Quppernerup imai iserfigikkit
Oqaatsit toqqakkit
Ujaasinermut uterit
Inatsisit
Nr. 54
20. novembari 2026
Akuerineqarpoq

Aalisarneq pillugu Inatsisartut inatsisaata allanngortinnissaa pillugu Inatsisartut inatsisissaattut siunnersuut (Aalisarneq pillugu Siunnersuisoqatigiit aamma Aalisarnerup Piujuartitsilluni Ineriartortinneqarneranut Siunnersuisoqatigiit il.il. pilersinneqarnissaat pillugit malittarisassanik aalajangersaaneq)

§ 1

 

Aalisarneq pillugu Inatsisartut inatsisaat nr. 29, 23. maj 2024-meersumi tulliuttut allanngortinneqarput:

 

1. § 3, nr. 15, ima oqaasertalerneqassaaq:

”15)  ”Piareersaaneq”: pisanik suliarinninnerit tamarmik, saliineq, niaquiaaneq, sikulersuineq qerititerinerlu minillugit.”

 

2. § 3, nr. 27, ima oqaasertalerneqassaaq:

”27) ”Nakkutilliinermi oqartussat”: Kalaallit Nunaanni Aalisarnermut Piniarnermullu Nakkutilliisoqarfiup aamma sakkutuut imarsiortut aalisarnermik nakkutilliisut kiisalu § 5, imm. 2 naapertorlugu oqartussaasutut toqqarneqarsimasut.”

 

3. § 5, imm. 1-2 ima oqaasertaqassapput:

”  Kalaallit Nunaanni Aalisarnermut Piniarnermullu Nakkutilliisoqarfiup aamma sakkutuut imarsiortut aalisarnermik nakkutilliinermi ingerlatsisut inatsit, takuuk kapitel 14, naapertorlugu iliuuseqarnersut misissussavaat nakkutigalugillu.

  Imm. 2. Naalakkersuisut nakkutilliinermik allanik oqartussanik toqqaasinnaapput, Kalaallit Nunaanni Aalisarnermik Piniarnermillu Nakkutilliisoqarfiup aamma sakkutuut imarsiortut aalisarnermik nakkutilliisut toqqarnagit.”

 

4. § 10, imm. 1, oqaasertalerneqassaaq imatut:

”  Akuersissut ingerlatsisumut aalajangersimasumut angallammik aalajangersimasumik pigisalimmut atulersinneqassaaq, tak. § 9. Akuersissummik piginnittoq kisimi aalisariummik aalisarsinnaatitaavoq. Akuersissutit 6 meterit l.o.a. ataallugit angallatitallit suliffeqarfinnut tunniunneqarsinnaanngillat.”

 

5. § 15-imi ilanngunneqassaaq nr. 4-p kingorna, normutut nutaatut:

”5) angallatit 6 meterinit naannerusut, akuersissummi allattorsimasut,”

 

6. § 32, imm. 8, oqaasertalerneqassaaq imatut:

” Imm. 8.  Imm. 7-mi oqaaseqatigiit siulliit malillugit aalajangersakkanik aalajangersaanermi Naalakkersuisut Inatsisartunut immikkut ilisimatitsissuteqassapput.”

 

7. § 33, imm. 1-imi nr. 3-p kingorna normutut nutaatut ilanngunneqassaaq:

”4) Tunumi avataasiorluni qaleralinniarneq: Ukiut qulit.”

 

Nr. 4 aamma 5 tamatuma kingorna nr. 5-inngorlutillu nr. 6-inngorput.

 

8. Kapitali 13-mut qulequtaq ima allanneqassaaq:

 

”Kapitali 13

Aalisarneq pillugu Siunnersuisoqatigiit aamma Aalisarnerup Piujuartitsisumik Ineriartortinnissaanut Siunnersuisoqatigiit”

 

9. § 54 imatut oqaasertalerneqassaaq:

”  § 54.  Naalakkersuisut aalisarneq pillugu siunnersuisoqatigiinnik pilersitsissapput (“Aalisarneq pillugu Siunnersuisoqatigiit”).

  Imm. 2.  Sammisat tunngaviusut pillugit ingerlaavartumik Naalakkersuisut Aalisarneq pillugu Siunnersuisoqatigiinnut ilisimatitsisassapput, ukulu pillugit oqaaseqaateqarnissamut qinnuigissallugit:

1)  inuussutissarsiutigalugu aalisarnerup ingerlanneqarnissaa aaqqiiffigineqarnissaalu pillugit pilersaarusiorneq malittarisassaliornerlu,

2)  pisaqarsinnaassutsip, pisassiissutit, aalisarnermi atortunik atuinissap, umiarsuarnik tunitsiviliinissat kiisalu pisanik kaaviiaartinneqarnissap aalajangersarneqarnerat, aamma

3)  aalisarnerup inuussutissarsiutitut nungusaataanngitsumik ineriartortinneqarnera siuarsarniarlugu suliniutit.

