorneqarnera taamaatitsinissamut siumoortumik nalunaarfissap naanissaa kingusinnerpaamik ulluinnaat 15-it sioqqullugit pissaaq attartorneqartorlu qimanneqarsimassalluni. Nalinginnaasumik iluarsaassineq taamaatitsinissamut siumoortumik nalunaarfissaq naatinnagu isumagineqarsimassaaq. Taamaattorli namminersortoq inissiamik attartortitsisoq attartortorlu isumaqatigiissuteqarsinnaallutik attartortup tungaaniit taamaatitsineq qaammatip naaneranut sivikinnerpaamik qaammatinik pingasunik allakkatigut kalerriinikkut pisinnaasoq. Piumasaqaat atuutissappat attartorneq pillugu isumaqatigiissummi immikkut erseqqissarneqarsimassaaq.
Imm. 3. Attartortoq piffissaq ilisimatitsiffiusoq suli naanngitsoq inissiamiit nuuppat, attartortitsisup attartukkap allamut attartorteqqinnissaa anguniassavaa. Attartortitsisup allamut attartortitsinermini isertitai isertitassaraluiluunniit attartortumut piumasaqaammini ilanngaatigineqassapput.
§ 53. Attartornermut isumaqatigiissut piffissamut aalajangersimasumut atuuttussanngortitaasimappat, piffissap attartorfiusussatut isumaqatigiissutigineqartup naanerani siumut ilisimatitsinertaqanngitsumik attartorneq atorunnaassaaq. Attartornermut isumaqatigiissut piffissamut aalajangersimasumut atuuttussanngortitaasoq piffissap attartorfiusup ingerlanerani taamaatinneqarsinnaanngilaq, tamatumani attartornermut isumaqatigiissutip taamaatinneqarsinnaanera allakkatigut isumaqatigiissutigineqarsimanngippat.
Imm. 2. Imm. 1-imi aalajangersarneqartut apeqqutaatinnagit attartortitsisup attartornissamut isumaqatigiissut kapitali 11-mi aalajangersakkat malillugit atorunnaarsissinnaavaa.
Imm. 3. Attartortup attartortitsisup ilisimasaanik attartornerup piffissamut aalajangersimasumut atuuttussanngortitaasup naareernerani attartukkani atorpagu, attartortitsisorlu akerliliinngippat, attartorneq attartornermut nalinginnaasumut piffissamut aalajangigaanngitsumut ingerlaannartumik nuussaaq, inatsisitigut sunniutissai tassunga attuumassutillit atuutsinneqalerlutik.
§ 54. Attartornermik taamaatitsineq attartortumillu anisitsineq attartortitsisoq pequtinik toqqorterinissamut pisussaaffeqanngilaq, attartortitsisorlu attartortup akiligassaanik annaasaqaataasinnaaneranillu pigisat qimatat igissinnaavai, taamaattorli takuuk imm. 2.
Imm. 2. Attartukkamik taamaatitsineq anisitsinerlu tassungalu ilanngullugu attartortup pequtaanik sivisunerpaamik qaammatit pingasut tikillugit toqqortarineqarnissaat attartortullu pequtaanik igitsinissaq pillugu malittarisassanik Naalakkersuisut aalajangersaasinnaapput.
Kapitali 11.
Atorunnaarsitsineq
§ 55. Namminersorlutik Oqartussat kommunillu inissiaataanni attartortittakkani qularnaveeqqusiissummik, ineqarnermut akiliummik, imermut kiassarnermullu akiliutinik kiisalu najugaqartup akiligassaanik aamma aningaasartuutinik allanik attartornermut isumaqatigiissut naapertorlugu akileqquneqartunik piffissaq eqqorlugu akilerneqannginnerisa kingunerisaanik attartorneq pillugu isumaqatigiissummik attartortitsisoq atorunnaarsitsissaaq. Namminersortut inissiaataanni attartortittakkani attartortitsisoq oqaaseqatigiit siulliit naapertorlugit pissutsit taaneqartut tunngavigalugit attartorneq pillugu isumaqatigiissummik atorunnaarsitsisinnaavoq.
Imm. 2. Attartortitsisup attartorneq pillugu isumaqatigiissummik atorunnaarsitsisinnaavoq:
1) Inissiaq unioqqutitsisumik atorneqarpat, takukkit § 36, imm. 2 aamma 3.
2) Attartortoq attartornerup naannginnerani inissiamit ataavartumik nuunnermini pisussaaffimminik sumiginnaappat, takuuk § 36 imm. 5.
3) Attartortitsisoq unioqqutitsisumik inissiamut iseqquneqanngippat, takuuk § 37, imm. 1.
4) Ileqqoreqqusat unioqqutinneqarpata, takuuk § 38.
Imm. 3. Attartortitsisup attartorneq pillugu isumaqatigiissut taamaallaat atorunnaarsissinnaavaa, takukkit imm. 1 aamma 2, pissuseq attartortumut pisuutinneqartoq annertuumik pingaaruteqarpata.
