Takornariartitsinermik ingerlataqarneq aamma inuussutissarsiutigalugu ingerlatsinermi zonenut immikkoortiterineq il.il. pillugit Inatsisartut inatsisaata allanngortinneqarnera pillugu Inatsisartut inatsisaat (Immikkut akuersissummik pissarsisinnaanerup, nalunaarsuisussaatitaanerup aamma uppernarsaasussaatitaanerup il.il. annertusineqarnerat)
§ 1
Takornariartitsinermik ingerlataqarneq aamma inuussutissarsiutigalugu ingerlatsinermi zonenut immikkoortiterineq il.il. pillugit Inatsisartut inatsisaanni nr. 62, 25. november 2024-meersumi tulliuttutut allannguisoqassaaq:
1. Maleruagassap taaguutaa ima oqaasertalerneqassaaq:
”Takornariaqarneq, zonenullu immikkoortiterineq pillugit Inatsisartut inatsisaat”.
2. § 1 ima oqaasertalerneqassaaq:
” § 1. Takornariartitsinermik ingerlataqarnermut Inatsisartut inatsisaat atuuppoq.
Imm. 2. Inatsisartut inatsisaata kapitali 9-a malillugu malittarisassat atuutsilersinneqartut, takornariartitsinermik ingerlataanatik inuussutissarsiutigalugu ingerlatanut allanut aamma atuussinnaapput.
Imm. 3. Inatsisartut inatsisaata kapitali 9-a malillugu malittarisassat atuutsilersinneqartut, inunnut maani aalajangersimasumik najugaqaratik nunami angalasunut imaluunniit akunnittunut aamma atuussinnaapput.
Imm. 4. Sumiiffinni nunami aalajangersimasuni takornariartitsinermut akuersissuteqartarnissaq pillugu Inatsisartut inatsisaat malillugu akuersissutini ingerlatanut Inatsisartut inatsisaat atuutinngilaq.
Imm. 5. Inunnut imaluunniit inatsisitigut pisinnaatitaasunut pisussaatitaasunullu, Kalaallit Nunaannut imaluunniit Kalaallit Nunaannit imaluunnit Kalaallit Nunaata iluani inunnik angallassinermik taamaallaat suliaqartunut, tassunga atatillugu takornariartitsinermik ingerlatsisoqartinnagu, Inatsisartut inatsisaat atuutinngilaq, taamaattoq tak. § 15.
Imm. 6. Inuussutissarsiutit inatsisartut inatsisaannit matuminnga ilaatinneqartussaanngitsut pillugit Naalakkersuisut aalajangersakkanik ersarinnerusunik aalajangersaasinnaapput.”
3. § 2, imm. 1, ima oqaasertalerneqassaaq:
” Inatsisartut inatsisaanni matumani takornariartitsinermik ingerlataqarneq ima paasineqassaaq, pingaarnertut takornarianut aningaasaqarnikkut ingerlatat aamma ingerlatsinerit, Kalaallit Nunaanni misigisaqartitsinissamik iluseqartumik sullissinermik neqerooruteqarnissamik siunertaqartut.”
4. § 3, imm. 2, ima oqaasertalerneqassaaq:
” Imm. 2. Inunnut imaluunniit inatsisitigut pisinnaatitaasunut pisussaatitaasunullu, §§ 7-mit 10 ilanngullugu malillugit piumasaqaatinik naammassinnittunut imaluunniit kapitali 6-imi malittarisassat malillugit immikkut akuersissummik tunineqarsimasunut, Naalakkersuisut akuersissutinik tunniussissapput. Takornariartitsinermik ingerlataqarnissamut akuersissut, tamanna immikkut ittumik pissutsit pissutissaqartippassuk, piffissamut aalajangersimasumut killilerlugu tunniunneqarsinnaavoq.”
5. § 3, imm. 4, atorunnaarsinneqassaaq.
Taassumap kingorna imm. 5 aamma 6, imm. 4 aamma 5-inngussapput.
6. § 4-mi imm. 3-p kingorna immikkoortut nutaat 4-6 ilanngunneqassapput:
” Imm. 4. Piumasaqaatit allanngortinneqarnissaannik akuersissutaatillit qinnuteqarsinnaapput, tamanna piffissami akuersissuteqarfiusumi pissutsit allanngortut pissutissaqartippassuk.
Imm. 5. Pissutsini imaluunniit atugassarititaasuni akuersissummik tunniussinermut tunngavissiisuni allannguutit suulluunniit, pissutissaqanngitsumik kinguarsarani Naalakkersuisunut ilisimatitsissutiginissaannut akuersissutaatillit pisussaaffeqarput.
Imm. 6. Imm. 5-imi paasisitsisussaatitaaneq naammassineqanngippat, inatsiartut inatsisaanni matumani malittarisassat naapertorlugit akuersissut utertinneqarsinnaavoq imaluunniit allanngortinneqarsinnaavoq.”
