(najukkani pissutsit eqqarsaatigalugit, neqerooruteqartunik ilaajunnaarsitsineq kiisalu teknikikkut siunnersuinerit aamma illuliornermi sanaartornermilu atugassanik atortussanik il.il. pilersuinerit ilanngunneri)

 

§ 1

 

Sanaartornermi neqerooruteqartitsisarneq pillugu Inatsisartut inatsisaanni nr. 11-mi, 2. december 2009-meersumi, tak. Namminersorlutik Oqartussanut nalunaarutaat nr. 9, 20. august 2021-meersoq, imatut allannguisoqassaaq:

 

1. § 1, imm. 1, imatut oqaasertalerneqassaaq:

”Inatsit ukunani neqeroorutinik piniarnermut suliakkiissummillu tunniussinermut atuuppoq:

1) illuliornissamik sanaartornissamillu pilersaarusiornernut imaluunniit suliarinerinut,

2)  illuliornermut sanaartornermullu teknikikkut ikiuunnernut, aamma

3)  illuliornernermi sanaartornermilu atugassanik atortussanik il.il. pilersuinermut.”

 

2. § 2 imatut oqaasertalerneqassaaq:

”  § 2.  Illuliornermi sanaartornermilu atatillugu paasineqassaaq sulinerit sanaartorfiusumi, illuliorfiusumi, sanaartukkami, atortumi, nunaminertami imaluunniit imaani aalajangersimasumik tigussaasumik inernerup pissarsiarinissaanik siunertaqartut. Suliaqarnermi ilaatinneqarput atortunik sanaartukkanillu sanaartorneq allannguinerluunniit, isaterineq ikkussueqqinnerlu kiisalu iluarsaassineq aserfallatsaaliinerlu.”

 

3. § 2-p kingorna ilanngunneqarpoq:

”  § 2 a.  Soqutigisallit akerleriinneritut paasineqassaaq pissutsini inuk, neqeroortitsisoq sinnerlugu iliuuseqartoq, aamma neqeroortitsinerup ingerlannerata naammassiniarnerani peqataasoq, imaluunniit ingerlatsinerup inaarneqarnissaanut sunniuteqarsinnaasoq, toqqaannartumik toqqaannanngitsumilluunniit aningaasaqarnikkut, aningaasarsiornikkut allatigulluunniit annertuutigut soqutigisaqartoq, neqeroortitsinerup ingerlanneranut atatillugu pineqartup kinaassusiunnginneranut attaviitsuuneranillu navianartortitsisinnaasoq, imaluunniit inuup attuumassuteqarpallaarneranik kinguneqarsinnaasoq.”

 

4. § 3, imm. 1, oqaaseqatigiit siulliit ima oqaasertaqassapput:

”Inatsimmi matumani suliariumannittussarsiuussinertut paasineqassaaq suliassaq imatut neqeroorutigineqassasoq, piffissap aalajangersimasup ataatsip iluani aamma neqerooruteqartitsinermi tunngavissat assigiit imaluunniit piumasaqaatit minnerpaaffissaat tamanut atuuttut tunngavigalugit arlallit atuuttussamik neqerooruteqassasut, imaluunniit suliassaq pillugu suleqatigiinnissamik pisussaaffiliisumik isumaqatigiissuteqarluni neqerooruteqassasut.”

 

5. § 3, imm. 2, imatut oqaasertalerneqassaaq:

” Imm. 2.  Tamanut ammasumik suliariumannittussarsiuussinermi suliassaq pisortat neqeroortitsinermut nittartagaanni allagarsiissutigineqassaaq, taamaalillutik neqerooruteqarnissamut soqutiginnittut suliariumannittussarsiuussinerup ilisimaarilernissaanut periarfissaqalissallutik.”

 

6. § 5 imatut oqaasertalerneqassaaq:

”  § 5.  Sinaakkutissatut isumaqatigiissutitut paasineqassaaq piffissaliussap aalajangersimasup iluani sanaartugassat assigiit sananeqarsinnaanerinut piumasaqaatit pillugit isumaqatigiissutit, assersuutigalugu akit, pitsaassutsit amerlassutsillu, imaluunniit annertussutsit eqqarsaatigalugit.”