Imm. 4. Imm. 1-imi aamma imm. 2-imi pissutsit taaneqartut, attartornermut isumaqatigiissummik attartortitsisup atorunnaarsitsinnginnerani aaqqinneqarsimappata attartortitsisumit tunngaviginiarneqarsinnaanngillat.
Imm. 5. Attartortitsisup pissutsit imm. 2-mi taaneqartut tunngavigalugit attartornermik atorunnaarsitsinnginnerani attartortitsisup pissutsit aaqqeqqullugit attartortoq peqqussuteqarfigissavaa.
Imm. 6. Attartortoq attartukkaminit anisinneqarpat, attartortitsisup kommunimi inunnik isumaginnittoqarfik tamanna pillugu allakkatigut ilisimatissavaa. Ilisimatitsinermi anisitsinissamik piumasaqaatip assilinera attartortitsisup nassiutissavaa.
§ 56. Namminersorlutik Oqartussat kommunillu inissiaataanni attartortittakkani akiliinngitsoortoqartillugu attartornermik isumaqatigiissut attartortitsisumit atorunnaarsinneqassaaq, takuuk § 55, imm. 1, tamanna pillugu piumasaqaatip allakkatigut attartortumut takkunnerata kingorna attartortup kingusinnerpaamik ulluinnaat qulit qaangiunneranni akiligassanut kinguaattoorutini akilersimanngippagit, imaluunniit piffissaliussap naannginnerani imm. 4 aamma 5 naapertorlugit naafferartumik akilersuinissamik isumaqatigiissuteqarsimanngippat. Tamannattaaq naafferaalluni aaqqissuussinermi akiliutissat akilinngitsoorneranni atuutissaaq. Attartortitsisup akileeqqusissutaa piffissaq eqqorlugu akiliiffissap ullup kingulliup kinguninngua tunniunneqassaaq, tassanilu paatsuugassaanngitsumik allassimassaaq, akiligassanut kinguaattoorutit akilerneqanngippata imaluunniit piffissaliussap naannginnerani naafferartumik akilersuinissamik isumaqatigiissuteqartoqanngippat attartorneq atorunnaarsinneqassasoq.
Imm. 2. Akiliinngitsoornerup malitsigisaanik attartornermik isumaqatigiissut namminersortup attartortitsisup atorunnaarsissaavaa, takuuk § 55, imm. 1, tamanna pillugu piumasaqaatip allakkatigut attartortumut anngunnerata kingorna attartortup kingusinnerpaamik ulluinnaat pingasut qaangiunneranni akiligassanut kinguaattoorutini akilersimanngippagit. Attartortitsisup akileeqqusissutaa piffissaq eqqorlugu akiliiffissap ulluata kingulliup kinguninngua tunniunneqassaaq, tassanilu erseqqaarissumik takuneqarsinnaassaaq ulloq akileeqqusiffik naatinnagu akilerneqarsimanngippat attartornermut isumaqatigiissut atorunnaarsinneqassasoq.
Imm. 3. Namminersorlutik Oqartussat kommunillu inissiaataanni attartortittakkani piumasaqaat pillugu akiliummik aamma atorunnaarsitsinerup atorunnaarsinneranut akiliummik attartortitsisoq akileeqqusisinnaavoq.
Imm. 4. Attartortoq ineqarnermut, imermut kiassarnermulluunniit akilinngitsuukkaminik akiitsoqartoq akilersuinissamut nammineq piumassutsiminik Namminersorlutik Oqartussanut imaluunniit kommunimut attartortitsisutut isumaqatigiissuteqarsinnaatitaavoq, qaammatit sisamat sinnerlugit sivisussuseqartinneqarsinnanngitsoq.
Imm. 5. Akilersuinissamut isumaqatigiissuteqarnissamut piumasaqaatit makkua naammassineqarsimassapput:
1) Attartortup Namminersorlutik Oqartussat imaluunniit kommuni attartortitsisut akilersuinissamik isumaqatigiissuteqarnissamik qinnuigissavai, allakkatigut akileeqqusissutip attartortumut apuutereernerata kingorna kingusinnerpaamik ulluinnaat qulit qaangiutsinnagit.
2) Attartortoq akilersuinissap isumaqatigiissutigineqarneranut akitsuummik akiliuteqassaaq aammalu qaammatit akilersuiffiusut ingerlaneranni qaammatit tamaasa akiliuteqartassalluni. Pilersitsinermut akiliut qaammammullu akiliut akilersuinissamut isumaqatigiissutip isumaqatigiissutigineqarnerani aningaasanngorlugit akilerneqassapput.
Imm. 6. Attartortut uku akilersuinissamut aaqqissuussinissamut pisinnaatitaaffeqassanngillat:
1) Ukiut pingasut kingulliit iluanni inissiamik siusinnerusukkut attartornerminni ineqarnermut aningaasartuutinik ingerlaavartunik akiliinngitsoornermikkut imaluunniit akilersuinissamik aaqqissuussinermik sumiginnaanermikkut attartornermut isumaqatigiissummik sumiginnaasimasut.
