Atuarfik pillugu Inatsisartut Inatsisaata allanngortinneqarnera pillugu Inatsisartut Inatsisaat (Nukarlerni atuartitsissutit ikinnerusut, atuartitsissutit qanitariinnut aamma ilitsoqqussaralugu oqaatsinik ilinniartitsinermik allannguineq kiisalu inuussutissarsiornermi klassit pillugit aaqqissuussinerit)
§ 1
Namminersorlutik Oqartussat nalunaarutaat nr. 19, 27. april 2023-meersoq naapertorlugu atuarfik pillugu Inatsisartut inatsisaanni makku allanngortinneqarput:
1. § 8, imm. 1, ima oqaasertalerneqassaaq:
” Ukioq atuarfiusoq 1. august aallartittassaaq, nukarlerni ullut atuarfiusussat 180-iniit 200-nut amerlassuseqassallutik kiisalu akullerni angajullernilu ullut atuarfiusussat 200-niit 240-nut amerlassuseqassallutik. Ullut atuarfiusussat sapaatip-akunnerata ulluini siullerni tallimani imaluunniit ulluini siullerni arfinilinni pisassapput. ”
2. § 10, imm. 1 imatut oqaasertalerneqassaaq:
” Atuartitsissutinut ataasiakkaanut immikkoortiterilluni aamma immikkoortiterinani - atuartitsineq pissaaq, tak. §§ 11 - 13 atuartitsissutit qanitariissut makku iluanni:
1) oqaatsinut ilaapput ”kalaallit oqaasii”, ”qallunaat oqaasii”, ”tuluit oqaasii” kiisalu ”allamiut oqaasii oqaatsit pingajuattut”,
2) kulturimut inuiaqatigiinnullu ilaapput ”inuiaqatigiilerineq”, ”oqaluttuarisaaneq” aamma ”upperisalerineq isumalioqqissaarnerlu”,
3) matematikkimut pinngortitamullu ilaapput atuartitsissutit ”matematikki” aamma ”pinngortitalerineq”,
4) inuunerinnermi ilaapput atuartitsissutit ”inuunerinneq” aamma ”timersorneq silamilu sammisaqartarneq”, aamma
5) mernguernartulerinermut ilaapput atuartitsissutit ”angerlarsimaffimmi suliassanik ilinniarneq”, ”nipilersorneq” tassani ilaallutik erinarsorneq, aalaneq aamma isiginnaartitsineq, ”eqqumiitsuliorneq” tassanilu ilaallutik illuliortaaseq aamma ”assassorluni suliassat ilusilersuinerlu”, tassani ilaallutik sananeq aamma assassorneq, taamaattorli tak. imm. 2.”
3. § 10-mi imm. 1-ip kingorna nutaatut immikkoortoq ilanngunneqassaaq:
” Imm. 2. Nukarlerni mernguernartulerinerup iluaniipput atuartitsissut ”pilersitsinermik atuartitsissut”, tassani atuartitsissutit ataatsimoortillugit “nipilersorneq” tassani ilaallutik erinarsorneq, aalaneq aamma isiginnaartitsineq, ”eqqumiitsuliorneq” tassanilu ilaallutik illuliortaaseq aamma ”assassorluni suliassat ilusilersuinerlu”, tassani ilaallutik sananeq aamma assassorneq atuartitsissummi ataatsimi katersorneqartut.”
Imm. 2-8 taamaalillutik imm. 3-9-nngussapput.
4. § 11, imm. 2 imatut oqaasertalerneqassaaq:
” Imm. 2. Nukarlerni atuartitsissutit qanitariissut ukuupput:
1) oqaatsit,”kalaallit oqaasii”, ”qallunaat oqaasii” aamma ”tuluit oqaasii”,
2) matematikki atuartitsissut ”matematikki”,
3) inuunerinnermi ilaallutik atuartitsissutit ”inuunerinneq” aamma ”timersorneq silamilu sammisaqartarneq”, aamma
4) mernguernartulerinerup iluaniipput atuartitsissut ”pilersitsinermik atuartitsissut”.”
5. § 11-mi imm. 2-p kingorna immikkoortoq nutaaq una ilanngunneqarpoq:
” Imm 3. Atuartitsissutit ”qallunaat oqaasii” aamma ”tuluit oqaasii” oqaatsinut aallarniutitut neqeroorutigineqarput.”