 

7. § 5-ip kingornagut ilanngunneqarpoq:

”  5 a.  Suliassatut paasineqassaaq illuliornermi sanaartornermilu suliassaq, illuliornermi sanaartornermilu teknikikkut siunnersuinerit aamma illuliornermi sanaartornermilu atugassanik atortussanik pilersuinerit.”

 

8. § 6-ip kingorna qulequtaq nutaaq ilanngunneqarpoq:

 

”Soqutigisat akerleriinneri”

 

Qulequttap nutaap kingorna ilanngunneqarpoq:

”  § 6 a.  Neqerooruteqartitsisoq suliariumannittussarsiuussinerup naammassineqarneranut atatillugu soqutigisat akerleriissutaasut suunerinik, pitsaaliornissaannik ikiuuffiginissaannullu tulluartumik piareersaateqarsimassaaq.”

 

9. § 7, imm. 1, imatut oqaasertalerneqassaaq:

”Inatsimmut matumunnga ilaasumik sanaartugassanik suliaqarnissamut neqeroorutit tamanut ammasumik imaluunniit killilimmik suliariumannittussarsiuussinikkut imaluunniit suliaqartinniakkat ilisimatereerlugit neqorooruteqartitsinikkut pissarsiarineqassapput.”

 

10. § 7, imm. 3, imatut oqaasertalerneqassaaq:

” Imm. 3.  Neqerooruteqartitsisoq neqerooruteqartitsinissamik piareersaanermi ingerlatsinermilu aamma suliakkiissutissamik tunniussinermi pisussaavoq kinaassusersiunngitsumik, piviusorsiortumik immikkoortitsiviunngitsumillu tunngaveqarluni neqerooruteqartussanik toqqaassalluni aamma neqerooruteqartut akornanni assigiinngissitsisoqannginnissaa isumagissallugu, tassami neqeroortitsisoq kinaassusersiunngitsumik tunngavissarititaasut mianeralugit inuiaqatigiinni akisussaasunngorsinnaammat, ilanngullugu najukkani pissutsit najukkanilu tunngaveqarnissaq eqqarsaatigalugit.”

 

11. § 7, imm. 4, imatut oqaasertalerneqassaaq:

” Imm. 4.  Suliassanik neqerooruteqarnermi Naalakkersuisut akuerisimasaannik, taamaatunik peqarsimappat, ataatsimut piumasaqaatit pisortanit akuerineqarsimasut malillugit isumaqatigiissutip suliarineqarnissaa piumasaqaataavoq. Ataatsimut piumasaqaatit allannguisoqarsimappallu ukiup ingerlanerani suut akuerineqarsimanersut ukiut tamaasa januaarimi Naalakkersuisut tamanut saqqummiussissapput.”

 

12. § 7, imm. 5, imatut oqaasertalerneqarpoq:

”  Imm. 5.  Neqeroortitsisup tamanna kinaassusersiunngitsumik siunertamut iluaqutaassappat, imm. 4-mi piumasaqaatit ataatsimoorussat saneqqussinnaavai. Allannguutit neqeroortitsinermut najoqqutassani ersarissumik allassimassapput.”

 

13. § 8, imm. 1, oqaasertalerneqassaaq imatut:

”Suliassat suliarinerini akiligassiissutaasartut tamanut ammasumik neqerooruteqartitsisarnermut maleruagassanut ilaatinneqanngillat. Suliassanut suliarinerini akiligassiisarneq pissutsit immikkut ittut pissutaallutik pisariaqartitsiviusuni, imaluunniit suliassaq annerpaamik 500.000 koruuninik naleqartussaatillugu qaqutiguinnaq atorneqarsinnaavoq.”

 

14. § 12, imm. 1, oqaaseqatigiit siulliit ima oqaasertaqassapput:

” Killilimmik suliariumannittussarsiuussinermi neqerooruteqartitsisoq pisortat neqeroortitsinermut nittartagaatigut neqeroortitsinermik ussassaarutip tamanut ammasumik saqqummiunneratigut neqerooruteqarsinnaasunik aggersaanikkut piukkunnartussarsiorsinnaavoq.”