2) Akilersuinissamik aaqqissuussineq suli atuuttoq ingerlatsereersut.
3) Akiligassanut kinguaattoorutinut pineqartunut matussutissanik pisortanit ikiorsiissutinik imaluunniit pisortanit allanik pisartagaqalersimasut.
Imm. 7. Namminersorlutik Oqartussat kommunillu inissiaataanni attartortittakkani imm. 3 aamma 5 naapertorlugit akiliutit pillugit akiliutillu angissusii pillugit malittarisassanik Naalakkersuisut aalajangersaasinnaapput.
Imm. 8. Namminersorlutik Oqartussat kommunillu inissiaataanni attartortittakkani attartortitsisut ingerlatsivimminni tamani attartortitsinermi annaasanut akilersukkanullu annaasanut ataatsimut nalimmassaanissamik, naatsorsuutini immikkut ittuni kontomik ataatsimoorussamik pilersitsisinnaapput, kontomullu tassunga ingerlatsiviit ataasiakkaat ukiumut annaasassaattut missingersuusiarineqartut, inigisap annertussusaani kvadratmeterimut ukiumut 25 kroninit ikinnerusinnaanngitsut immikkoortineqartassallutik. Konto naatsorsuutinut tunngasoq, ukiumoortumik naatsorsuusiorneqartartussaq, aqqutigalugu annaaneqarsimasut akilerneqartassapput.
§ 57. Attartortitsisup attartorneq erngerluni atuutilersussamik atorunnaarsissinnaavaa, attartortoq illumut, attartortitsisumut, taassuma atorfeqartitaannut, illumi attartortunut allanut inatsisit malillugit eqqortumik illumiittunut annertuumik ajoqutaasumik pissusilersorpat, taamatuttaaq:
1) Attartortoq inunnut pineqartunut timikkut imaluunniit tarnikkut nakuuserpat imaluunniit timikkut persuttaanissamik siorasaarippat.
2) Attartortup pissusilersornera illumut imaluunniit inunnut pineqartunut ulorianartorsiortitsisinnaappat, matumani ilanngullugit sakkunik atuisimappat imaluunniit attartorneqartumi atortunik navianartunik uninngatitaqarpat.
Imm. 2. Attartortitsineq atorunnaarsinneqarsinnaavoq, tamatumani pissusilersornerit imm. 1-imi taaneqartut attartortumit namminermit, attartortup inoqutaanit allanilluunniit attartortup attartukkamut imaluunniit illuummut allatigut isertissimasaanit piliarineqarnersut apeqqutaatinnagu.
§ 58. Pissutsit §§ 55-57-imi taaneqartut pissutaallutik attartorneq atorunnaarsinneqarpat, attartortoq pisussaavoq erngerluni attartukkaminit anissalluni, aammalu ineqarnermut akiliut, aammalu attartortup inissiamiit nuunnissaanut siumut nalunaarfissap nalinginnaasup naanissaata tungaanut attartukkamut akiligassat allat akilissallugit. Kiisalu attartortoq pisussaavoq sumiginnaanerup kingunerisaanik attartortitsisup annaasai taarsissallugit, matumani ilanngullugit attartukkamit anisitsinermut aningaasartuutit.
Imm. 2. Attartortitsisup attartukkap allamut attartorteqqinnissaa anguniassavaa. Attartortitsisup allamut attartortitsinermini isertitai piffissamiluunniit imm. 1-imi taaneqartumi isertitassaralui attartortumut piumasaqaatigisaanit ilanngaatigineqassapput.
Imm. 3. Attartornermik atorunnaarsitsineq attartortumillu anisitsineq tassungalu ilanngullugu anisitsinermi Namminersorlutik Oqartussat kommunillu attartortumik inisseqqinnerat, attartortup pequtaanik sivisunerpaamik qaammatit pingasut tikillugit toqqortarineqarnissaat attartortullu pequtaanik igitsineq pillugu malittarisassanik Naalakkersuisut aalajangersaasinnaapput.
Kapitali 12
Attartortup attartukkamik qimatsinera
§ 59. Inissiaq taamaatitsinissamut kalerriinerup naanissaa kingusinnerpaamik ulluinnaat 15-it sioqqullugit qimanneqarsimassaaq. Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaat qaqorsarlugit qalipaaneq, iikkanik qalipaaneq imaluunniit ungalitsersuineq kiisalu eqqiaaneq. Natit nutaamik lakkersimasutut isikkoqassapput, taamaattorli takuuk imm. 3.
Imm. 2. Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Suliaq attartornermik taamaatitsineq imaluunniit atorunnaarsitsineq naapertorlugu inissiap qimanneqarnera sioqqullugu aamma inissiap misissorneqarnissaa sioqqullugu naammassineqarsimassaaq.
Imm. 3. Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa. Nalinginnaasumik kingullermik iluarsaassisoqarneraniit qaammatinit pingasunit sivikinnerusoq ingerlasimappat atuisimanerit takussaasut kisiisa iluarsaanneqarnissaat attartortitsisup allakkatigut akuerisinnaavaa.