  Imm. 3.  Aalisarneq pillugu Siunnersuisoqatigiit sammisanik namminneerlutik suliniuteqarlutillu suliarinnissinnaapput kiisalu tamanna pillugu oqaaseqaateqarsinnaallutik.

Imm. 4. Naalakkersuisut suliat kinguartinneqarsinnaanngitsut pillugit aalisarneq pillugu siunnersuisoqatigiinni ilaasortat tamaasa allakkatigut tusarniaaffigisassavaat.

Imm. 5. Aalisarneq pillugu Siunnersuisoqatigiit suliaminnut qanoq suleriuseqassanerlutik aalajangersaassapput.

  Imm. 6. Aalisarneq pillugu Siunnersuisoqatigiinnut allattoqarfimmik Naalakkersuisut isumaginnissapput.

  Imm. 7. Aalisarnermut tunngassutilinni soqutigisaqaqatigiit kattuffii attuumassutillit ilaasortanngortinneqarsinnaapput. Naalakkersuisut ilaasortaanermut piumasaqaatinik aamma siunnersuisoqatigiit katitigaanerannut malittarisassanik erseqqinnerusunik aalajangersaasinnaapput. Aalisarneq pillugu Siunnersuisoqatigiinni ilaasortanngornissamut piumasaqaatitut nipangiusimasussaatitaanermut uppernarsaasoqassasoq Naalakkersuisut piumasarisinnaavaat.”

 

10. § 54-ip kingorna ilanngunneqassaaq:

”  § 54 a. Aalisarnerup ineriartorneranik nalilersuisartussanik immikkut ilisimasalinnik siunnersuisoqatigiinnik (Aalisarnerup Piujuartitsisumik Ineriartortinneqarnissaanut Siunnersuisoqatigiit)-nnik Naalakkersuisut pilersitsissapput. Aalisarnerup Piujuartitsisumik Ineriartortinneqarnissaanut Siunnersuisoqatigiit aalisarnermi pissutsit pillugit Naalakkersuisunut siunnersuissapput, tassunga ilanngullugit aalisarnermi aningaasarsiornermut tunngasut pissutsit aamma aalisarnermik ineriartortitsinermi takussaalersut pillugit.
  Imm. 2.  Aalisarnerup Piujuartitsisumik Ineriartortinneqarnissaanut Siunnersuisoqatigiinnut allattoqarfimmik Naalakkersuisut isumaginnissapput.
  Imm. 3.  Aalisarnerup Piujuartitsisumik Ineriartortinneqarnissaanut Siunnersuisoqatigiit suleriusissaannik Naalakkersuisut aalajangersaasinnaapput.

  Imm. 4.  Aalisarnerup Piujuartitsisumik Ineriartortinneqarnissaanut Siunnersuisoqatigiit  suliassaat erseqqinnerusut, katitigaanerat, piffissaq suliffissaat il.il. pillugit malittarisassanik erseqqinnerusunik Naalakkersuisut aalajangersaasinnaapput. Siunnersuisoqatigiinni ilaasortanngornissamut piumasaqaatitut nipangiusimasussaatitaanermut uppernarsaasoqassasoq Naalakkersuisut piumasarisinnaavaat.”

 

11. § 77, imm. 3, oqaasertalerneqassaaq imatut:

” Imm. 3.  § 10-mi allanneqartoq naapertorlugu inuussutissarsiutigalugu aalisarnermut atorneqartunik angallatinik meterinik arfinilinnik angissusilinnik naannerusunilluunniit nalunaarsuineq kingusinnerpaamik 31. december 2028 naammassineqarsimassaaq.”

 

12. § 77, imm. 4-tut ilanngunneqassaaq:

” Imm. 4. Ukiumoortumik pisassiissutit minnerpaamik 75 %-iisa aalisarnissaannut pisussaaffeqarneq, tak. § 35 inatsisip atuutilerneraniit 1. januar 2032-p tungaanut atuutissanngilaq, sinerissamut qanittumi qaleralinniarnermut avannarpasissutsimut 68°30N-imut kiisalu 75°00N -ip kujataanut tunngatillugu.”



§ 2

 

Inatsisartut inatsisaat ulloq 1. januar 2027-mi atuutsilersinneqassaaq.

 

 

Kalaallit Nunaanni Namminersorlutik Oqartussat, ulloq 20. novemberit 2026

 

 

 

Jens-Frederik Nielsen (atsior.)

Naalakkersuisut Siulittaasuat

Allakkiat