 

15. § 13 ima oqaasertalerneqassaaq:

” § 13.  Killilimmik suliariumannittussarsiuussinerit suliffeqarfiit aalajangersimasuinnaat pisariaqartinneqartunik taamaallaat piginnaasaqarpata imaluunniit suliassap suliarinissaanut pisariaqartinneqartumik immikkut ittumik ilisimasaqarpata piukkunnartussarsiuussinertaqanngitsumik ingerlanneqarsinnaapput.

  Imm. 2.  Killilimmik suliariumannittussarsiuussinerit nunap ilaani pissutsit kingunerisaannik najukkani suliffeqarfiit kisimik neqerooruteqarnissaat naatsorsuutigineqarpat, aamma § 25 a, imm. 4 malillugu killilimmik suliariumannittussarsiuussinermut aggersaasoqarsimappat aamma piukkunnartussarsiuussinertaqanngitsumik ingerlanneqarsinnaapput.”

 

16. § 13-ip kingorna qulequtaq nutaaq ilanngunneqarpoq:

 

”Peqataanissamut mattunneqarneq”

 

Qulequttap nutaap kingorna ilanngunneqarpoq:

”  § 13 a.  Neqerooruteqartoq imaluunniit taassuma siulersuisuini imaluunniit pisortaaneqarfiani ilaasortat neqeroortitsinerup tamanut nalunaarutigineqarneraniit ullormi kingusinnerpaamik ukiut tallimat iluanni, 2026-mi julip aallaqqaataa sioqqullugu ukiunut tallimanut sunniuteqartumut ukunani pineqaatissinneqarsimappat neqeroortitsinerup ingerlanneraniit neqerooruteqartup peqataanissaanut mattutissavaa:

1) Akiliilluni pinerluuteqarneq, peqquserlunneq imaluunniit niuernikkut isumaqatigiinnernik ingerlataqarneq.

2) Aaqqissuussaasumik pinerlunniaqatigiinnut peqataaneq.

3) Peqqarniisaarnernut imaluunniit peqqarniisaarnermut atatillugu pineqaatissiissutigineqarsinnaasumik iliuuseqarsimanerit.

4) Aningaasanik peqquserlunnikkut pissarsiarisimasanik malunnarunnaarsaaneq imaluunniit peqqarniissaarniartarnernut aningaassaliissuteqartarneq.

5) Meeqqanik sulisitsineq imaluunniit inunnik niueruteqarneq.

 

  § 13 b.  Neqeroortitsisup neqeroortitsinerup ingerlanneraniit neqerooruteqartup peqataanissamut mattussinnaavaa neqerooruteqartoq:

1) akiliisinnaajunnaarsinnaasutut suliarineqarpat, akiliisinnaassuseqanngitsutut imaluunniit atorunnaartussatut suliarineqarpat taamaaqataanilluunniit inissisimappat,

2)  neqeroortitsinerup tamanut nalunaarutigineqarneraniit ullormi kingusinnerpaamik ukiut tallimat iluanni, 2026-mi julip aallaqqaataa sioqqullugu ukiunut tallimanut sunniuteqartumut inuussutissarsiutimi ingerlannerani annertuunik sumiginnaasimappat, tassunga ilanngullugu neqeroortitsisumik imaluunniit pisortani oqartussanik allanik isumaqatigiissummini annertuumik sumiginnaasimappat,

3)  neqeroortitsinerup tamanut nalunaarutigineqarneraniit ullormi kingusinnerpaamik ukiut tallimat iluanni, 2026-mi julip aallaqqaataa sioqqullugu ukiunut tallimanut sunniuteqartumut neqerooruteqartumiit imaluunniit pisortani oqartussanit allaniit ingerlanneqartumut neqeroorummut  atatillugu paasissutissanik eqqunngitsunik piaaraluni tunniussisimappat, imaluunniit

4) Kalaallit Nunaanni nunamiluunniit suliffeqarfiup pilersinneqarfigisimasaani akileraarutinik akitsuutinillu akiitsunik akileqquneqartunik 100.000. kr.-t sinnerlugit nalilinnik akiliisimanngippat.