Imm. 4. Attartortitsisup imm. 1-imi aamma 2-mi aalajangersakkat sanioqqussinnaavai, attartornerup atorunnaarnerata nutaamillu isumaqatigiissuteqarnerup kingorna inissiap iluarsaanneqarnissaa annertuunik ajornartorsiutitaqarpat. Attartornerup atorunnaarnerani tamatumunnga taarsiullugu attartortoq inissiamik attartornerup nalaani nungullarnernut naleqquttumik annertussusilinnik akiliuteqassaaq. Akiliutissaq qaammammut ataatsimut inimut ataatsimut 50 kr.-inik annertussuseqarpoq. Attartortitsisup nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai.
Imm. 5. Inissiamit aninermi nalinginnaasumik iluarsaassisarneq aamma attartortup tamatumunnga atatillugu aningaasartuutigisaanut ajunngitsorsiassaqartarneq pillugu Naalakkersuisut maleruagassiorsinnaapput.
§ 60. Attartortitsisup § 59 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai, taamaattorli takuuk imm. 2.
Imm. 2. Piffissami attartorfiusumi tupanik allanilluunniit pujortartoqarsimappat inissiap pujorsunninnermik tipaarsaanermut aningaasartuutit tamarmiusut imm. 1 malillugu annikillineqarsinnaanngitsut akilernissaannut attartortoq akisussaavoq. Attartortitsisoq pujorsunninnermik tipaarsaanermik isumaginnissaaq.
§ 61. Attartorneq atorunnaarsinneqartussanngorsimappat imaluunniit inissiaq allamik pissuteqartumik qimanneqartussanngorsimappat attartortitsisoq attartortullu piffissaq nutserfissaq inissiamillu misissuisoqarnissaa pillugu naapinnissaq isumaqatigiissusiorfigissavaat. Misissuineq attartorneq pillugu isumaqatigiissutip atorunnaarnissaa kingusinnerpaamik ullut 15-it sioqqullugit ingerlanneqassaaq. Attartortoq sinniisumik ilaqarluni misissuinermut peqataanissamut pisinnaatitaavoq. Attartortitsisup sivikinnerpaamik ullunik arfineq marlunnik siumut ilisimatitsinermigut attartortoq misissuinermut peqataaqqullugu noqqaaffigissavaa. Attartortoq imaluunniit attartortitsisoq Pisortani Digitalimik Allakkerinermut ilaanngippat, aggeqqussut najukkami tunniunneqassaaq imaluunniit attartortup mailitut innersuussaanut nassiunneqarluni.
Imm. 2. Misissuinermi attartortitsisoq misissuisimaneq pillugu nalunaarusiussaaq, tassanilu amigaataasinnaasut paarinerlutallu attartortitsisup isumaa malillugu attartortup akisussaaffigisassai allassimassapput. Attartortoq taakkununnga isumaqataanngippat, tamanna attartortup isumai taallugit nalunaarusiami allanneqassapput. Nalunaarusiaq misissuinermut atatillugu illuatungeriinnit atsiorneqassaaq. Attartortoq imaluunniit sinniisoq misissuinermut nalunaarusiap assinganik tunineqassaaq. Attartortup piumasarippagu, pissutissaqanngitsumik kinguarsaanertaqanngitsumik suliassat attartortitsisup isumaa malillugu attartortumit akilerneqartussaasut aningaasartuutissaannik missingersuummik allakkatigut nalunaarfigineqassaaq.
Imm. 3. Attartortoq imaluunniit attartortumut sinniisoq Pisortani Digitalimik Allakkerinermut ilaanngippat nuunnissaq kingusinnerpaamik ullunit arfineq pingasunik sioqqullugu allakkerivikkut imaluunniit mailikkut najukkani nassiussiffiusussaq tunniutissavaa.
§ 62. Attartortoq taassumaluunniit sinniisaa misissuinermut takkutinngippat, attartortitsisoq pisinnaatitaavoq nalunaarusiaq tunngavigissallugu attartortullu qularnaveeqqusiissutaasa nalinginnaasumik iluarsaassinermut aningaasartuutissanut, takukkit § 59, imm. 2 aamma § 60, matussutissatut aamma attartornermik isumaqatigiissut naapertorlugu attartortup pisussaaffiinut matussutigineqarnissannut atussallugit.
Imm. 2. Attartortitsisup amigaatit misissuinerup nalaanni pissusissaatut malugineqarsinnaasimagaluit piumasaqaatigisinnaanngilai, tamatumani attartortoq peqquserlulluni iliuuseqarsimanngippat.
Imm. 3. Attartortitsisoq inissiami qimanneqartumi paarsinerluttoqarsimaneranik aserorterisoqarsimaneranilluunniit uparuaasimappat, pissutsit annertussusiilu immikkoortillugit uppernarsaaserneqassapput.
