Erngup nukingata nukissiornermut atorneqartarnera pillugu Inatsisartut inatsisaannik allannguineq pillugu Inatsisartut inatsisaat (Akuersissuteqarnermut piumasaqaatinut aamma atuinissamut akuersissutit atuuffissaannut iluarsiissutit)
§ 1
Erngup nukingata nukissiornermut atorneqartarnera pillugu Inatsisartut inatsisaat nr. 5, 27. novembari 2018-imeersoq imatut allannguuteqartinneqassaaq:
1. § 5, imm. 3 imatut oqaasertalerneqassaaq:
” Imm. 3. Atuinissamut akuersissutit ukiut 60-it tikillugit atuuttussanngorlugit nalunaarutigineqartassapput, taamaattorli tak. § 14, imm. 2-4. Piffissaliussassaq inatsimmi matumani § 6 a naapertorlugu naatsorsorneqassaaq.”
2. § 6, imm. 3 imatut oqaasertalerneqassaaq:
” Imm. 3. Naalakkersuisut immikkut ittunik atugassaqartitsillutik imm. 1-imi piffissaliussat marluusut sivitsorsinnaavaat.”
3. § 6-ip kingorna una ikkunneqassaaq:
” § 6 a. Erngup nukinganik isumalluutinik atuinissamut akuersissutip sivisussusissaa, § 5, imm. 1 naapertorlugu Naalakkersuisunit nalunaarutigineqartoq, piffissamit erngup nukinganik innaallagissiorfiup sananeqarluni aallartiffianiit atuuttussanngortinneqassaaq.
Imm. 2. Erngup nukinganik innaallagissiorfiup sananeqarluni aallartinneqannginnerani nalunaarusiat uppernarsaatillu piumasarineqartut suliarineqassapput, aammalu Naalakkersuisunit akuerineqassallutik.
Imm. 3. Erngup nukinganik isumalluutinik atuinissamut akuersissut nalunaarutigineqarpat, kisiannili pisinnaatitaaffimmik pigisaqartup nalunaarusiat piumasarineqartut akuersissutip nalunaarutigineqarneraniit ukiut tallimat qaangiutsinnagit akueritissimanngippagit, Naalakkersuisut atuinissamut akuersissut utertissinnaavaat.”
4. § 11, imm. 1 imatut oqaasertalerneqassaaq:
”Naalakkersuisut akuersissuteqarnermi atugassarititaasunik, aammalu pisinnaatitaaffimmik pigisaqartup sulisartunik najukkaneersunik atuinissaanut aalajangersakkanik aalajangersaasinnaapput.”
5. § 19, imm. 3 imatut oqaasertalerneqassaaq:
” Imm. 3. Imm. 2 naapertorlugu tunisassiornissamut sanaartornissamullu pilersaarutit akuerineqarnerinik nalunaaruteqartoqannginnerani, isumannaassuseq, peqqissuseq, avatangiisinik illersuineq inuiaqatigiinnilu piujuartitsineq eqqarsaatigalugit sanaartornerup nukissiornerullu isumannaatsumik ingerlanneqarsinnaanerinut, aammalu tunisassiornerup imermik milluaavimmik pitsaanerpaamik atuilluni ingerlanneqarsinnaaneranut uppernarsaatinik tunniussinissaanik Naalakkersuisut pisinnaatitaaffimmik pigisaqartoq piumasaqarfigisinnaavaat, tak. § 1, imm. 2.”
6. § 19, imm. 4-tut una ikkunneqassaaq:
” Imm. 4. Naalakkersuisut imm. 3 naapertorlugu uppernarsaatinut akuersissummik nassiussinissaat sioqqullugu atuinissamut akuersissuteqartoqarnissaanik qinnuteqaat nassiunneqarsinnaavoq. Naalakkersuisut atuinissamut akuersissut, akuersissummik pigisaqartup piareersaataasunik suliaqarnissaanut akuersissuteqarfiusoq nalunaarutigisinnaavaat, kisiannili uppernarsaatit, imm. 3-mi taaneqartut akuerineqaqqaartinnagit, erngup nukinganik innaallagissiorfiup sananeqarnera aallartinneqarsinnaanngilaq, tak. § 6 a, imm. 2.”
§ 2
Inatsisartut inatsisaat atuutilersinneqarpoq 1. januaari 2027-mi.
Namminersorlutik Oqartussat, ulloq 20. novemberi 2025
Jens-Frederik Nielsen (atsior.)
Naalakkersuisut Siulittaasuat
Allanngortippaa
-
PDF (0.42MB)
-
PDF (0.14MB)