  Imm. 2.  Suliffeqarfiup imm. 1, nr. 4-mi pineqartup peqataatinneqannginnissaa aalajangiunneqarpat neqerooruteqartitsisup nalunaarutigisinnaavaa suliffeqarfik taamatut pineqartoq mattunneqassanngitsoq, imatut pisoqarpat:

1) neqeroortitsinermi peqataasut tamarmik imm. 1, nr. 4-mi nassuiarneqartutut pisortanut akiitsoqarpata,

2) suliffeqarfik 100.000 kr.-t sinnerlugit akiitsut ilaannut qularnaveeqqusiisimappat, imaluunniit

3) suliffeqarfik akiitsut akilerneqarnissaat pillugu isumaqatigiissuteqarpat isumaqatigiissummillu taassuminnga eqquutitsippat.”

 

17. § 15, imm. 1, nr. 2 ima oqaasertalerneqassaaq:

”2)  Suliassaq pineqartoq malillugu allanngorartut piumasaqaatit assigiinngitsut eqqarsaatigalugit aamma illuliorneq sanaartornermilu suliassat, taakkununnga teknikikkut ikiuunneq imaluunniit illuliornermut sanaartornermullu atortussanik il.il. pilersuineq pineqarnersoq malillugu aningaasaqarnikkut neqeroorut iluatinnarnerpaaq, assersuutigalugu akit, pitsaassuseq, piffissaq sanaartorfiusoq, piffissaq pilersaarusiorfiusoq, ingerlatsinermi aningaasartuutit, imminut akilersinnaanera, teknikikkut nalinga, avatangiisit sunnerneqarneri, illuliassap titartarneqarnera, atorneqarnissaa kiisalu inuiaqatigiinnut akisussaaneq, tassunga ilanngullugit najukkami pissutsit najukkamut tunngassuteqarnera, atuartunik, ilinniartunik suliffimmilu misiliisussanut inissat aamma inuit atugarliortut sulisinneqarneri eqqarsaatigalugit.”

 

18. § 20 imatut oqaasertalerneqassaaq:

”  § 20.  Neqerooruteqartitsisut § 1, imm. 2-mut ilaasut illuliornermi sanaartugassanilu suliaqartinniakkat ilisimatereerlugit neqorooruteqartitsisinnaangillat, matumani pineqanngippata:

1)  suliassaq katillugu nalinga annerpaamik 3.000.000 koruuninik naleqartoq pineqarpat, Illuliornermut sanaartornermullu siunnersuinerli eqqarsaatigalugu ataatsimut nalinga annerpaamik 10.000.000 koruuninik naleqassaaq,

2)  sanaartugassat aatsaat neqerooruteqartitsinermi tunngavigisat najoqqutaralugit ajornakusuungaatsiartumik aalajangiiffigineqarsinnaasunik annertussuseqartut, pitsaassuseqartut piffissalerneqarsinnaasullu, soorlu misileraanerit, ilisimatusarnerit ineriartortitsinerillu, imaluunniit nutarterinerit, iluarsaassinerit allanngortiterinerillu, imaluunniit suliassat isumannaallisaaneq eqqarsaatigalugu pinngitsoorani suliarineqartussaallutik kinguartinneqarsinnaanngitsut,

3)  suliariumannittussarsiuussinermi neqeroorutinik naleqquttunik imaluunniit peqqussutit malillugit suliarineqartunik tigusisoqarsimannginnera, imaluunniit aallaqqaammut neqerooruteqartitsinermi piumasaqaataasut annertuumik allanngortinneqanngippata qinnuteqaatinik tigusisoqarsinnaannginnera,

4)  nunap ilaani pissutsit imaluunniit pissutsit allat pissutigalugit suliassap suliarinissaanut suliffeqarfiit pingasut tikillugit taamaallaat suliaqarsinnaappata, aamma § 25 a, imm. 4 malillugu suliaqartinniakkat ilisimatereerlugit neqerooruteqartitsinissamut aggersaasoqarsimappat, imaluunniit

5) suliffeqarfiup aalajangersimasup toqqarneqarnissaa tunngavissat immikkut ittut allat aalajangiisuulluinnartippassuk, imaluunniit inuiaqatigiinni eqqarsaatigisassat, suliaqartinniakkap ilisimatereerlugit neqerooruteqartitsinikkutnajukkami suliffeqarfimmut neqeroorutiginissaa aalajangiisuulluinnartippassuk.”