Kapitali 13
Nakkutilliineq
§ 63. Namminersorlutik Oqartussat kommuniluunniit inissianik allaffissornikkut aqutsisussamik avataaneersumik pissarsisimappat, inissianik aqutsisup avataaneersup inissianik attartortittakkanik aqutsinera inatsit manna aamma malittarisassat inatsit manna naapertorlugu atulersinneqartut imaluunniit ingerlatiinnarneqartut naapertorlugit ingerlanersoq pillugu inissianik aqutsisup kukkunersiuisua nalunaarummik suliaqassasoq Naalakkersuisut imaluunniit kommunalbestyrelsip nakkutigissavaa.
Imm. 2. Kommuni nammineerluni inissiaatiminik attartortittakkanik allaffissornikkut aqutsinermik isumaginnippat, inatsit manna aamma aalajangersakkat inatsit manna naapertorlugu atulersinneqartut imaluunniit ingerlatiinnarneqartut naapertorlugit inissianik aqutsineq isumagissagaa nammineq ukiumoortumik kukkunersiuisuni nalunaaruteqartissavaa.
Imm. 3. Namminersorlutik Oqartussat kommunillu inissianik attartortittakkanik ingerlatsiviillu aqutsinerannik nakkutilliineq pillugu Naalakkersuisut malittarisassanik aalajangersaasinnaapput.
§ 64. Namminersortoq attartortitsisoq inissianik attartortittakkanik tallimanik amerlanerusunilluunniit, inatsit manna naapertorlugu attartorneqartunut, pigisalik kukkunersiuisumik nalunaarsorsimasumik imaluunniit naalagaaffimmit akuerisaasumik atuisussaatitaavoq. Inatsit manna aamma inatsit malillugu atulersinneqarsimasut imaluunniit ingerlatiinnarneqartut malittarisassat naapertorlugit inissiat attartortinneqarneri pillugit kukkunersiuisoq nalunaaruteqassaaq. Kukkunersiuisup nalunaarutaata assilinera attartortumut tunniunneqassaaq.
Kapitali 14
Ineqarneq pillugu Maalaaruteqartarfik
§ 65. Inissiani attartortittakkani attartortup attartortitsisullu akornanni isumaqatigiinngissutaasut suliarineqartarnissaannut Ineqarneq pillugu Maalaaruteqartarfimmik siulittaasulimmik sisamanillu ilaasortaqartumik Naalakkersuisut pilersitsisinnaapput.
Imm. 2. Siulittaasoq taassumalu sinniisua Naalakkersuisunit toqqarneqassapput. Siulittaasoq taassumalu sinniisua inatsisilerituutut kandidatitut angusinikuussapput, ineqarnermullu tunngassutilinnik immikkut ilisimasaqartuussallutik. Maalaaruteqartarfimmi ilaasortaq ataaseq taassumallu sinniisussaa INI A/S-imit aamma Iserit A/S-imit peqatigiillutik innersuussinerat malillugu Naalakkersuisunit toqqarneqassaaq. Maalaaruteqartarfimmi ilaasortaq ataaseq taassumallu sinniisussaa kommunit peqatigiillutik innersuussinerat malillugu Naalakkersuisuniit toqqarneqassaaq. Maalaaruteqartarfimmi ilaasortaq ataaseq taassumallu sinniisussaa Kalaallit Nunaanni Sulisitsisut innersuussinerat malillugu Naalakkersuisuniit toqqarneqassaaq. Maalaaruteqartarfimmi ilaasortaq ataaseq taassumallu sinniisussaa SIK, IMAK aamma PPK-miit innersuunneq malillugu Naalakkersuisuniit toqqarneqassaaq. Maalaaruteqartarfimmut ilaasortaasut sisamat sinniisuilu inissiaateqarnernut tunngassuteqartunut ilisimasaqartuussapput.
Imm. 3. Siulittaasumik, ilaasortanik taakkununngalu sinniisunik toqqaaneq ukiut sisamat tikillugit pissaaq.
Imm. 4. Siulittaasoq taassumaluunniit sinniisussaa piginnittuunermut, inissianut imaluunniit attartornermut kattuffinnut immikkut attuumassuteqartuussanngilaq imaluunniit inissianik tuniniaasarnermi inuussutissarsiuteqarnikkut akulerusimasuussanngilaq.
Imm. 5. Maalaaruteqartarfimmi ilaasortaq sinniisorluunniit piffissaalluartillugu ataatsimiigiaqqusaareernermi kingorna ataatsimiigiarnissaminut pisussaatitaavoq. Ineqarneq pillugu maalaaruteqartarfimmi ataatsimiinnissamut takkutinngitsoornerup kingunerisassai pillugit Naalakkersuisut malittarisassaliorsinnaapput.
§ 66. Ineqarneq pillugu Maalaaruteqartarfiup illumik ineeqqanillu aalajangersimasumik najugaqarfissatut attartorneq, tassunga ilanngullugu allamut attartortitsineq, pillugu isumaqatigiissummit aallaaveqartut isumaqatigiinngissutit suliarisinnaavai, attartortoq inuttut namminiussuseqarpat.
