§ 1

Inatsisartut inatsisaanni nr. 15, 6. juni 2016-imeersumi imatut allannguisoqarpoq:

1. § 1 imatut oqaasertalerneqassaaq:

”  § 1.  Inatsisartut inatsisaata timersorneq siuarsassavaa, tassunga unammilluni timersorneq timigissarnerlu ilaapput, tamatumuunakkut inuit ataasiakkaat peqqissusaat, atugarissaarnerat, aamma timikkut, tarnikkut, inooqatigiinnikkullu ineriartornerat kiisalu unammillersinnaassuseqarnerat nukittorsarniarneqarpoq.

  Imm. 2.  Unammilluni timersorneq tassaavoq timersornermi unamminertalimmi, malittarisassat aalajangersimasut malillugit ingerlanneqartartoq. Unammilluni timersorneq timersornikkut, eqqarsartaatsikkut elektroniskimillu periarfissat atorlugit ingerlanneqarsinnaavoq.”

2. § 2 atorunnaarsinneqarpoq.

3. § 11-ip kingorna ilanngunneqassaaq:

”  § 11 a.  Immikkut kattuffinnut timersoqatigiiffinnullu Kalaallit Nunaanni Timersoqatigiit Kattuffiannut ilaasortaanngitsunut aningaasanut inatsimmi aningaasaliinertigut Naalakkersuisut ukiumoortumik tapiissuteqartarput.

  Imm. 2.  Tapiissutit ilai siunertanut aalajangersimasunut immikkut atugassanngortinneqarsinnaapput. 

  Imm. 3.  Tapiissutit atugassarititanik aalajangersimasunik piumasaqaatitaqarsinnaapput.”

4. § 13 imatut oqaasertalerneqassaaq:

”  § 13.  §§ 11, 11 a aamma 12 naapertorlugu tapiissuteqarnissamut piumasaqaataavoq tapiissuteqarfigineqartussanit Nakorsaatit Pissassaatitut Atorneqartarnerinut Kalaallit Nunaanni Akiuisunit nakorsaatit pissassaatitut atorneqarnerinik pitsaaliornissaq akiuinissarlu pillugit aalajangerneqarsimasut malinneqarlutillu eqquutsinneqassasut, tak. § 21, imm. 2, nr.

5. Malittarisassanik taakkuninnga peqqarniitsumik arlaleriarluniluunniit unioqqutitsinerit

tapiiffigitinnissamut pisinnaatitaajunnaarnermik kiisalu tapiissutit tunniunneqareersut utertillugit akiliisoqarnissamik piumasaqaateqarnermik kinguneqassaaq.

  Imm. 2.  §§ 11, 11 a aamma 12 naapertorlugu tapiissuteqarnissamut piumasaqaataasinnaavoq tapiissuteqarfigineqartussanit Naalakkersuisunit timersorluni unamminermik allanngortiteriniarnernik pitsaaliornissaq akiuinissarlu pillugit aalajangerneqarsimasut malinneqarlutillu eqquutsinneqassasut, tak. § 5, imm. 2. Malittarisassanik taakkuninnga peqqarniitsumik arlaleriarluniluunniit unioqqutitsinerit tapiiffigitinnissamut pisinnaatitaajunnaarnermik kiisalu tapiissutit tunniunneqarsimasut utertillugit akiliisoqarnissamik piumasaqaateqarnermik kinguneqassaaq.”

5.  § 19 imatut oqaasertalerneqassaaq:

”  § 19.  Kalaallit Nunaanni Timersoqatigiit Kattuffiat tassaavoq Kalaallit Nunaanni timersornikkut timigissarnikkullu aaqqissugaasumik ingerlataqarnermut nuna tamakkerlugu pisortatigoortumik sinniisoq. Kattuffik pisortatigoortumik Kalaallit Nunaannut, tassunga ilanngullugu nunanut tamalaanut atatillugu sinniisuuvoq, taamaattorli imm. 2 takuuk.

  Imm. 2.  Timersuutit immikkut kattuffinnut timersoqatigiiffinnullu Kalaallit Nunaanni Timersoqatigiit Kattuffiannut ilaasortaanngitsunut tunngatillugu, timersuummi pineqartumi kattuffiup pisortatigoortumik, tassunga ilanngullugu nunat tamalaat akornganni Kalaallit Nunaat sinniisuuffigissavaa.”

6.  § 20, imm. 1 aamma 2, imatut oqaasertalerneqassapput:

”  Suliffeqarfik imminut pigisoq Elite Sport Greenland tassaavoq timersortartunik pikkorivissunik siuarsaanermi inerisaanermilu Kalaallit Nunaanni nuna tamakkerlugu sulisoq. Pisortatigoortuni, soorlu nunat assigiinngitsut akornganni, kattuffik Kalaallit Nunaannut sinniisuuvoq. Timersornikkut timigissarnikkullu aaqqissugaasumik ingerlataqarneq pillugu Kalaallit Nunaanni Timersoqatigiit Kattuffiat peqatigalugu sinniisuuneq pisarpoq. Immikkut kattuffik aamma timersortartut peqatigiiffiat Kalaallit Nunaanni Timersoqatigiit Kattuffiannut ilaasortaanngikkaangat timersuummi pineqartumut immikkut kattuffik peqatigalugu sinniisuuneq pisarpoq.