 

19. § 24, imm. 3, oqaasertalerneqassaaq imatut:

” Imm. 3.  Neqerooruteqartitsisup qinnuigineqarnermini neqeroorutip itigartinneqarneranut tunngaviusoq pillugu neqerooruteqartunut pineqartunut § 13 a, § 13 b, § 15, imm. 3 aamma § 22 naapertorlugit nalunaarutigissavaa, taamatut tunngavilersuut § 25, imm. 2 naapertorlugu nalunaarutigineqareersimanngippat.”

 

20. § 25 a, imm. 1, oqaaseqatigiit aappaat  ima oqaasertaqassapput:

”Siumoortumik nalunaaruteqarneq pisortat neqeroortitsinernut nittartagaatigut tamanut saqqummiunneqassaaq.”

 

21. § 25 a, imm. 4, oqaaseqatigiit aappaat ima oqaasertaqassapput:

”Suliassamut neqeroorutit pissarsiarinissaannut neqeroortitsisup aallartinnissaa sioqqullugu kingusinnerpaamik sapaatit akunneri sisamat sioqqullugit siumoortumik nalunaarut tamanut saqqummiunneqassaaq aamma sulinerit imaluunniit suliassat suut ilaanersut, sumiiffik aamma naammassineqarnissaanut piffissaq kiisalu soqutiginnittut saaffiginninnissaanut piffissaliussaq pillugu paasissutissanik imaqassalluni.”

 

22. § 35, imm. 1, imatut oqaasertalerneqassaaq:

”Illuliornerit sanaartukkallu suliarineqarnerinut atatillugu aamma taakkununnga teknikikkut ikiuunnermi ilinniartut, suliffimmi sungiusartut assigisaalluunniit qanoq amerlatigisut atorfinitsinneqartarnissaat pillugu Naalakkersuisut maleruagassiorsinnaapput. Ilinniartut, ilinniartut sungiusartut assigisaallu pillugit malittarisassat eqqortinneqanngippata ullormut akiliititsinissanik imaluunniit ataasiartumik akiliisitsinissamik Naalakkersuisut aalajangersaasinnaapput.”

 

§ 2

 

Pisortat oqartussaaffigisaanni suliffeqarfiinilu nioqqutissanik kiffartuussinernillu pisiniarnermut tunngatillugu neqerooruteqartitsisarneq pillugu Inatsisartut inatsisaanni nr. 6, 12. juni 2019-imeersumi makkua allanngortinneqarput:

 

1. § 2, imm. 1, imatut oqaasertalerneqarpoq:

”Inatsisartut inatsisaat manna pisortat oqartussaaffigisaannik suliffeqarfiinilu nioqqutissanik kiffartuussinernillu pisiniarnerannut kr. 500.000-nik annertunernilluunniit nalilinnut, § 3 malillugu ilaatitsiviunngitsut ilanngullugit, inatsit atorneqassaaq, taamaattoq takuuk imm. 2.”

 

2. § 2, imm. 3, atorunnaarsinneqarpoq.

 

Imm. 4 aamma 5 tamatuma kingorna imm. 3-nngorlutillu 4-nngorput.

 

3. § 3, nr. 1 ima oqaasertalerneqassaaq:

”1)  Illuliornermi sanaartornermilu suliat, illuliornermi sanaartornermilu sulianut teknikikkut ikiuunneq aamma illuliornermi sanaartornermilu sulianut atortunik il.il. pilersuineq.”

 

§ 3

 

Inatsisartut inatsisaat ulloq 2026-imi juulip aallaqqaataani atuutilissaaq.

 

 

 

Namminersorlutik Oqartussat, ulloq 25. juuni 2026

 

 

 

Jens-Frederik Nielsen (atsior.)

Naalakkersuisut Siulittaasuat