§ 67. Naalakkersuisut maalaaruteqartarfiup atortussatut pisariaqartitaannik atugassiissapput, aammalu pisariaqartitsinikkut allaffeqarfimmiit ikiorneqarnissaat isumagissallugu.
Imm. 2. Maalaaruteqartarfiup sulineranut aningaasartuutit Naalakkersuisunit akilerneqartassapput, kiisalu allaffissornermut il.il. aningaasartuutit. Ineqarneq pillugu maalaaruteqartarfimmi ilaasortat Inatsisartunut, Naalakkersuisunut il.il. ilaasortat akissarsiaqartitaanerat pillugu Inatsisartut inatsisaanni maleruagassat naapertorlugit akissarsiaqartinneqassapput, ullormusiaqartinneqarlutik angalanermilu aningaasartuutinut ajunngitsorsiassaqartinneqassallutik. Aningaasartuutit taakku aningaasanut inatsimmi ukiumut aningaasaliissutit iluanniit akilerneqartassapput.
Imm. 3. Ineqarneq pillugu maalaaruteqartarfik ukiumoortumik nalunaarummik saqqummiussisassaaq, ilaatigut suliassat takkuttut suliallu naammassineqartut pillugit kisitsisitigut takussutissanik, kiisalu aalajangiisarnerit ataasiakkaat inernerinik naatsunngorlugit saqqummiunneqarnerinik imaqartumik.
Imm. 4. Aningaasartuutinut imm. 2-mi taaneqartunut matussutissatut, attartortitsisoq tallimanik amerlanerusunilluunniit inissianik attartugassaatilik ukiumoortumik ineqarnermut akiliutit aqqutigalugit akiliutissat attartortunut ataasiakkaanut Naalakkersuisut akileeqqusisinnaallutillu akiligassamik isumannaareqqusisinnaapput. Attartortitsisup akiliutissat ukiumi akiliiffiusussami kingusinnerpaamik januaarip 31-anni Naalakkersuisunut akilissavai. Akiliutissaq piffissaq eqqorlugu akilerneqanngippat, Naalakkersuisut missingiillutik pisassanik attartortitsisumut ilanngaateqarsinnaapput. Akiliutissaq ukiumoortumik aningaasanut inatsimmi oqaasertaliinikkut annertussusilerneqartassaaq.
Imm. 5. Naalakkersuisut maalaaruteqartarfiup sulineranut, matumani ilanngullugu Ineqarneq pillugu Maalaaruteqartarfimmut maalaaruteqarnermut akiliuteqartarneq pillugit sukumiinerusunik malittarisassaliorsinnaapput.
Imm. 6. Ineqarneq pillugu maalaaruteqartarfiup suleriaasissani nammineq aalajangersassavaa.
§ 68. Ineqarneq pillugu Maalaaruteqartarfiup maalaarutit makkununnga tunngasut attartortunit suliakkiissutigineqartut suliarisarpai, takuuk § 66:
1) Inissiani attartortittakkani namminersortunit pigineqartuni ineqarnermut akiliutit naatsorsorneri, takuuk § 24.
2) Ineqarnermut akiliutinik qaffaanissamik siumoortumik ilisimatitsisarnermi piumasarisat, takukkit § 22, imm. 1 aamma § 24, imm. 4-5.
3) Aserfallatsaaliuineq iluarsaassinerlu, takukkit § 33 aamma § 34.
4) Inissiap iserterfigineqarnerani qanoq issusia, takuuk § 35.
5) Attartortup attartukkaminik atuinera, tassunga ilanngullugit ileqqoreqqusanik unioqqutitsinerit, takuuk § 38.
6) Inissiamit aninermi inissiap qanoq issusia (iluarsaassineq nalinginnaasoq), takuuk § 59.
Imm. 2. Imm. 1-imi eqqaaneqartuni pissutsinut tunngasut maalaarutit pisortat ingerlatsiviinut allanut suliassanngortinneqarsinnaanngillat.
§ 69. Maalaarut Ineqarneq pillugu maalaaruteqartarfimmut allakkatigut tunniunneqassaaq, ersarissarneqassallunilu attartortup suna maalaaruteqartarfiup isummerfigissaneraa. Maalaarut attartortitsisup suliarinninnerata naammassineranik nalunaarutip tiguneqarneranit kingusinnerpaamik sapaatit akunneri sisamat qaangiutsinnagit Ineqarneq pillugu maalaaruteqartarfimmut attartortumit suliassanngortinneqassaaq, kingusinnerpaamilli attartukkap atorunnaarsinneraniit qaammatit aqqaneq marluk qaangiutsinnagit. Maalaarummut ilaatinneqassapput uppernarsaatit, suliap suliarineqarnissaanut atorfissaqartinneqartut, attartortup suliaritikkusutaanut tunngasut.