Imm. 3 taamaalilluni imm. 4-nngorpoq.
6. § 12, imm. 1, oqaasertalerneqassaaq imatut:
”Akullerni atuartitsissutit qanitariissut ukuupput:
1) oqaatsit ilaallutik atuartitsissutit ”kalaallit oqaasii”, ”qallunaat oqaasii” aamma ”tuluit oqaasii”,
2) kulturimut inuiaqatigiinnullu, ilaapput inuiaqatigiilerineq”, ”oqaluttuarisaaneq” aamma ”upperisalerineq isumalioqqissaarnerlu”,
3) matematikkimut pinngortitamullu ilaapput atuartitsissutit ”matematikki” aamma ”pinngortitalerineq”,
4) inuunerinnermi ilaapput atuartitsissutit ” inuunerinneq” aamma ”timersorneq silamilu sammisaqarneq”, aamma
5) mernguernartulerinerup iluaniipput atuartitsissutit ”angerlarsimaffimmi suliassanik ilinniarneq”, ”nipilersorneq” tassani ilaallutik erinarsorneq, aalaneq aamma isiginnaartitsineq, ”eqqumiitsuliorneq” tassanilu ilaallutik illuliortaaseq aamma ”assassorluni suliassat ilusilersuinerlu”, tassani ilaallutik sananeq aamma assassorneq.”
7. § 13, imm. 1 imatut oqaasertalerneqassaaq:
”Angajullerni atuartitsissutit qanitariissut ukuupput:
1) oqaatsit ilaapput atuartitsissutit ”kalaallit oqaasii”, ”qallunaat oqaasii” aamma, ”tuluit oqaasii” kiisalu toqqarneqarsinnaasutut ”allamiut oqaasii oqaatsit pingajuattut”,
2) kulturi inuiaqatigiillu ilaapput atuartitsissutit ”inuiaqatigiilerineq”, ”oqaluttuarisaaneq” aamma ”upperisalerineq isumalioqqissaarnerlu”,
3) matematikki pinngortitarlu, ilaapput atuartitsissutit ”matematikki” aamma ”pinngortitalerineq”,
4) inuunerinnermi ilaapput atuartitsissutit ”inuunerinneq” aamma ”timersorneq silamilu sammisaqarneq”, aamma
5) mernguernartulerinermi ilaapput atuartitsissut ”angerlarsimaffimmi suliassanik ilinniarneq”. ”
8. § 13-ip kingornagut ilanngunneqarpoq:
”Inuussutissarsiornermi klassit
§ 13 a. Kommunalbestyrelsi Naalakkersuisunut qinnuteqareernermi akuerineqareernermilu kingorna 9. aamma 10. klassinut taarsiullugu inuussutissarsiorneq pillugu 9. aamma 10. klassimik ingerlatitsisinnaavoq. Inuussutissarsiornermi klassi taamaattoq atuartunut 10. klassip kingorna inuussutissarsiornermi ilinniarniarlutik siunertalinnut faginilu piumasaqaatinut angusinngitsunut imaluunniit inuussutissarsiornermut ilinniarnermut isernissamut nalornissuteqartunut siunnerfeqassaaq, takuuk Inuussutissarsiutinik ilinniartitsinerit aamma inuussutissarsiutinik ilinniartitsinerup iluani pikkorissaanerit pillugit Inatsisartut inatsisaat.
Imm. 2. Inuussutissarsiornermi klassit imatut aaqqissuunneqassapput, ukioq kaajallallugu ingerlasussatut aammalu atuartitsinermi piffissaritinneqartoq § 7 imm. 2-mi, oqaaseqatigiit pingajuani malittarisassat malissallugit, taamaattorli tak. §13 b, imm. 1.
Imm. 3. Atuartoq inuussutissarsiornermi klassimi ingerlaqqikkusunngikkuni malittarisassat nalinginnaasut malillugit klassemi atuartitsinertalimmik atuartoq neqeroorfigineqassaaq.
§ 13 b. Inuussutissarsiornermi klassinik aaqqissuussinermi atuartitsinermut ilaapput atuartitsissutit ”kalaallit oqaasii”, ”qallunaat oqaasii”, ”tuluit oqaasii” aamma ”matimatikki” meeqqat atuarfiannik inaarutaasumik naliliinerup naammassineqarnissaanik periarfissaqartoq. Kommunalbestyrelsip aalajangersinnaavaa, faginik allanik attuumassuteqartunik atuartitsisoqassasoq.