7. § 4-p kingorna ilanngunneqassaaq:
” § 4 a. Uumasut artit immikkut illersugaasut eqqarsaatigalugit uumasunik nujuartanik takusassassiortitsilluni takornariartitsisarnermut, taamatullu ingerlatsineq soorlu nannunik takusassarsiortitsilluni takornariartitsinermi immikkut pissusilersorluni ingerlanneqartussaatillugu takornariartitsisartunut Naalakkersuisut immikkut akuersissutinik tunniussissapput.
Imm. 2. Imm. 1 naapertorlugu akuersissutini, pineqaatissiinernik tunniunneqartuni piumasaqaatit pillugit Naalakkersuisut malittarisassanik ersarinnerusunik aalajangersaasinnaapput.”
8. § 7 ima oqaasertalerneqassaaq:
” § 7. Suliffeqarfik inummit ataatsimit ingerlanneqartoq takornariartitsinermik ingerlatap CVR normuanut akuersissummik taamaallaat tunniunneqarsinnaavoq, piginnittoq:
1) Kalaallit Nunaanni inuit allattorsimaffianni nalunaarsugaasimaguni,
2) Kalaallit Nunaannut tamakkiisumik akileraartussaatitaaguni, aamma
3) nammineq pisuussutiminik tamakkiisumik atuisinnaaguni aamma akiliisinnaajunnaarneq-, akiliisinnaannginneq- imaluunniit atorunnaarsitsineq pillugit suliaqarfigineqanngikkuni.
Imm. 2. Piginnittut pisortani sulinerminnut atatillugu, ilinniarnerminnut, ilisimatusarnerni, inuiaqatigiinnullu iluaqutaasussamik ingerlatanut peqataanerminnut imaluunniit sivisuumik napparsimanerminni katsorsartinnerminnut atatillugu Kalaallit Nunaata avataaniikkallartut, imm. 1, nr. 1 aamma 2-mi piumasaqaataasunut ilaatinneqanngissinnaapput.
Imm. 3. Imm. 2-mi pissutsit taaneqartut kingunerisaannik piginnittup aappaasa imaluunniit inooqataasa Kalaallit Nunaata avataaniikkallarnerani imm. 2 assinganik piginnittunut atuuppoq.
Imm. 4. Imm. 2-mi taasatut Kalaallit Nunaata avataaniikkallarnermut imaluunniit allamik ingerlatsinermut imaluunniit ingerlatamut uppernarsaat, Naalakkersuisunut takutinneqarsinnaassaaq.”
9. § 8 ima oqaasertalerneqassaaq:
” § 8. Suliffeqarfik inummit ataatsimit ingerlanneqarani, tak § 7, inatsisitigut pisinnaatitaasumut pisussaatitaasumullu takornariartitsinermik ingerlatap CVR normuanut akuersissut taamaallaat tunniunneqarsinnaavoq, suliffeqarfik:
1) aningaaasaatileqatigiiffiuppat Kalaallit Nunaanni angerlarsimaffeqartoq, aamma
2) akiliisinnaajunnaarnermik, akiliisinnaannginnermik imaluunniit atorunnaarsitsinissaq pillugit suliaqarfigineqanngitsumut,
Imm. 2. Takornariartitsinermik ingerlatamut akuersissut ingerlatsivinnut aningaasaliiffiusunut taamaallaat tunniunneqarsinnavoq,
1) ingerlatseqatigiiffiup aningaasaataasa minnerpaamik 2/3-ii inunnit § 7, nr. 1- 3-mi piumasaqaatinik naammassinnittunit toqqaannartumik toqqaannanngitsumilluunniit pigineqarpata, aamma
2) aningaasaatileqatigiiffimmi taasisinnaatitaanermut piginnaatitaaffiit minnerpaamik 2/3-ii toqqaannartumik toqqaannanngitsumilluunniit inunnit, § 7, nr. 1-3-mi piumasaqaatinik naammassinnittunit pigineqarpata. ”
10. § 11 ima oqaasertalerneqassaaq:
” § 11. Suliffeqarfinnut 1natsisartut inatsisaata atortuulersinneqarfiani pilersinneqareersimasunut, tak. § 18, imm. 2, immikkut ittumik pisoqartillugu § 7, nr. 1 aamma 2-mi, § 8, imm. 2-mi nr. 1-imi , aamma 2-mi, §§ 9-10-mi kiisalu piumasaqaataasunit aamma inatsisartut inatsisaani matumani § 5 malillugu aalajangersakkanit aalajangersarneqartunik Naalakkersuisut immikkut akuersissuteqarsinnaapput. Immikkut akuersissut ukiuni tallimani atuuppoq, qinnuteqarnikkulli qinnuteqarnerit tamaasa ukiut marluk tikillugit sivitsorneqarsinnaalluni. Immikkut akuersissummut, tassungalu sivitsuinermut Naalakkersuisut piumasaqaatinik aalajangersaasinnaapput.”
Imm. 2. Imm. 1 malillugu immikkut akuersissutinut piumasaqaatinut, suleriaasissanullu Naalakkersuisut malittarisassanik ersarinnerusunik aalajangersaasinnaapput.”