Imm. 2. Ineqarneq pillugu maalaaruteqartarfimmi maalaarutip suliarineranut attartortoq akiliummik akiliuteqassaaq. Attartortoq maalaarutigisamini ilaannakortumik tamakkiisumilluunniit ajugaappat maalaaruteqarnermut akiliut utertinneqassaaq, imaluunniit suliaq Ineqarneq pillugu maalaaruteqartarfimmi suliarineqarnissamut naleqqutinngitsutut itigartinneqarpat.
Imm. 3. Attartortup suliaq eqqartuussivinnut suliakkiissutigineqareersoq ineqarneq pillugu maalaaruteqartarfimmut suliakkiissutigineqarnissaa kissaatigippagu, maalaarutip piviusumik suliarinissaa maalaaruteqartarfiup itigartitsissutigissavaa.
§ 70. Maalaarut piffissaliussap kingorna imaluunniit maalaaruteqartarfimmi suliarineqarsinnaanngitsutut nalilerneqarsimappat Ineqarneq pillugu maalaaruteqartarfiup maalaarutip suliarinissaanik itigartitsissaaq. Ineqarneq pillugu Maalaaruteqartarfiup maalaarut itigartitsissutigissavaa, suliaq ilisimasalinnit takusaanermik naliliinermilluunniit imaluunniit illuatungeriit takunnittullu nassuiaateqarnerinik atuinani illersorneqarsinnaasumik paasissutissiissutigineqarsinnaanngippat.
Imm. 2. Maalaarummi attartortumut tapersersuisoqarsinnaannginnera ersarippat maalaarutip suliarinissaa maalaaruteqartarfiup itigartissinnaavaa.
Imm. 3. Maalaaruteqartarfiup imm. 1-imi 2-milu aalajangigassanik taaneqartunik aalajangiinissamut allattoqarfik pisinnaatissinnaavaa.
Imm. 4. Maalaaruteqartarfiup allatseqarfiata siulittaasullu maalaaruteqartarfiup ataatsimiinnissaanut suliassat piareersassavaat. Suliaq aalajangersimasoq suliamik saqqummiussinermik aamma suliap qanoq aalajangiiffigineqarnissaanik siunnersuummik suliaqarnermut atatillugu misissorneqassasoq imaluunniit suliamut innersuussutissamik suliaqarnissamut atatillugu annertunerusumik erseqqissaassuteqarfigineqarnissaa siunertaralugu misissorneqassasoq siulittaasoq aalajangiisinnaavoq. Tamatumunnga atatillugu siulittaasoq suliami illuatungerisami, pisortani oqartussani inuinnarnilu paasissutissanik pissarsiniarsinnaavoq. Siulittaasup suliassat suliamik saqqummiussinertallit aamma suliap qanoq aalajangiiffigineqarnissaanik siunnersuutitalerlugit innersuussutitalerlugit maalaaruteqartarfimmut saqqummiutissavai.
Imm. 5. Suliap suliarisassanngortinneqarluni ilanngunneqarneraniit kingusinnerpaamik sapaatit akunneri marluk qaangiunnerini maalaaruteqartarfiup allattoqarfiata suliami illuatungiliuttoq suliakkiissuteqarneq pillugu ilisimatissavaa, tassanilu nalunaarutip nassiunneraniit sapaatit akunneri pingasut qaangiutsinnagit illuatungiliuttup suliamut isummaminik saqqummiussisinnaanera allanneqassaaq. Piffissamik killissarititaasoq tamanna maalaaruteqartarfiup sivitsorsinnaavaa, tamatumunnga immikkut ittunik pissutissaqartoqarpat.
Imm. 6. Suliami peqataasunut allanulluunniit siulittaasup apeqqutigisaanut akissuteqarnissamut piffissamik allattoqarfik aalajangersaassaaq, nalinginnaasumik sapaatit akunneri pingasut qaangernagit. Nalunaarutip nassiunneraniit piffissamut killissarititaasoq allattoqarfiup sivitsorsinnaavaa, tamatumani immikkut ittunik pissutissaqartoqarpat.
Imm. 7. Siulittaasup nammineq inissiaq maalaarutigineqartoq arlaannaannulluunniit attuumassuteqanngitsumik suliamut attuumassuteqanngitsunit takuniarlugu misissorteqqullugu maalaaruteqartarfiup allattoqarfia noqqaaffigisinnaavaa. Suliami peqataasut sivikinnerpaamik sapaatit akunneri marluk sioqqullugu tassunga aggersarneqassapput. Takuniaalluni misissuinermut aningaasartuutit Naalakkersuisunit akilerneqassapput.
Imm. 8. Suliami peqataasut takkunnerminni maalaaruteqartarfimmut nassuiaateqarsinnaanngillat.