  Imm. 2.  Elite Sport Greenland Kalaallit Nunaanni Timersoqatigiit Kattuffiat tassanilu immikkut kattuffiit, matumani Kalaallit Nunaanni Timersoqatigiit Kattuffiannut ilaasortaanngitsut, timersoqatigiiffiit immikkut kattuffeqanngitsut aamma timigissartarfiit suleqatigalugit siunertaminik tapersersuissaaq ilaatigut ukununnga tapersersuinermigut:

1)  timersornermik piginnaasallit timersortartullu pikkorivissut sungiusarnerinut aamma unamminerni peqataanerinut, nunani tamalaani pikkorivissut timersornerini peqataanissamut periarfissamik siuarsaasoq,

2)  nunat assigiinngitsut akornganni timersornermi kingusinnerusukkut peqataanissaq siunertaralugu piginnaasalinnik inerisaaneq,

3)  pikkorivissut pillugit sungiusaasut ilinniartitsinerillu,

4)  Kalaallit Nunaanni timersornermi nakorsaanikkut immikkut ilisimasalinnik ineriartortitsineq, aamma

5) pikkorivissut soqutigisaannik isumaginninneq nunallu assigiinngitsut akornganni peqataanissaq siunertaralugu kalaallit nunaanni immikkut kattuffinnik aaqqissugaasumik ineriartortitsineq.”

7. § 22, imm. 5, imatut oqaasertalerneqassaaq:

”  Imm. 5.  Naalakkersuisut ataatsimiititaliamit atorneqarsinnaasumik allatseqarnikkut ikiuissaaq”

8. § 23, imm. 1, imatut oqaasertalerneqassaaq:

”  Kalaallit Nunaanni Timersoqatigiit Kattuffiannut ilaasut immikkut kattuffiit, timersoqatigiiffiit, timersornermi klubbit aamma timigissartarfiit avatanni timersornermi timigissarnermilu nakorsaatinik pissassaatitut atuinerup pinngitsoortinnissaanik siunertaqarluni Nakorsaatit Pissassaatitut Atorneqartarnerinut Kalaallit Nunaanni Akiuisut nakorsaatit pissassaatitut atorneqarnerinik pitsaaliornissaq akiuinissarlu pillugit ukuninnga suleqateqarnissamik isumaqatigiissuteqassapput:

1)  Timigissartarfinnik ingerlataqarfinnillu allanik timersornikkut imaluunniit timigissarnikkut sammisaqartitsinermik neqerooruteqartut imaluunniit taakkununnga eqqaanartunik sammisaqartitsisut aamma Kalaallit Nunaanni Timersoqatigiit Kattuffiannut ilaanngitsut.

2)  Kalaallit Nunaanni Timersoqatigiit Kattuffiannut ilaasut immikkut kattuffiit, timersoqatigiiffiit, timersornermi klubbit aamma timigissartarfiit avataanni timersornermi timigissarnermilu ingerlataqartut immikkut kattuffii.”

9.  § 24, imm. 1, imatut oqaasertalerneqassaaq:

”  Timigissartarfiit allallu ingerlataqarfiit timersornermik imaluunniit timigissarluni sammisaqartitsinermik taakkununngaluunniit eqqaanartunik sammisaqartitsisut aamma Kalaallit Nunaanni Timersoqatigiit Kattuffiannut ilaanngitsut, Nakorsaatit Pissassaatitut Atorneqartarnerinut Kalaallit Nunaanni Akiuisunik suleqatigiinnissamik isumaqatigiissuteqarsimanerlutik atuisunut paasissutissiisassapput, tak. § 23. Taamatuttaarlu immikkut kattuffinnut timersoqatigiiffinnullu aamma timersoqatigiiffiit timigissartartullu kattuffiinut Kalaallit Nunaanni Timersoqatigiit Kattuffiannut ilaasortaanngitsunut imaluunniit Kalaallit Nunaanni Timersoqatigiit Kattuffianniittunut immikkut kattuffinnut, timersoqatigiiffinnut kiisalu timigissartarfinnut attuumassuteqanngitsunut aamma atuuppoq.”

§ 2

Inatsisartut inatsisaat ulloq 1. januar 2027 atuutilissaaq.

Kalaallit Nunaanni Namminersorlutik Oqartussat, ulloq 12. juuni 2026

Jens-Frederik Nielsen (atsior.)

Naalakkersuisut Siulittaasuat