11. § 11-p kingorna kapitali 7 sioqqullugu ilanngunneqassaaq:
“Sumiiffinnut immikkut akuersinissamut immikkut periarfissat
§ 11 a. Sumiiffinni takornariartitsinermik ingerlatanik pilersitsiviusimanngitsuni imaluunniit ingerlatsisut imak ikitsigimmata takornariartitsinermik ingerlatat piumaneqarnerat matussuserneqarsinnaanani, takornarialerinermik ingerlatsinernut § 7, nr. 1 aamma 2-mi, § 8, imm. 2 nr. 1, 2,-mi piumasaqaataasunit Naalakkersuisut immikkut akuersissuteqarsinnaapput.
Imm. 2. Imm. 1 malillugu immikkut akuersissut ukiuni pingasuni atuuppoq. Qinnuteqarnikkut immikkut akuersissut ukiut marlukkaarlugit sivitsorneqarsinnaavoq.
§ 11 b. § 11 malillugu immikkut akuersissutit pillugit Naalakkersuisut malittarisassanik ersarinnerusunik aalajangersaasinnaapput.”
12. Kapitel 9 ima oqaasertalerneqassaaq:
”Kapitali 9
Inuussutissarsiutigalugu ingerlatanut aamma inunnut nunami angalasunut imaluunniit akunnittunut zonenut immikkoortiterineq
§ 15. Inuussutissarsiutigalugu ingerlataqarneq, takornariartitsinermik ingerlataqarneq kiisalu inuit angalanerat aamma akunninnerat, tak. § 1, imm. 1-3, taamaallaat sumiiffinni erseqqinnerusumik taasani, piffissami erseqqinnersumik aalajangersarneqartuni imaluunniit piumasaqaatinik immikkut ittunik eqqortitsinikkut taamaallaat pisinnaaneri pillugit, sumiiffinnillu taakkuninnga toqqaanermut atatillugu suleriaatsit suut atuunnersut pillugit Naalakkersuisut malittarisassanik ersarinnerusunik aalajangersaasinnaapput. Malittarisassat taamak ittut, tamanut saqqummiussinerup siusinnerpaamik qaammatit 18-it kingorna atuutsilersinnaapput.
Imm. 2. Naalakkersuisut malittarisassanik ersarinnerusunik aalajangersaasinnaapput inuit Kalaallit Nunaanni aalajangersimasumik najugaqanngitsut angallavinni, sumiiffinniluersarinnerusumik toqqaakkani:
1) asimi pisuttuarnissat, angalanissat imaluunniit akunninnissat angalanissaq imaluunniit akunninnissaq sioqqullugu nalunaarutigissagaat,
2) asimi pisuttuarnissamut uppernarsaammik imaluunniit isernissamut uppernarsaammik kommunalbestyrelsimit tunniunneqartussamik pissarsissasut,
3) angallavinni aamma sumiiffinni toqqakkani asimi pisuttuarnernut, angalanernut imaluunniit akunninnernut asimi pisuttuarnissamut uppernarsaammik imaluunniit akunninnissamut uppernarsaammik aamma matussusiisumik angalanermut sillimmasiissummik imaluunniit annaanneqarnissamut sillimmasiissummik atuuttumik nassataqassasut, piumasarineqartillugulu oqartussanut taakkua takutissallugit.”
13. § 16, nr. 1, ima oqaasertalerneqassaaq:
” § 16. Inummut tulliuttunik iliuuseqartumut Kalaallit Nunaanni Pinerluttulerinermi inatsimmi malittarisassat malillugit akiliisitsissummik akiliisitaasussanngortitsisoqarsinnaavoq:
1) §§ 3, imm. 1 aamma 4 a malillugit takornariartitsinermik ingerlataqarnissamut akuersissummik atuuttumik peqarani takornariartitsinermik ingerlataqartumut,”
§ 2
Inatsisartut inatsisaat ulloq 1. juli 2026-mi atuutilissaaq.
Imm. 2. Manna tikillugu § 11 atuuttoq malillugu piffissaligaasumik akuersissutit 1. juli 2026 sioqqullugu tunniunneqartut, ullormiillu tunniunneqarfiinit annerpaamik ukiuni marlunni atuuttut, aalajangiinerni ataasiakkaani allatigut piumasaqaatitaqanngippat, immikkut akuersissutip piffissaq aallaqqaataanit tunniunneqarfianit ukiuni tallimani atuuttussanngorlugit annertunerusumik iliuuseqarfigineqanngitsumik sivitsorneqassapput.
Imm. 3. Suliffeqarfimmi pissutsit annertuumik allanngorpata imaluunniit immikkut akuersissummi piumasaqaatinik suliffeqarfik annertuumik unioqqutitsisimappat Naalakkersuisut aalajangersinnaapput, imm. 2 malillugu aallaqqaataanit piffissap saniatigut immikkut akuersissut sivitsorneqassanngitsoq.
Namminersorlutik Oqartussat, ulloq 20. Novemberi 2026
Jens-Frederik Nielsen (atsior.)
Naalakkersuisut Siulittaasuat
-
PDF (0.43MB)
-
PDF (0.18MB)