§ 71. § 70, imm. 4-mi misissuinerit taaneqartut naammassineqarnerinit kingusinnerpaamik sapaatit akunneri sisamat qaangiutsinnagit maalaaruteqartarfiup allattoqarfia suliami inatsisilerinikkut tunngavii piviusullu pillugit nassuiaasumik suliap saqqummiunnissaanut missingiummik suliaqassaaq kiisalu suliap aalajangiiffiginissaanut siunnersuuteqarluni. Suliamik saqqummiussineq maalaaruteqartumut attartortitsisumullu tusarniutigalugu nassiunneqassaaq tusarniaanermillu akissuteqarnissamut ulluinnarnik 14-inik piffissaliisoqarluni. Suliamik saqqummiussineq inaarutaasoq illuatungeriit tusarniaanermi akissutai ilaatillugit siulittaasumut saqqummiunneqassaaq. Suliamik saqqummiussineq siulittaasumit akuerineqarpat suliamik saqqummiussineq suliap aalajangiiffiginissaanut siunnersuutitalik illuatungeriinnillu tusarniaanermi akissutit ilaatillugit maalaaruteqartarfimmut siulittaasumit saqqummiunneqassaaq.
Imm. 2. § 70, imm. 6 malillugu akissuteqarnissamut piffissaliussaq akissutissat tunniunneqarnatik naappat nipaanneq akissuteqarsimanngitsup illuatungerisaanut iluaqutaanerpaatut maalaartarfimmit paasineqarsinnaavoq pingaartumillu aalajangiinermut tunngavittut tamanna saqqummiussinnaallugu.
Imm. 3. Ineqarneq pillugu maalaaruteqartarfimmi aalajangigassat nalinginnaasumik amerlanerussuteqartoqarneratigut aalajangiiffigineqartassapput. Taasinermi amerlaqatigiittoqarneratigut siulittaasup taasinera aalajangiisuusarpoq. Siulittaasup imaluunniit taassuma sinniisussaata aammalu ikinnerpaamik ilaasortat marluk imaluunniit takkua tamarmik immikkut sinniisussaat ataatsimiinnermi peqataatillugit Ineqarneq pillugu maalaaruteqartarfik aalajangiisinnaatitaavoq.
Imm. 4. Ineqarneq pillugu maalaaruteqartarfiup aalajangiinera allanneqassaaq. Aalajangiineq tamarmiusunit akuerineqanngippat, taamatuttaaq taasinermut tunngatillugu paasissutissat allanneqassapput.
Imm. 5. Ineqarneq pillugu maalaaruteqartarfiup aalajangiinera maalaaruteqartumut illuatungerisallu sinnerinut allakkatigut nalunaarutigineqassaaq. Aalajangiineq tunngavilersorneqassaaq. Aalajangiineq tamarmiusunit akuersissutigineqanngippat, tamanna aalajangiinermi allanneqassaaq tunngavilersuutaa taasinerillu qanoq inerneqarneri ilanngullugit.
Imm. 6. Ineqarneq pillugu maalaaruteqartarfiup aalajangiineri attartortitsisumut pituttuisutut sunniuteqarput. Attartortitsisoq aqutsisumik avataaneersumik atorfinitsitsisimappat maalaaruteqartarfiup aalajangiineri aamma taassumunnga pituttuisutut sunniuteqassapput.
Imm. 7. Maalaaruteqartarfiup aalajangiinerinut atatillugu aalajangiinerup illuatungeriinnut nalunaarutigineqarnerata kingorna, kingusinnerpaamik sapaatit akunneri arfinillit qaangiunnerini eqqartuussivinnut suliakkiissutigineqarsinnaapput. Eqqartuussivinnut suliassanngortitsineq kinguartitsisumik sunniuteqassanngilaq.
Kapitali 15
Ikaarsaariarnermi malittarisassat aamma atuutilernera
§ 72. Inatsisartut inatsisaat ulloq 2027-imi januaarip aallaqqaataani atuutsilersinneqassaaq.
Imm. 2. Peqatigisaanik Inissianik attartortitsisarneq pillugu Inatsisartut peqqussutaat nr. 2 12. maj 2005-imeersoq atorunnaarpoq.
Imm. 3. Inissianik attartortarneq pillugu Inatsisartut peqqussutaat, takuuk Namminersorlutik Oqartussat inatsimmik nalunaarutaat nr. 32, 2. april 2025-imeersoq, naapertorlugu najoqqutassat Inatsisartut inatsisaat manna naapertorlugu malittarisassatigut allanngortinneqarnissaasa imaluunniit atorunnaarsinneqarnissaasa tungaanut atuutiinnassaapput.
§ 73. Attartorneq pillugu isumaqatigiissutit atuuttut, attartortoq inuttut namminiussuseqarpat, Inatsisartut inatsisaat manna malillugu allannguutit ilanngullugit ingerlatiinnarneqassapput, taamaattorli takuuk imm. 2.
Imm. 2. § 36, imm. 1, oqaaseqatigiit kingulliit aamma § 60, imm. 2 Inatsisartut inatsisaata atulersinnerata kingorna isumaqatigiissutigineqartunut attartorneq pillugu isumaqatigiissutinut atorneqassapput.
Namminersorlutik Oqartussat, ulloq 20. novemberit 2026
Jens-Frederik Nielsen (atsior.)
Naalakkersuisut Siulittaasuat
-
PDF (0.81MB)
-
PDF (0.17MB)
-
PDF (0.16MB)