Imm. 2. Inuussutissarsiornermi klassinik aaqqissuussinermi 9. aamma 10. klassi pinngitsoorani ingerlanneqartussaq, inuussutissiornermut sammisumik atuartitsissutinik ingerlatanillu ataqatigiissinneqassaaq inuussutissarsiutinut assigiinngitsunut aallarniuteqartitsisunik aamma ikaarsaartitsinikkut suliffimmillu sungiusarnikkut misileraanissamut periarfissaqartitsisoq.
Imm. 3. 10. klassi naammassineqarnerani § 22, imm. 4 aamma 5 naapertorlugit, nalilersuineq ingerlanneqartarpoq aamma soraarummeernermut allagartaq suliarineqartarluni.Atuartup ilinniartitsisutullu sulisup akornanni, atuartup suliffimmi sungiusarluni misiliinermi atuartitsinermilu ilikkakkat misilittakkallu pillugit inaarutaasumik oqaloqatigiissutigineqartassaaq.
§ 13 c. Inuussutissarsiornermi klassinik ingerlataqarnissamik neqerooruteqarnissaq pillugu kommunalbestyrelsip aalajangiinerani minnerpaamik qitiusumik atuarfimmik ataatsimik imaluunniit inuussutissarsiorneq pillugu ilinniartitaanermik neqerooruteqartumik ilinniarfeqarfimmik allamik kommunalbestyrelsip isumaqatigiissuteqarnissaa tunngavigineqassaaq.
Imm. 2. Qitiusumik ilinniarfimmik isumaqatigiissuteqarnikkut atuartut tiguneqarsinnaasut amerlassusissai kiisalu inuussutissarsiornermi klassemut tiguneqarnissamut piumasaqaatit suut tunngavigineqassanersut pillugit kommunalbestyrelsi aalajangersaassaaq.
Imm. 3. Suliffeqarfinni suliffimmi sungiusarnermik aamma ilinniarfeqarfinni sulinermik atuartitsinerit ingerlanneqarnerinik kommunalbestyrelsi nakkutiginnissaaq.
§ 13 d. Inuussutissarsiornermi klassit pillugit malittarisassanik erseqqinnerusunik Naalakkersuisut aalajangersaasinnaapput, tassunga ilanngullugit nalunaarneq, peqataaneq peqataajunnaarnerlu, atuartitsinerup aaqqissuunnera, atuartitsinerup imaa, suliffimmi sungiusarnerup aamma sulinermik atuartitsinerup ingerlanerata imarisaanut aaqqissuunnerinillu piumasaqaatit, suliffimmik sungiusarfimmut piumasaqaatit, sulinermik atuartitsinermik ingerlatsineq pillugu kommunalbestyrelsip ilinniarfeqarfiullu akornanni isumaqatigiissuteqarneq kiisalu inaarutaasumik nalilersuilluni oqaloqateqarneq.”
9. § 17 imatut oqaasertalerneqassaaq:
” § 17. Atuartut kalaallisut ilitsoqqussaralugu oqaaseqanngitsut ilitsoqqussaralugu oqaatsiminnik atuartitaanissaminnik neqeroorfigineqarsinnaapput.”
10. § 35, imm. 4-mi aamma § 43, imm. 2-mi, oqaaseqaat pingajuanni, ”§ 10, imm. 8” ima allanngussaaq: ”§ 10, imm. 9”.
11. § 53, imm. 2-mi ”§ 10, imm. 6” ima allanngussaaq: ”§ 10, imm. 7”.
12. § 53, imm. 3 aamma 4 allanngortinneqarput ”§ 10, imm. 6 aamma 7” ima allanngussaaq: ”§ 10, imm. 7 aamma 8”.
§ 2
Inatsisartut inatsisaat atortuulissaaq ulloq 1. august 2027, taamaattorli tak. imm. 2.
Imm. 2. Inatsisartut inatsisaanni § 1, nr. 1-7 aamma 9 ulloq 1. august 2028-mi aallarnerfigalugu atuutilissapput.
Kalaallit Nunaanni Namminersorlutik Oqartussat, ulloq 20. novemberi 2026
Jens-Frederik Nielsen (atsior.)
Naalakkersuisut Siulittaasuat
-
PDF (0.16MB)
-
PDF (0.15MB)